Read Ntcham Actes 21 Bible Online

Actes 21 - Ntcham bible

Actes 21

¹Timbi nì bi dāa cúu yākatì tɔbinee, ní timbi kɔ́ meela ki túĺ dicancaal ki búntì Kɔɔsi, ní ku wúntèe ti dūu bàn̄ Roodi. Niinee ní ti cāatì Patara.

²Ní ki ká meela un cá Feenisiiyee, ní ti kɔ́ úǹ ki búntì.

³Ti tin gbīitì Siipiri tiŋki kin nnyim māntì ki túee ní ki dū-kì ki fá ŋŋaŋgan pú, ní ki dūu dī Siirii watil pú, ní ki tin bàn̄ Tiir, laakin meela làá tàkatī u-wantee.

⁴Niin ní ti ká Kriisitoo yab biba, ní ti kāl̀ iwiin iluli bi-cee. Circir Fam yāntì bi béè ki tùkū Pɔɔl yii ú taa jɔ̄m̀ Jeerusaleem.

⁵Ti nín kāl̀ iwiin gbanti dóò ti làá yīkìńee, bi nì bi-nimpoobi nì bi-biyaamu kɔkɔ céeǹní-ti áli ki nyántì kitiŋ kpaanceetiŋu. Niinee ní ti gbāaǹ dimɔɔgbandi ki mēē.

⁶Ti mēē ki dóòyee, ní ki kāaǹ tɔb, ní timbi búntì kí cùú kɔ́ meela, ní bi mun nín fàtī bi-dumpui.

⁷Ní ti yíkì Tiir ki cūtì Tooleemayiisi, ki cūtìi jáam̀ nnabiyaamu, ki kāl̀ bi-cee ŋwiin ŋubɔ. Niin ní ti kúntì dimɔɔl pu saŋkindi.

⁸Kutaa wúntèe ní ti yíkì niin ki bàn̄ Seesaaree, ní ki kɔ́ Fiiliipi dumpu. U sá un sòoǹ Yeesu bɔmɔntiiti ki sá binib biluli bin bi nìn lēē bí nīn yàkatī tijinee kansikin ubɔee ní.

⁹U nìn cáá bisapɔmbi binaa bin kaa nyí uninjee, bi nìn sá Unimbɔti bɔnaatiliibi.

¹⁰Ti nìn kāl̀ u-cee ki yúntì fiii, ní Unimbɔti bɔnaatiliu ubɔ, bi yíì-u Agabusi, nyánní Juudee ki dɔ́miń ti-cee.

¹¹Kijapaayee yōoǹ Pɔɔl dambalau ní ki dūu bóob́ u-taaŋi nì u-ŋalii, ní ki bí yii: «Pīlifìmaan Circir Fam nín lī puee! Uninja un di yaa yì dambala neeyee, Juuda yab làá bóob́ udaan míǹ ní Jeerusaleem, ní kí dū-u kí tīī bin kaa sá Juuda yabee.»

¹²Ti gbìl̄ mimmee, ní timbi nì laakin ti kóòyee yab bíi gbàam̄ Pɔɔl yii ú taa cù Jeerusaleem.

¹³Ní Pɔɔl bí-ti yii: «Ba ŋá ní ni sūǹ ki bíiĺ m-pɔbil míǹ? Báà bi yaa làá bóob́-mi kí kpɔ̀-mi gba Jeerusaleem niin ti-Dindaan Yeesu puɔɔɔ, maa mɔ́tí!»

¹⁴Ti lī-u tikɔkɔ kaa ŋúń-uee, ní ti cāntì-u, ní ki bí-u yii: «Too, ti-Dindaan yaa là miŋyee, án ŋá míǹ!»

¹⁵Iwiin gbanti boonee, ní ti bɔ́ntì ki nín jɔ́ḿ Jeerusaleem.

¹⁶Kriisitoo yab bin bí Seesaareeyee biba céeǹní-ti ki cáa cūnnì kijapaai kin bi yíì Minaasɔnee dumpu. U nìn sá Siipiri, ki nìn fōō ki kíí dooooyee. Úǹ cee ní bi nìn kɔ́ǹ-ti.

¹⁷Ti bàn̄ Jeerusaleemee, ní nnabiyaamu fōō-ti nì dipɔɔpindi.

¹⁸Kutaa wúntèe ní ti nì Pɔɔl búntì Yakubu cee. Niin ní bikpilib kɔkɔ nìn kpáfì.

¹⁹U jáam̀-bi ki dóòyee, ní ki bíi sòoǹ ki bɔ́bití-bi Unimbɔti nín dī u-pu ki túń ditundi din bin kaa sá Juuda yabee kansikinee.

²⁰Bi gbìl̄ mimmee, ní ki nyɔ́ŋkì Unimbɔti. Ní bi bí-u yii: «Ti-nabiki, a ká Juuda yab kansikin binib kutukub tikpil nín kpántì Kriisitoo yab, bi-kɔkɔ ŋúb́ Mooyiisi marab tiŋan pueeyaa!

²¹Di sá bi tùkū-bi yii a dàkà Juuda yab bin kóò binicambi kansikinee yii bí fá Mooyiisi marab kí taa ti nín̄ gífí bi-biyaamu akpancan, kí fá ti-naanjab koobiliŋ mun.

²²Báà an ŋá pu bi-kɔkɔ làá béé yii a dɔ́miń. Mimmee, ti làá ŋá mana kɔŋkɔnnee?

²³Míǹ puee, ti làá tùkù-si a nín làá ŋá puee. Bininjab binaa biba bí ti-kansikin doo ki pōoǹ ipoon.

²⁴Yòon̄-bi kí cù si nì bi kɔkɔ ń ŋá saraabi kí kòotī-bi, kí pà animbil bí kòol̀-bi. Niinee ní báà ŋma làá béé yii tin ní bi sòoǹ a-puee kaa sá ibaamɔn, ní kí ká yii sisi aba bí kii bin dī marabee nín bí puee.

²⁵An yaa kíǹ bin kaa sá Juuda yab ki fōō Yeesu ki kííyee, ti nìn ŋmàn̄ kugbɔŋu ki tùkū-bi yii timbi kpēē yii an ŋān̄ bí taa ti ŋmɔ́ tiwaatootinan, kí taa ŋmɔ́ fatiku nì tiwan tin baa lāntì fatiku nyáńee, kí taa ŋá tilaakpaal mun.»

²⁶Kutaa wúntèe ní Pɔɔl yōoǹ bininjabee, ní u nì bi cūtì ki ŋá saraabi, ní ki kɔ́ kunimbɔtidiin. Niin ní Pɔɔl yóoǹ ŋwiin ŋun bi làá kòotēe nì báà ŋma nín làá dāá cáań saraabi bin biŋyee[102].

²⁷Ŋwinluluútee cá dikúntilee, ní Juuda yab biba bin nyánní Asiiyee ká Pɔɔl kunimbɔtidiin. Niinee ní bi fíiǹ báà ŋma landɔkɔŋu ŋá mbaanti, ní bi cúú Pɔɔl.

²⁸Bi cúú-uee, ní ki kíǹ ki bíi tátí yii: «Isirayeel yab, jòoḿmaan-ti! Kpèèmaan, uninjee dee un cá an kɔkɔ ki sòoǹ báà ŋma cee ki bíiĺ Isirayeel yab yindi nì Mooyiisi marab nì kunimbɔtidiiyee. Áli gba, u yāntì bin kaa sá Juuda yabee kɔ́ kunimbɔtidiin, ki bíil̀ circir kɔŋkooŋŋu gbanti!»

²⁹Kun yì-tèe di sá, bi nìn ká u nì Troofiim un sá Eefeesee kitiŋin, ní bi dākafì yii Pɔɔl nìn cáá-u ki kɔ́ǹ kunimbɔtidiin[103].

³⁰Niin ní kitimmɔŋee fōō ki píĺ dàii, ní binib nyánní ajan kɔkɔ pu ki dɔ́miń ki cúú Pɔɔl ki dáaĺ-u ki nyántì kunimbɔtidiin, ní ki dū mpunyɔmu ki pīiǹ dicilpu niin.

³¹Bi nín nìn pée nyàab̀ kí kpɔ̀-uee puee, an pūtì kpáàa pée bàn̄ Room yab soojakpikpaaŋwu, yii fìkil fikil ubɔ kóoń Jeerusaleem tiŋki kɔkɔn.

³²Dicilpu niinee, kijapaayee yōoǹ soojab ki kpáaǹ bi-kpilib biba ki sáń ki nín cá samaayee cee. Bi dāa ká usoojakpilee nì u-yab páaǹnée, ní bi gbēeǹ, kaa ti bíi gbáà Pɔɔl.

³³Niinee ní Room yab soojakpikpaaŋwu dāatìi cúú Pɔɔl, ní ki bí yii bí dū ikusaka ili kí bóob́-u, ní u bālifì-bi un Pɔɔl sée nì tin u ŋée.

³⁴Kunipaau kansikinee, biba tátí ki lì tiba, ní bin kíǹee mun cáá tiba, an di nìn yì-tì waa nìn ŋúń ki béè mbaamɔn, ní u bí yii bí cáá-u kí cùnnì soojab dumpu.

³⁵Ŋyunti ŋun bi bāań akɔl puee, samaayee kɔkɔ nín páb́ Pɔɔl mpɔn puee ní soojab yōoǹ-u ki túǹ, kí mɔ̄tì u-pu.

³⁶Kun puee binib nìn wīikí tikpil ki pá u-boon ki tátí yii bí kpɔ̀-u.

³⁷Bi tóob́ kí kɔ́ soojab dumpuee, ní Pɔɔl bālifì usoojakpikpaan yii: «A kíikí ḿ sòoǹ nì si tibaaa?» Ní ukpilee fātìi bālifì-u yii: «A gbìl̀ Greeki yab sooŋyaaa?

³⁸Sii di kaa sá Ueejipitija un là kí bīil̀ kitiŋ yaadal nee, ki yíkìi yōoǹ digaŋgandambi kutukub binaa ki cūnnì kuteeuneeee?»

³⁹Ní Pɔɔl kíí-u yii: «Man sá Ujuudaja ní, ní bi màl̄-mi Taarsi, Siilisii tiŋkpaaŋkin. M baasii sá kitiŋkpaaŋŋi tindambiki ní. M gbāam̀-si, pɔ̄-mi nsan ḿ sòoǹ nì samaa!»

⁴⁰Niinee ní usoojakpikpaanee pú-u mpaan. Ní Pɔɔl yúl̀ akɔl pu ki yōoǹ u-ŋal ki téefì samaa. Niinee ní báà ŋma ŋmíl̀ fɔ́ŋfɔŋ. Ní u yōoǹ dinyɔɔbundi ki bíi sòoǹ nì samaa nì eebru sooŋyin, yii: