Read Ntcham Jean 17 Bible Online

Jean 17 - Ntcham bible

Jean 17

¹Yeesu sòon̄ míǹ ki dóòyee, ní ki wáaǹ ki kpēē kutaa ní ki bí yii: «M-Baa, kɔŋkɔnnee ŋyunti bāań! Tīī a-Jipɔɔn tinyool, án nín làá ŋá pu a-Jipɔɔn mun ń tīī-si tinyoolee.

²Kun puee sii di tīī-u mpɔn binib kɔkɔ pu, yii ú tīī bin kɔkɔwoooo a dūu ŋá u-ŋaanee dimaŋfal din kaa cáá dikúntilee.

³Dimaŋfal gbanti di sá bí béé sii un baba sá Unimbɔtibaamɔnee, kí béé Yeesu Kriisitoo un a túnnée mun.

⁴M dàkā duulinya nib a-nyooti, m dóò ditundi din a tīī-mi ḿ tɔ̄ee.

⁵M-baa, kɔŋkɔnnee, tīī-mi tinyool a-cee, tinyool tin m nìn cáá a-cee dooooyee, ki wāatì ní a nín náań duulinyee.

⁶«M yāntì binib bin a nyántì duulinya nib kansikin ki tīī-mee béè-si. Sii di nìn yì-bi, ní ki dū-bi ki tīī-mi, ní bi fōō a-bɔti.

⁷Kɔŋkɔnnee, bi béè yii tin kɔkɔ a tīī-mee nyánní a-cee.

⁸Tibɔti tin a tīiń-mee m cáań ki tùkū-bi, ní bi fōō ki béè yii ibaamɔn m nyánní sii cee, ní ki fōō ki kíí yii sii di túnní-mi.

⁹«Bíǹ pu ní m mèé-si nee. An kaa sá duulinya nib pu ní m mèé. M mèé-si binib bin a tīī-mi nee pu ní, kun puee sii di yì-bi.

¹⁰Tin kɔkɔ m cááyee, sii di yì, ní tin kɔkɔ si mun cááyee, man di yì. Bíǹ pu ní bi tìì-mi tinyool.

¹¹Man kaa ti bí duulinyan. Man dòoń sii cee ní, ní bíǹ làá nīn gbíntìi bí duulinyan. M-Baa circirdaan, dū mpɔn ŋun bí a-yindi din a tīī-mee nee kí ŋúb́-bi, án nín làá ŋá pu bí kpāfì ubaanti kii man nì si nín ŋá ubaanti puee.

¹²Man nì bi nín nìn bée, m dū a-pɔŋŋu ŋun a tīī-mee ki ŋúb́-bi, ní ki mɔ́tì bi-pu, ní báà ubɔ bi-kansikin kaa wáŋkì, asee un baba làá pée wāŋkì, kii a-gbɔŋku nín nìn pée sòon̄ ki síiǹ puee[87].

¹³Kɔŋkɔnnee, m dòoń a-cee. M nín dáá bí duulinyan ki sòoǹ tin nee, an sá kí ŋmā kí yàntī bí ká dipɔɔpindi, man pɔɔpimmɔntiil.

¹⁴M cáań-bi a-bɔti, ní duulinya yab ná-bi, kun puee baa sá duulinyan, kii ma mun nín kaa sá duulinyan puee.

¹⁵Maa mèé-si yii á yòon̄-bi duulinyan, á ŋúb́-bi, bí taa jēetí Sitaan ŋaan[88].

¹⁶Baa sá duulinya yab, kii ma mun nín kaa sá duulinyan yɔu puee.

¹⁷Á dū a-baamɔŋyi kí ŋá bi-ni, kí yàntī bí kpántí a-yab kɔkɔ: a-bɔti di sá ibaamɔn.

¹⁸Kii a nín túnní-mi duulinyan puee, míǹ ní ma mun tú-bi duulinyan.

¹⁹M kúntì m-ba kɔkɔ ki tīī-si bi-pu, án nín làá ŋá pu ibaamɔn ń yàntī bi mun ń kúntí bi-ba kí tīī-see.

²⁰«An kaa sá bíǹ baba pu ní m mèé-si. M mèé-si ki kpáaǹ bin bin làá dāá pīlifì bi-bɔti kí fōō-mi kí kííyee pu ní.

²¹M-Baa, yàntī bi-kɔkɔ ń ŋá ubaanti kii sii nín bí man ni, ma mun bí sii ni puee. Bi-kɔkɔ ń ŋá ubaanti nì ti, án nín làá ŋá pu duulinya nib ń lafun béé yii sii di túnní-mee.

²²M yāntì bi fōō a-nyooti tin a nìn tīī-mee án nín làá ŋá pu bi-kɔkɔ ń ŋá ubaantee, kii man nì si nín ŋá ubaanti puee.

²³Man ń nīn bí bi-ni kii sii nín bí man ni puee, án nín làá ŋá pu bí ŋá ubaanti mbaamɔmin, duulinya nib ń bée yii sii di túnní-mi, ki néeń-bi kii a nín néeń man puee.

²⁴«M-Baa, m là yii laakin m bée, bin kɔkɔwoooo a tīī-mee ń nīn bí m-cee niin kí ká m-nyooti, tinyool tin a tīī-mee. Di sá yii a néeń-mi ki wāatì ní ki nín náań yilpu nì taapu.

²⁵M-Baa deedeedaan, duulinya nib kaa nyí-si, ama man nyí-si, ní bin bí nee béè yii sii di túnní-mi.

²⁶M yāntì bi béè-si, ki làá yàntī bí mɔ̀tīí béé-si, án nín làá ŋá pu dineendi din a cáá m-puee ń nīn bí bi-ni, ní ma mun m-ba ń nīn bí bi-nee.»