Read Ntcham Jean 2 Bible Online

Jean 2 - Ntcham bible

Jean 2

¹Winta dalee, tinimpucan tiba nìn bí Kana, Galiilee timbiliikin. Yeesu na mun nìn bí niin,

²ní bi nìn yíiń Yeesu mun nì u-boonnooliibi bí dāan̄.

³Ndaam dāa dóòyee, ní Yeesu na bí-u yii: «Bi-daam dóòyaa!»

⁴Ní Yeesu kíí-u yii: «M-na, sii di làá tùkù-mi m nín làá ŋá pueeee? Ŋyunti ŋun m làá tɔ̄ m-tundee kaa láá ŋmāntì.»

⁵Niinee ní Yeesu na bí bitɔntɔnliibi bin bí niinee yii: «U yaa bí ní ŋá puee, ŋámaan míǹ.»

⁶Ataŋkpee lɔnti tiluu nìn yú. Niin ní bi nìn jòotī nnyim ki fíntí, kii Juuda yab koobiliŋ nín sá puee. Kulɔŋŋu kamaa nìn fòol̄ nnyim liitirib dilaataal ní.

⁷Ní Yeesu bí bitɔntɔnliibee yii bí lúń nnyim kí gbéeǹ tilɔn gbanti. Ní bi lafun lúń ki gbéeǹ yátí yati.

⁸Niinee ní Yeesu bí-bi yii: «Jōōmaan kí cáá tīī ukpil un kpèé tijinee!» Ní bi jōō ki cáa tīī-u.

⁹Ukpilee dákée, nnyimee kpántì ndaam. Waa nìn nyí laakin ndaamee nyánnée, see bitɔntɔnliibi bin nìn lúń nnyimee di nyí. Niinee ní u yíiń unimpucaan cal,

¹⁰ní ki bí-u yii: «Bi péetí kí cáań ndamɔntiim, ní binib yaa nyùn̄ an nyāatì-bee ní bí nín nyāntiń min kaa mɔ̄tìi mɔ̄ee. Ní sii dū ndamɔntiim ki kpáafì ki dāa cāabìń-mi naŋkɔnampuɔɔɔ?»

¹¹Kana timbiliiki kin bí Galiileeyee ní Yeesu nìn ŋá u-maamaacipeepeekaau ki dàkā u-nyooti, ní u-boonnooliibi fōō-u ki kíí.

¹²Boonee ní u nì u-na nì u-naalib nì u-boonnooliibi nín sìntī Kapeernayum[14], ki kāl̀ niin iwiŋkaaŋkaa iba.

¹³Juuda yab jiŋaaliu un bi yíì Dilákatil jiŋaaliuee nìn tóobińee, ní Yeesu nín cá Jeerusaleem[15].

¹⁴U bàn̄ ki kɔ́ kunimbɔtidiinee ní ki ká bin nyáfí inaa, nì ipii nì abeenanjilee nì binimbikpantiliibi kā[16].

¹⁵Ní u nyàab̄ iŋmii ki dūu ŋá dinaalabil, ní ki jìn̄-bi ki nyántì nì bi-piii nì bi-naai kɔkɔ, ní ki dū binimbikpantiliibi nimbiliŋ ki yàl̄ kitiŋ, ní ki lábitì bi-teebilib ki cìb̄,

¹⁶ní ki bí bin nyáfí abeenanjilee yii: «Nyāntímaan ni-wanti nee doo. Ní taa nín̄ cáá m-Baa diiku ki kpántí kunyɔmpudii!»

¹⁷Niinee ní u-boonnooliibi téetì tibɔti tin bi ŋmàn̄ Unimbɔti gbɔŋkunee, yii: «Ti-Dindaan, m nín mɔ́tí a-diiku nee pu miŋyee di wù m-pɔbilin kii ŋŋmee[17].»

¹⁸Ní Juuda yab kpilib bí-u yii: «Dàkà-ti kudaaŋŋu ní tí béé yii a cáá nsan kí ŋá min a ŋá nee!»

¹⁹Ní Yeesu kíí-bi yii: «Wīīmaan kunimbɔtidii nee, iwiin ita dal m làá fàtīí mā-ku[18].»

²⁰Niinee ní Juuda yab kpilib bí yii: «Bi dū abin imuŋku ili nì aluu ní ki máń kunimbɔtidii nee, nì mana ní sii ŋūǹ kí dū iwiin ita kí fàtīí mā-ku?»

²¹Ama Yeesu nìn sòoǹ u-wunti pu ní ki nántiǹ kunimbɔtidii.

²²Boon u nín dāa fīkitì ditaŋkpiilinee ní u-boonnooliibi téetì yii u nìn lī míǹ, ní ki fōō tin bi nìn ŋmàn̄ Unimbɔti gbɔŋkunee nì Yeesu nín sòon̄ tin u-fìkititam puee ki kíí.

²³Yeesu nín nìn bí Jeerusaleem Dilákatil jiŋaaliu yuntiŋuee ní binib tikpil kántì maamaacib bin u ŋáańee ní ki fōō-u ki kíí.

²⁴Ama Yeesu kaa nìn máká bi-pu. Di sá yii u nyí bi-kɔkɔ nín sá biŋyee.

²⁵Waa nyàab̀ ubɔ ń tùkù-u kun bi sée, kun puee u nyí tin bí unil pɔbilinee.