Read Ntcham Jean 1 Bible Online

Jean 1 - Ntcham bible

Jean 1

¹Kí wàatī Unimbɔti ń náań duulinyee, ubɔ nìn bí bi yíì-u Dinyɔɔbundi ní ki bí Unimbɔti cee, ní ki sá Unimbɔti.

²Dinyɔɔbundi gbanti di nìn pée bí Unimbɔti cee doooo ŋkilkaamin[1].

³Díǹ ní Unimbɔti dū ki náań tikɔkɔ. Tiba kaa bí fám Unimbɔti kaa dū Dinyɔɔbundee ki náań kudɔŋu[2].

⁴Di-ni ní dimaŋfal nìn bí, dimaŋfal gbanti di nìn tìì binib ŋwalifi.

⁵Ní ŋwalifee dɔ́miń ki ŋmíntí binib bin bí dibɔmbɔndinee, ní binibee kaa fōō-ŋu.

⁶Unimbɔti nìn túnní uninja ubɔ, bi yíì-u Yoowaneesi.

⁷U nìn dɔ́miń kí sòoǹ nì binib ŋwalifi bɔti, án nín làá ŋá pu báà ŋma ń dī u-pu kí fōō kí kííyee.

⁸Yoowaneesi u-ba kaa nìn sá ŋwalifi, u nìn dɔ́miń kí lēē ŋwalifee pu seera ní.

⁹Dinyɔɔbundi di sá ŋwalifi mmɔnti, ki dɔ́miń kitiŋ pu ki ŋmíntí báà ŋma.

¹⁰Unimbɔti dū dinyɔɔbundee ki náań taapu doo wanti kɔkɔ, ama, ŋyunti ŋun dì nìn bí taapu dooyee, baa béè-dì.

¹¹Un sá Dinyɔɔbundee dɔ́miń u-yab cee, ní u-yab kaa fōō-u.

¹²Ama bin kɔkɔ fōō-u ki gbìl̄ ki tīiǹ-uee, u yāntì bidambi kpántì Unimbɔti biyaamu[3],

¹³mbiyaamu mun ní unil kaa màl̄, kaa tí sá unil làtamee, ama an sá Unimbɔti di màl̄ múǹ.

¹⁴Un sá Dinyɔɔbundee kpántì unil ki kāl̀ ti-kansikin ki cáá tiŋan nì ibaamɔn tikpil, ní ti ká u-nyooti[4] tin u nìn fōō Ubaati ceeyee, kun puee u sá Unimbɔti Jipɔmbaabil.

¹⁵U-pu ní Yoowaneesi nìn kúuǹ ki lī yii: «Un m nìn lī yii u dòoń man boon ama úǹ jítiǹ mamee, dee! Di sá yii úǹ pée bí ní bi nín màl̄ man.»

¹⁶Úǹ cee ní tiŋan kɔwoooo nyánní ní ki bāań-ti, ní timbi kɔkɔ fòol̄-tì múlmul.

¹⁷Unimbɔti nìn yāntì Mooyiisi tīī-ti marab[5], ama ní Yeesu Kriisitoo cáań-ti tiŋan nì ibaamɔn.

¹⁸Báà ubɔ kaa wál̀ Unimbɔti dalba[6], ama u-Jipɔmbaabil un mun sá Unimbɔti ki bí ki nákáǹ u-Baa Unimbɔtee di yāntì ti béè-u.

¹⁹Juuda yab kpilib bin nìn bí Jeerusaleemee nìn túnní bisaraaŋaliibi nì Leefii yab bin tūǹ Unimbɔti diiku poon ditundee biba Yoowaneesi cee bí dāá bàlifì-u yii: «Sii di sá ŋma?» Ní u kíí-bi yii:

²⁰«Man di kaa sá Meesiya.» Waa nìn bál̀-bi, ki sòon̄ ki cántì-bi míǹ.

²¹Ní bi fātìi bālifì-u yii: «Kin sii di sá ŋma ní? Eeliiii?» Ní u bí yii: «Aayee, maa sá Eelii.» Ní bi tí bālifì-u yii: «Sii di sá Unimbɔti bɔnaatiliu un máaǹ kí dāan̄eeee?» Ní u tí bí yii: «Aayee[7].»

²²Ní bi fātìi tí bālifì-u yii: «Kin, sii baasii sá ŋma ní? Di sá ti là kí tin tùkù bin túnní-tee un ní a baasii sée. Sii lì yii a sá ŋma ní?»

²³Ní Yoowaneesi kíí-bi yii: «Man di sá un báakí kuteeun yii: <Tɔ̄maan nsan ŋun tèen̄ee kí tīī ti-Dindaan,>» - kii Unimbɔti bɔnaatiliu Yeesaya mun nín nìn lī puee.

²⁴Fariisab biba nìn bí bin bi nìn túnní Yoowaneesi ceeyee kansikin,

²⁵ní bíǹ bālifì-u yii: «A yaa kaa sá Meesiya, kaa sá Eelii, kaa tí sá Unimbɔti bɔnaatiliu un ti cée, kin ba pu ní a fùul̀ binib Unimbɔti nyim?»

²⁶Ní Yoowaneesi kíí-bi yii: «Man fùul̀ binib nnyim ní, ama ubɔ bí ni-kansikin, naa nyí-u,

²⁷úǹ di làá dāá dāan̄ man boon. Man kaa kpántì kí gútí u-naatakaŋ ŋmiii gba.»

²⁸Bi nìn bí Beetanii, kitiŋ kin bí Jɔɔdan buŋgbandi lapu pu, laakin Yoowaneesi fùul̀ binib nnyimee, ní ki sòoǹ an bɔti gbanti.

²⁹Kutaa wúntèe ní Yoowaneesi ká Yeesu dòoń u-cee, ní u bí yii: «Kpèèmaan, Unimbɔti pibil din lèekī binib kɔkɔ kpitiiyee dee[8]!

³⁰Úǹ pu ní m fu sòon̄ yii: <Uninja ubɔ làá dāá dāan̄ man boon, ama úǹ jítiǹ man, kun puee úǹ pée bí ní bi nín màl̄ man.>

³¹Maa nìn nyí un ní an sée, ama an sá yii Isirayeel yab ń béé-uee pu ní man dɔ́miń ki bíi fùul̀ binib Unimbɔti nyim.»

³²Ní Yoowaneesi gíti lī yii: «M ká Unimbɔti Fam lafun nyánní yilpu kii dibeenanjilee ki kpákatìń Yeesu pu[9].

³³Maa nìn nyí un ní an sée, ama Unimbɔti un túnní-mi ḿ nīn fùul̀ binib u-nyimee bí-mi yii: <A yaa láa ká man Fam kpákatìń ki kóò un puee, úǹ di làá fàl̀ binib Circir Fam.>

³⁴M ká mimmee, ní ki sòoǹ ki tùkù-ni yii úǹ di sá Unimbɔti Jipɔɔn.»

³⁵Kutaa tí wúntèe, Yoowaneesi nì u-boonnooliibi bili tí yú.

³⁶U ká Yeesu bíi jītée ní u kpēē-u dímmm ki bí yii: «Kpèèmaan, Unimbɔti pibil sèé!»

³⁷Yoowaneesi boonnooliibi bilee gbìl̄ mimmee, ní ki nóó Yeesu.

³⁸Yeesu fātìi kpēē bi nóó-uee, ní ki bí-bi yii: «Ni nyàab̀ ba?» Ní bi bí yii: «Rabii, la ní a kóò ní?» - Rabii taapu di sá yii, Udakal. -

³⁹Ní Yeesu bí yii: «Dāam̄maan kí cùú béé laakin m kóòyee.» Ní bi nóó-u ki cūtìi béè laakin u kóòyee, ní ki kpáàa gbíntì niin yaadal wiiŋŋu. An nìn sá tikúti tinaa kujoou ní bi nìn cūtì.

⁴⁰Andree un sá Siimɔn Peetroo naalee nìn sá binib bilee kansikin ubɔ bin nìn gbìl̄ Yoowaneesi nyɔɔbundi gbanti ki nóó Yeesuee,

⁴¹ní Andree péé ki cūtìi ká u-maan Siimɔn ki tùkū-u yii: «Timbi ká Meesiya!» - An dàkà yii Kriisitoo. -

⁴²Ní u cáá Siimɔn ki cūnnì Yeesu cee. Ní Yeesu kpēē-u ní ki bí yii: «Sii di sá Siimɔn Yoowaneesi jipɔɔn. Bi làá nīn kíǹ ki yíì-si Keefaasi ní», an dàkà yii Peetroo[10].

⁴³Kutaa gíti tí wúntèe, Yeesu lēē yii u làá cù Galiilee, ní ki ká Fiiliipi, ní ki bí-u yii: «Nóó-mi!»

⁴⁴Fiiliipi nìn sá Beetisayida tiŋkin ní. Niin ní Andree nì Peetroo mun nìn sá.

⁴⁵Boonee ní Fiiliipi ká Natanayeel, ki tùkū-u yii: «Timbi ká un pu ní Mooyiisi nìn ŋmàn̄ u-marab gbɔŋkun ki kpáaǹ Unimbɔti bɔnaatiliibi mun sòon̄ u-puee[11]. An sá Yeesu Jooseefi jipɔɔn un sá Naasaareetee.»

⁴⁶Ní Natanayeel bālifì-u yii: «Mimmee, tiwammɔntiil ŋūǹ kí nyānní Naasaareeti mun deeee?» Ní Fiiliipi bí-u yii: «Dāan̄ kí cùú kpèè.»

⁴⁷Yeesu kpēēyee, Natanayeel dòoń u-cee, ní u bíi sòoǹ u-pu yii: «Un bí nee di sá uisirayeelja páaa, kaa sá milimilidaan.»

⁴⁸Ní Natanayeel bālifì-u yii: «A ŋá mana ní ki nyí-mi?» Ní Yeesu kíí-u yii: «Min a bí fiigi subu taapuee ní man ká-si ki wāatì ní Fiiliipi dāa nín yíiń-see.»

⁴⁹Niinee ní Natanayeel bí-u yii: «Ukpil, a sá Unimbɔti Jipɔɔn ki sá Isirayeel yab mun bɔtiu[12]!»

⁵⁰Ní Yeesu bí-u yii: «M nín bí yii m ká-si fiigi subu taapuee pu ní a fōō ki kííii? A làá gíti ká tin jítiǹ tin bí neeyee.

⁵¹Ibaamɔn ní m tùkù-ni, ni làá dāá ká kutagbɔŋu cúu pīitì, ní Unimbɔti tuuŋyi sìntīń ki jɔ́ḿ man Kinibiki pu[13].»