Read Ntcham Jean 15 Bible Online

Jean 15 - Ntcham bible

Jean 15

¹Ní Yeesu bí yii: «Man di sá fiinyi subu tiŋman[82], ní m-Baa sá un ŋáŋkí-buee.

²Apan ŋin túkú m-pu kaa lòoǹee, u gà-ŋi ki féeń ní. Apan ŋin lòoǹee, u ŋáŋkí-ŋi, ní ŋí mɔ̀tīí lòoǹ.

³Tibɔti tin m sòon̄ nì nee, tì ŋáŋkì nimbi.

⁴Ní nīn bímaan man ni, ní ma mun ń nīn bí ni-ni. Kii dipandi nín kaa ŋūǹ kí lòoǹ abil di-baba asee dí nīn túkú busubu puee, míǹ mbaantiim ní ni yaa kaa bí man ni, naa ŋūǹ kí lòoǹ abil.

⁵«Man di sá fiinyi subu, ní nimbi sá apan. Un yaa bí man ni ma mun bí udaan nee lòoǹ abil ní tikpil, kun puee ni yaa kaa bí man ni, naa ŋūǹ kí ŋá tiba.

⁶Un yaa kaa bí man nee, bi gà-u kí fá kii disupandee ní, ní ú kpā. Asupaŋkulimee, bi kōontí-ŋi kí tɔ̄ ŋŋmin, ní án wà.

⁷Ni yaa bí man ni, ní ma mun bɔti bí ni-nee, bàlifìmaan tin tin ni yaa lèe, ni làá ká kudɔŋu.

⁸Tin tìì m-Baa tinyoolee di sá ní lòoǹ abil tikpil ní kí nīn sá man boonnooliibi.

⁹Kii m-Baa nín néeń-mi puee, míǹ ní ma mun néeń-ni. Nín̄ bímaan m-neendin.

¹⁰Ni yaa ŋúb́ m-marabee, mimmee, ni bí m-neendin dee, kii ma mun nín ŋúb́ m-Baa marab ki bí u-neendin puee.

¹¹«M sòoǹ nì ni tin bí nee án nín làá ŋá pu m-pɔɔpindi ń nīn bí ni-ni, ní ni-pɔbiliŋ ń mɔ̀tīí gíti pīil̀ee[83].

¹²Mara un m síiǹ-nee sèé: ní nīn néeḿmaan tɔb, kii man nín néeń-ni puee.

¹³Dineeŋkpaandi diba kaa ti bí kí bà unil ń dū u-maŋfal kí kúntí u-bɔɔbi pu.

¹⁴Ni yaa ŋáań min m bàlifī-nee, mimmee ni kpántì m-bɔɔbi dee.

¹⁵Maa ti yíì-ni m-tɔntɔnliibi, kun puee utɔntɔnli kaa nyí tin u-kpiliu ŋáańee. M yíì-ni m-bɔɔbi ní, kun puee m dàkā-ni tin kɔkɔwoooo m gbìl̄ m-Baa ceeyee.

¹⁶Man di lēē nimbi, kaa sá nimbi di lēē man. M tú-ni ní cùú lòoǹ abil, abil ŋin làá yúntée, mimmee, m-Baa làá tīī-ni tin kɔkɔ ni yaa mēē-u man yindi puee.

¹⁷Tin tin m síiǹ-nee, di sá ní nīn néeń tɔb.»

¹⁸«Duulinya nib yaa ná-nee, ní béé yii man ní bi péé ki ná.

¹⁹Ni yaa bàà sá duulinya yabee, duulinya yab bàà néeń-ni, kun puee ni sá u-yab. Ama m lútì-ni ki nyántì duulinya nib kansikin. Naa ti sá duulinya yab, an pu ní bi ná-ni.

²⁰Ní téetímaan tin tin m nìn tùkū-nee, yii: <Utɔntɔnli kaa jítiǹ u-kpiliu[84].> Bi yaa páb́ man, bi làá dāá páb́ ni mun, bi yaa bàà pílifì man bɔti, bi bàà dāa pílifí ni mun yati.

²¹Man pu ní bi làá ŋá-ni tin bí nee kɔkɔ, kun puee baa nyí un túnní-mee.

²²M yaa kaa bàà dɔ́miń ní kaa bàà sòon̄ nì bi, baa bàà cáá ikpiti. Ama kɔŋkɔnnee, baa ti cáá nnaakpal báà ŋubɔ bi-kpitii pu.

²³Un yaa ná-mee ná m-Baa mun dee.

²⁴M yaa kaa bàà ŋá maamaacib bin bin báà ubɔ kaa ŋée bi-kansikin, baa bàà cáá ikpiti. Ama bi kántì m-maamaacib, ní ki gbíntì ki ná man nì m-Baa.

²⁵Too! An ŋá kii bi-marab gbɔŋku poon nín lī ki síiǹ puee dee yii: <Bi ná-mi fám, an kaa cáá taapu[85].>

²⁶«M yaa bàn̄ m-Baa ceeyee, m làá tɔ̄ń-ni Ututunli, úǹ di sá Unimbɔti Fam ibaamɔndaan un nyánní m-Baa ceeyee. U yaa láa bāańee, u làá sòoǹ m-pu,

²⁷ní ni mun ń dāá lēē m-pu seera, kun puee ni pée bí m-cee doooo ŋkilkaamin ní.