Read Ntcham Actes 12 Bible Online

Actes 12 - Ntcham bible

Actes 12

¹Ŋyunti gbantee, ubɔti Eeroodi kíĺ ki bíi sàantí Kriisitoo yab biba,

²ní ki yāntì bi dū kitàataajiki ki kūū Yakubu un sá Yoowaneesi maanee.

³U ká yii an ŋān̄ Juuda yab ceeyee, ní u yāntì bi cúú Peetroo mun. An nìn sá iwiin in poon bi ŋmóò kpɔnɔb bin baa ŋá ŋkpɔnɔnyɔkɔee ní[69].

⁴Bi cúú-u ki tɔ́ sarkanee, ní ubɔti lēē asoojakiti anaa, dikitil kamaa cáá soojab binaa, bí nīn cīití-u ki kpántí. U là yii, bi yaa jíń Dilákatil jiŋaaliu ki dóòyee, ú cáań-u samaa nimbiin kí sòoǹ u-bɔti.

⁵Ŋyunti ŋun Peetroo nìn bí kusarkadiinee, Kriisitoo nikitil nìn bí ki mèé Unimbɔti u-pu, kaa gbèentí.

⁶Kutaa ń wúntí Eeroodi ń cáá-u ibɔsoon samaa nimbiinee, kunyeeuee, Peetroo nìn sáká soojab bili kansikin ki dɔ̄ ki gèeǹ. Bi nìn bóob́-u ikusaka ili, ní soojab bili yú kipunyɔkɔpu ki cí kusarkadii.

⁷Kpalaayee, Unimbɔti tuuŋŋu ŋubɔ dɔ́miń, ní kusarkadiin wál̀ nyáka nyaka. Ní ntuun fáá Peetroo takakal ki fīntì-u, ní ki bí yii: «Yīkì malaa!» Ní ikusakee cúu fɔ́fì u-ŋaliiyin ki lítì.

⁸Ní ntuun bí yii: «Gbìn̄ a-dambalau kí táká a-naatakaŋ.» Ní u ŋá míǹ. Ní ŋu gíti bí yii: «Dū a-satau kí pèen̄, kí nīn nóó-mi.»

⁹Ní Peetroo nóó-u ki nyánní kusarkadiin, kaa nyí min ntuun bíi ŋáańee sá tibɔŋman. Úǹ nìn dākafì yii an sá kudamintiiu ní.

¹⁰Bi jítì soojapeekaabi pu ki tin jítì bililiitiibi mun pu, ní ki dūu bàn̄ tikúti punyɔkɔki kin túĺ kitiŋinee. Kipunyɔkɔee cúu pīitì ki-ba bi-nimbiin, ní bi nyáń ki tākaǹ didandi diba pu. Kpalaayee, ntuunee yíkì Peetroo cee.

¹¹Niinee ní Peetroo béè tin bāań-uee ní ki bí yii: «Kɔŋkɔnnee, tiŋman, m nyí yii ti-Dindaan di túnní u-tuuŋŋu ŋú dāá nyāntí-mi Eeroodi ŋaan nì tin kɔkɔwoooo Juuda yab bàà cí kí ŋá-mee.»

¹²U yúl̀ ki dākafèe, ní ki nín dòoń Maarii, Yoowaneesi un bi páaǹ diyindi yii Maarkee na dumpu. Niin ní binib tikpil nìn kpáfì ki bíi mèé.

¹³U bàn̄ ki fáá kunaakoou punyɔkɔ, ní utɔntɔnli ubɔ, u sá unimpu bi yíì Roodee sútìń kí pīlifì.

¹⁴U béè Peetroo neenee, ní an mɔ́ɔkiǹ-u. Ú bàà pìitī-uee, ní u sáǹ ki cūtìi lī yii Peetroo yú kipunyɔkɔpu.

¹⁵Ní bi bí-u yii: «A wáatì níii?» Ní u bí yii: «An baasii sá ibaamɔn ní!» Niinee ní bi bí yii: «An làá nīn sá Unimbɔti tuuŋŋu ŋun cí-uee ní!»

¹⁶Ŋyunti gbantee, Peetroo pée gbíntìi fátí. Bi cúu pīitì ki ká-uee, ní ki bākatì sèeee.

¹⁷Ní Peetroo dū u-ŋal ki téefì-bi yii bí ŋmīĺee, ní u máafì-bi Unimbɔti nín nyántì-u kusarkadiin puee. Ní u bí-bi yii: «Cùú tùkùmaan Yakubu nì nnabiyaamu mun kíǹee.» Ní u nyáń ki búntì laaba mun.

¹⁸Kutaa wúntèe, soojab pɔbiliŋ bíil̀ tikpil, ní bi bíi bàlifī tɔb yii: «Ba di nín ŋá Peetroo dee?»

¹⁹Eeroodi tú bí nyàab̀-u, ama ní baa ká-u. Ní u bí yii bí bàlifì soojab tibɔti, ní ki pú nsan bí kpɔ̀-bi. Míǹ boonee ní Eeroodi yíkì Juudee ki cūtìi kāl̀ Seesaaree ŋyunti ŋubɔ poon.

²⁰Eeroodi nìn fōō Tiir nì Siidɔn yab pu diŋuul, ní bíǹ kpáfì dicilpu kí cùú ká-u. U-tiŋkin ní bi nìn tūntí tijin ki cāabìń bíǹ cee. Míǹ puee, bi píí ubɔti Eeroodi cindin kpiliu Blaastuusi kubɔɔtiiu ki wāatì, ní ki cūtìi gbāam̀ ubɔti Eeroodi.

²¹Ŋwiin ŋun bi nìn síiǹee bāańee, Eeroodi pēeǹ u-beebɔkutil ki kā u-beejal pu ki bíi sòoǹ nì bi tibɔti.

²²Ní samaa bíi kūuntí yii: «An sá unimbɔti ubɔ di sòoǹ, an kaa sá unil[70]!»

²³Dicilpu niin ní Unimbɔti tuuŋŋu ŋubɔ cáań iween ki tɔ́ u-pu, kun puee waa tīī Unimbɔti tinyool. Ní akoosibil aba kɔ́ u-ni ki ŋmɔ́ ki kūū-u[71].

²⁴Ŋyunti gbantee, Unimbɔti nyɔɔbundi mɔ̀tīi gbìtī, ní bin fòol̄ ki kíikée wíiŋŋu gbēentí.

²⁵Baarnaabaasi nì Sɔɔl dóò bi-tuuŋŋi Jeerusaleemee, ní ki fātìi gítìń, ki kpáaǹní Yoowaneesi un bi páaǹ diyindi yii Maarkee.