Read Ntcham Actes 14 Bible Online

Actes 14 - Ntcham bible

Actes 14

¹Ikooniyum tiŋkinee, Pɔɔl nì Baarnaabaasi tí kɔ́ Juuda yab kpafidiikun mbaantiim, ki sòon̄ tiŋan, áli binib tikpil, Juuda yab nì Greeki yab, fōō ki kíí.

²Ama Juuda yab bin kaa fōō ki kííyee téé bin kaa sá Juuda yabee bí cùú ŋá Pɔɔl nì Baarnaabaasi tin kaa ŋān̄ee.

³Nì míǹ kɔkɔee, Pɔɔl nì Baarnaabaasi kāl̀ ki yúntì Ikooniyum ki sòon̄ ti-Dindaan bɔti, kaa fàŋkí, ní ti-Dindaan yāntì bi ŋáań tidaandi nì maamaacib kí dàkà yii bi nín sòoǹ u-ŋanti puee, an sá ibaamɔn.

⁴Ní kitiŋin yab cúu yākatì mili: biba bí Juuda yab jandi pú, ní bin kíǹee mun bí Yeesu kpambaliŋ jandi pú.

⁵Ní Juuda yab nì bin kaa sá Juuda yabee, ki kpáaǹ bi-bɔtiibi, kpáfì ki bíi bɔ́ntí ki là kí sàaǹ-bi, kí yāŋkì-bi ataŋkpee kí kpɔ̀.

⁶Pɔɔl nì Baarnaabaasi béè mimmee, ní ki sáǹ ki búntì ki tin bàn̄ Liista nì Deebi, ntimu mun bí Liikayoonii tiŋkinee, nì mu-kpaanceetii.

⁷Bi nìn bí niin ní ki sòoǹ Yeesu bɔmɔntiiti.

⁸Ufaliŋfaan ubɔ nìn bí Liista. Bi pée màl̄-uee, u-taaŋi fáká ní waa cōom̀ ki ká.

⁹Dalba uninjee bíi pílifí Pɔɔl nyɔɔbundee, ní Pɔɔl dū u-nimbikpeeŋu ki báaǹ u-pu, ki béè yii u cáá fookii Unimbɔti pu ki ŋūǹ kí ká dicáaǹdee,

¹⁰ní u téeń mpɔn yii: «Yīkìí yūĺ mɔ́lmɔl a-taaŋi pu!» Ní u nyīī ki yíkì kùrub ki bíi còom̄.

¹¹Samaa nìn ká min Pɔɔl ŋée, ní bi bíi tátí nì Liikayoonii sooŋyin yii: «Awaa aba kpántì binib ki kpákatìń ti-cee!»

¹²Ní bi pú Baarnaabaasi diyindi yii Seeyusi, ní ki pú Pɔɔl mun yii Eermeesi[85], kun puee úǹ di nìn sòoǹ nì samaa.

¹³Ní utandaan un nìn tòotī diwaal din bi yíì Seeyusi, di-diiku yú kitiŋ kpaanceetiŋuee, dūń nsupumpukum [86] ki léeǹ inajaa ki cáań kitiŋ punyɔkɔpu, u nì samaa là kí dūú tòotī-bi.

¹⁴Yeesu kpambaliŋ Pɔɔl nì Baarnaabaasi gbìl̄ mimmee, an wùn̄-bi, ní bi cátì tiwan tin bi pēēyee ki sáǹ ki nín cá samaayee kansikin ki tátí yii:

¹⁵«Ti-yab, ba ŋá ní ni ŋáań míǹ? Ti mun pée sá binib kii nimbee ní, tiwumbaantiil. Ti bíi tùkù-ni Tibɔmɔntiil yii ní fá ni-waaŋi gbanti ŋin sá fámee kí nóó Unimbɔti un bée. Úǹ di náań yilpu nì taapu nì tiŋku, nì tin kɔkɔwoooo pée bée[87].

¹⁶Ŋyunti ŋun jítèe, u nìn yāntì ditimbundi kamaa nóó di-saŋŋu.

¹⁷Nì míǹ kɔkɔee, u dàkā-ŋi u-laŋŋaŋfitiiku. Di sá yii u yàntī utaa nì[88], tiwan lòoǹ, tijikaal gbóotí ki tìì-ni dipɔɔpindi.»

¹⁸Mpɔn nì mpɔn ní Yeesu kpambaliŋ dū tibɔti gbanti ki dūu pīiǹ samaa nsan bí taa ŋmā kí tòotī-bi.

¹⁹Boonee, Juuda yab biba nyánní Antiyɔɔsi nì Ikooniyum ki ŋúń ki ŋmātiǹ samaa. Bi nìn yáŋkì Pɔɔl ataŋkpee ki fùn̄-u ki cáa bíl̀ kitiŋ boon ŋkpaanceeti, ki dàkafī yii u kpíì.

²⁰Ama Kriisitoo yab dāa dɔ́miń ki māntìi tú-u, ní Pɔɔl yíkì ki nín cá kitiŋin. Kutaa wúntèe, ní u nì Baarnaabaasi búntì Deerbi.

²¹Bi sòon̄ Tibɔmɔntiil kitiŋ gbantin ki yāntì binib tikpil kpántì Kriisitoo yab. Boonee ní bi nín gítiń Liista, Ikooniyum nì Antiyɔɔsi.

²²Bi nìn tìì Kriisitoo yab kunyannyaau, ki sáŋkí-bi yii bí nīn pɔ̄ɔntí bi-ba fookii poon, ní ki bí-bi yii: «An sá nì falaakpaan ní tí nín ŋmā kí kɔ́ Unimbɔti Beelin.»

²³Bi nìn lēekì bikpilib Kriisitoo nikitil sá kamaa poon. Bi bóob́ kinyɔkɔ ki mēē ki dóòyee, ní ki dū-bi ki ŋá ti-Dindaan un bi fōō ki kííyee ŋaan.

²⁴Bi dīń Piisidii puee, ki bāań Paŋfilii.

²⁵Bi sòon̄ Unimbɔti bɔti Peeji ki dóòyee, ní ki nín sìntī Atalii.

²⁶Niin ní bi kɔ́ meela ki búntì Antiyɔɔsi, laakin Kriisitoo yab nìn mēē Unimbɔti ń tūtuǹ-bi atuun ŋin bi túńee puee.

²⁷Bi bàn̄ee ní ki kpáfì Kriisitoo nikitil ki máafì tin kɔkɔwoooo Unimbɔti ŋá ki tīī-bee, nì min ní u pīitì nsan bin kaa sá Juuda yabee kɔkɔ ń fōō kí kííyee.

²⁸Bi nìn kāl̀ ki yúntì fiii Kriisitoo yab cee.