Read Ntcham Jean 4 Bible Online

Jean 4 - Ntcham bible

Jean 4

¹Yeesu béè yii Fariisab gbìl̄ yii u kíǹ ki fùul̀ binib tikpil Unimbɔti nyim ki jítiǹ Yoowaneesi ní bi kpántí u-boonnooliibee,

²- ama an kaa nìn sá Yeesu u-ba di nìn fùul̀-bi nnyim, an sá u-boonnooliibi di nìn fùul̀-bi. -

³Ní u yíkì Juudee ki nín gítí Galiilee.

⁴Kí wàatī kí nín bà Galiileeyee, see ú dī Samaarii watil pú.

⁵Ní u dūu bàn̄ Samaarii tiŋki kin bi yíì Siikaar, kì pìlīǹ Jaakɔb saaku kun u nìn tīī u-jipɔɔn Jooseefee[23].

⁶Niin ní Jaakɔb lɔkɔu bí. Yeesu cōom̀ ki gīīyee, ki kāl̀ lɔkɔee nyɔɔgbandi pu. An nìn ŋmāntì awinsaan.

⁷U kēe ní Usamaariinimpu ubɔ dɔ́miń kí lúń nnyim, ní Yeesu bí-u yii: «Pɔ̄-mi nnyim ḿ nyɔ̀.»

⁸- Di sá yii u-boonnooliibi nìn búntì kitiŋin kí nyàabìń tijin. -

⁹Ní unimpuee kíí-u yii: «Sii sá Ujuudaja ní, ba pu ní a mèé man un sá Usamaariinimpuee nnyim?» - Di sá yii Juuda yab nì Samaarii yab kaa nìn kpí[24]. -

¹⁰Ní Yeesu bí-u yii: «A yaa bàà nyí Unimbɔti pɔ̄tam nì man un mèé-si nnyimee, sii gba di bàà làá mèè man nnyim, ní man ń bàà tīī-si nnyim min tìì dimaŋfalee.»

¹¹Ní unimpuee bí-u yii: «Ukpil, aa cáá guuka, lɔkɔ mun di nyóòyee, kin a làá ŋá mana kí kánní nnyim min tìì dimaŋfalee gbanti?

¹²Ti-naanja Jaakɔb di nìn gbìn̄-ti lɔkɔ nee, ki nyùn̄ u-ba lɔkɔ gbanti nyim, ki kpáaǹ u-biyaamu nì u-waŋkuti. Mimmee, sii dàkafī yii a jítiǹ Jaakɔbaaa?»

¹³Ní Yeesu fātìi kíí-u yii: «Un sá kamaa yaa nyùn̄ nnyim neeyee, nnyinnyoo làá gíti cúú udaan.

¹⁴Ama un yaa nyùn̄ nnyim min man tììyee, nnyinnyoo kaa ti cútí udaan jaanjaan, kun puee nnyim min man tììyee kpántí nnyimbul u-pɔbilin, ní ki kíǹ ki pùub̀ ki tìì-u dimaŋfal din kaa cáá dikúntilee[25].»

¹⁵Ní unimpuee bí-u yii: «Ukpil, yaa sée tīī-mi a-nyim gbanti ḿ nyɔ̀, nnyinnyoo ń taa ti cúú-mi, ḿ taa nín̄ gíti dòoń doo ki lúù nnyim.»

¹⁶Ní Yeesu bí-u yii: «Cùú yíiń a-cal kí fàtīí gítiń doo!»

¹⁷Ní u kíí-u yii: «Maa cáá cal.» Ní Yeesu bí-u yii: «A cáá nsan kí lì yii saa cáá cal,

¹⁸kun puee a mɔ́ǹ bininjab biŋmoo dee ki yíkì, ní un cee a bí kɔŋkɔnnee mun kaa tí sá a-cal. Míǹ puee, a sòon̄ a-baamɔŋyi ní.»

¹⁹Ní unimpuee bí yii: «Ukpil, kɔŋkɔnnee m ká yii a baasii sá Unimbɔti bɔnaatiliu ní.

²⁰Di sá ti-naanjab nìn jáaḿ Unimbɔti dijool nee pu ní, ní nimbi Juuda yab bí yii Jeerusaleem ní bi máaǹ kí cùú jāam̀ ti-Baa Unimbɔti.»

²¹Ní Yeesu bí-u yii: «Unimpuee, á pīlifiǹ-mi! Ŋyunti ŋubɔ dòoń an kaa dāa gíti bàlifī yii unil ń cù dijool nee puɔɔɔ, Jeerusaleem ní kí jāam̀ Unimbɔti.

²²Nimbi Samaarii yab, naa nyí kun ni jáaḿee, ama timbee ti nyí un ti jáaḿee, kun puee Unimbɔti dū difiil ki dīń Juuda yab pu ní[26].

²³Kɔŋkɔnnee, ŋyunti ŋubɔ dòoń, ŋu bāań gba, ŋun ni ní bin jáaḿ ti-Baa Unimbɔti mmɔntiiminee làá nīn jáaḿ-u nì Ŋfamin nì ibaamɔn. Kun puee bin jáaḿ-u mimmee ní ti-Baa Unimbɔti nyàab̀.

²⁴Unimbɔti sá Ŋfam ní: míǹ puee, bin jáaḿ-uee máaǹ kí jāam̀-u nì ŋfamin nì ibaamɔn.»

²⁵Ní unimpuee bí-u yii: «M nyí yii Meesiya - an dàkà yii Kriisitoo - làá dāan̄. Úǹ yaa láa bāańee, ní u làá tùkù-ti tikɔkɔ.»

²⁶Ní Yeesu bí-u yii: «An sá man un bíi sòoǹ nì si nee di sá Kriisitoo.»

²⁷Niinee ní Yeesu boonnooliibi bāań, ní an ŋá-bi bitii bi nín ká u nì unimpu bíi sòoǹee, ama baa bālifì yii: «A là ba u-cee?» àá «A sòoǹ nì u tilati?»

²⁸Niinee ní unimpuee yāntì u-nyimbool ki fātìi nín gítí kitiŋin ki tùkū binib yii:

²⁹«Dāá kpèèmaan uninja ubɔ bīitì m-bɔɔŋŋi pu! An kaa kalin sá Meesiya?»

³⁰Ní bi yíkìń kitiŋin ki nín dòoń Yeesu cee.

³¹Unimpuee búntèe, ní u-boonnooliibi bíi lì yii: «Ukpil, dāá jī tijin!»

³²Ní u bí-bi yii: «Man cáá tijin tin nimbi kaa nyée.»

³³Niinee ní u-boonnooliibi kíǹ ki bíi bàlifī tɔb yii: «Ubɔ kalin cáań-u tijin níii?»

³⁴Ní Yeesu bí-bi yii: «M-jinti di sá ḿ ŋá un túnní-mee nín là puee, kí tɔ̄ u-tundi.

³⁵Kéè, ni cáá yii an kíǹ iŋmal inaa dee, kudiceeuaa! Ama man tùkù-ni yii ní wáaǹ kí kpèè, tijin kūń ki ŋmāntì dical.

³⁶Kii un cēēyee nín kōontí ki kpáfí ki fòol̄ u-paati puee, míǹ mbaantiim ni mun cáaḿmaan binib m-cee ḿ tīī-bi dimaŋfal din kaa cáá dikúntilee. Ní án mɔ̄ɔkiǹ un búĺee nì un cáńee kɔkɔ.

³⁷Kun puee dilaŋkpandi din lì yii: <Ubɔ būul̀ ní ubɔ ń dāá cēe> sá tiŋman ní.

³⁸Míǹ puee, m tú-ni ní cùú cā laakin biba búĺee ní, nimbi ń páatí bíǹ gìńdi pu.»

³⁹Unimpuee nín tùkū-bi yii Yeesu bīitì u-bɔɔŋŋi puee, ní Samaarii yab bin kóò kitiŋ gbantinee tikpil fōō Yeesu ki kíí.

⁴⁰Samaarii yab gbanti nín dāa bāań ki ká-uee, ní bi mēē-u yii ú kàl̄ bi-cee, ní u lafun kāl̀ iwiin ili.

⁴¹Binib tikpil nìn gíti fōō-u ki kíí tin u nìn sòon̄ nì bee pu.

⁴²Ní binibee lī unimpuee yii: «Ti nín fōō ki kíí nee, an kaa ti sá sii nín lī puee ŋmaniŋma pu. U sòon̄ ti mun ti-ba gbìl̄ ki béè yii, ibaamɔn, u sá duulinya kɔkɔ Fiiliu.»

⁴³Iwiin ili gbanti boonee, Yeesu yíkì niin ki nín cá Galiilee.

⁴⁴Kun puee úǹ u-ba nìn lī yii: «Unimbɔti bɔnaatiliu dumpu yab kaa tɔ́-u[27].»

⁴⁵U nín bàn̄ Galiileeyee, niin yab fōō-u tiŋan, kun puee bi nìn cūtì Jeerusaleem ki ká u nín nìn ŋá tin kɔkɔ jiŋaalinee.

⁴⁶Ní u fātìi gítì Kana, Galiilee timbiliiki, laakin u nìn dū nnyim ki kpántì ndaamee. Gɔmina kàlinjakpaaŋwu ubɔ nìn bí Kapeernayum u-jipɔɔn būǹ.

⁴⁷U nín gbìl̄ yii Yeesu nyánní Juudee ki dɔ́miń Galiileeyee, ní u dɔ́miń u-cee ki gbāam̀-u ú cù Kapeernayum kí cáaǹ u-jipɔɔn un būǹ ki làá kpúee.

⁴⁸Ní Yeesu bí-u yii: «Ni yaa kaa ká maamaacib nì tidaandi, naa fòol̄ kí kíí!»

⁴⁹Ní ukàlinjakpaanee bí-u yii: «Ukpil, dāan̄ tí cù malaa, m-biki ń taa kpú!»

⁵⁰Ní Yeesu kíí-u yii: «Nín̄ cá, a-jipɔɔn pɔ́ɔkì.» Uninjee fōō Yeesu nín lī puee ní ki nín cá.

⁵¹U bí nsanni ki fàtīi kùǹee, ní u-tɔntɔnliibi biba túŋkìń-u ki tùkū-u yii: «A-jipɔɔn pɔ́ɔkì.»

⁵²Ní u bālifì-bi yii: «Ŋyunti ŋulɔŋu ní an yāntì-u?» Ní bi kíí-u yii: «Fool, wiŋkpooti kukúluu kubɔ, ní an cāntì-u, u-wunti kaa ti tùm̀.»

⁵³Niinee ní u béè yii kukúluu gbanti deedee ní Yeesu tùkū-u yii: «A-jipɔɔn pɔ́ɔkì». Ní u nì u-dicaŋku kɔkɔ fōō Yeesu ki kíí[28].

⁵⁴Yeesu nín yíkì Juudee ki fātì Galiileeyee, maamaacililiiti un u ŋée dee.