Read Ntcham Jean 9 Bible Online

Jean 9 - Ntcham bible

Jean 9

¹Dalba Yeesu jītée, ní ki ká ujɔfu ubɔ. Bi nìn pée màl̄-u nì ijɔfi ní.

²Ní u-boonnooliibi bālifì-u yii: «Ukpil, ba pu ní bi màl̄ kijapaai nee nì ijɔfi ní? Úǹ u-ba di ŋá ikpiti naaa, u-baa nì u-na di ŋá ikpiti ní[56]?»

³Ní Yeesu kíí-bi yii: «An kaa sá úǹ di ŋá ikpitaaa, an kaa tí sá u-baa nì u-na di ŋá ikpiti, ama an sá Unimbɔti ń dī u-pu kí dàkà u-tundi, an pu ní bi màl̄-u míǹ.

⁴Ŋwìiń nín dáá bí pu nee, tí tɔ̄ un túnní-mee tundi, kun puee kunyeeu làá mɔ́ ubɔ kaa dāa gíti ŋūǹ kí tɔ̄ ditundi.

⁵M nín dáá bí duulinyan doo nee, man di sá ŋwalifi ki tīī duulinya.»

⁶Yeesu lī mimmee, ní ki tíil̀ timɔtan[57] kitiŋ ní ki dū u-ŋambiki ki mɔ́ǹ ntam ki dūu ŋmītì ujɔfuee nimbiliŋ,

⁷ní ki bí-u yii: «Nín̄ cá Siiloowee nyimbɔbilin[58] kí fíntí a-nimbiin.» - Siiloowee taapu di sá yii: «Bi túnní-u.» - Ujɔfuee nìn búntì kí fíntí u-nimbiin. U dāa fātìi gítìńee, u kíǹ ki wāĺ ní.

⁸Ní u-kɔŋkɔnnaatɔb nì bin nìn kāntí u kàal̀ ki mèé animbilee bíi lì yii: «An kaa sá kijapaai nee di nìn kàal̀ doo ki mèé ki jīǹeeee?»

⁹Ní biba bí yii: «Tiŋman, an sá úǹ!» Ní bin kíǹee bí yii: «An kaa sá úǹ, bi náań ní.» Niinee ní un nìn sá ujɔfuee bí yii: «Tiŋman, an sá man!»

¹⁰Ní bi bālifì-u yii: «Kin, an ŋá mana ní a wál̀?»

¹¹Ní u kíí-bi yii: «Kijapaai kin bi yíì Yeesuee di sɔ̄ŋkì ntam ki ŋmītì m-nimbiliŋ ní ki bí yii ḿ nīn cá Siiloowee kí fíntí m-nimbiin. M nín cūtì ki fíntì m-nimbiinee, ní m wál̀.»

¹²Ní bi bālifì-u yii: «Kijapaayee bí la?» Ní u kíí-bi yii: «Maa nyí u-laŋki.»

¹³Ní bi yōoǹ kijapaai kin nìn sá ujɔfuee ki cáa cūnnì Fariisab cee.

¹⁴An nìn sá ŋwiŋŋuŋfikaa dal ní Yeesu nìn sɔ̄ŋkì ntam ki ŋúbitì ujɔfuee nimbiliŋ.

¹⁵Míǹ pu ní Fariisab mun bālifì kijapaayee yii: «An ŋá mana ní a wāĺ kɔŋkɔnnee ní?» Ní u kíí-bi yii: «U sɔ̄ŋkì ntam ki dūu ŋmītì m-nimbiliŋ, ní m cūtìi fíntì m-nimbiin ní ki kíǹ ki wāĺ kɔŋkɔnnee.»

¹⁶Ní bi-kansikin biba bíi lì yii: «U nín kaa nyí ŋwiŋŋuŋfikaa nee, kijapaayee kaa sá Unimbɔti niliu.» Ní biba mun lī yii: «Unikpiti mun ŋūǹ kí ŋá maamaacib yéèee?» An di nìn cáań diyakatil bi-kansikin.

¹⁷Niinee ní bi fātìi bālifì un nìn jɔ̀b̄ee yii: «Un ŋúbitì a-nimbiliŋee, sii nyí yii u sá ŋma ní?» - Ní u kíí-bi yii: «U sá Unimbɔti bɔnaatiliu ní.»

¹⁸Juuda yab kpilibee kaa nìn fōō ki kíí yii kijapaayee nìn sá ujɔfu ní ki wál̀ kɔŋkɔnnee, an pu ní bi tú ki yíiń u-baa nì u-na

¹⁹ki bālifì-bi yii: «Ni-jipɔɔn baasii sɔ̀ɔɔ? Ni lafun màl̄-u nì ijɔfaaa? Ní an ŋá mana ní u wāĺ kɔŋkɔnnee?»

²⁰Ní u-baa nì u-na kíí-bi yii: «Tiŋman, ti-jipɔɔn dee, ti lafun màl̄-uee u sá ujɔfu ní.

²¹Ama taa nyí an nín ŋá pu ní u wāĺ kɔŋkɔnneeyee, kaa tí nyí un di yāntì u wál̀ee mun. Ní bàlifìmaan-u, kun puee u cíkitì ki ŋūǹ kí sòoǹ u-ba.»

²²Kun pu u-baa nì u-na nìn sòon̄ mimmee di sá bi nìn fāŋkì Juuda yab tindaŋkpilib, kun puee bi nìn sòon̄ ki yóoǹ yii un yaa pée lī yii Yeesu sá Meesiyayee, bí jà-u kukpafidiin ú taa ti nín̄ bí bi-kansikin.

²³Kun yì-tì u-baa nì u-na nìn bí yii u cíkitì ki ŋūǹ kí kíí u-ba, bí bàlifì-uee dee.

²⁴Niinee ní bi gíti tí yíiń kijapaai kin nìn jɔ̀b̄ee nliliitiim, ní ki bí-u yii: «Á pàkà Unimbɔti! Ama timbi nyí yii uninjee sá unikpiti ní.»

²⁵Ní u kíí-bi yii: «U yaa sá unikpitaaa, u yaa kaa sáaa, maa nyí, kun m nyée di sá m nìn sá ujɔfu ní kɔŋkɔnnee m wāĺ.»

²⁶Ní bi gíti bālifì-u yii: «U ŋá-si mana naaa? Mana ní u ŋúbitì a-nimbiliŋ ní?»

²⁷Ní u kíí-bi yii: «M pée tùkū-ni ní naa pílifiǹ-mi. Ba pu ní ni là ḿ gíti bùsì kí lì nliliitiim? Àá ni mun là kí kpántí u-boonnooliibi ní?»

²⁸Niinee ní bi bíi sìí-u yii: «Sii di sá kijapaai gbanti boonnooliu, ama timbi sá Mooyiisi boonnooliibi ní.

²⁹Kun puee, ti nyí yii Unimbɔti nìn sòon̄ nì Mooyiisi, ama un bí nee úŋ̀wuee, taa kpáàa nyí laakin gba ní u yaa nyánnée.»

³⁰Ní kijapaayee kíí-bi yii: «Tin sá maamaacee sɔ̀. Nimbi kaa nyí laakin u nyánnée, u mun di ŋúbitì man nimbiliŋ.

³¹Ti nyí yii Unimbɔti kaa pílifíǹ binikpitib, ama un yaa tɔ́-u ki ŋáań min min ní u lèe, udaan ní u pílifíǹ[59].

³²Doooo nee, taa láá gbìl̄ dalba dalba yii ubɔ ŋúbitì unil un bi màl̄ nì ijɔfee nimbiliŋ.

³³An niliuee yaa kaa nyánní Unimbɔti cee, waa ŋūǹ kí ŋá míǹ.»

³⁴Ní bi kíí-u yii: «Sii pée sá unikpiti doooo a-na poon ní bi nín màl̄-si, ní sii là kí dàkà timbaa!» Niinee ní bi jìn̄-u ki nyántì.

³⁵Yeesu gbìl̄ yii bi jìn̄ un nìn sá ujɔfuee. U dāa ká-uee ní ki bí-u yii: «A fōō Kinibiki ki kííii?»

³⁶Ní u kíí-u yii: «Ukpil, úǹ di sá ŋma ní ḿ fōō-u kí kíí ní?»

³⁷Ní Yeesu bí yii: «A wāĺ-uaa! Úǹ di bíi sòoǹ nì si nee.»

³⁸Ní u bí yii: «M-Dindaan, m fōō-si ki kíí,» ní ki tātìi gbāaǹ Yeesu nimbiin ki jáam̀-u.

³⁹Ní Yeesu bí yii: «M dɔ́miń duulinya nee ni ibɔsoon ní. Bin yaa jɔ̀b̄ee ń wāl̀ ní bin wāĺee ń jɔ̀b̄.»

⁴⁰Fariisab biba nìn bí niin. Bi gbìl̄ an nyɔɔbuŋŋee, ní ki bālifì-u yii: «Mimmee, ti mun sá bijɔfub deeyaaa?»

⁴¹Ní Yeesu kíí-bi yii: «Ni yaa bàà sá bijɔfubee, naa bàà cáá ikpiti. Ama ni nín bí yii ni wāĺee puee, ni-kpitii làá nīn pée dī-ni ní.»