Read Ntcham Actes 16 Bible Online

Actes 16 - Ntcham bible

Actes 16

¹Pɔɔl bàn̄ Deebi nì Liistee, Kriisitoo yɔu ubɔ nìn bí niin, bi yíì-u Tiimootee. U-na nìn sá Ujuudanimpu ní ki fōō ki kíí, ní u-baa sá Ugreekija.

²Nnabiyaamu mun nìn bí Liista nì Ikooniyumee nìn sòoǹ kijapaayee pu yii u sá unimɔnti.

³Pɔɔl nìn là Tiimootee ń nīn bí u-ceeyee, ní u kpáaǹ-u. Juuda yab bin nìn kóò niinee puee, u nìn gíí-u dikpancandi, kun puee bi kɔkɔ nìn nyí yii Tiimootee baa sá Ugreekija.

⁴Ntimu mun kɔkɔwoooo poon bi jītée, bi sòoǹ ki tùkù Kriisitoo yab yii Yeesu kpambaliŋ nì Jeerusaleem kpilib nín nìn kpáfì ki ká tiŋyee, bí nīn ŋúb́-tì tiŋan.

⁵An nìn yāntì Kriisitoo nikitiŋ nìn mɔ̀tīi fòol̄ ki kíikí ní bi-wíiŋŋu gbēentí kutaa sá kamaa.

⁶Circir Fam nìn yíì yii Pɔɔl ń taa sòoǹ Unimbɔti bɔti Asii tiŋkinee, ní bi dūu dī Friijii nì Galaati timmun watil.

⁷Bi tóob́ Miisii tiŋkee ki bàà mākafì kí cù Bitinii, ama ní Yeesu Fam tí yíì, yii bí taa dī niin.

⁸Niinee ní bi dūu dī Miisii ki nín sìntī Troowaasi.

⁹Kunyeeuee ní Unimbɔti ŋúbitì Pɔɔl nimbiliŋ, u ká umaseeduwaanja ubɔ yú ki gbàam̄-u yii: «Dīń Maseeduwaan kí dāá jòoń-ti!»

¹⁰Pɔɔl ká mimmee, ní ti béè yii Unimbɔti di yíì-ti tí cùú sòoǹ u-bɔmɔntiiti Maseeduwaan. Dicilpu niinee ní ti bɔ́ntì ki nín cá.

¹¹Ti kɔ́ meela ki yíkì Troowaasi, ní ki túĺ dicancaal ki búntì Samootraasi. Kutaa wúntèe, ti nín cá Neeyapooliisi,

¹²ní ki dāa yíkì niin ki búntì Fiiliipi, kitiŋkpaaŋŋi kin bí Maseeduwaan tiŋkin, ki bí Room yab ŋaanee. Ti nìn kāl̀ kitiŋ gbantin iwiŋkaaŋkaa iba.

¹³Ŋwiŋŋuŋfikaa dalee, ti nyáń kitiŋ kpaanceetiŋu ŋkpin ŋubɔ caŋin, ki nyàab̀ laakin bi kpáfí ki mèé Unimbɔtee. Ti kāl̀ee, ní ki sòon̄ nì binimpoobi bin nìn kpáfì niinee.

¹⁴Unimpu ubɔ nìn bí bin nìn bíi pílifée kansikin, bi yíì-u Liidiya. U nìn nyánní Tiyatiir tiŋkin ki sá unyampu ki nyáfí bisatamambi. U nìn tɔ́ Unimbɔti marab, ní ti-Dindaan pīitì u-pɔbil ki yāntì u fōō Pɔɔl bɔti.

¹⁵Unimpuee yāntì ti fùl̄ u nì u-samaau Unimbɔti nyim. Ní u mēē-ti yii: «Ni yaa lafun nyí yii tiŋman m fōō ti-Dindaan ki kíí, ní dāan̄ kí nīn kóò m-dumpu.» Ní u páb́-ti áli ti lafun cūtì u-dumpu.

¹⁶Dalba ti nìn cá ŋwimmeem paaŋŋu puee, ti tú uyumbusapɔɔn ubɔ. U nìn cáá arasinii ubɔ u-ni ki wāĺ. An di nìn yì-tì u kāntí animbil tikpil ki cāabìń u-dindambi.

¹⁷Ní usapɔɔnee kíǹ ki nóó ti nì Pɔɔl, ki tátí yii: «Bininjab nee sá yilpu Nimbɔtiu tɔntɔnliibi ní, bi bíi sòoǹ nì ni min ní ni làá dī kí ká difiilee ní!»

¹⁸U dū iwiin tikpil ki nóó-ti ki sòoǹ an bɔti. Pɔɔl dāa gīīyee, ní ki fātìi bí arasiniiyee yii: «Nì Yeesu Kriisitoo yindi pu ní m bí yii á nyā usapɔɔn nee ni.» Ní arasiniiyee kpáàa nyáń niin dicilpu.

¹⁹Uyumbuee dindambi ká yii Pɔɔl bíil̀ nsan ŋun pu bi dì ki kāntí animbilee, ní bi cúú u nì Siilasi ki dáaĺ-bi ki cáa cūnnì bikpilib nimbiin laakin kunipaau nìn kpáfée,

²⁰ní ki dāa yōoǹ-bi ki cūnnì biyidambi cee ki bí yii: «Binib nee di bíiĺ kitiŋ. Bi sá Juuda yab ní.

²¹Marab bin bi dàkèe, timbi Room yab kaa ŋūǹ kí fōōyaaa, kaa ŋūǹ kí dī-bi mun.»

²²Niinee ní kunipaauee kɔkɔ dɔ́miń ki kútì bi-pu, ní bi kpáfì Pɔɔl nì Siilasi pu, ní biyidambi dáaĺ Pɔɔl nì Siilasi bɔkutiŋ ki pēetì, ní ki bí yii bí gbá-bi anaalab.

²³Bi yāntì bi tāfì-bi míǹ ki dóòyee, ní bi cáá-bi ki tɔ́ sarkan, ní ki bí yii sooja un cí bisarkadambee ń nīn kpèé-bi tiŋan.

²⁴Bi kpáafì soojee míǹ ki dóòyee, ní u fōō-bi ki cáa tɔ́ kusarkadii poon ki bá-bi abaa.

²⁵Kunyataasiiu nyɔkɔmee, Pɔɔl nì Siilasi bíi mèé ki gà ilan ki nyɔ́ŋkí Unimbɔti, ní bisarkadambi bin kíǹee bíi pílifí.

²⁶Kpalaa kpalaa niinee, kitiŋ cīŋkì ki kpáaǹ kusarkadii. Dicilpu niinee, mpunyɔmu kɔkɔ cúu pīitì, ní tin bi bóob́ bisarkadambee kɔkɔ cúu bútì.

²⁷Sooja un cí bisarkadambee nín fīntì, mpunyɔmu wāāyee, u dàkafī yii bisarkadambi kɔkɔ sáǹ ki kátì dee, ní u dáaĺ ki fɔ́fì u-tàataajiki kí bàà kpɔ̀ u-ba.

²⁸Niinee ní Pɔɔl téeń mpɔn yii: «Taa kpɔ̀ a-ba! Ti-kɔkɔ sèé doo.»

²⁹Ní soojee bí yii bí pɔ̄ń-u ŋŋmi. Niinee ní u tóotì malaa ki cūtìi gbāaǹ Pɔɔl nì Siilasi nimbiin, tiwun jìkì.

³⁰Ní u cáá-bi ki nyántì mmɔŋki, ní ki bālifì-bi yii: «M-dindambi, m làá ŋá mana ní kí nín ká difiil dee?»

³¹Ní bi kíí-u yii: «Fōō ti-Dindaan Yeesu kí kíí, a làá ká difiil, sii nì a-dicaŋku kɔkɔ.»

³²Niinee ní bi bíi sòoǹ nì u nì bin kɔkɔ nìn bí u-dumpuee ti-Dindaan nyɔɔbundi.

³³Ní soojee yōoǹ-bi kunyeeu kukúluu gbanti poon ki fíntì bi-buuŋyi. Niin dicilpu ní bi fùl̄ u nì u-dicaŋku kɔkɔ Unimbɔti nyim.

³⁴Boonee ní u yōoǹ-bi ki cáa jɔ́m̀ u-dumpu yilpu, ní ki ŋá-bi tijin. Ní u nì u-dicaŋku kíǹ ki bí dipɔɔpindin bi nín fōō Unimbɔti ki kííyee pu.

³⁵Kutaa wúntèe ní biyidambee túnní pilisib ń dāá tùkù soojee ú líí binibee.

³⁶Ní soojee cūtìi tùkū Pɔɔl yii: «Biyidambi túnní yii ḿ líí-ni. Míǹ puee, nyā kí nīn cámaan nì ŋgbansɔŋfi.»

³⁷Ní Pɔɔl bí pilisibee yii: «Bi cúú timbi bin sá Room tindambiyaamuee, kaa sòon̄ ti-bɔti ki ká ti-bɔkpil ní ki gbáń-ti samaa kɔkɔ nimbiin ki cáań-ti ki pīiǹ kudii. Ní kɔŋkɔnnee, bi là kí báĺ soooo kí nyāntí-taaa[93]? Ti yíì kpataaa, see biyidambi bi-ba ń dāan̄ kí nyāntí-ti!»

³⁸Pilisib cáá dinyɔɔbundee ki fātìi bàn̄ biyidambee cee. Bi nín gbìl̄ yii njapaamu gbanti sá Room tindambiyaamuee, tifaandi kɔ́-bi.

³⁹Ní bi dɔ́miń ki sɔ̄ŋkì bi-pɔbiliŋ ki nín nyántì-bi, ní ki gbāam̀-bi yii bí yīkì kitiŋ gbanti poon.

⁴⁰Bi nyáń kusarkadiinee, ní ki cūtìi kɔ́ Liidiya cee ki ká nnabiyaamu ki kútì-bi tibɔti, ní ki nín yíkì niin.