Read Ntcham Jean 7 Bible Online

Jean 7 - Ntcham bible

Jean 7

¹Míǹ boonee, Yeesu nìn kíǹ ki bíi yìiǹ Galiilee timmun, kaa là kí yìiǹ Juudee watil, kun puee Juuda yab yidambi nìn nyàab̀ kí kpɔ̀-u.

²Juuda yab jiŋaaliu un bi yíì Tibìń jiŋaaliuee[41] tóobińee,

³ní Yeesu naalib bí-u yii: «Yīkì doo kí nīn cá Juudee, án nín làá ŋá pu a-boonnooliibi mun ń tin ká atuun ŋin a tūǹee.

⁴Unil yaa là bí ká-uee, waa gíti tūǹ u-tuuŋŋi dibalin, míǹ puee, tɔ̄ a-tuuŋŋi gbanti báà ŋma ń ká.»

⁵Di sá yii Yeesu naalib mun gba kaa nìn là kí fōō-u kí kíí.

⁶Niinee ní Yeesu kíí-bi yii: «An yaa sá nimbee, iyunti kɔkɔ pée ŋān̄ ki tīī-ni ní, man yuntiŋu kaa láá bāań.

⁷Duulinya yab kaa ŋūǹ kí nīn ná nimbi, ama bi ná man, kun puee man sòoǹ yii tin bi ŋáańee sá atuŋkpiti.

⁸Nimbi nín̄ cámaan jiŋaal gbanti. Man kaa làá cù. Di sá yii m-yuntiŋu kaa láá ŋmāntì.»

⁹U lī-bi mimmee, ní ki gbíntìi kā Galiilee.

¹⁰U-naalib búntì jiŋaal gbanti, boonee ní u mun dāa dī dibalin ki cūtì, kaa là bí ká-u.

¹¹Jiŋaal gbantinee, Juuda yab kpilib nìn nyàab̀-u ki bàlifī tɔb yii: «U nín bí la dee?»

¹²Ní binib tikpil nìn lɔ́kɔfí Yeesu bɔti pu samaa kansikin, biba bí yii: «U sá unimɔnti.» Ní biba mun bí yii: «Waa sá unimɔnti, u sá uŋmatinli ní.»

¹³Míǹ puee, ubɔ kaa nìn sòoǹ mpɔn, di sá yii bi nìn fàŋkí Juuda yab kpilib.

¹⁴Bi jíń jiŋaal ki kɔ́ kansikinee, ní Yeesu nín jɔ́ḿ kunimbɔtidiin ki cūtìi bíi dàkà binib.

¹⁵Juuda yab kpilib nìn bākatì sèeee, ní ki bíi lì yii: «An ŋá mana ní unil nee nyí Unimbɔti gbɔŋku míǹ, úǹ un kaa ŋá an sukuliuee[42]?»

¹⁶Ní Yeesu bí-bi yii: «M-dàkatam nee nyēeń un túnní-mee cee ní, an kaa sá man m-ba dàkatam.

¹⁷Un yaa là kí ŋá min Unimbɔti lèe, udaan làá béé m-dàkatam nee yaa nyēeń Unimbɔti ceeyaaa, an yaa tí sá man m-ba pɔŋŋu pu ní m sòoǹ.

¹⁸Un sòoǹ u-ba bindi puee nyàab̀ kí yòon̄ u-ba yilpu ní, ama un nyàab̀ kí yòon̄ un túnní-uee yindi yilpuee di cáá ibaamɔn, nnyimɔn kpá udaan úǹ ni.

¹⁹Mooyiisi di nìn tīī-ni marab àá an kaa sá míǹ? Kin, ba ŋá ní ni-kansikin báà ubɔ kaa tɔ́ marab gbanti?

²⁰Ba di yì-tì ní ni là kí kpɔ̀-mi?» Ní samaayee bí-u yii: «Arasinii kā a-pu níii? Ŋma di là kí kpɔ̀-si ní?»

²¹Ní Yeesu kíí-bi yii: «Ditumbaantiil din m ŋá ŋwiŋŋuŋfikaa dalee pu ní ni kɔkɔ bākatì nee.

²²Ama ni kíikí ki gífí ni-biyaamu akpancan ŋwiŋŋuŋfikaa dal, kun puee Mooyiisi di nìn tīī-ni mara gbanti[43]. - Ama an kaa nìn sá Mooyiisi di náanní, doooo ni-naanjab ní an nìn kíliń. -

²³Ni nín kaa là kí yìntī Mooyiisi marabee puee, ní ni gífí ŋwiŋŋuŋfikaa dal. Mimmee, ba pu ní ni fōō man pu diŋuul yii m cáaǹ uninja ubɔ weeŋyi kɔkɔ ŋwiŋŋuŋfikaa dal?

²⁴Ní taa pɔ̀ digàndi ama ní tɔ́kɔń ibaamɔn pu kí sòoǹ nì deedee[44].»

²⁵Niinee ní Jeerusaleem yab biba bíi lì yii: «An kaa sá un bi là kí kpɔ̀ee deeee?

²⁶Kin, an ŋá mana ní u yú ki tɔ́ u-ba mpaampiin pu doo ki sòoǹ, ubɔ kaa bíi lì-u tiba! Àá biyidambi kalin béè yii úǹ di sá Meesiya ní?

²⁷Ama uninja nee úŋ̀wuee, ti nyí laakin u nyánnée, an yaa sá Meesiyayee, ubɔ kaa dāa béetí laakin ní úǹ sée.»

²⁸Ŋyuntee, Yeesu nìn bí kunimbɔtidiin ki dàkà, ní ki téeń mpɔn yii: «Ni nyí-mi, ki nyí laakin mun m sée yaa! Maa dɔ́miń m-ba pu, un sá ibaamɔndaanee di túnní-mi, ní naa nyí-u.

²⁹Ama man nyí-u, kun puee u-cee ní m nyánní, úǹ di túnní-mi.»

³⁰Niinee ní bi bíi nyàab̀ kí cúú-u, ama báà ubɔ ŋal kaa máań u-pu, kun puee u-yuntiŋu kaa láá bāań.

³¹Samaa kansikinee, binib tikpil nìn fōō-u ki kíí, ní ki lì yii: «Mimmee, Meesiya yaa láa bāańee, u dāa ŋūǹ kí ŋá maamaacib kí jītíǹ kijapaai nee deeee?»

³²Fariisab nín gbìl̄ samaa bíi sòoǹ Yeesu pu míǹ bi-ŋmaniŋmee, ní bi nì bisaraaŋakpilib tú soojab ń cù kí cúuń-u.

³³Ní Yeesu tùkū-bi yii: «Ŋyunti fiii ní m làá gíti ŋá ni-kansikin, ní kí nīn gítí un túnní-mee cee.

³⁴Di sá yii ni làá dāá nyàab̀-mi, kaa làá dāá ká-mi, kun puee naa làá dāá ŋmā kí dāan̄ laakin m làá nīn bée.»

³⁵Niinee ní Juuda yab kpilib bíi bàlifī tɔb yii: «La ní u kalin nín cá ní ki nín tùkù-ti yii taa làá ŋmā kí ká-u ní? Àá, u làá kalin cù Juuda yab bin yàl̄ ki kɔ́ Greeki yab timmunee cee kí dàkà Greeki yab Unimbɔti bɔti ní?

³⁶U nín bí yii: Ni làá nyàab̀-mi, kaa làá ká-mi, ki gíti lī-ti yii: Naa làá ŋmā kí dāan̄ laakin m làá nīn bée, taapu nín sá yii ba dee?»

³⁷Ŋwiin ŋun jiŋaal kúntée bɔti di nìn páb́[45]. Ŋwiin gbanti ní Yeesu nìn yúl̀ samaa kansikin ki téeń yii: «Un ní nnyinnyoo yaa cááyee ń dāan̄ m-cee kí nyɔ̀!

³⁸Un di yaa fōō-mi ki kííyee, nnyim min tìì dimaŋfalee làá kpántí mbun kí nīn pùub̀ udaan pɔbilin, kii Unimbɔti gbɔŋku poon an nín ŋmàn̄ ki síiǹ puee[46].»

³⁹Bin fōō Yeesu ki kííyee nín làá fōō Unimbɔti Fam miŋyee pu ní Yeesu nìn bíi sòoǹ nì bi. Ŋyunti gbantee, Unimbɔti Fam kaa láá dɔ́miń kun puee Yeesu kaa nìn dáá fōō u-nyooti.

⁴⁰Kunipaauee kansikin biba gbìl̄ an nyɔɔbuŋŋee, ní ki bí yii: «Unil nee lafun sá Unimbɔti bɔnaatiliu un ti cée ní!»

⁴¹Ní biba mun bí yii: «Úǹ di sá Meesiya!» Ní biba mun gíti bí yii: «Meesiya ŋūǹ kí nyānní Galiileeee?

⁴²Ama Unimbɔti gbɔŋku tùkù-ti yii Meesiya làá dāá nīn sá Daafiidi maaliŋun, ní ki sá Beetileem, kitiŋ kin ni Daafiidi nìn sée[47].»

⁴³Yeesu puee kunipaauee nìn cúu yākatì mili.

⁴⁴Ní bi-kansikin biba bàà nìn là kí cúú-u, ama báà ubɔ ŋal kaa máań u-pu.

⁴⁵Soojab nín fātìi gítì bisaraaŋakpilib nì Fariisab ceeyee, ní bi bālifì soojabee yii: «Ba ŋá ní naa cáań-u ní?»

⁴⁶Ní soojab kíí-bi yii: «Doooo nee, taa láá ká ubɔ sòoǹ kii kijapaai nee!»

⁴⁷Ní Fariisab fātìi bí soojabee yii: «Ni mun yāntì u kíil̀-ni naaa?

⁴⁸Ni ká biyidambi kansikin ubɔ àá Fariisab kansikin ubɔ fōō-u ki kííii?

⁴⁹An sá binifantantiibi bin kaa nyí Unimbɔti marab ki sá mbusudambee, bíǹ di fōō-u ki kíí.»

⁵⁰Niikoodeem un nìn cūtìi ká Yeesu ŋyunti ŋubɔee mun nìn ŋmàl̄ Fariisab kansikin. Úǹ di bí yii:

⁵¹«Ti-marab poonee, an pú-ti nsan tí kpɔ̀ unil bɔti fám, kaa bālifì-u ki béè kun u ŋéeee[48]?»

⁵²Ní bi kíí-u yii: «A mun sá Galiilee níii? Nyàab̀ Unimbɔti gbɔŋku poon kí kpèè! Aa làá ká bi ŋmàn̄ laaba yii Unimbɔti bɔnaatiliu ubɔ nyánní Galiilee.» [

⁵³Niinee ní bi-kɔkɔ yāaǹ ki nín kùn̄ bi-dumpui.