Read Ntcham Jean 11 Bible Online

Jean 11 - Ntcham bible

Jean 11

¹Uninja ubɔ nìn būǹ ki bí Beetanii, kitiŋ kin Maarii nì u-maan Maarta nìn kóòyee, bi yíì-u Laasaar[65].

²- Maarii gbanti di sá un nìn kpáatì talaalu ki sītì ti-Dindaan taaŋi pu ki dū u-yikpiti ki pítèe. U-niija di sá Laasaar un nìn būǹee. -

³Ní Laasaar niisalibee tú ubɔ ú cùú tùkù Yeesu yii: «Ti-Dindaan, a-bɔɔ būǹ.»

⁴Yeesu gbìl̄ mimmee, ní ki bí yii: «Laasaar weeŋyi nee kaa sá-u ŋkúm, i sá kí tīī Unimbɔti tinyool, ní ki làá tīī u-Jipɔɔn mun tinyool.»

⁵Yeesu nìn néeń Maarta nì u-naal nì bi-niija Laasaar.

⁶Nì míǹ kɔkɔee, u nín gbìl̄ yii Laasaar būǹee, u gíti kāl̀ laakin u nìn bée iwiin ili.

⁷Ní boonee, u tùkū u-boonnooliibi yii: «Tí gítímaan Juudee!»

⁸Ní u-boonnooliibi kíí-u yii: «Ukpil, yaadal nee ní Juuda yab kpilib kaa bíi nyàab̀ ataŋkpee kí yāŋkì kí kpɔ̀-saaa? Ní a là kí gítí niinaaa?»

⁹Ní Yeesu bí-bi yii: «Ŋwìiń ń nyā kí dāa jēetée tikúti saalaa nì tili di kaa báaa? Sii un yaa còom̄ ŋwiimpuee, aa gbéetí, kun puee ŋwìiń wāĺ an kɔkɔ.

¹⁰Ama sii un yaa còom̄ kunyeeuee di gbéetí, kun puee ŋwalifi kaa ti bí-si.»

¹¹Yeesu lī míǹ ki dóòyee, ní ki gíti kútì yii: «Ti-bɔɔ Laasaar gèen̄. Ama man làá cùú fìntī-u.»

¹²Ní bi kíí-u yii: «Ti-Dindaan, u yaa gèen̄ee, u làá pɔ̄ɔkì deeyaa!»

¹³Yeesu nìn là kí lì yii Laasaar kpíì ní, ama ní u-boonnooliibi bíǹ dākafì yii u sòoǹ ŋgeem min báà ŋma gèeǹee pu ní.

¹⁴Míǹ puee ní Yeesu tùkū ki cántì-bi, yii: «Laasaar kpíì.

¹⁵Ni-puee an mɔ̄ǹ-mi m nín kaa bí niinee, min làá ŋá ní fōō-mi kí kííyee dee. Kɔŋkɔnnee tí nīn cá u-cee!»

¹⁶Niinee ní Toomasi (un bi gíti yíì Atee) bí Yeesu boonnooliibi bin kíǹee yii: «Ti mun ń táá-u ti nì ti-Kpiliu ń tin kpú dicilpu!»

¹⁷Yeesu bàn̄ee ní ki ká yii Laasaar nìn ŋá dikaakulin iwiin inaa.

¹⁸Beetanii kaa nìn dátiǹ Jeerusaleem, an nìn sá kii ataŋkpee ata nyɔkɔm ní.

¹⁹An di yì-tì ní Juuda yab tikpil nìn dɔ́miń kí sɔ̀ŋkì Maarii nì Maarta pɔbiliŋ bi-niija kúm pu.

²⁰Maarta nín gbìl̄ yii Yeesu dòońee, ní u yíkìi túŋkì-u, Maarii úǹ nìn gbíntìi kā kudiin.

²¹Ní Maarta bí Yeesu yii: «Ukpil, a yaa bàà nìn bí doo, m-niija kaa bàà kúù.

²²Ama m nyí yii, kɔŋkɔnnee gba, tin tin kamaa ní a yaa mēē Unimbɔtee u làá tīī-si kudɔŋu.»

²³Ní Yeesu bí-u yii: «A-niija làá fìkitī.»

²⁴Ní Maarta kíí-u yii: «M nyí yii, ŋwinjoolkaa dal, difìkitil yuntiŋuee, u mun làá dāá fìkitī[66].»

²⁵Ní Yeesu kíí-u yii: «Man di sá difìkitil nì dimaŋfal. Sii un fōō-mi ki kííyee, báà a yaa kpíì gba, a làá nīn cáá dimaŋfal,

²⁶ní sii un yaa bí dimaŋfalin ní ki fōō-mi ki kííyee kaa ti kúù jaanjaan. A fōō ki kíí mimmaaa?»

²⁷Ní u kíí-u yii: «Iiin, m-Dindaan: M nyí yii sii di sá Meesiya, Unimbɔti Jipɔɔn un máaǹ kí dāan̄ duulinyanee.»

²⁸U sòon̄ míǹ ki dóòyee, ní ki cūtì ki yíiń u-naal Maarii ki tùkū-u soooo yii: «Ukpil bāań ki bàlifī a-pu.»

²⁹Maarii gbìl̄ mimmee, ní ki yíkì dicilpu ki búntì Yeesu cee.

³⁰Di sá yii Yeesu nìn dáá gbíntìi bí laakin Maarta nìn túŋkì-uee, kaa láá kɔ́ kitiŋin.

³¹Juuda yab bin nìn bí Maarii cee kudiin ki ŋmēentí-uee nín ká u yíkì dicilpu ki nín nyēēyee, ní bi dī-u. Bíǹ dàkafī yii u cá dikaakul pu kí sɔ̄ dee.

³²Ŋyunti ŋun Maarii bàn̄ laakin Yeesu bée ki ká-uee, ní u tātìi gbāaǹ u-nimbiin, ki bí-u yii: «Ti-Dindaan, a yaa bàà nìn bí doo, m-niija kaa bàà kúù.»

³³Yeesu nín ká u bíi sūǹee, ki kpáaǹ Juuda yab bin nìn nóoń-uee, ní kunimbaau kɔ́-u ki gbēē u-pɔbil,

³⁴ní u bālifì-bi yii: «La ní ni síb́-u ní?» Ní bi kíí-u yii: «Ti-Dindaan, dāá cùú kpèè.»

³⁵Ní Yeesu bíi sūǹ.

³⁶Ní Juuda yab bí yii: «Kpèèmaan, u nín bàà baasii néeń-u puee!»

³⁷Ama ní bi-kansikin biba mun bí yii: «Úǹ un nìn ŋúbitì ujɔfuee nimbiliŋee kaan ŋūǹ kí yàntī Laasaar ń taa bàà kpúɔɔɔ?»

³⁸An fātìi tí gbēē Yeesu pɔbil, ní u búntì dikaakul laŋki. An nìn sá ntaŋkpalɔkɔn, ní bi dū ditaŋkpal ki ŋéeb́ di-nyɔkɔ pu[67].

³⁹Ní Yeesu bí yii: «Nyìkitīmaan ditaŋkpalee!» Niinee ní Maarta, utaŋkpiilee niisal, bí yii: «Ti-Dindaan, an ŋá iwiin inaa dee, u máaǹ ki tin núukì!»

⁴⁰Ní Yeesu kíí-u yii: «Maa tùkū-si yii, a yaa fōō-mi ki kíí, a làá ká Unimbɔti nyootaaa?»

⁴¹Niinee ní bi nyīkitì ditaŋkpal dikaakul nyɔkɔ pu. Ní Yeesu wáaǹ kutaa pu, ní ki bí yii: «M-baa, m jáam̀-si kii a nín pílifíǹ-mee pu.

⁴²M nyí yii a pée pílifíǹ-mi baabadal, ama bin māntì ki tú-mi nee pu ní m bíi lì, bí fōō kí kíí yii sii di túnní-mi.»

⁴³U lī míǹ ki dóòyee, ní ki téeń mpɔn yii: «Laasaar, nyānní!»

⁴⁴Ní utaŋkpiil nyánní, u-taaŋi nì u-ŋalii fìn̄ iŋaabu, ki kpáaǹ u-nimbiin[68]. Ní Yeesu bí yii: «Cúú fìntīmaan-u kí yàntī ú nīn cá!»

⁴⁵Juuda yab kansikin bin nìn dɔ́miń Maarii cee ki ká min min Yeesu ŋée tikpil fōō-u ki kíí.

⁴⁶Ama bi-kansikin biba cūtì ki ká Fariisab ki máafì-bi min Yeesu ŋée.

⁴⁷Ní bi nì bisaraaŋakpilib kpáfì bibɔsoonliibi kitil kɔkɔ ki sòon̄ yii: «Ti làá ŋá mana ní kijapaayee ŋáań maamaacib tikpil míǹ na!

⁴⁸Ti yaa yāntì u gbíntìi ŋáań míǹ, báà ŋma làá fōō-u kí kíí. An làá yàntī Room gɔminau ń dāan̄ kí wīī ti-nimbɔtidiiku nì ti-tiŋki.»

⁴⁹Bi-kansikinee ubɔ nìn bí, bi yíì-u Kaayiifi, úǹ di nìn sá usaraaŋakpil dibindi gbanti, ní úǹ bí-bi yii: «Naa gbìl̀ tibɔti taapu.

⁵⁰Naa dàkafī yii an ŋān̄ yii unibaanti ń kpú inifunaan pu ní ditimbundi kɔkɔ ń ŋmátáaa?»

⁵¹An kaa nìn sá úǹ u-ba di là ní ki sòon̄ an bɔti. U nín nìn sá usaraaŋakpil dibindi gbantee puee, ní Unimbɔti yāntì u sòon̄ yii Yeesu làá dāá kpú Juuda yab pu.

⁵²An kaa sá Juuda yab baba pu, an sá kí kpāfì Unimbɔti biyaamu bin yàl̄ee kɔkɔ bí ŋá ubaanti.

⁵³Ki yōoǹ an wiiŋŋu gbanti ní bi bóob́ yii see bí kpɔ̀ Yeesu.

⁵⁴An di yì-tì ní Yeesu kíǹ ki còom̄, kaa yàntī Juuda yab kāntí-u, ní ki búntì kitiŋ kiban, kì bí kuteeu caŋin, bi yíì-kì Eefiraayiim. Niin ní u nì u-boonnooliibi nìn cūtìi kāl̀.

⁵⁵Dilákatil jiŋaaliu nìn tóobiń, ní binib tikpil nìn yíkí ki cá Jeerusaleem kí cù kí ŋá saraabi, kí nyā bi-jɔkɔntin kí wàatī ní jiŋaalee ń nín bàń.

⁵⁶Bi nìn nyàab̄ Yeesu niin. Bi bí kunimbɔtidiinee, ní ki bíi bàlifī tɔb yii: «Ni dàkafī yii ba ní? U làá dāan̄ jiŋaal neeyaaa, waa làá dāan̄?»

⁵⁷Di sá yii bisaraaŋakpilib nì Fariisab nìn síiǹ mara yii un yaa nyí laakin Yeesu bée ń lì bí cùú cúú-u.