Read Ntcham Jean 13 Bible Online

Jean 13 - Ntcham bible

Jean 13

¹Kutaa ń wúntí Dilákatil jiŋaaliuee, Yeesu nìn nyí yii ŋyunti ŋun u làá yīkì kitiŋ nee pu kí gítí u-Baa ceeyee bāań. U nìn néeń u-yab bin bí duulinyan dooyee, ki gíti néeń-bi ki lákatì áli ki tin kátì-ku.

²Ŋyunti ŋun u nì u-boonnooliibi kā ki jīǹ tijoojinee, mimmee Sitaan pée lūkutì Juudasi Isikaariyɔti, Siimɔn jipɔɔn ú dū Yeesu kí nyāfiǹ u-nannanliibi dee.

³Yeesu mun nìn pée nyí yii u nyánní Unimbɔti cee ní ki làá fàtīí gítí Unimbɔti cee, ní ki nyí yii u-Baa Unimbɔti dū tikɔkɔwoooo ki ŋá u-ŋaan.

⁴U nì u-boonnooliibi bíi jīǹee ní Yeesu yíkì tijin pu, ní ki pēetì u-bɔkutifɔkɔl ní ki dū ŋŋaabu ŋubɔ ki gbìn̄ u-caŋ,

⁵ní ki jōō nnyim ki ŋá kisampeeyin, ní ki kíĺ ki bíi fíntí u-boonnooliibi taaŋi, ní ki cáá ŋŋaabu ŋun u gbìn̄ u-caŋee ki cáa pítí bi-taaŋi.

⁶U fíntì ki bāań Siimɔn Peetrooyee ní Siimɔn bí yii: «Ti-Dindaan, sii a-ba di làá fíntí man taaŋaaa?»

⁷Ní Yeesu kíí-u yii: «Tin m bíi ŋáań nee, aa gbìl̀ taapu kɔŋkɔnnee, ama boonee a làá dāá gbìl̄.»

⁸Ní Peetroo bí yii: «M yíì kpataaa, a kpá kí fíntí m-taaŋi.» Ní Yeesu kíí-u yii: «A yaa kaa yāntì m fíntì-si, mimmee, aa sá m-yɔu.»

⁹Ní Siimɔn Peetroo kíí-u yii: «An yaa sá míǹ, ti-Dindaan, taa fíntí m-taaŋi ŋmaniŋma, fíntí kí kpáaǹ m-ŋalii nì m-yil!»

¹⁰Ní Yeesu kíí-u yii: «Un yaa fùl̄ee kaa ti fùul̀, see ataa ŋmaniŋma ní u fíntí, kun puee waa ti cáá tijɔkɔndi. Míǹ ní ni mun bí circir, ama an kaa sá ni-kɔkɔ.»

¹¹Di sá yii Yeesu nìn nyí un làá dū-u kí tīī u-nannanliibee, míǹ pu ní u bí yii: «An kaa sá ni-kɔkɔ di bí circir.»

¹²Yeesu fíntì bi-taaŋi ki dóòyee, ní ki fātìi dū u-bɔkutilee ki pēeǹ, ní ki fātìi kāl̀, ní ki bālifì-bi yii: «Tin m ŋá-ni nee, ni gbìl̄ taapuɔɔɔ?

¹³Ni yíì-mi yii Ukpil nì ni-Dindaan, ní ni máaǹ kí yíiń-mi míǹ, kun puee míǹ ní m lafun sá.

¹⁴Míǹ puee, man udakal nì ni-Dindaan yaa fíntì ni-taaŋee, ni mun máaǹ kí nīn fíntí tɔb taaŋi.

¹⁵M ŋá míǹ ki dàkā-ni ni mun ń nīn ŋáań míǹ ki tìì tɔb ní.

¹⁶Ibaamɔn, ibaamɔn ní m sòoǹ nì ni, utɔntɔnli kaa jítiǹ u-kpiliu, míǹ ní un bi túee kaa jítiǹ un túnní-uee[79].

¹⁷Kɔŋkɔnnee ni béè, ni yaa ŋáań míǹ, ni làá gbìl̄ mmɔn.

¹⁸«An kaa sá ni-kɔkɔ pu ní m sòoǹ, kun puee m nyí bin m lútèe. Tin bí nee ń ŋá kii Unimbɔti gbɔŋku poon nín lī puee, yii: <Un jīǹ m-jintee fātìi bíi jáà nì mi[80].>

¹⁹M tùkù-ni tin bí nee ki yōontí kɔŋkɔnnee kí wàatī ní an bàń, án nín làá ŋá pu tì yaa láa bāańee ní fōō kí kíí yii <man di sá un m sée>.

²⁰Ibaamɔn, ibaamɔn ní m sòoǹ nì ni, un yaa fōō un man túnnée, fōō ma mun dee. Un yaa fōō mamee, fōō un túnní-mee mun dee.»

²¹Yeesu lī míǹ ki dóòyee, ní an gbēē u-pɔbil, ní u bí yii: «Ibaamɔn, ibaamɔn ní m sòoǹ nì ni, ni-kansikin ubɔ di làá dū-mi kí tīī m-nannanliibi.»

²²Ní u-boonnooliibi fātìi bíi kpèé tɔb, kaa kpáàa béè un pu ní u bíi sòoǹee.

²³Un Yeesu nìn néeń u-boonnooliibi kansikinee kā ki nákáǹ-u.

²⁴Ní Siimɔn Peetroo ŋá-u kudaaŋŋu yii ú bàlifì-u kí kpèè un pu ní u sòon̄ee.

²⁵Ní u sútì ki mɔ̄tìi nákáǹ Yeesu ní ki bālifì-u yii: «Ukpil, an sá ŋma ní?»

²⁶Ní Yeesu kíí-u yii: «M làá sēē kpɔnɔ tikunni. Un m yaa dūu tīīyee, úǹ ní an sá.» Niinee ní Yeesu dū kpɔnɔ ki sēē tikunni ki fíiǹ ki tīī Juudasi, Siimɔn Isikaariyɔti jipɔɔn.

²⁷Juudasi fōō kpɔnɔee, ní Sitaan kɔ́ u-ni. Ní Yeesu bí-u yii: «Tin a cáá ki làá ŋée, á ŋá-tì malaa!»

²⁸Bin nìn kā ki jīǹee, báà ubɔ kaa béè kun pu ní u lī-u mimmee.

²⁹Biba nìn dàkafī yii Yeesu là ú cùú dā tin tin bi làá cáá jī jiŋaalee, àá u là ú tīī biwɔfib tiba ní. Di sá yii Juudasi di nìn ŋúb́ bi-nimbiliŋ.

³⁰Juudasi fōō kpɔnɔee, ní ki nyáń malaa. Kunyeeu nìn mɔ́.

³¹Juudasi nyáńee, ní Yeesu bí yii: «Kɔŋkɔnnee man Kinibiki fōō m-nyooti dee, Unimbɔti ń ká tinyool man ni.

³²Unimbɔti yaa ká u-nyooti man nee, míǹ ní ma mun làá ká m-nyooti Unimbɔtin an kaa làá yúntí.

³³M-biyaamu, ŋyunti fiii di kíǹ ḿ gíti kàl̄ ni-cee. Míǹ boonee ni làá dāá nyàab̀-mi. Kii m nín nìn tùkū Juuda yab puee, naa làá ŋmā kí cù laakin m cée. Kɔŋkɔnnee, m tùkū ni mun dee.

³⁴M tīī-ni marapɔɔn ubɔ: nín̄ néeḿmaan tɔb. Kii man nín néeń nimbi puee, ni mun ń nīn néeḿmaan tɔb míǹ.

³⁵Ni yaa néeń tɔbee, niin di làá dàkà báà ŋma yii ni lafun sá m-boonnooliibi.»

³⁶Ní Siimɔn Peetroo bālifì-u yii: «Ti-Dindaan, la ní a cá?» Ní Yeesu kíí-u yii: «Aa ŋūǹ kí nóó-mi laakin m cée kɔŋkɔnnee, ama boonee, a dāa nōotí-mi.»

³⁷Ní Peetroo bí-u yii: «Ti-Dindaan, ba pu ní maa ŋūǹ kí nóó-si kɔŋkɔnnee? Báà an yaa sá ŋkúm, m làá dū m-maŋfal kí tīī a-pu.»

³⁸Ní Yeesu kíí-u yii: «A làá lafun dū a-maŋfal kí tīī man puɔɔɔ? Ibaamɔn, ibaamɔn ní m sòoǹ nì si, kí wàatī ukooja ń bāakèe, a làá néé yii saa nyí-mi diba dibee mita.»