Read Ntcham Actes 20 Bible Online

Actes 20 - Ntcham bible

Actes 20

¹Fìkil fikilee jítèe, ní Pɔɔl yíiń Kriisitoo yab, ki tīī-bi kunyannyaau, ní ki kāaǹ-bi, ní ki yíkì bi-kansikin ki búntì Maseeduwaan.

²U dī Maseeduwaan tiŋgbammun, ki sòon̄ nì Kriisitoo yab ki sáŋkí-bi tikpil ki wāatì ní ki nín bàn̄ Greeki tiŋkin.

³U nìn ŋá niin iŋmal ita ní. Ŋyunti ŋun u bɔ́ntì ki làá kɔ́ meela kí nīn cá Siiriiyee, ní u béè yii Juuda yab sòon̄ ki bɔ́ntì nsàmbiyaamu mun pu bi làá dī kí kpɔ̀-uee. Niinee ní u fātìi dūu dīń Maseeduwaan pú.

⁴Bin nìn nóó-uee di sá: Sɔpateer, Piirusi jipɔɔn un nìn sá Beereeyee, nì Ariistaarki nì Seekundusi, bíǹ sá Teesalooniiki yab, Gaayusi un sá Deebee, nì Tiimootee nì Tiisiiki nì Troofiim, bíǹ nyánní Asii.

⁵Bíǹ kɔkɔ nìn līntì ki cūtìi cíitì-ti Troowaasi.

⁶Iwiin in poon Juuda yab ŋmóò kpɔnɔb bin baa ŋá ŋkpɔnɔnyɔkɔee boonee, timbi kɔ́nní meela ki yíkìń Fiiliipi tiŋkin, ki ŋá iwiin iŋmoo ní ki nín bàn̄ bi-cee Troowaasi, ní ki ŋá iwiin iluli niin.

⁷Kinyɔŋ wimpeepeekaaŋu dalee, ti nìn kpáfì kí jī ti-Dindaan jikaati, ní Pɔɔl kíĺ ki bíi sòoǹ nì bin kpáfì niinee. U nìn sòon̄ ki yúntì tikpil, áli kunyataasiiu tikúti saalaa nì tili, kun puee an nìn sá kutaa ń wúntí ú yīkì ní.

⁸Fitilab nìn wīikí diditɔntɔkɔl din poon ti nìn kpáfèe ni tikpil.

⁹Unaacimpɔɔn ubɔ nìn bí niin, bi yíì-u Eetiiki. U nìn kā diditɔntɔkɔl tɔkɔlau nyɔɔgbandi pu. Ŋyunti ŋun Pɔɔl gbíntìi bíi sòoǹ nì bi ki cée, ní ŋgeem cúú-u. U bíi gèeǹ tikpil tikpilee, ní ki dāa kpáàa nyánní diditɔntɔkɔl yilpu kuditataatiiu poon ki lítì kitiŋ. Bi pée yōoǹ-uee, u kpíì ní.

¹⁰Niinee ní Pɔɔl kpákatìń ki bōoǹ ki yōoǹ-u ní ki bí yii: «Ni-pɔbiliŋ ń taa máĺ, kun puee u fātìi jɔ́mìń!»

¹¹Ní u fātìi nín jɔ́ḿ ki cūtìi yākatì kpɔnɔb bi ŋmɔ́, ní u fātìi tí kíĺ ki bíi sòoǹ nì bi áli kutaa nì ku-wuntil, ní boonee u dāa nín yíkì.

¹²Ní bi fātìi gíiǹ unaacimpɔɔnee u-dumpu nì alaafiya, ní an nìn mɔ́ɔkiǹ báà ŋma tikpil.

¹³Ní timbi kɔ́ meela ki līntì kí cùú kíntí Pɔɔl Asoosi tiŋkin, kii u nín nìn pée sòon̄ puee, kun puee úǹ làá dāá còomìń ataa pu ní.

¹⁴U bāań ki ká-ti Asɔsee, ní ti yōoǹ-u ki nín cáa cá Miitileen.

¹⁵Niinee ní ti nín nìkì. Áli kutaa nì ku-wuntilee ní ti dūu bàn̄ Kiyoo. Ku tí wúntèe ní ti dūu bàn̄ Samɔsi, ní ku gíti tí wúntèe ní ti yúl̀ Troogiliyɔn ní ki nín bàn̄ Miilee.

¹⁶Pɔɔl nìn lēē yii u là kí gɔ́ntí Eefeesi kí taa bīil̀ ŋyunti kitiŋ gbantin. Míǹ pu ní u nìn túĺ dicancaal, án ŋá-u malaa u yaan ŋūǹ, ú bàà nín̄ bí Jeerusaleem Pantikooti wiiŋŋu dal.

¹⁷Pɔɔl bí Miileeyee, ní ki tú bí cù Eefeesi kí yíiń niin Kriisitoo nikitil kpilib.

¹⁸Bi bāań u-ceeyee, ní u bí-bi yii: «Kéè, nimbi ni-ba nyí doooo ŋwimpeekaa ŋun m kóoń Asii tiŋkinee m nín bí nì ni baabadal miŋyeeyaa!

¹⁹Míǹ ní m nìn sīntiǹ m-ba ki túń ti-Dindaan tundi nì nnyinnyim, ki bí falaabi kansikin kun puee Juuda yab nìn nyàab̀ isan kí kpɔ̀-mi.

²⁰Míǹ ní ni nyí yii maa nìn bál̀ tin ŋūǹ kí tūtuǹ-nee báà tiba, ki sòoǹ ki dàkà-ni Unimbɔti bɔti laakin binib kpáfée ki kpáaǹ ni-dumpui.

²¹M nìn sáŋkí Juuda yab ki kpáaǹ Greeki yab tiŋan, yii bí fá ikpiti, kí fōō ti-Dindaan Yeesu kí kíí kí nóó Unimbɔti.

²²«Kɔŋkɔnnee, m làá nīn cá Jeerusaleem dee kii Unimbɔti Fam nín bí ḿ ŋá puee, kaa nyí tin làá ŋá-mi niinee.

²³Ama ntimu mun kɔkɔ poon m jītée, Circir Fam tùkù-mi yii sarka nì dinimbinaamandi dɔ̄ ki cí-mi.

²⁴Ama, man maŋfal bɔti kaa páb́-mi, a lì kii an kaa sá-mi tiwammɔntiil tibee ní. Tin di páb́-mee di sá ḿ tɔ̄ ditundi din m fōō ti-Dindaan ceeyee: díǹ di sá ḿ sòoǹ Tibɔmɔntiil kí tùkù binib dineendi din Unimbɔti cáá ti-puee[101].

²⁵«Míǹ puee, nimbi bin cee m jítì ki sòon̄ Unimbɔti Beel pu bɔtee, kɔŋkɔnnee m nyí yii naa làá ti ká-mi.

²⁶An di yì-tì ní m tùkù-ni an bɔti díǹ kí síiń, boonee, ubɔ yaa láa gíti wáŋkèe, an kaa dāa gíti sá m-cee.

²⁷Di sá yii m tùkū-ni kaa bál̀-ni Unimbɔti nín là kí dāá ŋá min miŋyee kɔkɔ.

²⁸Míǹ puee, ní kpèèmaan ni-ba tiŋan, kí kpèèmaan dinikitil din pu Circir Fam lēē-ni yii ní nīn sá bikpilibee, kí kpòotī Unimbɔti nikitil din u dū u-ba fatikuu ki dée tiŋan.

²⁹M nyí yii, m-kpátam boonee, binib làá dāá kóoń ni-kansikin. Baa làá dāá tàan̄ dinikitil gbanti, a lì kii agbiŋgbil nín cáá ntoom, kaa tàantí dipikitil puee.

³⁰Míǹ ní ni-kansikin bininjab biba mun làá dāá yòon̄ tinyimɔmbɔti kí sòoǹ kí ŋmàtiǹ Kriisitoo yab biba ń nīn nóó-bi.

³¹Míǹ puee, ní nīn nyímaan nì ni-ba kí nīn téetí m nín nìn sáŋkí-ni pu nì nnyinnyim ŋwiimpu nì kunyeeu áli abin atee.

³²«Kɔŋkɔnnee, m dū-ni ki ŋá Unimbɔti ŋaan, ní nīn ŋúb́ u-bɔmɔntiitee. Tíǹ di cáá mpɔn kí yàntī ní béé Unimbɔti bɔti tikpil kí dāá fōō ipaati in u síiǹ kí tīī bin kɔkɔ sá u-yabee.

³³Ni nyí yii man kaa nìn là ubɔ nimbiliŋ, kaa nìn là ubɔ mun bɔkutil.

³⁴Nimbi ni-ba nìn nyí yii nì m-ŋalii in bí nee ní m nìn cáa tūǹ ditundi ní man nì bin nìn nóóyee jīǹ.

³⁵M dàkā-ni ni-kɔkɔ ń béé yii ni máaǹ kí nīn tūǹ ditundi tikpil kí ŋmā kí tūtuǹ biwɔfib, kí nīn téetí ti-Dindaan Yeesu u-ba nín nìn lī dinyɔɔbundi diŋyee, yii: <Á pɔ̄ tiwanee mɔ̄ ki jítiǹ bí pɔ̄-si.>»

³⁶Pɔɔl lī míǹ ki dóòyee, ní ki gbāaǹ, ní u nì bi kɔkɔ bíi mèé.

³⁷Niinee ní bi-kɔkɔ bíi sūǹ, ní ki dū bi-ŋalii ki kpàl̄ Pɔɔl.

³⁸Tin nìn kɔ́ǹ-bi kunimbaauee di sá u nín lī yii dalba dalba baa làá ti ká-uee. Niinee ní bi céeǹ-u áli meela taapu.