Read Ntcham Jean 14 Bible Online

Jean 14 - Ntcham bible

Jean 14

¹Ní Yeesu nìkī ki lī yii: «Ni-pɔbiliŋ ń taa bīil̀. Ní fōō Unimbɔti kí kíí, kí fōōmaan ma mun kí kíí.

²Ikɔŋkoon tikpil bí m-Baa dumpu, m làá cù kí bɔ́ntí-i kí yóoń-ni. I yaa kaa bàà bí tiŋman, m bàà tùkù kí cántí-ni.

³M yaa cūtì ki bɔ́ntì ipaan gbantee, ní ḿ gítiń kí yòon̄-ni, án nín làá ŋá pu laakin m làá nīn bée, ni mun ń nīn bí m-cee niinee.

⁴Ni nyí laakin m cée, ki nyí nsan mun.»

⁵Ní Toomasi bí-u yii: «Ti-Dindaan, taa nyí laakin a cée! Ti làá ŋá mana kí béé nsan?»

⁶Ní Yeesu kíí-u yii: «Man di sá nsan, ki sá ibaamɔn ki sá dimaŋfal. Ubɔ kaa ŋūǹ kí dī laaba kí dāan̄ m-Baa Unimbɔti cee, see ú dīń man pu.

⁷Ni yaa bàà nyí-mee, ni bàà nyí m-Baa mun ní. Ama kɔŋkɔnnee ni nyí-u, ki ká-u mun.»

⁸Niinee ní Fiiliipi bí-u yii: «Ti-Dindaan, dàkà-ti a-Baa Unimbɔti ti-pɔbiliŋ ń sɔ̀ŋkì.»

⁹Ní Yeesu kíí-u yii: «Fiiliipi, m nín bí ni-cee an yúntì pu nee, ní saa nyí-maaa? Un yaa ká-mee, ká m-Baa mun dee. Kin ba pu ní sii gíti lì yii ḿ dàkà-ni m-Baa?

¹⁰Aa nyí yii man bí m-Baa ni, ní m-Baa mun bí man naaa? Tibɔti tin m sòoǹ nì nee, maa sòoǹ-tì m-ba pu, an sá m-Baa un bí m-nee di tūǹ u-tundi.

¹¹Fōō kí kíímaan yii m bí m-Baa ni ní m-Baa mun bí man ni. Báà ni yaa kaa fōō m-bɔti ki kíí, kpèèmaan m-tuuŋŋi ŋin m ŋá nee pu kí fōō kí kíí.

¹²Ibaamɔn, ibaamɔn ní m sòoǹ nì ni, un yaa fōō-mi ki kííyee làá tɔ̄ atuun ŋin m tūǹee, úǹ làá tɔ̄ ŋin jítiǹ man yaŋ nee gba, kun puee m cá m-Baa cee ní.

¹³Ní tin kɔkɔ ni yaa mēē m-yindi puee, m làá ŋá míǹ kí tīī-ni, ní m-Baa ń ká tinyool u-Jipɔɔn pu.

¹⁴Ni yaa mēē tiba m-yindi pu, m làá ŋá míǹ kí tīī-ni.

¹⁵«Ni yaa néeń-mee, nín̄ ŋúb́maan m-marab,

¹⁶ní man ń mèè m-Baa Unimbɔti ú gíti tīiń-ni Ututunli ubɔ un làá nīn bí ni-cee kí nīn cá jaanjaanee.

¹⁷Úǹ di sá Unimbɔti Fam ibaamɔndaan, un duulinya nib kaa ŋūǹ kí fōōyee, kun puee baa wāĺ-uaaa, kaa nyí-u mun. Ama an yaa sá nimbi, ni nyí-u kun puee u kóò ni-cee ní ki làá dāá nīn bí ni-ni.

¹⁸«Maa làá dū-ni kí fá kii ataŋkpiibilee, m làá fàtīí gítiń ni-cee.

¹⁹An kíǹ fiii duulinya nib kaa làá ti ká-mi, ama nimbi làá ká-mi, kun puee m bí dimaŋfalin, míǹ ní ni mun làá nīn bí dimaŋfalin.

²⁰Ŋwiin gbanti yaa láa bāańee, ni dāa béetí yii man bí m-Baa ni, ní nimbi bí man ni, ní man bí ni mun ni.

²¹Un yaa cáá man marab ki ŋúb́-bee, udaanee di néeń-mi. Míǹ ní m-baa làá nīn néeń un néeń-mee, ma mun ń nīn néeń-u, ní kí nyāntí m-ba kí dàkà udaan.»

²²Ní Juudi - an kaa nín sá Juudasi Isikaariyɔti - bí-u yii: «Ti-Dindaan, mana ní a làá ŋá ní kí nyāntí a-ba kí dàkà timbi, ní kí taa dàkà duulinya nib?»

²³Ní Yeesu kíí-u yii: «Un yaa néeń-mee làá nīn ŋúb́ m-bɔti. M-Baa làá nīn néeń udaan, ní man nì m-Baa ń dāan̄ kí nīn kóò udaan cee.

²⁴Un kaa néeń-mee kaa ŋúb́ m-bɔti. M-bɔti tin m sòoǹ nì nee nyánní m-Baa un túnní-mee cee ní, an kaa sá m-ba pu ní m sòoǹ.

²⁵«M tùkū-ni tin bí nee ŋyunti ŋun m dáá bí ni-cee nee.

²⁶Ama Ututunlee, Circir Fam min m-Baa làá dāá tɔ̄ń man yindi puee, làá dāá dàkà-ni tikɔkɔ, ní kí téetí-ni tin kɔkɔ m sòon̄ nì nee.

²⁷«Ŋgbansɔŋfi ní m cáań-ni, man gbansɔŋfiŋu ní m dūu tīī-ni, maa tìì kii duulinya nín tìì puee[81]. Ní taa bàkatī kí taa fàŋkì mun.

²⁸Ni gbìl̄ m nín lī yii m làá nīn cá kí dāá fàtīí gítiń ni-ceeyee. Ni yaa bàà néeń-mee, an bàà mɔ́ɔkíǹ-ni kii m nín cá m-Baa ceeyee pu, kun puee m-Baa jítiǹ man.

²⁹M tùkū-ni kɔŋkɔnnee ki yóoǹ kí wàatī ní án nín bàń, ní ŋyunti ŋun ní an yaa láa bāańee, ní ŋmā kí mɔ̀tīí fōō kí kíí.

³⁰Maa làá ti sòoǹ nì ni tikpil, kun puee duulinya bɔtiu Sitaan dòoń. Waa nín ŋūǹ kí ŋá-mi tiba.

³¹Ama duulinya nib máaǹ kí béé yii m néeń m-Baa, an pu ní min ní m-Baa yaa bí ḿ ŋée, míǹ ní m ŋáań. Yīkìmaan, tí nīn cá.»