Read Ntcham Actes 15 Bible Online

Actes 15 - Ntcham bible

Actes 15

¹Bininjab biba nìn nyánní Juudee ki dɔ́miń Antiyɔɔsi, ki kíĺ ki bíi dàkà nnabiyaamu yii: «Ni yaa kaa gíí dikpancandi kii Mooyiisi marau nín lī puee, naa ŋūǹ kí ká difiil[89].»

²Niinee, Pɔɔl nì Baarnaabaasi kaa kíí, ní kunikpɔŋkpɔkɔkpaaŋŋu kɔ́ bi-kansikin. Ní bi bí yii Pɔɔl nì Baarnaabaasi nì Kriisitoo yab biba mun ń jɔ̄m̀ Jeerusaleem Yeesu kpambaliŋ nì bikpilib cee, bí kpèè an bɔti.

³Ní Kriisitoo nikitil nyántì-bi nsanni, ní bi dīń Feenisii nì Samaarii ki máafí bin kaa sá Juuda yabee nín kpántì bi-bimbim ki fōō Yeesu ki kíí puee. Niinee ní an mɔ́ɔkiǹ Kriisitoo nikitil kɔkɔ.

⁴Bi bàn̄ Jeerusaleemee, ní Yeesu kpambaliŋ nì bikpilib nì Kriisitoo nikitil kɔkɔ fōō-bi. Bi nìn máafì Unimbɔti nín dū-bi ki túń atuun puee.

⁵Niinee ní Fariisab jandi din nìn fōō ki kííyee yíkì, kaa kíí, yii, bi máaǹ kí gīfì dikpancandi bin kaa sá Juuda yabee kí yàntī bí nīn ŋúb́ Mooyiisi marab kí wàatī ní bí nīn nín sá Kriisitoo yab.

⁶Ní Yeesu kpambaliŋ nì bikpilib kpáfì kí kpèè an bɔti.

⁷Bi nìn kpáká ki yúntì, ní Peetroo dāa nín yíkì ki bí yii: «M-nabiyaamu, ni nyí yii, doooo ŋkilkaam ní Unimbɔti lēē-mi ni-kansikin ḿ sòoǹ tibɔmɔntiil kí tīī bin kaa sá Juuda yabee, bí gbìl̄ kí fōō kí kíí.

⁸Ní Unimbɔti un nyí binib pɔbiliŋinee tīī-bi Circir Fam kii timbee, kí dàkà yii u fōō-bi.

⁹Waa gāntì timbi nì bíǹ. Bi nín fōō-u ki kííyee ní u ŋá bi-pɔbiliŋ circir.

¹⁰Ba pu ní ni cɔ́ŋkí Unimbɔti ki cáá diwaŋgul din ti-naanjab nì timbi ti-ba kaa ŋúń ki túǹee, ki cáa tūntí Kriisitoo yab?

¹¹An sá nì ti-Dindaan Yeesu ŋanti pu ní ti máká yii ti ká difiil kii bi muee.»

¹²Niinee ní samaa kɔkɔ ŋmíl̀, ní ki kíǹ ki bíi pílifí Baarnaabaasi nì Pɔɔl nín bíi máafí Unimbɔti nín nìn dī bi-pu ki ŋáaǹ tidaandi nì maamaacib bin kaa sá Juuda yabee kansikinee.

¹³Bi sòon̄ ki dóòyee, ní Yakubu fōō dinyɔɔbundi ki bí yii: «M-nabiyaamu, pīlifìmaan-mi!

¹⁴Siimɔn bàà máafì-ni min ní Unimbɔti nìn kpēē ki lútì doooo ŋkilkaamin bin kaa sá Juuda yabee kansikin bin ń nīn sá u-yabee.

¹⁵An nóó nì Unimbɔti bɔnaatiliibi nín nìn sòon̄ puee, kun puee an nìn ŋmàn̄ Unimbɔti gbɔŋkun yii:

¹⁶<Míǹ boonee, m làá dāá gítiń kí fàtīí mā Daafiidi diiku kun nìn lítèe. M làá dāá fàtīí mā u-guŋŋi mɔ́lmɔl,

¹⁷kí ŋmā kí yàntī binib bin kɔkɔ kíǹee ń nyàab̀ man bi-Dindaan, ki kpáaǹ atimbun ŋin kɔkɔ m yíiń ŋí nīn sá m-yabee.

¹⁸Man ni-Dindaan un nìn yāntì bi béè dooooyee tin tin m làá dāá ŋée di lī míǹ[90].>

¹⁹«Míǹ puee ní man Yakubu ká yii, an kaa máaǹ tí nīn páb́ bin kaa sá Juuda yab ki kpántì bi-ba ki nóó Unimbɔtee.

²⁰Ama tí ŋmà kí tùkùmaan-bi bí yàntī kí taa ti nín̄ jīǹ tiwan tin bi dū ki tōotì awaayee, kí taa ŋá tilaakpaal, kí taa ŋmɔ́ fatiku, kí taa jī tiwan tin baa lāntì fatiku nyáńee[91].

²¹Di sá yii, doooo jaanjaan ki dāa dūu sāā díǹ, binib gbíntìi bí ki sòoǹ Mooyiisi marab pu ntimu sá kamaa poon, ki kàaǹ u-gbɔnti akpafidiinni ŋwiŋŋuŋfikaa sá kamaa dal.»

²²Niinee ní Yeesu kpambaliŋ, nì bikpilib, nì Kriisitoo yab kɔkɔ bí yii bi làá lēē bi-kansikin biba kí tɔ̄ Antiyɔɔsi, bi nì Pɔɔl nì Baarnaabaasi. Bin bi lēēyee di sá Juudi un bi nìn yíì Baarsabaasee, nì Siilasi. Bininjab bili gbanti ní nnabiyaamu kɔkɔ nìn tɔ́.

²³Ní bi tīī-bi kugbɔŋu kun poon bi ŋmàn̄ yii: «Timbi ni-nabiyaamu Yeesu kpambaliŋ nì bikpilib jáamiń nimbi nnabiyaamu mun kaa sá Juuda yab ki bí Antiyɔɔsi nì Siirii nì Siilisiiyee.

²⁴Ti gbìl̄ yii ti-yab biba dɔ́miń ni-cee ki sòon̄ nì ni tibɔti, ki yāntì ni bākatì nì ni-ba, ki bíil̀ ni-pɔbiliŋ. Ti mun kaa túnní-bi ni-cee.

²⁵Míǹ pu ní ti mun sòon̄ ki kpáfì ki lēē binib biba ki dū-bi ki túnní ni-cee, bi nì Baarnaabaasi nì Pɔɔl, ti-nabineeŋkaamu,

²⁶binib bin dū bi-ba ki tīī ŋkúm ti-Dindaan Yeesu Kriisitoo yindi puee.

²⁷Míǹ puee ní ti dū binib bili nee, Juudi nì Siilasi ki túnní ni-cee, bí sòoǹ ni-nimbiin tibɔbaantiil gbanti pu.

²⁸Min ŋān̄ Circir Fam cee ki kpáaǹ ti mun ceeyee di sá tí taa ti dū awaŋgul aba kí túń-ni, an yaa kaa tin sá tin máaǹ ní ŋée.

²⁹Tíǹ di sá yii ni máaǹ kí yíí kí taa ti ŋmɔ́ tiwaatootinan, kí taa ŋmɔ́ fatiku, kí taa ŋmɔ́ tiwan tin kpíì baa lāntì fatiku nyáńee, kí taa ŋá tilaakpaal. Min ŋān̄ ki tīī-nee di sá ní kòò tiwan gbanti. Ní nīn bí tiŋan!»

³⁰Niinee ní binib bin bi túee búntì Antiyɔɔsi. Bi bàn̄ee ki kpáfì Kriisitoo yab ki dū kugbɔŋu ki tīī-bi.

³¹Bi kàan̄ kugbɔŋuee ki dóòyee, ní an mɔ́ɔkiǹ báà ŋma, kun puee kugbɔŋuee cáań-bi dipɔɔsɔŋkil.

³²Juudi nì Siilasi mun nìn sá Unimbɔti bɔnaatiliibi, ní ki sòon̄ tibɔti tikpil ki sɔ̄ŋkì nnabiyaamu pɔbiliŋ, ní an kútì-bi mpɔn.

³³An dāa ŋmāntì ŋyunti ŋubɔee, ní nnabiyaamu mun cee bi cūtèe kāaǹ-bi nì dipɔɔpindi, ki yāntì bi nín gítiń bin túnní-bee cee. [

³⁴Ní Siilasi úǹ là kí gbíntí niin[92].]

³⁵Pɔɔl nì Baarnaabaasi gbíntì Antiyɔɔsi bi nì binib tikpil bí ki sòoǹ ki dàkà ti-Dindaan bɔti.

³⁶Iyunti iba jítì boonee, ní Pɔɔl bí Baarnaabaasi yii: «Yàntī tí gítí ntimu mun poon ti nìn sòon̄ ti-Dindaan bɔtee kí màntì ti-nabiyaamu pu kí kpèè yii bi bí mana.»

³⁷Ní Baarnaabaasi bàà là bí kpáaǹ Yoowaneesi un bi yíì Maarkee,

³⁸ní Pɔɔl kaa nìn kíí yii, baa ŋūǹ kí kpáaǹ unil un nìn dū-bi ki fá doooo Paŋfilii, bi nì u kaa ti nóó ki tūǹ ditundee.

³⁹Ní bi nìn kpáká áli an pɔ́ɔkì, ní ki dāa kpáàa dūu yāaǹ tɔbin. Ní Baarnaabaasi yōoǹ Maarki, bi kɔ́ meela ki nín cá Siipiri.

⁴⁰Ní Pɔɔl mun lēē Siilasi. Kí wàatī Pɔɔl ń nīn nín cée, nnabiyaamu mēē ti-Dindaan ń bìin̄ u-boon.

⁴¹Ní u dī Siirii nì Siilisii timmu, ki mɔ̀tīi kútí Kriisitoo nikitiŋ mpɔn.