Read Ntcham Actes 10 Bible Online

Actes 10 - Ntcham bible

Actes 10

¹Uninja ubɔ nìn bí Seesaaree, bi yíì-u Kɔɔrneeyi. U nìn sá usoojakpil disoojakitil din bi yíì Italii yalee kansikin.

²Uninja gbanti nìn nóó Unimbɔti ki sá unimɔnti, u nì u-dicaŋku kɔkɔ nìn fàŋkí Unimbɔti. U nìn pūǹ Juuda yab wɔfib tiwan ní ki mèé Unimbɔti baabadal.

³Dalbee, an cá kii tikúti titee, u ká Unimbɔti tuuŋŋu kpìrrr, ŋu kóoń u-cee ní ki bí-u yii: «Kɔɔrneeyi!»

⁴Tifaandi nìn kɔ́-u, ní u kíǹ ki bíi kpèé Unimbɔti tuuŋŋu, ní ki bí yii: «Ba ŋá ní, m-Dindaan?» Ní ntuun bí-u yii: «A-wimmeem nì a nín pūǹ tiŋyee bàn̄ Unimbɔti, ní u téetì a-pu.

⁵Tɔ̄ bininjab kɔŋkɔnnee Joopee bí yíiń un bi yíì Siimɔn ki páaǹ-u diyindi yii Peetrooyee.

⁶U bí ugbanjɔb un bi yíì Siimɔŋyee cee, un diiku bí tiŋku caŋinee.»

⁷Ŋyunti ŋun ntuun ŋun nìn dɔ́miń ki sòon̄ nì Kɔɔrneeyee búntèe, ní u yíiń u-tɔntɔnliibi bili nì sooja ubɔ un nìn bí u-cee ki fàŋkí Unimbɔtee.

⁸U nìn máafì-bi tibɔtee ní ki dū-bi ki tú Joopee.

⁹Kutaa wúntèe, bi bí nsanni ki tóob́ kitiŋ gbantee, Peetroo jɔ́m̀ kudii yilpu kuwiŋkuluu yuntiŋu kí mèè.

¹⁰Ŋkùm nìn cúú-u, u bàà là kí jī. Ŋyunti ŋun bi bíi ŋáań-u tijinee, ní an ŋá-u kii ŋgeemee.

¹¹Ní kutagbɔŋu pīitì, ní u ká tiwan tiba bí kii satakpaanee bi bóob́ ajannaatil pu ki sīntìń kitiŋ u-nimbiin.

¹²Tiwan tin còom̄ ataa anaayee nì tin fùee nì nnɔmbiyaamu kɔkɔ nìn kā satee poon,

¹³ní nneen ŋubɔ bí-u yii: «Peetroo, yīkìm̄ kí kpɔ̀ kí ŋmɔ́!»

¹⁴Ní Peetroo bí yii: «Aayee, m-Dindaan! Maa láá pée jíń tijin tin kòóyee àá tin kaa bí circiree[63].»

¹⁵Ní an gíti sòon̄ nì u nliliitiim yii: «Tin tin Unimbɔti ŋáŋkèe, sii ń taa lī yii taa ŋān̄[64]!»

¹⁶An jítì míǹ diba dibee mita pu, ní tiwanee fātìi nín jɔ́ḿ yilpu.

¹⁷Peetroo bākatì ki kíǹ ki bíi dàkafī tin tin u bàà wál̀ee taapuee, niinee, bininjab bin Kɔɔrneeyi túnnée bālifì ki béè Siimɔn dumpu ki dɔ́miń ki yú kipunyɔkɔpu

¹⁸ki yíiń ki bālifì yii: «Doo ní Siimɔn un bi yíì Peetrooyee kóòoo?»

¹⁹Peetroo gbíntìi bíi dàkafī tin u bàà wál̀ee taapuee, ní Unimbɔti Fam bí-u yii: «Bininjab bita biba di nyàab̀-see.

²⁰Yīkìí kpákatí, taa gùgufì, si nì bi kɔkɔ ń nīn cá, kun puee man di túnní-bi.»

²¹Niinee ní Peetroo kpákatìń, ní ki bí bininjabee yii: «Man un ni nyàab̀ee sèé. Ba di ŋá ní ni dɔ́miń doo?»

²²Ní bi kíí-u yii: «Kɔɔrneeyi un sá usoojakpil ki bí deedee ki fàŋkí Unimbɔti, Juuda yab kɔkɔ sòoǹ u-pu yii u sá unimɔntee, Unimbɔti tuuŋŋu ŋubɔ tùkū-u yii ú yíiń-si, á dāan̄ u-dumpu ú pīlifì tin tin a cáá kí tùkù-uee.»

²³Ní Peetroo fōō-bi ki bíl̀. Kutaa wúntèe, u nì bi yíkìi búntì. Nnabiyaamu mun nìn bí Joopeeyee biba mun nìn céeǹ-u.

²⁴Ku wúntèe ní u dūu bàn̄ Seesaaree. Kɔɔrneeyi nìn yíiń u-yab nì u-bɔɔtimɔntiibi ki kíǹ ki kā ki cí-bi.

²⁵Ŋyunti ŋun Peetroo kóònée, ní Kɔɔrneeyi túŋkì-u ki gbāaǹ ki póofì-u kunɔpoou.

²⁶Ama Peetroo yáatì-u, ní ki bí yii: «Yīkìm̄! Ma mun sá unil ní.»

²⁷Bi bíi sòoǹee ní ki nín kóò, ní Peetroo bàn̄ ki ká kunipaau kpáfì ki kā.

²⁸Ní u bí-bi yii: «Kéè, ni nyí yii an sá timbi Juuda yab dikoobil ti nì binicambi ń kpāfì àá tí kɔ́ bi-dumpuyaa! Ama Unimbɔti dàkā-mi yii ḿ taa kpèè yii ubɔ sá ukpiti àá waa ŋān̄.

²⁹Míǹ pu ní ni tú ki yíiń-mi, m dɔ́miń kaa kpákáǹ. Too, ba pu ní ni yíiń-mi?»

³⁰Ní Kɔɔrneeyi kíí-u yii: «Iwiin inaa sèé, tikúti tita, ŋyunti ŋun bí nee deedee, m bíi mèé m-dumpu. M kpēēyee, uninja ubɔ dee ki pēē dibɔkutil diba di jìl̀, ki yú m-nimbiin,

³¹ní ki bí yii: <Kɔɔrneeyi, Unimbɔti fōō a-wimmeem ki téetì a nín ŋáań biwɔfib tiŋan puee.

³²Tɔ̄ Joopee bí yíiń Siimɔn un bi yíì Peetrooyee, u kóò Siimɔn ugbanjɔb un dumpu nákáǹ tiŋkuee.>

³³Dicilpu ní m tú binib a-cee, ní a ŋá tiniti ki dɔ́miń. Kɔŋkɔnnee, ti-kɔkɔ bí Unimbɔti nimbiin kí pīlifì tin ti-Dindaan tīī-si á tùkù-tee.»

³⁴Niinee, Peetroo kíĺ ki bíi sòoǹ nì bi yii: «Ibaamɔn, m béè yii Unimbɔti kaa gàntī ubɔ[65].

³⁵Ntimu kɔkɔn, un yaa fàŋkí-u ki ŋáań min kítèe ŋān̄ u-nimbiin.

³⁶«Ni nyí yii Unimbɔti túnní Tibɔmɔntiil[66] Isirayeel yab cee, kí tùkù-bi yii nì Yeesu Kriisitoo puee bi làá ká nsɔŋfi: Yeesuee di sá ti-kɔkɔ Dindaan.

³⁷Yoowaneesi nín sòon̄ Unimbɔti nyim difaldi bɔti ki dóò boonee, ni nyí tin jítì Juudee tiŋki kɔkɔn ki kíliń Galiileeyee.

³⁸Ni nyí yii Unimbɔti nìn tīiń Yeesu Naasaareeti yɔu u-Fam ki yāntì u cáá mpɔŋkpaan. U nìn cá ajan kɔkɔ ki ŋáań tiŋan ki cāantí bin kɔkɔ Sitaan pɔŋŋu nìn ŋúb́ee, kun puee Unimbɔti nìn bí u-cee.

³⁹Timbi kántì tin kɔkɔ u ŋáaǹ Juuda yab tiŋkin ki kpáaǹ Jeerusaleemee mun. Úǹ ní bi kpáá ndɔ pu, ki kūū-u.

⁴⁰Ama Unimbɔti fīkitì-u winta dal, ki yāntì bi ká-u.

⁴¹An kaa sá samaa kɔkɔ di ká-u, asee Unimbɔti nín nìn pée lēē timbi bin bin ń ká-uee. Di sá u nín nìn fīkitì ditaŋkpiilinee, boonee, ti nì u di jíń ki nyùn̄[67].

⁴²Ní u bí-ti yii tí nīn sòoǹ u-pu samaa cee, kí dàkà-bi yii úǹ Yeesu baba ní Unimbɔti lēē u-bɔsoonliu, ú sòoǹ bin wāĺee nì bin kpíìyee bɔti.

⁴³Úǹ pu ní Unimbɔti bɔnaatiliibi kɔkɔ lēekì seera yii un sá kamaa yaa fōō-u ki kííyee kāntí u-kpitii pɔ̄tam u-yindi pu[68].»

⁴⁴Peetroo bíi sòoǹ mimmee, ní Circir Fam kpákatìń bin kɔkɔ nìn bíi pílifí u-nyɔɔbundee pu.

⁴⁵Kriisitoo yab bin sá Juuda yab ki céeǹní Peetrooyee nìn bākatì. Di sá yii Unimbɔti nìn pú bin kaa sá Juuda yabee gba Circir Fam.

⁴⁶Bi nìn gbìl̄ binicambi bíi sòoǹ isooncaan ki nyɔ́ŋkí Unimbɔti. Niinee ní Peetroo bí yii:

⁴⁷«Binib nee fōō Circir Fam kii timbee dee. Mimmee, ti ŋūǹ kí yíí yii taa làá fàl̀-bi Unimbɔti nyimaaa?»

⁴⁸Ní u pú nsan yii bí fàl̀-bi Unimbɔti nyim Yeesu Kriisitoo yindi pu, ní bi gbāam̀-u yii ú kàl̄ bi-cee iwiŋkaaŋkaa.