Read Ntcham Jean 20 Bible Online

Jean 20 - Ntcham bible

Jean 20

¹Ŋwiŋŋuŋfikaa jítì kutaa wúntì, kutaafaau pɔ̀lpɔl an dáá bɔ̀ǹee, Maarii un sá Magidalaa tiŋkinee nín cá dikaakul laŋki, ní ki ká yii ditaŋkpal din bi nìn dūu pīiǹ dikaakul nyɔkɔ puee kaa ti pīī.

²Ní u fātìi sáǹ, ki cūtì Siimɔn Peetroo nì Yeesu boonnooliu un u néeńee cee, ní ki bí-bi yii: «Bi cúú ti-Dindaan ki lēē dikaakulin. Taa nyí laakin bi cáá-u ki ŋée!»

³Ní Peetroo nì uboonnool un béeyee nín cá dikaakul laŋki.

⁴Bi-liitil kɔkɔ nìn sáń ki cá, ní uboonnool un béeyee sáǹ ki jítì Peetroo pu, ki péé ki bàn̄ dikaakul laŋki malaa.

⁵U gbóońee, ki ká iŋaabu dɔ̄, ama waa kɔ́.

⁶Boonee ní Siimɔn Peetroo mun bāań ki nín kóò dikaakul poon, ní ki ká iŋaabu in nìn fìn̄ Yeesu wuntee dɔ̄ kitiŋ

⁷nì ŋŋaabu ŋun nìn fìn̄ u-yilee. Ŋŋaabu gbanti nì in nìn fìn̄ u-wuntee kaa nìn dɔ̄ dibɔɔbaantiil, ŋúǹ nìn póob́ ki dɔ̄ ŋkpaanceeti laaba.

⁸Niinee ní Yeesu boonnooliu un nìn péé péé ki bàn̄ee mun kɔ́, ki ká, ní ki fōō ki kíí yii u fīkitì.

⁹Ama Yeesu boonnooliibi kaa nìn dáá gbìl̄ Unimbɔti gbɔŋku nín lī yii Yeesu máaǹ kí fìkitī ditaŋkpiilinee taapu[104].

¹⁰Niin ní bi fātì ki nín gítí bi-dumpu.

¹¹Maarii nìn yú ki kɔ́ĺ dikaakul ki sūǹ. U yú ki sūǹee, ní ki gbóoń ki kpēē dikaakul poon,

¹²ní ki ká Unimbɔti tuuŋyi ili kā laakin bi nìn bíl̀ Yeesu wuntee ki pēē tiwampin. Ŋubɔ kā u-yil laŋki, ní ŋun kíǹee mun kā u-taaŋi laŋki.

¹³Ní ituunee bālifì-u yii: «Unimpuee, ba ŋá ní a sūǹ?» Ní u kíí-i yii: «Bi yōoǹ m-Dindaan. Maa nyí laakin bi dū-u ki ŋée!»

¹⁴U lī mimmee, ki fātèe ki ká Yeesu yú, ama waa béè yii an sá Yeesu.

¹⁵Ní Yeesu bālifì-u yii: «Unimpuee, ba ŋá ní a sūǹ ní? Ŋma ní a nyàab̀ ní?» Unimpuee nyí kii bukpaadaan di bíi bàlifī-u, míǹ pu ní u bí yii: «Ukpil, sii di yaa yōoǹ-u, dàkà-mi laakin a cáá-u ki ŋée, m làá cùú yòon̄-u».

¹⁶Ní Yeesu yíiń-u yii: «Maarii!» Ní u fātìi u-ba ki túĺ-u ní ki lī-u nì eebru sooŋyin yii: «Rabuunii!» - An taapu sá yii, Ukpil. -

¹⁷Ní Yeesu bí-u yii: «Taa gbēē-mi, di sá yii maa láá jɔ́m̀ m-Baa cee. Ama nín̄ cá kí tùkù m-nabiyaamu yii m nín jɔ́ḿ m-Baa un sá ni-Baayee, m-Nimbɔtiu un sá ni-Nimbɔtiuee cee.»

¹⁸Niinee Maarii Magidalaa yɔu nín cá u-boonnooliibi cee ki tùkū-bi yii: «M ká ti-Dindaan!» Ní ki dū tin u tùkū-uee ki lī.

¹⁹Ŋwiŋŋuŋfikaa jítì, ku wúntì kujoouee ní Yeesu boonnooliibi kpáfì ki kā kudii kubɔn ki pīiǹ mpunyɔmu nì saafii, kun puee bi fàŋkí Juuda yab kpilib. Ní Yeesu cílìń, ki dɔ́miń ki yúl̀ bi-kansikin, ní ki bí-bi yii: «Ni-pɔbiliŋ ń nīn sɔ̀m̀!»

²⁰U bíi sòoǹ mimmee, ní ki dàkā-bi u-ŋalii nì u-takakal. U-boonnooliibi nín ká ti-Dindaan mimmee, ní an mɔ́ɔkiǹ-bi tikpil.

²¹Ní Yeesu gíti lī-bi yii: «Ni-pɔbiliŋ ń nīn sɔ̀m̀! Kii m-Baa nín túnní-mi puee, ma mun tú nimbi.»

²²U lī mimmee, ní ki púfì bi-pu, ní ki bí yii: «Fōōmaan Unimbɔti Fam.

²³Ni yaa dū bin kpitii ki pú-bee, bi làá ká bi-kpitii pɔ̄tam. Ni yaa kaa dū bin kpitii ki pú-bee, baa làá ká bi-kpitii pɔ̄tam[105].»

²⁴Ama ŋyunti ŋun Yeesu dɔ́mińee, Toomasi un bi gíti yíì Ata ki sá Yeesu kpambaliŋ saalaa nì alee kansikin dibee, nìn kpá.

²⁵Ní u-boonnooliibi bin nìn bée bí-u yii: «Ti ká ti-Dindaan!» Ní Toomasi kíí-bi yii: «M-nimbiliŋ yaa kaa ká u-ŋalii laakin bi kpááyee, m yaa kaa dū m-ŋambiki ki bɔ́ laakin bi kpááyee, ki yaa kaa dū m-ŋal ki bɔ́ u-takakal laakin bi nìn sāāyee, maa làá fōō kí kíí.»

²⁶Iwiin inii boonee, Yeesu boonnooliibi fātìi kpáfì kudiin. Toomasi mun nìn bí bi-kansikin. Bi dū mpunyɔmu ki pīiǹ ki kpàl̄, ama ní Yeesu cílìń bi-kansikin, ní ki bí-bi yii: «Ni-pɔbiliŋ ń nīn sɔ̀m̀!»

²⁷Ní u bí Toomasi yii: «Dāá kpèè m-ŋalii, kí cáań a-ŋambiki kí máań! Cáań a-ŋal kí máań m-takakal, kí fōō kí kíí, kí taa nín̄ gíti kpākantí!»

²⁸Niinee ní Toomasi ń bí-u yii: «M-Dindaan, m-Nimbɔtiu!»

²⁹Ní Yeesu kíí-u yii: «A nín ká-mee ní a nín fōō ki kííyaa! Bin kaa ká-mi ki fōō ki kííyee bí mmɔnneeee[106]!»

³⁰Yeesu nìn ŋáaǹ maamaacib tikpil u-boonnooliibi kansikin bin ní baa ŋmàn̄ ki ŋá kugbɔŋu nee poonee.

³¹Bi yaa ŋmàn̄ tin bí neeyee, an sá ní fōō kí kíí yii Yeesu sá Unimbɔti Jipɔɔn ki sá Meesiya. Ni yaa fōō-u ki kíí mimmee, ní ká dimaŋfal u-yindi pu.