Read Ntcham Jean 5 Bible Online

Jean 5 - Ntcham bible

Jean 5

¹Boonee ní Yeesu nín jɔ́ḿ Jeerusaleem kun puee Juuda yab nìn cáá jiŋaal ubɔ.

²Dinyimbɔbil diba nìn bí Jeerusaleem, kadantikub biŋmoo māntìi tú-dì, bi yíì-dì eebru sooŋyin yii Beeteesda, di bí ki nákáǹ kipunyɔkɔ kin bi yíì ipii punyɔkɔkee.

³Bijɔfub nì bideembi nì bifaliŋfaambi nì bibunliibi tikpil nìn dɔ̄ kadantikub taapu. [Bi nìn cí ŋyunti ŋun Unimbɔti tuuŋŋu làá dāan̄ kí gbàtī nnyimee.

⁴Di sá ntuunee nìn dòoń ŋyunti ŋyunti ki gbàtī nnyim. Ŋu yaa gbātì míǹ, ní un yaa péé péé ki kɔ́ee kāntí dicáaǹdi, báà an yaa yāntì ki sá iween iŋyee[29].]

⁵Uninja ubɔ nìn bí niin ki būǹ doooo abin ali kpá imuŋku ili.

⁶Yeesu ká u dɔ̄ee, ní ki béè yii u būǹee an yúntì, ní u bālifì-u yii: «A là kí pɔ̄ɔkàaa?»

⁷Ní ubunlee kíí-u yii: «Ukpil, bi yaa gbātì nnyimee, maa cáá ubɔ ń yòon̄-mi kí tɔ̄ niin. Ŋyunti ŋun m bíi pɔ̄ɔntí ki cée ní ubɔ ń péeǹ-mi kí cùú jēetí.»

⁸Niinee ní Yeesu bí-u yii: «Yīkìí yūĺ kí yòon̄ a-kampeeku kí còom̀!»

⁹Kpalaa niinee ní uninjee pɔ́ɔkì ki yōoǹ u-kampeeku ki kíǹ ki bíi còom̄. An nìn sá ŋwiŋŋuŋfikaa dal ní.

¹⁰Míǹ pu ní Juuda yab kpilib nìn bí uninja un ká dicáaǹdee yii: «Díǹ di sá ŋwiŋŋuŋfikaa dal. Aa cáá nsan kí bùkun̄ a-kampeeku[30].»

¹¹Ní u kíí-bi yii: «Un cáaǹ-mee di bí-mi yii ḿ yòon̄ m-kampeeku kí nīn còom̄.»

¹²Ní bi bālifì-u yii: «Ŋma di bí-si yii á yòon̄ a-kampeeku kí nīn còom̄aaa?»

¹³Uninjee kaa nìn nyí un di cáaǹ-uee, di sá yii Yeesu nìn nyáń kunipaau kansikin ki búntì.

¹⁴Boonee ní Yeesu dāa ká uninjee kunimbɔtidiin ní ki bí-u yii: «A nín pɔ́ɔkì pu nee, á taa ti ŋá ikpiti, án nín làá ŋá pu tiba ń taa láa gíti bàń-si kí jītíǹ tin bí neeyee!»

¹⁵Niinee, uninjee cūtìi tùkū Juuda yab kpilib yii an sá Yeesu di cáaǹ-u.

¹⁶Míǹ pu ní Juuda yab nìn nyáń Yeesu pu u nín ŋá míǹ ŋwiŋŋuŋfikaa dalee pu.

¹⁷Ní Yeesu kíí-bi yii: «M-Baa tūǹ ditundi baabadal, míǹ ní ma mun tūǹ.»

¹⁸Tibɔti tin u lēe puee, Juuda yab kpilib mɔ̄tìi bíi nyàab̀ kí kpɔ̀-u. An kaa sá u nín yīntì mara un sá bí taa tɔ̄ ditundi ŋwiŋŋuŋfikaayee ŋmaniŋma pu, an sá u nín lī yii Unimbɔti di sá u-Baayee, ki cáá u-ba ki ŋmàntīǹ Unimbɔtee pu.

¹⁹Niinee ní Yeesu bí-bi yii: «Ibaamɔn, ibaamɔn ní m sòoǹ nì ni, tin Ubaati ŋáańee ní u-Jipɔɔn kāntí ki ŋáań. An yaa sá fám, waa ŋūǹ kí ŋá tiba u-ba pu. Tin kɔkɔ Ubaati ŋáańee, u-Jipɔɔn mun ŋáań míǹ mbaantiim ní.

²⁰Kun puee Ubaati néeń u-Jipɔɔn, ní ki dàkà-u tin kɔkɔwoooo u ŋáańee. U làá dāá gíti dàkà-u tin jítiǹ tin bí neeyee gba, án làá ŋá-ni maamaaci.

²¹Kii Ubaati nín fìkitī bitaŋkpiibi ki tìì-bi dimaŋfal puee, míǹ mbaantiim ní u-Jipɔɔn mun tìì un un u yaa lèe dimaŋfal.

²²Ubaati kaa sòoǹ báà ubɔ bɔti. U dū ibɔsoon kɔkɔ ki ŋá u-Jipɔɔn ŋaan ní,

²³án nín làá ŋá pu binib kɔkɔ ń nīn tìì-u jilma kii bi nín tìì Ubaati puee. Un kaa tīī Ubaati Jipɔɔn jilmee kaa tīī Ubaati un túnní-uee mun jilma dee.

²⁴«Ibaamɔn, ibaamɔn ní m tùkù-ni, un yaa pílifì m-bɔti ki fōō un túnní-mee ki kííyee kāntí dimaŋfal din kaa cáá dikúntilee. Udaan kaa dāa gíti bí ibɔsoon ni, u nyáń ŋkúmin ki póotì dimaŋfalin.

²⁵Ibaamɔn, ibaamɔn ní m tùkù-ni, ŋyunti ŋubɔ dòoń, ŋu bāań gba, ŋun ni bitaŋkpiibi làá gbìl̄ Unimbɔti Jipɔɔn neenee, ní bin yaa láa gbìl̄ u-neen gbantee dāa kāntí dimaŋfal.

²⁶Ubaati nín cáá mpɔn kí tīī dimaŋfal puee, míǹ ní u tīī u-Jipɔɔn mpɔn u mun ń nīn tìì dimaŋfal,

²⁷ní ki tīī-u mpɔn ú nīn sá ubɔsoonli kun puee u sá Kinibiki.

²⁸Tin bí nee kɔkɔ ń taa bàkatīǹ-ni, kun puee ŋyunti ŋubɔ dòoń ní bin kɔkɔ dɔ̄ akaakul poonee làá dāá gbìl̄ u-neen pu

²⁹kí nyānní. Bin yaa ŋá tiŋanee ń fìkitī kí ká dimaŋfal, ní bin yaa ŋá ikpitee ń fìkitī kí kɔ́ ibɔsoon ni[31].

³⁰Maa ŋūǹ kí ŋá tiba m-ba. M-bɔsooŋyi nóó nì un túnní-mee nín tùkù-mi puee ní. M sòoǹ tibɔti deedee kun puee maa nyàab̀ kí ŋá min man m-ba lèe, see un túnní-mee nín là puee.

³¹M yaa sòon̄ tiba m-ba pu, an kaa ŋūǹ kí dàkà ibaamɔn,

³²ama ubɔ di lèekī m-pu seera, ní m nyí yii tin u sòoǹ m-puee sá ibaamɔn.

³³Ni nìn tú binib Yoowaneesi cee ní u sòon̄-ni ibaamɔn m-pu.

³⁴Kun pu m lì mimmee di sá m là ní ká difiil, an yaa sá fám, maa nyàab̀ ubɔ ń lēē m-pu seera.

³⁵Yoowaneesi nìn sá fitila ní ki ŋmíntí nyáka nyaka, ní ni nìn kíí ki nóó u-walifiŋu gbanti ŋyunti ŋubɔ poon, ní an mɔ̄ǹ-ni.

³⁶Ama m cáá kun lèekī m-pu seera ki jítiǹ Yoowaneesee: di sá yii atuun ŋin m-Baa tīī-mi ḿ tɔ̄ m bíi tūnnèe sòoǹ ki dàkà m-pu yii m-Baa di lafun túnní-mi.

³⁷Ní m-Baa un túnní-mee mun u-ba lèekī seera m-pu. Naa láá pée gbìl̄ u-neen pu dalba, kaa láá ká u-nimbiin dalba,

³⁸kaa kpáafí u-bɔti mun ni-ni, kun puee naa fōō un u túnnée ki kíí.

³⁹Ni bífí Unimbɔti gbɔŋku poon ki dàkafī yii niin ní ni ŋūǹ kí ká dimaŋfal din kaa cáá dikúntilee. An sá man pu ní kugbɔŋuee sòoǹ,

⁴⁰ama naa là kí dāan̄ man cee kí ká dimaŋfal.

⁴¹«Man kaa nyàab̀ binib pampakaku,

⁴²di sá yii m nyí-ni, naa cáá Unimbɔti neendi ni-ni.

⁴³M-Baa di túnní-mi, ní naa là kí fōō-mi, ama bin dòoń bi-ba puee, ni fòol̄ bíǹ.

⁴⁴Mana ní ni ŋūǹ kí fōō kí kíí, nimbi bin néeń ni-jutiibi ń nīn pàkà-nee, kaa nyàab̀ kupampakau kun Unimbɔtibaanti tììyee?

⁴⁵Ní taa dàkafì yii man làá dāá bàlifì-ni tibɔti m-Baa nimbiin. An sá Mooyiisi di làá dāá bàlifì-ni tibɔti[32], úǹ un pu ni dū ni-mákal ki ŋée.

⁴⁶Ni yaa bàà fōō Mooyiisi ki kííyee, ni bàà tí fòol̄ ma mun ní kí kíí, di sá yii man bɔti ní Mooyiisi nìn ŋmàn̄[33].

⁴⁷Ni nín kaa fōō tin Mooyiisi nìn ŋmàn̄ee ki kííyee, ni làá ŋá mana kí fōō man bɔti kí kíí?»