Read Ntcham Jean 18 Bible Online

Jean 18 - Ntcham bible

Jean 18

¹Yeesu sòon̄ an nyɔɔbuŋŋi ki dóòyee, ní u nì u-boonnooliibi búntì Seedrɔn buŋgbandi lapu pu[89]. Bukpaa bubɔ nìn bí niin, ní u nì u-boonnooliibi cūtì ki kɔ́ bu-poon.

²Juudasi un nìn nyáń u-boonee mun nyí niin, kun puee Yeesu nì u-boonnooliibi nìn pée cá niin múlmul[90].

³Bisaraaŋakpilib nì Fariisab nìn tīī Juudasi disoojakitil nì dipilisikitil, ní u yōoǹ-bi ki cáa nín cá bukpaayee poon. Bi nìn ŋúb́ iŋminaapool nì fitilab nì tijanjawan.

⁴Yeesu nyí tin dòoń-uee, ní ki sútì ki pìl̄-bi, ki bālifì-bi yii: «Ŋma ní ni nyàab̀ ní?»

⁵Ní bi kíí-u yii: «Ti nyàab̀ Yeesu Naasaareeti yɔuee ní.» Ní u kíí-bi yii: «Man sèé!» Juudasi, un nyáń u-boonee, sáká bi-kansikin.

⁶Yeesu nín kíí-bi yii: «Man sèéyee», ní bi fātìi túlifì bi-boon ki lítì kitiŋ.

⁷Ní Yeesu fātìi tí bālifì-bi yii: «Ŋma ní ni nyàab̀ ní?» Ní bi bí yii: «Ti nyàab̀ Yeesu Naasaareeti yɔuee ní.»

⁸Ní Yeesu kíí-bi yii: «Kéè, m pée tùkū-ni yii m sèéyaa! An yaa sá man ní ni nyàab̀ee, ní yàntī bin bí nee ń nīn cá!»

⁹Mimmee an ŋá kii u nín bàà sòon̄ puee dee, yii: «Maa fá bin a tīī-mee kansikin báà ubɔ.»

¹⁰Niinee ní Siimɔn Peetroo dáaĺ ki fɔ́fì u-tàataajiki, ki gāā ki wúkutì usaraaŋakpil tɔntɔnliu ubɔ ŋaŋgiitafal. Bi nìn yíì utɔntɔnli gbanti Maalkusi ní.

¹¹Ní Yeesu bí Peetroo yii: «Gíiǹ a-tàataajiki kí fúuń kujitooun! M-Baa yaa tīī-mi falaa ḿ nyɔ̀ee, ḿ taa nyɔ̀ɔɔ[91]?»

¹²Niinee ní disoojakitilee nì bi-kpiliu nì Juuda yab pilisib cúú Yeesu ki bóob́-u,

¹³ní ki dá láá cáá-u ki cūnnì Aani[92] cee. Aani gbanti di nìn sá Kaayiifi un nìn sá usaraaŋakpil dibindi gbantee coo.

¹⁴Kaayiifi gbantee di nìn sáŋkì Juuda yab yii: «An máaǹ unibaanti ń kpú binib kɔkɔ yil puee.»

¹⁵Siimɔn Peetroo nì Yeesu boonnooliu ubɔ nìn nóó Yeesu. Uboonnoolee nóó Yeesu ki kɔ́ usaraaŋakpil cindin, kun puee usaraaŋakpil nìn nyí-u,

¹⁶ní Peetroo nìn gbíntìi sí kipunyɔkɔ boon mmɔŋki. Ní uboonnool un usaraaŋakpil nìn nyée nyáń ki ká unimpu un nìn cí kipunyɔkɔpuee ní ki cáá Peetroo ki kɔ́ǹ.

¹⁷Ní unimpu un nìn cí kipunyɔkɔpuee bālifì Peetroo yii: «A mun kaa sá uninja nee boonnooliibi ubɔɔɔ?» Ní Peetroo bí-u yii: «Aayee, maa sá.»

¹⁸Tiwool nìn bí, an pu ní bitɔntɔnliibi nì pilisib kpāā ŋŋmi ki sí ki wùl̀, ní Peetroo mun yú bi-cee niin ki wùl̀.

¹⁹Niinee ní usaraaŋakpil bíi bàlifī Yeesu u-boonnooliibi bɔti nì tibɔti tin u dàkèe pu.

²⁰Ní Yeesu kíí-u yii: «M sòon̄ mpaampiin pu báà ŋma nimbiin, ki dàkā m-bɔti akpafidiinni nì kunimbɔtidiin, laakin Juuda yab kɔkɔ kpáfée. Maa nìn sòon̄ tiba dibalin.

²¹Ba pu ní a bàlifī-mi? Bàlifì bin pílifì tin m sòon̄ee. Bālifì-bi tin m lēe, bíǹ nyí tin m sòon̄ee.»

²²Ŋyunti ŋun Yeesu lī mimmee, ní pilisi ubɔ un yú ki kɔ́ĺ-uee fáá-u ntampa, ní ki bí-u yii: «Míǹ ní bi kíikí usaraaŋakpilaaa?»

²³Ní Yeesu bí-u yii: «M yaa sòon̄ min kaa kítèe, dàkà-mi min ní m yīntèe. M yaa tí sòon̄ min kítèe, ba pu ní a fáá-mi?»

²⁴Yeesu ŋalii gbíntìi bóob́ee, ní Aani dū-u ki tīī usaraaŋakpil Kaayiifi.

²⁵Ŋyunti gbantee, Peetroo yú ki wùl̀ ŋŋmi. Ní bi bālifì-u yii: «Si mun kaa sá uninja nee boonnooliuaaa?» Ní Peetroo néé yii: «Aayee, man kaa sá.»

²⁶Ní usaraaŋakpil tɔntɔnliu ubɔ un nabiki tafal Peetroo bàà gāā ki wúkutèe bí-u yii: «Maa bàà ká si nì u bukpaanaaa?»

²⁷Ní Peetroo fātìi tí néé yii an kaa sá úǹ. Kpalaa niin ní ukooja báakì.

²⁸Ní bi yōoǹní Yeesu Kaayiifi cee ki cáá-u ki nín cá gɔmina Piilati cee. An nìn dáá sá kutaafaau pɔ̀lpɔl ní. Juuda yab kaa nìn là kí kɔ́ gɔmina diikun kun puee bi là kí nīn bí circir kí ŋmā kí jī Dilákatil jiŋaaliu.

²⁹Míǹ pu ní gɔmina Piilati nyánní ki dɔ́miń bi-cee, ní ki bālifì-bi yii: «Ba ní uninja nee ŋá ní ni cáań-u ní?»

³⁰Ní bi kíí-u yii: «U yaa kaa bàà sá unikpiti, taa bàà cāabìń-u kí tīī-si!»

³¹Ní Piilati bí-bi yii: «Yòom̄maan-u, ní sòom̀maan u-bɔti kí nóó nì ni-marau nín sá puee!» Ní bi kíí-u yii: «Timbi kaa cáá nsan kí kpɔ̀ unil.»

³²An ŋá míǹ kí dàkà Yeesu nín nìn sòon̄ u-kúm min u làá kpúee puee dee.

³³Ní Piilati nín kóò kudiin ki yíiń Yeesu, ní ki bālifì-u yii: «Mimmee, sii di sá Juuda yab bɔtiuaaa?»

³⁴Ní Yeesu kíí-u yii: «Tin tin a lī nee, sii a-ba di dākafì míǹ naaa, ubɔ di tùkū-si míǹ man pu ní?»

³⁵Ní Piilati kíí-u yii: «M sá Ujuudajaaa? A-yab nì bisaraaŋakpilib di dū-si ki tīiń-mi. Mimmee, ba ní a ŋá ní?»

³⁶Ní Yeesu kíí-u yii: «M-beel kaa sá taapu doo beel. M-beel yaa bàà sá duulinyan yal, m-tɔntɔnliibi bàà jáà kí mɔ̄tì m-pu ní. Baa bàà kíikí bí dū-mi kí tīī Juuda yab kpilib. Ama, m-beel kaa sá taapu doo yal.»

³⁷Ní Piilati bí-u yii: «Mimmee, a sá ubɔti níii?» Ní Yeesu kíí-u yii: «Sii di lī. M dɔ́miń bi màl̄-mi duulinyan ḿ dàkà binib kun di sá ibaamɔnee ní. Un kamaa sá ibaamɔn yɔuee pílifí tin m sòoǹee ní.»

³⁸Ní Piilati bālifì-u yii: «Ba di sá ibaamɔn ní?» Piilati sòon̄ míǹ ki dóòyee, ní ki nyáń ki tí nín cá Juuda yab cee, ní ki bí-bi yii: «Maa ká kun pu ní kijapaai nee máaǹ ditafadaaldee.

³⁹Kii ni-marau nín pée sá puee, Dilákatil jiŋaaliu kamaayee, m gīintí usarkadaan ubɔ ní kí líí-ni. Mimmee, ni là ḿ gíiǹ Juuda yab bɔtiu kí líí-naaa?»

⁴⁰Niinee ní bi gíti tí bíi tátí yii: «Aayee, á taa gíiǹ úǹ kí líí, see Baaraabaasi ní á gíiǹ kí líí!» Baaraabaasi gbantee mun di nìn sá digaŋgandaan[93].