Read Ntcham Actes 22 Bible Online

Actes 22 - Ntcham bible

Actes 22

¹«M-baabi nì m-nabiyaamu, pīlifìmaan kɔŋkɔnnee tibɔti tin m cáá kí tùkù-nee!»

²Bi nín gbìl̄ u bíi sòoǹ nì bi Eebru sooŋyee, ní bi mɔ̄tìi ŋmíl̀ díkí diki. Ní Pɔɔl bí-bi yii:

³«Man sá ujuudaja ní, bi màl̄-mi Taarsi Siilisii tiŋkin, ama kitiŋ nee poon ní m kāl̀ ki wíiǹ. Gamaliyeel cee ní m nìn bí ki bífì ti-naanjab marab kɔkɔ, ní ki nìn cáá dipɔ́ɔǹdi Unimbɔti bɔtin tiŋan, kii díǹ wiiŋŋu ni mun nín cáá dipɔ́ɔǹdi pu nan ní.

⁴M nìn páb́ bin nìn nóó ti-Dindaan saŋŋuee, áli ki kūū biba, ki cútì bininjab nì binimpoobi ki tɔ́ sarkan.

⁵Usaraaŋakpil nì bibɔsooŋkpilib kɔkɔ nìn kántì m nín nìn ŋáaǹ puee. Bíǹ di ŋūǹ kí tùkù-ni mbaamɔn. Bíǹ gba di nìn tīī-mi tigbɔn ḿ cáá tīī Juuda yab kpilib bin kóò Damaasee kí ŋmā kí cúú Kriisitoo yab bin bí niinee, kí bóobiń-bi ikusaka kí cáań Jeerusaleem bí dáaĺ bi-tafal.»

⁶«Ki cá kuwiŋkuluuee, m nìn bí nsanni ki tóob́ Damaasi. Dicilpu niinee ní ŋwalifikpaŋkpaan ŋubɔ nyánní yilpu ki dɔ́miń ki māntìi tú-mi ki wāĺ nyáka nyaka,

⁷ní m lítì kitiŋ. Niinee ní m gbìl̄ nneen ŋubɔ bíi lì-mi yii: <Sɔɔl, Sɔɔl, ba ŋá ní a páb́-mi míǹ?>

⁸Ní m fātìi bālifì-u yii: <An sá sii ŋma, m-Dindaan?> Ní u kíí-mi yii: <An sá man Yeesu Naasaareeti yɔu un a páb́ee.>

⁹Bin nìn bí m-ceeyee nìn ká ŋwalifi, ama ní kaa nìn nín gbìl̄ nneen ŋun sòon̄ nì mee pu.

¹⁰Niinee ní m bí yii: <Mimmee, m làá ŋá mana, m-Dindaan?> Ní ti-Dindaan bí-mi yii: <Yīkìí nīn cá Damaasi. Niin ní bi làá tin tùkù-si tin tin Unimbɔti bí yii á ŋée.>

¹¹Ŋwalifee nín nìn jīliŋkì m-nimbiliŋ puee, maa nìn gíti wāĺ, ní man nì bin nìn nóóyee cúú m-ŋal ki dātì-mi ki cūnnì Damaasi.

¹²«Uninja ubɔ nìn bí niin, bi yíì-u Ananiyasi. U nìn nóó Unimbɔti deedee ki tɔ́ ti-marab, ní Juuda yab bin nìn kóò Damaasee kɔkɔ nìn pàkà-u.

¹³Kijapaayee dɔ́miń ki yúl̀ m-cee, ní ki bí yii: <M-nabiki Sɔɔl, ŋúbití a-nimbiliŋ!> Kpalaa niinee, ní m cúu ŋúbitì, ní ki wál̀-u.

¹⁴Ní u bí-mi yii: <Ti-naanjab Nimbɔtiuee di lēē-si dooooyee ki yóoǹ yii á béé u nín là puee kí ká Deedeedaan un u lēē ki túnnée kí gbìl̄ u-neen.

¹⁵Sii di làá nīn sá u-seeraleeliu, kí sòoǹ binib kɔkɔ nimbiin tin tin a kée nì tin a gbìl̄ee.

¹⁶Míǹ puee ba di gíti ŋúb́-si kɔŋkɔnnee? Yīkìm̄ kí kúuǹ kí yíiń ti-Dindaan bí fàl̀-si Unimbɔti nyim á ká a-kpitii pɔ̄tam.>»

¹⁷Pɔɔl nìkī ki lī yii: «M dāa fātìń Jeerusaleemee, ní ki kɔ́ kunimbɔtidiin ki bíi mèé Unimbɔti, ní an fītì-mi ní m wál̀ ti-Dindaan.

¹⁸Ní u tùkū-mi yii: <Nyā Jeerusaleem malaa, kun puee baa làá fōō tibɔti tin a bíi sòoǹ m-puee kí kíí.>

¹⁹Ní m fātìi kíí-u yii: <Ti-Dindaan, kéè, bíǹ bi-ba nyí-mi, m nín nìn yìiǹ Jeerusaleem akpafidiinni ki cútí bin nóó-see ki gbáà-bi ki cáa tòó sarkeeyaa!

²⁰Kéè, bi nyí, daliŋkin bi bíi kù a-seeraleeliu Eetiyeenee, man di nìn bí niin ki bí yii u máaǹ ŋkúm, ní ki fōō bin bíi kù-uee bɔkutiŋ ki ŋúb́eeyaa!>

²¹Ama ní u bí-mi yii: <Nín̄ cá. Bin bí ndan kaa sá Juuda yabee cee ní m tūǹ-si!>»

²²Samaayee pílifiǹ Pɔɔl ki tin sāā laakin u bí yii ti-Dindaan tú-u bin kaa sá Juuda yabee cee. Niinee ní bi yíkì ki bíi tátí yii: «Bí kpɔ̀maan uninja nee! Bí taa tàan̄-u! Waa máaǹ kí nīn bí!»

²³Niinee ní bi bíi pùlifī ki pèetī bi-bɔkutiŋ ki fīintí, ní ki jáfí ntam ki tòó kutaa.

²⁴Ní usoojakpikpaanee bí yii bí cáá Pɔɔl kí kɔ́ǹ soojab dumpu kí gbá-u anaalab kí bàlifì-u kun di yì-tì ní samaa kɔkɔ tátí u-pu mimmee.

²⁵Bi bóob́-u ki dóò ki làá gbá-uee, ní Pɔɔl bí usoojakpil un nìn bí niinee yii: «An máaǹ ní gbá Room tindambiki un bɔti gba baa láá sòon̄eeee?»

²⁶Ukpilee gbìl̄ an nyɔɔbundee, ní ki cūtìi tùkū usoojakpikpaanee yii: «Á nīn nyí nì a-ba! Kijapaayee sá Room tindambiki ní.»

²⁷Niinee ní usoojakpikpaanee dɔ́miń ki bālifì Pɔɔl yii: «A sá Room tindambiki níii?» Ní Pɔɔl kíí-u yii: «Iiin.»

²⁸Niinee ní usoojakpikpaanee bí yii: «Man pàn̄ animbil tikpil ní ki nín kpántì Room tindambiki.» Ní Pɔɔl fātìi bí-u yii: «Bi pée màl̄-mee, m sá Room tindambiki ní.»

²⁹Kpalaayee, bin bàà làá gbá-u kí yàntī ú sòoǹee kākatì ki wāatì-u. Usoojakpikpaanee nín dāa béè yii Pɔɔl sá Room tindambikee, ní tifaandi kɔ́ u mun u-ba, kun puee u nìn dū ikusaka ní ki bóob́-u.

³⁰Usoojakpikpaanee là kí béé kun di yì-tì ní Juuda yab ŋúb́ Pɔɔlee. An pu ní kutaa wúntèe u bútì-u ikusaka ní ki bí yii bisaraaŋakpilib nì bibɔsoonliibi kitil kɔkɔ ń kpāfì. Bi kpáfèe, ní u cáań Pɔɔl ki yóoǹ bi-nimbiin.