Read Ntcham Jean 3 Bible Online

Jean 3 - Ntcham bible

Jean 3

¹Uninja ubɔ nìn bí, bi yíì-u Niikoodeem. U nìn bí Fariisab jandi pú ní ki sá Juuda yab kpiliu ubɔ.

²Ukpilee nìn dɔ́miń Yeesu cee kunyeeu kubɔ ní ki bí-u yii: «Ukpil, ti nyí yii Unimbɔti di túnní-si á dāan̄ kí dàkà-ti. Di sá yii, Unimbɔti yaa kaa bí unil cee, waa ŋūǹ kí ŋá maamaacib kii bin a ŋáań nee.»

³Ní Yeesu kíí-u yii: «Ibaamɔn ní m tùkù-si, Unimbɔti yaa kaa fātìi màl̄ unil mpɔm, u kpá kí ká Unimbɔti Beel.»

⁴Ní Niikoodeem bālifì-u yii: «Mimmee, mana ní bi gíti ŋūǹ kí màal̀ unil un púĺee mpɔm? Unil ŋūǹ kí fàtīí gíti kɔ́ u-na poon bí màal̀-uaaa?»

⁵Ní Yeesu gíti bí-u yii: «Ibaamɔn, ibaamɔn ní m tùkù-si, ubɔ kaa ŋūǹ kí kɔ́ Unimbɔti Beelin bi yaa kaa fātìi màl̄ udaan mpɔm nì nnyim nì Unimbɔti Famin.

⁶Bin binib màal̀ee di sá nnibiyaamu, ní bin Unimbɔti Fam màal̀ee mun sá ŋfam.

⁷M nín bí yii: <Ni-kɔkɔ máaǹ Unimbɔti ń fàtīí màal̀-ni mpɔmee>, án taa bàkatīǹ-si.

⁸Kubuŋu jītí ki cá laakin pú ku yaa lèe, ní a gbìl̀ ku-wooku pu ní kaa nyí laakin pú ku nyáńeeyaaa, kaa nyí laakin pú ku cée mun, míǹ ní an ŋáań bin kɔkɔ Unimbɔti Fam màal̀ee.»

⁹Ní Niikoodeem bí-u yii: «Mana ní an ŋūǹ kí ŋá míǹ?»

¹⁰Ní Yeesu fātìi kíí-u yii: «Sii un sá udakakpaan ki dàkà Isirayeel yabee di kaa nyí tin bí neeee?

¹¹Ibaamɔn, Ibaamɔn ní m tùkù-si nee, ti sòoǹ nì ni tin ti nyée nì tin ti kée, ní naa là kí fōō tin ti lèe.

¹²M sòon̄ nì ni taapu doo bɔti tin báà ŋma nyée, ní naa là kí fōō kí kíí, kin m yaa láa póotì ki bíi sòoǹ yilpu bɔti tin naa wāĺee, ni dāa ŋáań mana kí fōō tíǹ kí kíí?

¹³Báà ubɔ kaa láá pée jɔ́m̀ yilpu, asee man Kinibiki kin nyánní yilpu ki sīntìńee[19].

¹⁴«Kii Mooyiisi nín nìn lúntì kukoonaŋu ndɔ pu kuteeun[20] binib kpèé ki pɔ́ɔkée, míǹ mbaantiim ní bi làá dāá dū man Kinibiki kí lúntí yilpu,

¹⁵án nín làá ŋá pu un sá kamaa yaa láa fōō-mi ki kííyee ń dāá ká dimaŋfal din kaa cáá dikúntilee.

¹⁶Kun puee Unimbɔti néeń kitiŋ pu nib kɔkɔ tikpil, míǹ pu ní u dū u-Jipɔmbaabil ki tīī, án nín làá ŋá pu un sá kamaa yaa fōō-u ki kííyee ń taa kpú, ama ú ká dimaŋfal din kaa cáá dikúntilee.

¹⁷Unimbɔti nín túnní u-Jipɔɔn duulinyan doo nee, an kaa sá u là kí kpɔ̀ binib bɔti, ama u là bi-kɔkɔ ń ká difiil u-Jipɔɔn pu ní.

¹⁸Unimbɔti kaa dāa gíti kù bin fōō u-Jipɔɔn gbanti ki kííyee bɔti, ama un kaa fōō-u ki kííyee bɔti kpíì, u nín kaa fōō Unimbɔti Jipɔmbaabil ki kííyee pu.

¹⁹Kun cāabìń dibɔkpilee sèé: di sá yii ŋwalifee dɔ́miń duulinyan doo, ní binib là dibɔmbɔndi, kaa là ŋwalifi, kun puee bi tūǹ atuŋkpiti.

²⁰Un sá kamaa yaa ŋáań ikpitee ná ŋwalifi ní kaa cá ŋwalifin, kun puee u fàŋkí yii ŋwalifi làá bìitī u-tuŋkpitiŋ pu.

²¹Ama un nóó ibaamɔnee cá Unimbɔti walifiŋun ní bí ká yii Unimbɔti pu ní u tūǹ atummɔnti.»

²²Míǹ boonee ní Yeesu nì u-boonnooliibi búntì Juudee watil pú ki kāl̀ niin ki fùul̀ binib Unimbɔti nyim.

²³Yoowaneesi mun nìn bí Eenoon, Saaliim caŋin, ki fùul̀ binib Unimbɔti nyim, kun puee nnyim nìn dɔ̄ niin tikpil. Niin ní binib nìn cá bi fùul̀-bi.

²⁴Ŋyunti gbantee, baa láá cúú Yoowaneesi ki pīiǹ kudii[21].

²⁵Niinee ní Yoowaneesi boonnooliibi biba nì Ujuudaja ubɔ bíi kpákà bi-marab bin sá yii bí nīn fíntí bi-ba ki kpáaǹ tiwan kɔkɔee pu.

²⁶Ní bi cūtì Yoowaneesi cee ki bí-u yii: «Ukpil, sii nì un nìn bí Jɔɔdan gbandi lapu puee, un pu a nìn sòon̄ yii u sá unikpaanee, báà ŋma di yíkí sii cee ki cá u-cee u fùul̀-bi Unimbɔti nyimee.»

²⁷Ní Yoowaneesi kíí-bi yii: «Unil kaa ŋūǹ kí nīn cáá tiba Unimbɔti yaa kaa tīī-u kudɔŋu.

²⁸Nimbi ni-ba ni gbìl̄ m nín nìn lī yii: <Man di kaa sá Meesiya, bi túnní man ń lìntīń u-nyɔkɔpuee[22].>

²⁹Un cáá unimpucaanee, unimpucaan cal dee, ama unimpucaan cal bɔɔ bí niin ki pílifí u-bɔɔ neen, ní an mɔ̄ǹ-u tikpil. An mɔŋŋuee di sá man yɔŋu nee.

³⁰An máaǹ úǹ nyooti ń nīn wīintí ní man yati ń nīn bàtī!»

³¹Di sá un nyánní yilpuee di tɔ́kɔ́ tikɔkɔ pu. Un bí taapu dooyee di sá taapu yɔu ní ki sòoǹ taapu doo bɔti. Un nyánní yilpu ki tɔ́kɔ́ tikɔkɔ puee

³²di sòoǹ tin u kée nì tin u gbìl̄ee, ní báà ubɔ kaa fōō u-bɔti ki kíí.

³³Un di yaa fōō u nín lī puee ki kííyee, udaan dàkà yii Unimbɔti sá mbaamɔndaan dee,

³⁴kun puee un Unimbɔti túnnée sòoǹ Unimbɔti bɔti ní. Di sá Unimbɔti tìì-u u-Fam ní an kaa cáá bí dūú ŋmàntī.

³⁵Unimbɔti néeń u-Jipɔɔn ki dū tikɔkɔ ki ŋá u-ŋaan.

³⁶Un yaa fōō u-Jipɔɔn gbanti ki kííyee kāntí dimaŋfal din kaa cáá dikúntilee. Un yíì kaa fōō-u ki kííyee kaa kāntí dimaŋfal gbanti. Unimbɔti ŋuul làá nīn pée dàn̄ udaan pu ní.