Read Ntcham Jean 6 Bible Online

Jean 6 - Ntcham bible

Jean 6

¹Míǹ boonee ní Yeesu dūtì Galiilee mɔɔgbandi lapu pu - bi gíti yíì dimɔɔlee yii Tiibeeriyaadi mɔɔl. -

²Kunipaau nín kántì u ŋáaǹ maamaacib bin ki cáaǹ bibunliibee puee ní bi nìn nóó-u.

³Ní u nì u-boonnooliibi jɔ́m̀ digbantandi diba pu ki kāl̀.

⁴Juuda yab jiŋaaliu un bi yíì Dilákatil jiŋaaliuee nìn tóobiń.

⁵Yeesu kpēēyee, kunipaau di dòoń u-ceeyee, ní u bí Fiiliipi yii: «La ní ti làá ká tijin kí dā kí tīī bin kɔkɔ bí nee ń jī dee?»

⁶- Ama Yeesu nìn nyí min ní u làá ŋée, u nìn pée lī míǹ kí kpèè yii Fiiliipi làá kíí-u yii ba ní. -

⁷Ní Fiiliipi kíí-u yii: «Báà ti yaa dū animbil jitɔmbi[34] alaataa ali ki dá kpɔnɔb, an kaa làá bà bi-kɔkɔ kikatii kikatii gba.»

⁸Ní u-boonnooliibi kansikin ubɔ, Siimɔn Peetroo naal un bi yíì Andreeyee, bí-u yii:

⁹«Kinaacimpɔmbiki kiba bí doo ki cáań ɔɔji yim kpɔnɔb biŋmoo nì ijɔm ili. An kaa nín ŋūǹ kí ŋá kunipaau nee tiba ní[35].»

¹⁰Ní Yeesu bí-bi yii: «Yàntīmaan binib ń kàl̄!» Kumɔsɔŋu kubɔ nìn bí niin tikpil, ní bi kāl̀ ku-pu. Bi nìn bàn̄ kii kutukub biŋmoo nyɔkɔm.

¹¹Ní Yeesu yōoǹ kpɔnɔbee ki jáam̀ Unimbɔti an pu ki wāatì ní ki dūu yākatì-bi, ní ki tí yākatì ijɔm mun, min báà ŋma lèe.

¹²Bi jíń ki díkée, ní u bí u-boonnooliibi yii: «Tòòmaan akati ŋin kíǹee, tiba ń taa bīil̀!»

¹³Bi kóoǹ kpɔnɔb biŋmooyee katiŋi ŋin bi nìn ŋmɔ́ ki kíǹee, ki gbéeǹ tikabiti saalaa nì tili.

¹⁴Yeesu ŋá maamaaci gbanti samaa kée, ní bi bí yii: «Tilafuŋman, kijapaai nee di sá Unimbɔti bɔnaatiliu un máaǹ kí dāan̄ duulinyanee.»

¹⁵Yeesu béè yii bi làá cúú-u mpɔn kí kàan̄ dibeelee, ní u fātìi tí nín jɔ́ḿ digbantandi pu u-baba.

¹⁶Kujoou jóotèe ní Yeesu boonnooliibi nín sìntī dimɔɔlin

¹⁷ki kɔ́ buŋalimbu ki fātìi nín cá Kapeernayum watil. Kunyeeu mun nìn mɔ́ Yeesu kaa láá bāań bi-cee.

¹⁸Kubuŋkpaaŋŋu kubɔ kíĺ ki bíi jītí ki yòontí tinyiŋgban.

¹⁹Bi nín ŋàal̄ ki bàn̄ ataŋkpee aŋmoo kii aluu nyɔkɔmee, ní ki ká Yeesu nín tɔ́kɔń nnyim pu ki còomìń ki dòoń buŋalimbu ceeyee, ní bi fāŋkì.

²⁰Ní Yeesu bí-bi yii: «Taa fàŋkìmaan, an sá man!»

²¹Niinee ní bi bí yii bí kpáaǹ-u, kpalaayee, buŋalimbu mun pūtì dūu sāā dimɔɔgbandi laakin bi cée.

²²Kutaa wúntèe, kunipaau gbíntìi kā dimɔɔgbandi lapu pu. Bi nìn ká yii buŋalimbaantiibu di yú niin, ní Yeesu kaa kɔ́ buŋalimbu gbanti, u-boonnooliibi ŋmaniŋma di kɔ́ ki búntì.

²³Ama iŋaliŋfi iba nìn nyánní Tiibeeriyaadi tiŋkin ki bāań laakin ti-Dindaan nìn mēē ki pàkā Unimbɔti ki wāatì ní bi nín ŋmɔ́ kpɔnɔbee caŋin.

²⁴Kunipaauee nín kaa ká Yeesu kaa ká u-boonnooliibi muee ní bi kɔ́ iŋaliŋfee ki búntì Kapeernayum kí nyàab̀ Yeesu.

²⁵Bi bàn̄ niin ki ká-uee, ní ki bí yii: «Ukpil, ŋyunti ŋulɔŋu ní a bāań doo ní?»

²⁶Ní Yeesu bí-bi yii: «Ibaamɔn, ibaamɔn ní m tùkù-ni, ni nín ŋmɔ́ kpɔnɔb ki díkée pu ní ni nyàab̀-mi, kaa sá maamaacib bin dàkā-ni m nín sá uŋyee pu.

²⁷Ní taa nín̄ tūǹ ditundi tijin tin kaa yúntée pu, nín̄ tūm̀maan tijin tin yúntí ki tìì dimaŋfal din kaa cáá dikúntilee pu. Tijin gbantee, man Kinibiki di làá tīī-ni tíǹ, di sá yii man ní m-Baa Unimbɔti tīī an pɔŋŋu daaŋku.»

²⁸Niinee ní bi bālifì-u yii: «Ti máaǹ kí ŋá mana ní án nīn sá min Unimbɔti lèe ní?»

²⁹Ní Yeesu kíí-bi yii: «Unimbɔti nín là miŋyee di sá ní fōō man un u túnnée kí kíí.»

³⁰Ní bi bí-u yii: «Maamaaci ulɔu ní a làá dàkà-ti kí wàatī ní tí nín fōō-si kí kíí ní? Àá kudaaŋŋu kulɔkɔ ní a làá ŋá tí ká?

³¹Ti-naanjab nìn jīǹ tijin tin bi yíì maanee kuteeun, kii an nín ŋmàn̄ Unimbɔti gbɔŋku poon puee, yii: <U nìn tìì-bi tijin tin nyēeń yilpuee ní bi jīǹ[36].>»

³²Niinee ní Yeesu kíí-bi yii: «Ibaamɔn, ibaamɔn ní m tùkù-ni, an kaa sá Mooyiisi di tīī-ni tijin tin nyēeń yilpuee, m-Baa di tìì tijimmɔntiil tin nyēeń yilpuee.

³³Tijin tin Unimbɔti tììyee di sá un nyánní yilpu ki tìì binib kɔkɔ dimaŋfalee.»

³⁴Ní bi bí-u yii: «Ukpil, nín̄ pée tìì-ti tijinee baabadal!»

³⁵Ní Yeesu bí-bi yii: «Man di sá tijin tin tìì dimaŋfalee. Un yaa dɔ́miń m-ceeyee, ŋkùm kaa ti cútí udaan jaanjaan, míǹ ní un yaa tí fōō-mi ki kííyee, nnyinnyoo kaa ti cútí udaan jaanjaan.

³⁶Ama, m pée tùkū-ni: ni-nimbiliŋ ká tin m ŋée ní naa fōō-mi ki kíí.

³⁷Bin bin m-Baa tīī-mee kɔkɔ làá dāan̄ m-cee. Un di yaa dɔ́miń m-ceeyee, maa làá fá udaan,

³⁸kun puee m nyánní yilpu ki dɔ́miń kí ŋá un túnní-mee nín là puee ní, an kaa sá man m-ba nín là puee.

³⁹Un túnní-mee nín là puee di sá ḿ taa fá bin u tīī-mee kansikin báà ubɔ kí dāá fìkitī bi-kɔkɔ ŋwinjoolkaa dal.

⁴⁰M-Baa nín là min miŋyee sèé, yii un sá kamaa yaa ká man u-Jipɔɔn ki fōō-mi ki kííyee ń ká dimaŋfal din kaa cáá dikúntilee, ní man ń dāá fìkitī-u ŋwinjoolkaa dal.»

⁴¹Yeesu nín lī yii úǹ di sá tijin tin nyánní yilpuee pu ní Juuda yab bíi gbùkum̄ u-pu

⁴²ki lì yii: «An kaa sá Yeesu, Jooseefi jipɔɔn un timbi nyí u-baa nì u-neeee[37]? Kin an ŋá mana ní u gíti lì yii úǹ di nyánní yilpu ní?»

⁴³Ní Yeesu kíí-bi yii: «Ní taa nín̄ gbùkum̄ ni-ŋmaniŋma míǹ!

⁴⁴Ubɔ kaa ŋūǹ kí dāan̄ m-cee an yaa kaa sá m-Baa un túnní-mee di cáań udaan, kí wàatī ní man ń nín fìkitī-u ŋwinjoolkaa dal.

⁴⁵Kii Unimbɔti bɔnaatiliibi nín ŋmàn̄ puee yii: <Unimbɔti làá dàkà bi-kɔkɔ bí béé-u[38].> Mimmee, bin kɔkɔ yaa pílifì m-Baa ki fōō u nín dàkà puee dòoń man cee ní.

⁴⁶Báà ubɔ kaa ká m-Baa Unimbɔti, asee man un nyánní u-ceeyee, man baba di ká-u.

⁴⁷«Ibaamɔn, ibaamɔn ní m tùkù-ni, un yaa fōō-mi ki kííyee cáá dimaŋfal din kaa cáá dikúntilee.

⁴⁸Man di sá tijin tin tìì dimaŋfalee.

⁴⁹Nì min kɔkɔ ni-naanjab nìn ŋmɔ́ maana kuteeunee, boonee bi dāa kpíì.

⁵⁰Ama tijin tin nyánní yilpuee, un yaa jíń tintee kaa ti kúù jaanjaan.

⁵¹Man di sá tijin tin nyánní yilpu ki cáá dimaŋfalee. Un yaa jíń tijin gbantee làá nīn bí kí nīn cá jaanjaan. Tijin tin m làá tīī binib kɔkɔ ń nīn cáá dimaŋfalee di sá m-wunti.»

⁵²Niinee ní Juuda yab bíi kpákà bi-ŋmaniŋma tikpil yii: «Nì mana ní u ŋūǹ kí tīī-ti u-wunti tí ŋmɔ́ míǹ?»

⁵³Ní Yeesu fātìi bí-bi yii: «Ibaamɔn, ibaamɔn ní m tùkù-ni, ni yaa kaa ŋmɔ́ man Kinibiki wunti, kaa nyùn̄ m-fatikuu muee, naa làá ká dimaŋfal.

⁵⁴Ama sii un yaa ŋmɔ́ m-wunti ki nyùn̄ m-fatikuuee ká dimaŋfal din kaa cáá dikúntilee, ní ḿ dāá fìkitī-si ŋwinjoolkaa dal.

⁵⁵Kun puee m-wunti di sá tijimmɔntiil ní m-fatikuu mun sá tinyɔkaal tin sá timɔntiilee.

⁵⁶Un yaa ŋmɔ́ m-wunti ki nyùn̄ m-fatikuuee bí m-ni ní ma mun bí udaan ni.

⁵⁷M-Baa un túnní-mee nín cáá dimaŋfal puee ní u-puee ma mun cáá dimaŋfal. Míǹ ní un yaa fōō-mi ki jíńee mun kāntí dimaŋfal man pu.

⁵⁸Tijin tin nyánní yilpuee nín bí puee dee. Tíǹ kaa bí kii tin ni-naanjab nìn jíń, boonee ki dāa kpíìyee. Sii un di yaa jíń tijin gbantee làá nīn kíǹ ki bí kí nīn cá jaanjaan.»

⁵⁹Tin tin Yeesu nìn sòon̄ Kapeernayum kpafidiikun ki dàkā binibee dee.

⁶⁰Yeesu boonnooliibi tikpil nín gbìl̄ tibɔti gbantee, ní bi bíi lì yii: «Tibɔti nee pɔ̄ɔ̄ tikpil! Ŋma di ŋūǹ kí pīlifì-tì?»

⁶¹Yeesu béè yii u-boonnooliibi bíi gbùkum̄ tibɔti gbanti puee ní u bālifì-bi yii: «Tibɔti gbanti páb́-ni níii?

⁶²Mimmee, ni yaa láa ká man Kinibiki fātìi jɔ́ḿ laakin m nìn pée bíńee fáà[39]?

⁶³Unil nì u-pɔ́ɔǹtam kɔkɔ sá fám ní, see Ŋfam di tìì dimaŋfal din kaa cáá dikúntilee. Míǹ ní m-bɔti tin m sòon̄ nì nee sá Unimbɔti Fam ní ki sá dimaŋfal.

⁶⁴Ama ni-kansikin biba bí, kaa fōō ki kíí.» Kun di yì-tì Yeesu sòon̄ mimmee di sá u nìn pée nyí bin kaa fōō ki kííyee doooo ŋkilkaamin, nì un làá dāá dū-u kí tīī binannanliibee.

⁶⁵Ní u lī-bi yii: «Míǹ pu ní m tùkū-ni yii ubɔ kaa ŋūǹ kí dāan̄ m-cee an yaa kaa tin sá m-Baa Unimbɔti di cáań-u.»

⁶⁶Ki yōoǹ an yuntiŋu ní Yeesu boonnooliibi tikpil yíì, kaa ti nóó-u.

⁶⁷Niinee ní Yeesu bí u-kpambaliŋ saalaa nì alee yii: «Kin nimbi fáà, ni mun kaa làá nīn cáaa?»

⁶⁸Ní Peetroo kíí-u yii: «Ti-Dindaan, sii di cáá tibɔti tin tìì dimaŋfal din kaa cáá dikúntilee. Ŋma cee ní ti làá gíti cù?

⁶⁹Timbi fōō sii ní ki kíí, ní ki nyí yii sii di sá Circirdaan un nyánní Unimbɔti ceeyee[40].»

⁷⁰Niinee ní Yeesu bí yii: «Man di kaa nìn lēē-ni binib saalaa nì bilaaa? Ama ni-kansikinee, ubɔ sá Sitaan ní!»

⁷¹Juudasi un sá Siimɔn Isikaariyɔti jipɔɔnee pu ní u nìn sòon̄ míǹ. Di sá yii nì min kɔkɔ Juudasi mun nìn sá u-kpambaliŋ saalaa nì alee kansikin dibee, úǹ di làá dū-u kí ŋúbíǹ binannanliibi.