Read Ntcham Actes 17 Bible Online

Actes 17 - Ntcham bible

Actes 17

¹Pɔɔl nì Siilasi dī Aŋfiipooliisi pú ki cūtìi jítì Apooloonii, ní ki nín bàn̄ Teesalooniiki. Juuda yab nìn tí cáá niin kukpafidii.

²Pɔɔl nìn kɔ́ ki bíi dàkà kii u nín pée ŋáań puee, ki ŋá nnyɔmu muta. Kinyɔŋ sá kamaa poonee, u nìn cá kukpafidiin ŋwiŋŋuŋfikaa dal ki sòoǹ nì bi,

³ki kàaǹ ki dàkà-bi Unimbɔti gbɔŋku, laakin an nìn ŋmàn̄ yii Meesiya làá dāá kpú kí dāá fìkitī bitaŋkpiibi kansikinee. Ní u bí-bi yii: «Yeesu un bɔti m sòoǹ-ni nee, úǹ di sá Meesiya.»

⁴Juuda yab kansikin biba béè mimmee, ki dū bi-ba ki nákáǹ Pɔɔl nì Siilasi. Míǹ mun ní ki kpáaǹ Greeki yab bin nìn tɔ́ Unimbɔti marabee tikpil, nì binimpugaakaabee tikpil mun nìn dū bi-ba ki nákáǹ-bi.

⁵Ama Juuda yab ŋá ipoompoon ki cūtì kitiŋin ki nyàabìń anileen ŋin còom̄ adan puee ki kpáfì kunipaau, ki cáań fìkil fikil kitiŋ poon. Dinikitilee yíkìi cūtì Jasɔn dumpu kí nyàabìń Pɔɔl nì Siilasi kí cáań samaa nimbiin bí bàlifì-bi tibɔti.

⁶Bi bàn̄ Jasɔn dumpu, kaa ká-bee, ní ki cúuń Jasɔn nì nnabiyaamu mubɔ ki cáań bikpilib nimbiin, ní ki tátí yii: «Bitiŋwiiliibi bin yìiǹ duulinya kɔkɔnee bāań ti-mun cee doo.

⁷Jasɔn fōō-bi bi kóò u-dumpu. Binib gbanti kaa fàŋkí gɔminakpaan Seesaar marab, kun puee bi cáá yii ubɔti ubɔ gíti bí, bi yíì-u Yeesu.»

⁸An bɔtee bíil̀ samaa kɔkɔ pɔbiliŋ ki kpáaǹ bikpilib,

⁹ní bikpilibee gíí Jasɔn nì bin kíǹee dipɔŋkpaandi bí pà kí wàatī bí nín líí-bi.

¹⁰Kunyeeu mɔ́ kpalaayee, nnabiyaamu yāntì Pɔɔl nì Siilasi búntì Beeree. Bi bàn̄ niinee, ní ki nín cá Juuda yab kpafidiikun.

¹¹Binib gbanti nìn cáá mbimbimɔntiim ki jítiǹ Teesalooniiki yab, kun puee bíǹ nìn fōō Unimbɔti bɔti mmɔntiimin. Bi nìn kpátí Unimbɔti gbɔŋku ŋwiin kamaa ki kpèé yii tin Pɔɔl sòoǹ nì bee yaa sá ibaamɔn.

¹²An pu ní bi-kansikin kunipaau, ki kpáaǹ Greeki pijab nì bininjab tikpil, nìn fōō ki kíí.

¹³Ama Juuda yab bin bí Teesalooniikee nín béè yii Pɔɔl tí bíi sòoǹ Unimbɔti bɔti Beereeyee, ní bi dɔ́miń niin ki cáań fìkil fikil kitiŋin, ki yāntì samaa pɔbiliŋ bíil̀.

¹⁴Niinee ní nnabiyaamu yāntì Pɔɔl búntì tiŋku caŋin. Siilasi nì Tiimootee, bíǹ nìn gbíntìi bí Beeree niin.

¹⁵Bin nìn céeǹ Pɔɔlee nìn cáá-u ki cūnnì áli Ateeni ki fàtīi gítińee, ní Pɔɔl bí yii bi yaa bàn̄ee bí tùkù Siilasi nì Tiimootee yii bí kíntiń-u malaa.

¹⁶Ŋyunti ŋun Pɔɔl nìn kā Ateeni ki cí-bee, an nìn páb́-u tikpil, kun puee kitiŋ gbanti sá awaa ŋmaniŋma ní.

¹⁷Ní u kíĺ ki bíi sòoǹ nì Juuda yab nì bin nìn tɔ́ Unimbɔti marabee kukpafidiin, ní ki sòoǹ ŋwiin kamaa kinyɔŋin, laakin binib kpáfée.

¹⁸Anikiti ali aba nì Pɔɔl nìn bíi sòoǹ. Binib gbantee nìn nyí kugbɔŋu tiŋan. Dinikitil diba sá Eepiikuur yab, ní din kíǹee sá Stooyiiki yab. Ní biba bí yii: «Unifan nee kalin sòoǹ ba yati ní?» Ní bin kíǹee bí yii: «U máaǹ ki làá nīn sá un sòoǹ inimbɔticaan bɔtee ní.» Kun pu bi lì mimmee di sá yii Pɔɔl nìn bíi sòoǹ Yeesu nì difìkitil bɔti pu.

¹⁹Ní bi yōoǹ Pɔɔl ki cūnnì kitiŋ yidambi nimbiin[94], ní ki bí-u yii: «A-dàkatam nee sá tibɔcan, mimmee, a ŋūǹ kí tùkù-ti tibɔcan tin a dàkà nee taapuɔɔɔ?

²⁰Kun puee tin ti pée gbìl̀ a sòoǹee, taa láá gbìl̄-tì ki ká dalba dalba. Míǹ puee, ti bàà là kí béé tibɔti gbanti nín sá puee.» -

²¹Di sá yii Ateeni yab nì binicambi bin bí bi-kansikinee yati di nìn pée sá bí nīn kā ki pílifí tibɔcan ŋma. -

²²Ní Pɔɔl yáatìi yúl̀ biyidambi nimbiin ki bí yii: «Ateeni yab, m ká yii, binib kansikinee, nimbi di sá bin nóó inimbɔti tiŋanee.

²³Di sá yii m nín jītí ni-tiŋki nee poonee, m ká tiwan tin ní ni jáaḿee. Áli gba, m kpáàa ká nsaraafan ŋun pu bi ŋmàn̄ yii: <Unimbɔti un baa nyée.> Un ni jáaḿ kaa nyée, úǹ pu ní m dɔ́miń kí sòoǹ nì ni.

²⁴Úǹ di sá Unimbɔti un náań duulinya nì tin kɔkɔwoooo pée bée, ki sá yilpu nì taapu Dindaan. Waa kóò adiin ŋin binib cáá bi-ŋalii ki māāyee ni,

²⁵kaa nyàab̀ binib tūtuntam báà an yaa pée sá tintee. An kaa sá úǹ di tìì báà ŋma dimaŋfal nì ŋfam nì tikɔkɔɔɔ[95]?

²⁶Úǹ di dī unibaanti pu ki nyántì anibul ki gbéeǹ kitiŋ kɔkɔ pu, ki síiǹ atimbun kɔkɔ nì ŋi-kɔŋkooŋyi nyɔkɔm[96].

²⁷U ŋá míǹ ki là yii bin yaa táfí ki nyàab̀ úǹ Unimbɔtee yaa táá ŋmā kí ká-u. Ama Unimbɔti gbanti kaa dátiǹ-ti,

²⁸di sá yii: <Úǹ pu ní ti fòotī ki pɔ̄ɔ̄ ní ki bí.> Kii ni-laŋgaaliibi biba nín gāā puee, yii: <Ti mun pée sá u-biyaamu ní.>

²⁹Kii ti nín sá u-biyaamu puee, taa máaǹ kí dàkafì yii Unimbɔti sá kii awaa ŋin binib dākafì ki dū bi-ciiŋyi ki dū sindaariyab nì animbil ki mɔ́ɔ́yee, àá kii tiwaŋkpítikaalee.

³⁰Ama Unimbɔti kaa dū ŋyunti ŋun binib kaa nìn nyí tibee ki dūu ŋá tibɔti. Míǹ puee ní kɔŋkɔnnee u bíi tùkù ajan kɔkɔ nib yii bi-kɔkɔ máaǹ kí fá bi-kpitii.

³¹Di sá yii u yóoǹ ŋwiin ŋubɔ ŋun ní u làá yàntī Yeesu ń sòoǹ duulinya kɔkɔ bɔti nì ibaamɔnee, kun puee uninja gbanti ní u fīkitì bitaŋkpiibi kansikin ki dàkā-ti kudaaŋŋu páaa yii úǹ ní u lēē.»

³²Bi nín gbìl̄ u sòon̄ bitaŋkpiibi fìkititam puee, ní biba bíi bèel̄-u, ní bin kíǹee bí yii: «Dalba á dāá gíti sòoǹ tibɔti gbanti pu.»

³³Niinee ní Pɔɔl yíkì bi-kansikin ki nyáń.

³⁴Nì míǹ kɔkɔee, binib biba nìn fōō ki kíí, ki dū bi-ba ki nákáǹ Pɔɔl. Uyidaan un bi yíì Deeniiyee nì unimpu ubɔ bi yíì-u Damariisi nìn bí bi-kansikin. Biba mun nìn kútì.