Read Ntcham Jean 10 Bible Online

Jean 10 - Ntcham bible

Jean 10

¹Yeesu bí yii: «Ibaamɔn, ibaamɔn ní m sòoǹ nì ni, un yaa kaa dī kipunyɔkɔ ki kɔ́ kupikpuŋkpuŋun ní ki yaa dī laabee, udaan sá digaŋgandaan ki sá unaayuu.

²Un yaa dī kipunyɔkɔ ki kɔ́ kupikpuŋkpuŋunee di sá upikpaal.

³Un cí kipunyɔkɔee pìitī-u, ní u-piii nyí u-neen. U yíì u-piii sá kamaa nì i-yiŋŋi, ní ki lìntī i-nyɔkɔpu ki cáǹ-i kupikpaaun.

⁴U yaa nyántì i-kɔkɔ kupikpuŋkpuŋun ki dóòyee, ní ú lìntī i-nyɔkɔpu ní í páań u-boon, kun puee i nyí u-neen.

⁵Iaa nōotí uniyaŋyan. I sáń-u ní, kun puee iaa nyí u-neen.»

⁶Yeesu nìn dū tibɔti nee ki ŋmāntì, ama ní baa nìn gbìl̄ ti-taapu.

⁷Míǹ puee ní Yeesu gíti lī yii: «Ibaamɔn, ibaamɔn ní m sòoǹ nì ni, man di sá kupikpuŋkpuŋu punyɔkɔki.

⁸Bin kɔkɔ péeǹ-mi ki bāańee sá digaŋgandambi[60], ní ki sá binaayub, ipii mun kaa pílifíǹ-bi.

⁹Man di sá kipunyɔkɔ. Un yaa dīń man pu ki kóońee kāntí difiil. Udaan ŋūǹ kí nīn kóò ki nyēē ki kāntí u-jinti.

¹⁰Kun pu unaayuu dòońee di sá ú yɔ̀, kí kpɔ̀, kí bīil̀. Mamee m dɔ́miń í ká dimaŋfal ní, tiba nì tiba ń taa lóó-i dimaŋfal gbantin.

¹¹«Man di sá upikpaamɔnti[61], upikpaamɔnti piii pu ní u kúntí u-maŋfal.

¹²Upaadaan un kpàá ki nyàab̀ animbil, kaa sá upikpaal, kaa yì ipiiyee, u yaa ká usaakpan dòońee, u dù ipii ní kí fá kí sāǹ kí kátí, ní usaakpan ń dāan̄ kí cūtì ipii kí yàaǹ-i.

¹³Kun pu upaadaan sáńee di sá u nyàab̀ animbil ní, ipii bɔti kaa páb́-u.

¹⁴Man di sá upikpaamɔnti. M nyí m-piii ní m-piii mun nyí-mi,

¹⁵kii m-Baa nín nyí-mi, ma mun nyí m-Baa puee ní[62]. M kúntí m-maŋfal m-piii pu ní.

¹⁶M cáá ipii iba in kaa láá kóoń m-pikpuŋkpuŋku nee poonee. See ḿ cáań-i. I làá dāá gbìl̄ m-neen, ní kupicaŋkpuŋu ń ŋá kubaantiiu, ní upikpaal mun ń nīn sá ubaanti.

¹⁷«Kun pu m-Baa néeń-mee di sá m tìì m-maŋfal ní kí fàtīí fōō-dì.

¹⁸Ubɔ kaa ŋūǹ kí tìl̄ man maŋfal, see man m-ba di là ní kí dū-dì kí tīī. M ŋūǹ kí dū-dì kí tīī, ki ŋūǹ kí fàtīí fōō-dì mun. M-Baa nín bí ḿ ŋá miŋyee dee.»

¹⁹Tibɔti gbanti pu ní Juuda yab cúu yākatì.

²⁰Bi-kansikin tikpil nìn lì yii: «Arasinii ubɔ di kā u-pu ní u sòoǹ fám fám. Ba pu ní ni pílifíǹ-u?»

²¹Ní biba mun lì yii: «Unil un pu arasinii kēe kaa sòoǹ yéè. Mimmee arasinii ŋūǹ kí ŋúbití bijɔfub nimbiliŋaaa?»

²²An nìn sá dipeepɔndi ní. Bi nìn bíi jīǹ bi nín nìn ŋáŋkì kunimbɔtidii puee jiŋaaliu.

²³Yeesu nìn bí kunimbɔtidiin, laakin bi nìn yíì Saloomɔn kasarkauee taapu ki còom̄.

²⁴Ní Juuda yab dɔ́miń ki māntì ki tú-u ní ki bí yii: «Áli kí tin sāā ŋyunti ŋulɔŋu ní a làá sòoǹ-ti ibaamɔn ní ti-landɔkɔi ń wāl̀ ní? Sii di yaa sá Meesiya, á cántí kí tùkù-ti!»

²⁵Ní Yeesu kíí-bi yii: «M pée tùkū-ni dooooyee, ní naa fōō-mi ki kíí. Atuun ŋin m cáá m-Baa pɔŋŋu ki tūǹ nee sòoǹ m-pu,

²⁶ní naa fōō-mi ki kíí, kun puee naa sá m-piii.

²⁷M-piii gbìl̀ m-neen pu, ní ma mun nyí-i, ní i nóó-mi.

²⁸M tīī-i dimaŋfal din kaa cáá dikúntilee, i kpá kí kpú jaanjaan, báà ubɔ mun kaa tí ŋūǹ kí fōō-i m-ŋaan.

²⁹M-Baa un tīī-mi-iee cáá mpɔn ki jítiǹ báà ŋma. Míǹ ní ubɔ kaa ŋūǹ kí fōō tiba m-Baa ŋaan.

³⁰Man nì m-Baa Unimbɔti, ti sá ubaanti ní.»

³¹Niinee ní Juuda yab tí fātìi píí ataŋkpee kí yāŋkì kí kpɔ̀-u.

³²Ní Yeesu bí-bi yii: «M dū m-Baa pɔŋŋu ki túń atummɔnti tikpil ni-nimbilin. Mimmee, atuun gbanti kansikinee, dilal pu ní ni là kí yāŋkì-mi ataŋkpee kí kpɔ̀ na?»

³³Ní Juuda yab kíí-u yii: «An kaa sá atummɔnti pu ní ti là kí yāŋkì-si ataŋkpee kí kpɔ̀, an sá a nín sòon̄ ki bíil̀ Unimbɔtee pu. Kun puee sii sá unifantanti ní ki ŋèeǹ nì Unimbɔti[63].»

³⁴Ní Yeesu kíí-bi yii: «An kaa ŋmàn̄ ni-marau poon yii: <M bí yii, ni sá inimbɔtaaa[64]?>

³⁵Mara gbɔŋku yaa ŋūǹ kí yíiń bin bin bi sòon̄ Unimbɔti bɔti ki tùkūee yii bi sá inimbɔtee,

³⁶kin un Unimbɔti baasii lēē ki túnní duulinyanee fáà! Kin an dī mana ní nimbi lì yii m ŋèeǹ nì Unimbɔti m nín bí yii man di sá Unimbɔti Jipɔɔnee.

³⁷M yaa kaa bíi tūǹ m-Baa tuuŋŋi, ní taa fōō-mi kí kíí.

³⁸Ní m yaa bíi tūǹ-ŋi, báà ni yaa kaa làá fōō-mi kí kíí, fōōmaan atuun ŋin m bíi tūǹee kí kíí kí baasii béé yii Ubaati bí m-ni ní ma mun bí Ubaatin.»

³⁹Niinee ní bi tí bíi nyàab̀ kí cúú-u ní u ŋmátì bi-ŋaan.

⁴⁰Ní u fātìi gítì Jɔɔdan buŋgbandi lapu pu, laakin Yoowaneesi nìn dáá kíĺ ki fùul̀ binib nnyimee, ki kāl̀ niin.

⁴¹Binib tikpil nìn dòoń u-cee niin, ní ki lì yii: «Yoowaneesi kaa nìn ŋá maamaaci báà ubɔ,

⁴²ama tin kɔkɔwoooo u nìn sòon̄ kijapaai nee puee, an sá ibaamɔn.» Binib tikpil nìn fōō Yeesu ki kíí niin.