Read Ntcham Jean 19 Bible Online

Jean 19 - Ntcham bible

Jean 19

¹Niinee ní Piilati dū Yeesu ki tīī bí gbá-u anaalab.

²Soojab nìn dū ikuŋkum ki lùn̄ kibeefuulii ki dūu cíkiǹ Yeesu, ní ki dū dibɔkutil diba dì máǹ cínciŋ[94] ki dūu pēeǹ-u.

³Ní bi sútíi kɔ́l̀-u, ní ki lì yii: «Juuda yab bɔtiu, ti jáaḿ-si!» ní ki fátí-u.

⁴Ní Piilati fātìi tí nyánní, ní ki bí Juuda yab yii: «Kpèèmaan, m làá nyāntiń-ni-u mmɔŋki, ní béé yii man kaa ká kun pu ní kijapaai nee máaǹ ditafadaaldee.»

⁵Ní Yeesu nyáń ki cíkí ikuŋkum fuuliiki ki pēē dibɔkutimandi cínciŋ, ní Piilati bí-bi yii: «Kpèèmaan unil!»

⁶Bisaraaŋakpilib nì bi-pilisibee nín pée ká-uee, ní bi bíi tátí yii: «Bí kpáá-u ndɔpuntikaa pu! Bí kpáá-u ndɔpuntikaa pu!» Ní Piilati bí-bi yii: «Yòom̄maan-u kí cùú kpáá-u nimbi ni-ba ndɔpuntikaa pu, kun puee man kaa ká kun ní u ŋá ki máaǹ ditafadaaldee!»

⁷Ní Juuda yab kíí-u yii: «Timbi marau poonee, u máaǹ ŋkúm, kun puee u bí yii u sá Unimbɔti Jipɔɔn[95].»

⁸Piilati gbìl̄ mimmee, ní tifaandi mɔ̄tìi gíti kɔ́-u,

⁹ní u nín kóò kudiin, ki bālifì Yeesu yii: «A baasii nyánní la ní?» Ní Yeesu kaa kíí-u báà tiba.

¹⁰Ní Piilati bí-u yii: «Man ní saa làá kííii? Aa nyí yii m cáá mpɔn kí gíiǹ-si kí líí, ki cáá mpɔn kí yàntī bí kpáá-si ndɔpuntikaa puɔɔɔ?»

¹¹Ní Yeesu kíí-u yii: «Aa cáá mpɔn ŋubɔ ki kútì ŋun Unimbɔti tīiń-si yilpuee. Míǹ pu ní un dū-mi ki ŋúbíǹ-see kpitii wīikíǹ sii yai.»

¹²Ki yōoǹ ŋyunti gbanti ní Piilati bíi nyàab̀ kí gíiǹ Yeesu kí líí. Ama ní Juuda yab bíi kūuntí ki lì yii: «A yaa gíiǹ kijapaai nee ki líìyee, aa ti sá gɔmina Seesaar bɔɔ! Un kamaa yaa yíì u-ba ubɔtee di sá Seesaar pulincɔnti.»

¹³Piilati gbìl̄ mimmee, ní ki nyántìń Yeesu mmɔŋki ki dɔ́miń ki kāl̀ dibɔsoonjal pu laakin bi yíì ataŋkpee paaŋŋuee, (eebru sooŋyin bi yíì Gabata).

¹⁴An nìn sá kuwiŋkuluu nyɔkɔm ní kutaa ń wúntí Dilákatil jiŋaaliu. Ní u lī Juuda yab yii: «Kpèèmaan, ni-bɔtiu sèé!»

¹⁵Ní bi bíi tátí yii: «Bí kpɔ̀-u, bí kpɔ̀-u, bí kpáá-u ndɔpuntikaa pu!» Ní Piilati bí-bi yii: «Mimmee, ḿ yàntī bí kpáá ni-bɔtiu ndɔpuntikaa puɔɔɔ?» Ní bisaraaŋakpilib kíí-u yii: «Timbi kaa ti cáá ubɔti ubɔ ki kútì Seesaar pu.»

¹⁶Niinee ní Piilati dū Yeesu ki tīī-bi bí cáá-u kí kpáá ndɔpuntikaa pu. Niinee ní bi cáá Yeesu ki búntì.

¹⁷Ní Yeesu yōoǹ u-dɔpuntikaaŋu ki nyánní kitiŋin ki nín cá laakin bi yíì Kuyikpabiku laŋkee, (eebru sooŋyin bi yíì Gɔlgɔta.)

¹⁸Niin ní soojab kpáá Yeesu ndɔpuntikaa pu, ní ki gíti kpáá binib bili ki ŋàl̄-u, ubɔ u-ŋaŋgiil pú, un kíǹee u-ŋaŋgan pú ní úǹ sáká kansikin.

¹⁹Piilati nìn ŋmàn̄ tiŋmaŋmabiti ki tīī bí cáá nákań Yeesu dɔpuntikaaŋu pu. U nìn ŋmàn̄ yii: «Yeesu Naasaareeti yɔu, un sá Juuda yab bɔtiuee.»

²⁰Juuda yab tikpil nìn kàan̄ tiŋmaŋmabiti gbanti, kun puee laakin bi nìn kpáá Yeesuee nìn pìlīǹ kitiŋin, ní bi nìn ŋmàn̄ eebru sooŋyin ki ŋmàn̄ Room sooŋyin ní ki ŋmàn̄ greeki sooŋyin.

²¹Ní Juuda yab saraaŋakpilib bí Piilati yii: «Taa ŋmà yii: <Un sá Juuda yab bɔtiuee>, ŋmà yii: <Uninja nee bí yii úǹ di sá Juuda yab bɔtiu.>»

²²Ní Piilati kíí-bi yii: «Tin tin m ŋmàn̄ee, tíǹ dee.»

²³Bijanjaliibi bin nìn kpáá Yeesu ndɔpuntikaa puee nìn pēetì-u ki yōoǹ u-wampeeŋkaati ki yākatì minaa pu, bi-kɔkɔ yōoǹ diba diba pu. An kíǹ dibɔkutifɔkɔl [96] din bi nìn lùn̄ dicilpu, kaa ŋáĺ ki kpáfì kpáfèe.

²⁴Ní soojabee bíi lì tɔb yii: «Tí taa cátí dibɔkutil gbanti, tí tɔ̄maan kasi kí kpèè ŋma di làá jī díǹ.» Ní bi lafun ŋá míǹ. Min bi ŋá nee nóó nì Unimbɔti bɔti nín nìn sòon̄ ki síiǹ puee, yii: «Bi dū m-wampeeŋkaati ki yākatì, ní ki tɔ́ kasi m-bɔkutifɔkɔl pu[97].» Soojab nín nìn ŋá puee dee.

²⁵Yeesu na nì Yeesu nawaa, nì Maarii Kloopasi nimpuu nì Maarii un sá Magidalaa tiŋkinee di nìn sí ki kɔ́ĺ Yeesu dɔpuntikaaŋu.

²⁶Yeesu ká u-na nì u-boonnooliu un u néeńee yú ki kɔ́ĺ tɔb, ní u bí u-na yii: «M-na, kpèè a-jipɔɔn sèé»,

²⁷ní ki bí u-boonnooliuee mun yii: «Kpèè, a-na sèé.» Ki yōoǹ ŋyunti gbantee ní u-boonnooliuee yōoǹ-u u kíǹ ki bí u-cee.

²⁸Míǹ boonee, Yeesu ká yii kɔŋkɔnnee tikɔkɔ dóòyee, ní u bí yii: «Nnyinnyoo cáá-mi.» An ŋá kii Unimbɔti gbɔŋku nín nìn pée sòon̄ ki síiǹ puee dee[98].

²⁹Dibool diba nìn yú niin, ndamam min gàm̀ee kā poon, ní bi dū kuca ki bɔ́ ndaamee poon[99] ní ki dūu túuń isɔpi kpaŋkpaaŋŋu pu, ní ki cáa gbēē Yeesu nyɔkɔ.

³⁰Yeesu nyùn̄ee ní ki bí yii: «Tikɔkɔ dóò», ní ki tīntì u-yil ní ki dū u-fam ki tīī ki kpíì.

³¹Ŋwìiń bíi jēetí ŋwiŋŋuŋfikaa ń kíĺee, Juuda yab kpilib kaa nìn là bin bi kpááyee wunti ń nīn lúń idɔpuntikaa pu ŋwiin gbanti. Ŋwiŋŋuŋfikaa gbanti nìn sá ŋwiŋkpaan ní, míǹ pu ní bi nìn mēē Piilati yii bí kɔ̄fì bi-taaŋi bí kpú malaa[100], bí cúú-bi kí kpáatí.

³²Niinee soojab dɔ́miń ki kɔ́fì bin bin bi nìn kpáá idɔpuntikaa pu nì Yeesu dicilpuee upeepeekaa nì uliliiti taaŋi.

³³Bi bāań Yeesuee, ní ki ká yii u kpíì dooooyee, míǹ pu ní baa ti kɔ́fì úǹ taaŋi.

³⁴Ama ní sooja ubɔ bi-kansikin dū kikpaŋ ki sāā u-tikindi, ní fatiku nì nnyim nyáń.

³⁵Un bíi lèekī seera tibɔti nee puee baasii ká-tì ní, ní u-seerauee sá ibaamɔn, ní u nyí yii tin u sòoǹee sá ibaamɔn, ni mun ń ŋmā kí fōō kí kíí.

³⁶Tin bí nee ŋá míǹ, án ŋmā kí nóó nì Unimbɔti gbɔŋku nín nìn lī ki síiǹ puee, yii: «Baa làá wīī u-kpabil báà diba[101].»

³⁷Laaba mun gíti lī yii: «Bi làá dāá ká un tikindi bi sāā ki cíl̀ee[102].»

³⁸Míǹ boonee, Jooseefi un sá Arimatee[103] tiŋkinee, cūtì ki mēē Piilati nsan kí yòon̄ Yeesu wunti. - Jooseefi gbanti nìn sá Yeesu boonnooliu ní kaa là binib ń béé, kun puee u nìn fàŋkí Juuda yab. - Ní Piilati pú-u nsan, ní u cūtìi yōoǹ Yeesu wunti.

³⁹Niikoodeem un nìn cūtì dalba kunyeeu ki ká Yeesuee mun dɔ́miń, ki cáań tikaliŋkpun tin bi yíì miiree, tì ŋmàl̄ nì talaalu un bi yíì Alooweesi kiiloobi mmuŋku nì saalaa nyɔkɔm.

⁴⁰Bi yōoǹ Yeesu wunti mimmee, ní ki dū iŋaabu ki fìn̄-u ki dū talaalubee ki yāaǹ u-pu, kii Juuda yab koobiliŋ nín bàlifī bi yaa làá síb́ unil bí ŋá puee.

⁴¹Laakin bi nìn kpáá Yeesuee, bukpaa bubɔ nìn bí niin. Bu-poon ní dikaakupɔndi din ni baa láá síb́ báà ubɔee nìn bí.

⁴²Niin ní bi nìn cáá Yeesu ki síb́ kun puee án nìn sá kutaa ń wúntí Juuda yab wiŋŋuŋfikaaŋuaa, ní dikaakulee mun nìn pìl̄ niin.