Read Ntcham Actes 23 Bible Online

Actes 23 - Ntcham bible

Actes 23

¹Ní Pɔɔl dū u-nimbikpeeŋu ki báaǹ bikpilibee pu, ní ki bí-bi yii: «M-nabiyaamu, m nyí yii m ŋáaǹ tin kɔkɔwoooo m máaǹ kí ŋá kí tīī Unimbɔtee nì dipɔbil diba, ki dāa sāā díǹ wiiŋŋu nee.»

²Niinee ní usaraaŋakpil, un bi yíì Ananiyasee, bí bin yú ki pìl̄-uee yii bí cùú fáá u-nyɔkɔ.

³Ní Pɔɔl bí yii: «Unimbɔti làá dāá fáá si mun, upɔnyɔŋfiti[104]! Sii kā ki cáá marab ki sòoǹ man bɔti, ki yìntī marab gbanti a-ba ní ki cáá yii bí gbá mama!»

⁴Ní bin nìn yú ki kɔ́ĺ Pɔɔlee bí-u yii: «Mimmee, a bíi sìí Unimbɔti saraaŋakpiliu deeyaa!»

⁵Ní Pɔɔl fātìi kíí-bi yii: «M-nabiyaamu, maa nyí yii an sá usaraaŋakpil. An yaa sá fam, maa bàà sòoǹ míǹ, kun puee Unimbɔti gbɔŋku poon tùkù-ti yii: <A taa sòoǹ ni-bɔtiu bɔfam[105].>»

⁶Pɔɔl nìn nyí yii bibɔsoonliibee jandi diba sá Sadusab ní dijandi diba mun sá Fariisab. Míǹ pu ní u nìn téeń samaayee nimbiin yii: «M-nabiyaamu, ma mun sá Fariisa ní, Ufariisaja di màl̄-mi[106]. Dimákal din m cáá bitaŋkpiibi fìkititam puee di yì-tì ní bi cáań-mi doo kí sòoǹ m-bɔti!»

⁷U lī míǹ ki dóòyee, ní kunikpɔŋkpɔkɔu kɔ́ Sadusab nì Fariisab kansikin, ní samaa gbanti cúu yākatì tɔbin.

⁸Di sá yii Sadusab, bíǹ bí yii bitaŋkpiibi gíti kpá kí dāá fìkitī, Unimbɔti tuuŋyi kpá, kinaŋ mun kpá, ama Fariisab, bíǹ bí yii tíǹ kɔkɔ bí[107].

⁹Niinee ní kujakpaaŋŋu jéetì bi-kansikin, ní bimaradakaliibi bin nìn sá Fariisab jandi púee biba yíkì, kaa kíí, ki bíi mɔ́tí yii: «Timbi kaa ká kijapaai nee ŋá tiba. An yaa yíì, Unimbɔti tuuŋŋu di làá nīn máaǹ ki sòon̄ nì u.»

¹⁰Kunikpɔŋkpɔkɔu mɔ̄tìi pɔ́ɔkèe, ní usoojakpikpaan fāŋkì yii bí taa ŋée kí cúú Pɔɔl kí tɔ̀ntī. Ní u yāntì soojab kpákatìi cúú Pɔɔl ki nyántì bi-kansikin, ki cáa cūnnì soojab dumpu.

¹¹An nyeekuee, ti-Dindaan dɔ́miń Pɔɔl cee, ní ki bí-u yii: «Pɔ́ɔǹ a-ba! Kii a nín sòon̄ m-pu Jeerusaleem doo puee, án máaǹ á cù Room mun kí tin sòoǹ m-pu niin mbaantiim míǹ.»

¹²Kutaa wúntèe ní Juuda yab kpáfì kinyɔkɔ ki pūtì Unimbɔti yii, bi yaa kaa kūū Pɔɔl, baa làá jāaa, kaa làá nyɔ̀ mun.

¹³Bin nìn kpáfì kinyɔkɔ ki pūtì mimmee nìn jítì binib imuŋku ili pu.

¹⁴Ní bi cūtìi ká bisaraaŋakpilib nì bikpilib, ní ki bí-bi yii: «Timbi baasii pūtì ki tíntì yii, ti yaa kaa kūū Pɔɔl, taa làá dáká tiba.

¹⁵Míǹ puee, nimbi nì bibɔsoonliibi kitil kɔkɔ, ní mèè usoojakpikpaan ú cáań-ni Pɔɔl, yii nimbi là kí mɔ̀tīí bàlifì-u tin páaa ní u baasii ŋée. Mimmee, timbi ń bɔ́ntí, bi yaa cáá-u ki tóobińee, timbi ń kíntí kí kpɔ̀-u!»

¹⁶Niinee, Pɔɔl niisal biki gbìl̄ bi nín kpáfì ki sòon̄ tiŋyee, ní u búntì soojab dumpu ki kɔ́ ki tùkū Pɔɔl tin jítèe.

¹⁷Ní Pɔɔl yíiń bisoojakpilibee ubɔ ní ki bí-u yii: «Cáá kinaacimpɔmbiki nee kí cùnnì usoojakpikpaan cee, kun puee kì cáá tiba ki là kí tùkù-u.»

¹⁸Ukpilee yōoǹ-kì ki cáá-kì ki bàn̄ usoojakpikpaanee cee, ní ki bí yii: «Usarkadaan Pɔɔl di yíiń-mi ki gbāam̀ yii ḿ cáań-si kinaacimpɔmbiki nee, kì cáá tiba ki làá tùkù-si.»

¹⁹Niinee ní usoojakpikpaanee cúú kinaacimpɔmbikee ŋal ki kpáàa kākatì ŋkpaanceeti, ní ki bí-kì yii: «Tilati ní a cáań ní?»

²⁰Ní kì kíí-u yii: «Juuda yab kpáfì kí mèè-si yii á cáań-bi Pɔɔl bibɔsoonliibi kitil nimbiin, bi là kí ŋá kii bi làá gíti mɔ̀tīí bàlifì-u tibɔti tiba yamee.

²¹Á taa pīlifiǹ-bi! Di sá yii bi-kansikin binib imuŋku ili nì ipaa pūtì yii, bi yaa kaa kūū Pɔɔl, bíǹ kaa làá jāaa, kaa làá nyɔ̀ mun. Bi bɔ́ntì kí báĺ kí cīití-u. Míǹ puee, bi kíǹ ki cí tin sii cááyee ní nee.»

²²Niinee, usoojakpikpaanee bí kinaacimpɔmbikee yii: «Nín̄ kùǹ. Á taa sòoǹ ubɔ cee yii a tùkū-mi tibɔti gbanti!»

²³Boonee ní usoojakpikpaanee yíiń bisoojakpilib bili, ní ki bí yii bí kpāfì soojab kulaafaau nì soojab bin cáá itaamuee imuŋku ita nì saalaa, nì soojab bin tòó ŋkpamuee mun kulaafaau, bí bɔ́ntí kí nīn cá Seesaaree tikúti tiwa kunyeeu nee.

²⁴Bí nyàab̀ itaamu kí kàan̄ Pɔɔl, kí cáá-u kí bànnì gɔmina Feeliikisi cee nì alaafiya.

²⁵Ní usoojakpikpaanee ŋmàn̄ kugbɔŋu ki tīī gɔmina yii:

²⁶«Man Kloodi Liisiyasi di jáaḿ m-kpiliu gɔmina Feeliikisi.

²⁷Di sá yii Juuda yab di cúú uninja nee ki là kí kpɔ̀-u. M nín gbìl̄ yii u sá Room tindambikee, ní man nì m-soojab cūtìi fōoń-u.

²⁸M nìn là kí béé kun pu ní Juuda yab ŋúb́-u mimmee, ní m cáá-u ki cūnnì bi-bɔsoonliibi kitil cee.

²⁹Niinee ní m ká yii bi bí yii u yīntì bi-marab, ama an kaa sá tibɔti tin pu u máaǹ ŋkúmeeyaaa, kaa tí máaǹ sarka mun.

³⁰M nín dāa béè yii Juuda yab kpáfì ki nyàab̀ isan kí kpɔ̀-uee puee, ní m dū-u ki tīiń-si malaa, ní ki bí u-nannanliibi yii bí dāan̄ kí yíiń-u a-cee ibeeyiin.»

³¹Soojabee lafun ŋá u nín lī puee, ki yōoǹ Pɔɔl ki cáá-u ki bānnì áli Antiipatriisi kunyeeu gbanti.

³²Ku wúntèe ní soojab bin nìn còom̄ ataa puee nín gítiń, ní itaamu dambee kpáaǹ Pɔɔl ki cáa nín cá.

³³Bi bàn̄ Seesaareeyee, ní ki dū kugbɔŋu ki tīī gɔmina, ní ki dū Pɔɔl ki dàkā-u.

³⁴Gɔmina kàan̄ kugbɔŋuee ki dóòyee, ní ki bālifì Pɔɔl yii u sá kitiŋ kilaka ní. Ní Pɔɔl bí-u yii u sá Siilisii. U béè mimmee,

³⁵ní ki bí yii: «Si nì bin kpákèe yaa láa bāańee, á dāá sòoǹ tin a cááyee ḿ pīlifì.» U lī mimmee ní ki bí yii bí cáá-u kí cùnnì ubɔti Eeroodi dumpu.