Read Ntcham Actes 2 Bible Online

Actes 2 - Ntcham bible

Actes 2

¹Pantikooti [15] wiiŋŋu dalee, bi-kɔkɔ nìn kpáfì ki bí dibɔɔbaantiil.

²Dicilpu kpalaayee, kuwoou kubɔ nyánní yilpu kii kubuŋkpaaŋŋu kubɔee, ní ki dɔ́miń ki gbí kudii kun poon bi nìn kēe.

³Niinee bi ká alimbil aba kii aŋmilimbilee bāań-bi, ki cúu yākatì tɔbin ní ki tɔ́kɔǹ báà ŋma pu.

⁴Ní Circir Fam sīntìń ki kɔ́ bi-kɔkɔn mmɔntiim, ní bi kíǹ ki sòoǹ isooncaan in Ŋfam tīī-bi bí sòoǹee.

⁵Iwiin gbantee, Juuda yab bin nóó Unimbɔti deedeeyee nìn dɔ́miń Jeerusaleem, ki nyánní atimbun ŋin kɔkɔ bí duulinyanee.

⁶Kuwoou bíi gèe, ní samaa sáǹní ki bāańee, ní ki gíti bākatì, kun puee bi-kɔkɔ nìn gbìl̀ bi-sooŋyin binibee nín sòoǹ puee.

⁷Ní bi bākatì sèeee, an ŋá-bi bitii, ní bi kíǹ ki bíi sòoǹ nì tɔb yii: «Bin kɔkɔ sòoǹ nee kaa sá Galiilee yabaaa?

⁸Kin, an ŋá mana ní ti-kɔkɔ nee gbìl̀ nì ti-timmu sooŋyi poon tin bi sòoǹ nee?

⁹Ti-kansikin biba sá Paati, biba sá Meedi nì Eelam, biba mun sá Meesoopootamii nì Juudee nì Kapadoosi nì Pɔnti nì Asii nì

¹⁰Friijii nì Paŋfilii nì Eejipiti nì Liibii jandi din pìlīǹ Siireenee yab, nì bin kɔkɔ nyánní Roomee.

¹¹Biba sá Juuda yab, ní biba mun sá binicambi bin fōō Juuda yab marabee, Kreeti yab nì Bilaalibub. Kin an ŋá mana ní ti gbìl̀ bi sòoǹ Unimbɔti tunnyaaŋŋi bɔti timbi kɔkɔ sooŋyin?»

¹²Ní bi bākatì, kaa ti nyí tin poon ní bi bée, ní ki kíǹ ki lì tɔb cee yii: «Ba bɔti nín sèé dee?»

¹³Ama biba nìn bí ki bèel̄-bi, yii: «Bi nyùn̄ ndaam ní ki gbí!»

¹⁴Niinee ní Peetroo yáatìi yúl̀, u nì akpambal saalaa nì dibee, ní ki yōoǹ dinyɔɔbundi ki téeń mpɔn ki bí-bi yii: «Nimbi Juuda yab, nì nimbi bin kɔkɔ kóò Jeerusaleemee, ŋátímaan ni-tafaliŋ kí pīlifì tibɔti tin m làá sòoǹ nee.

¹⁵Binib nee kaa gbí ndaam, kii nimbi nín dàkafī puee, kun puee an dáá sá ntaafaawìiń ní.

¹⁶Ama tin ni wāĺ nee, Unimbɔti bɔnaatiliu Jooweel nín nìn lī puee dee yii:

¹⁷<Iyuntijoolkaayee, m làá dāá yàntī m-Fam ń kpákatiń unil sá kamaa pu, ni-jipɔmbi nì ni-bisalib dāa nàatī m-nyɔɔbuŋŋi, ni-naacimpɔmbi dāa wālifí tin dòońee, ní ni-jaŋkpilib mun dāa dámintí tidamintiil.

¹⁸Ibaamɔn, iwiin gbantee, m dāa yàntī m-Fam ń kpákatiń m-tɔntɔnliibi bininjab nì binimpoobi pu, ní bí nàatī m-nyɔɔbuŋŋi.

¹⁹M dāa ŋáań maamaacib yilpu, ní kí dàkà tidaandi taapu. Ni làá dāá ká fatiku nì ŋŋmi nì ŋŋminyiim.

²⁰Ŋwìiń dāa kpántí dibɔmbɔndi ní uŋmal ń kpántí kii fatikuee kí wàatī ní ti-Dindaan wiŋkpaaŋŋuee nyooti ń nín bàń.

²¹Niinee, un sá kamaa yaa láa fōō ki kíí ki mēē ti-Dindaanee dāa kāntí difiil[16].>

²²«Isirayeel yab, pīlifìmaan tibɔti nee. Unimbɔti yāntì Yeesu Naasaareeti[17] yɔu ŋáaǹ maamaaci tuuŋŋi nì tidaandi ni-kansikin, ki dàkā-ni yii úǹ di lafun túnní-u ni-cee, kii nimbi ni-ba nín nyí puee, kun puee tikɔkɔ jítì ni-nimbiin ní.

²³Kii Unimbɔti nín nyí ki là, ki lēē ki yóoǹ puee, ní ni dū-u ki tīī bin kaa nyí Unimbɔtee kpáá-u ndɔpuntikaa pu ki kūū-u[18].

²⁴Ní Unimbɔti fīkitì-u, ki bútì-u ŋkúm kusakai. Kun puee ŋkúm kaa ŋūǹ kí nīn ŋúb́-u[19].

²⁵A lì kii Daafiidi nín nìn sòon̄ min u-puee yii: <M wāĺ ti-Dindaan ŋyunti sá kamaa m-nimbiin, tiba kaa làá ŋá-mi kun puee u tíkí-mi m-ŋaŋgiil pú.

²⁶Míǹ puee m bí dipɔɔpindin ní ki sòoǹ an mɔ̄ǹ-mi. Nì min kɔkɔ m-wunti bí iwɔfinee, m máká yii m làá dāá fàtī kí ká dimaŋfal,

²⁷kun puee aa làá dāá fá-mi ditaŋkpiilin, kaa làá yàntī a-tɔntɔmmɔntiu un a lēēyee wunti ń sūū.

²⁸A yāntì m béè dimaŋfal sàmbiyaamu, a-nimbiin ní a làá dāá gbéeǹ-mi dipɔɔpindi[20].>

²⁹«Nnabiyaamu, càntī ḿ mɔ̀tīí tùkùmaan-ni ti-naanja Daafiidi bɔti. U kpíì ní bi síb́-u. U-kaakul gbíntìi dáá bí ti-kansikin áli nìn díǹ.

³⁰Daafiidi nìn sá Unimbɔti bɔnaatiliu ní. U nìn nyí Unimbɔti nín pūtì ki pōoǹ-u yii u làá dū úǹ Daafiidi naantiiu ubɔ kí kàan̄ u-beejal puee[21].

³¹An nìn sá Meesiya fìkititam pu ní u nìn sòon̄ ki yóoǹ yii: <Waa làá dāá gbíntí ditaŋkpiilin, u-wunti mun kaa làá dāá sūū.>

³²«Yeesu gbanti ní Unimbɔti fīkitì, timbi kɔkɔ ká ki sá seeradambi.

³³Ti-Baa Unimbɔti kāaǹ-u yilpu u-ŋaŋgiil pú, ní ki tīī-u u-Fam, kii u nín nìn pée pōoǹ puee. Tin tin ni wāĺ ki gbìl̄ kɔŋkɔnneeyee, Circir Fam min Yeesu tīiń-tee tuuŋŋi dee.

³⁴Di sá Daafiidi u-ba kaa nìn jɔ́m̀ yilpu, ama ki mun lī ki síiǹ yii: <Ti-Dindaan tùkū m-Dindaan yii: Kàl̄ m-ŋaŋgiil pú

³⁵kí nīn cí ŋyunti ŋun m làá dāá yàntī á nīn kíǹ ki tɔ́kɔ́ a-nannanliibi puee[22].>

³⁶«Isirayeel maaliŋun yab kɔkɔ, béémaan nì ibaamɔn poon yii, Yeesu un ni kpáá ndɔpuntikaa puee, Unimbɔti dū-u ki ŋá ti-Dindaan ki lēē yii ú nīn sá Meesiya.»

³⁷Bi nín gbìl̄ tibɔti gbantee, ní bi-pɔbiliŋ máĺ tiŋan, ní bi fātìi bālifì Peetroo nì akpambal ŋin kíǹee yii: «Ti-nabiyaamu, mimmee, ti làá ŋá mana?»

³⁸Ní Peetroo kíí-bi yii: «Kpántímaan ni-bimbim, báà ŋma ń yàntī bí fàl̀-u Unimbɔti nyim Yeesu Kriisitoo yindi pu, ní Unimbɔti ń dū ni-kpitii kí pɔ̄-ni. Ní ní fōō Circir Fam min Unimbɔti nìn pōoǹee.

³⁹Kun puee u-poondi gbanti sá ki tīī nimbi, nì ni-biyaamu, ki kpáaǹ bin bí ndanee, nì dinikitikpaandi din kɔkɔwoooo ti-Dindaan ti-Nimbɔtiu làá dāá yíińee.»

⁴⁰Peetroo gíti yōoǹ anyɔɔbun tikpil ki sòoǹ ki sáŋkí-bi yii: «Nyāmaan waanee nib bin nóó isaŋkpitee kansikin, kí kámaan difiil!»

⁴¹Bin fōō Peetroo bɔti ki kííyee yāntì bi fùl̄-bi Unimbɔti nyim. Yaadal wiiŋŋuee, binib bin kútì Yeesu boonnooliibi puee wíiŋŋu nìn bàn̄ kutukub bita nyɔkɔm.

⁴²Bi nìn pɔ̄ɔntí bi-ba ki bífí tin akpambal dàkà-bee, ki kpáfí kinyɔɔbaantii nì kunabitiiun, ki jīǹ ti-Dindaan jikaati, ki kpáfí dicilpu ki mèé Unimbɔti.

⁴³Tifaandi nìn kɔ́ báà ŋma maamaacib nì tidaandi tin akpambal nìn ŋáańee pu.

⁴⁴Bin nìn fōō ki kííyee nìn kpáfí dibɔbibaantiil, ní báà ŋma wanti nìn sá ki tīī bi-kɔkɔ.

⁴⁵Bi nìn nyáfí bi-sati nì bi-wammɔntiiti, ní ki yàkatī ki tìì báà ŋma nín máaǹ puee.

⁴⁶Kutaa kamaayee, bi nìn dòoń múlmul kunimbɔtidiin dicilpu ki nyɔ́ŋkí Unimbɔti, ki kpáfí akiti akiti adiinni ki jīǹ ti-Dindaan jikaati, ki jīǹ tijikaal nì dipɔɔbaantiil nì dipɔɔpindi poon,

⁴⁷ki nyɔ́ŋkí Unimbɔti. Samaa kɔkɔ nìn néeń bi-bɔti. Ní kutaa sá kamaayee, ti-Dindaan gbēentí bin kāntí difiilee wíiŋŋu.