Read Ntcham Actes 24 Bible Online

Actes 24 - Ntcham bible

Actes 24

¹Iwiin iŋmoo boonee ní usaraaŋakpil Ananiyasi bāań Seesaaree gɔmina cee, u nì bikpilib biba nì umɔtil ubɔ un bi yíì Teertuluusee, ki yíiń Pɔɔl ibeeyiin.

²Bi yíiń Pɔɔl, ní Teertuluusi kíĺ ki bíi kàaǹ tibɔti yii: «Ukpimɔnti Feeliikisi, sii di yì ŋgbansɔŋfi ŋun poon ti bí, an kaa kúntí nee. A-ciiŋŋu pu ní a yāntì kitiŋ kpántì ní ki ŋáŋkì.

³Ti kāntí a-ŋanti gbanti an kɔkɔ nì an kɔkɔ. Míǹ puee, ti jáaḿ-si tiŋan.

⁴Maa là kí bīil̀ a-yuntiŋu tikpilee, an di yì-tì ní m mèé-si a-laŋŋaŋfitiiku puee, á pīlifiǹ-ti fiii.

⁵Di sá yii timbi ká yii kijapaai nee sá unil un sá asaluu daanee. Úǹ di yì-tì ní fìkil fikil kɔ́ Juuda yab bin bí duulinya nee nee kɔkɔ kansikin. Úǹ di sá Naasaareeti yab kitil [108] kpiliu ubɔ.

⁶U là gba yii ú bīil̀ kunimbɔtidii, an pu ní timbi cúú-u. [Ti bàà mākafì yii tí dī ti-marab pu kí dáaĺ u-tafal.

⁷Ama ní usoojakpikpaan Liisiyasi dɔ́miń ki cúú-u ki fōō ti-ŋaan nì mpɔn,

⁸ní ki bí yii u nì bin kpákèe ń nīn dòoń sii cee[109].] Míǹ puee, sii a-ba yaa bālifì-u, a béetí kun pu ní ti ŋúb́-uee.»

⁹Ní Juuda yab bí yii Teertuluusi nín lī puee, míǹ ní an sá.

¹⁰Boonee ní gɔmina pú Pɔɔl nsan yii u mun ń sòoǹ. Ní Pɔɔl yōoǹ dinyɔɔbundi ki bí yii: «M nyí yii doooo abin kupaau sèé a nín sá kitiŋ nee poon ubɔsoonlee. An puee nì dimákal poon ní m làá sòoǹ tin m cááyee a-nimbiin.

¹¹Sii a-ba yaa bālifì gba, a làá béé yii an kaa láá bàn̄ iwiin saalaa nì ili m nín jɔ́m̀ Jeerusaleem kí nyɔ̄ŋkì Unimbɔtee.

¹²Dalba dalba baa láá ká-mi kunimbɔtidiin man nì ubɔ bíi kpákà. Baa láá tí ká-mi m bí akpafidiinnaaa, kitiŋ poon laaba ki sòoǹ ki yòontí binib pɔbiliŋ.

¹³Binib nee kaa ŋūǹ kí dàkà-si yii kun pu bi ŋúb́-mee baasii sèé.

¹⁴Nì ibaamɔn poon ní m sòoǹ nì si nee, m nóó Yeesu saŋŋu ŋun bíǹ yíì yii ŋuaa ŋān̄ee, ní ki jáaḿ ti-naanjab Nimbɔtiu. Ama man nyí yii Mooyiisi nì Unimbɔti bɔnaatiliibi nín ŋmàn̄ tin tigbɔn poonee, an sá ibaamɔn.

¹⁵M cáá dimákal Unimbɔti pu, kii bi mun bi-ba nín cáá dimákal u-pu puee, yii binimɔntiibi nì binikpitib kɔkɔ bí kí dāá fìkitī ditaŋkpiilin[110].

¹⁶Míǹ pu ní man bí ki pɔ̄ɔntí m-ba kí nīn sá unimɔnti Unimbɔti nimbiin nì binib mun cee.

¹⁷«Maa nìn gíti bí Jeerusaleem abiŋkaaŋkaa aba poon. Boonee ní m fātìi gítìń, ki cáań animbil kí tūtuǹ m-tiŋki nib, kí kpáàa ŋá saraabi.

¹⁸M ŋá akoobil ki dóò, boonee ní ki bíi ŋáań saraabi gbanti kunimbɔtidiin, ní bi bāań ki ká-mi. Biba kaa nìn kpáfì m-cee, fìkil fikil mun nìn kpá.

¹⁹Juuda yab bin kóò Asii ki nìn ká-mee di yaa bàà bímaan bi-ba a-nimbiin doo kí bàà sòoǹ tin ní m ŋá-bee, an bàà ŋān̄.

²⁰Àá bin bí nee ń tùkù-si, bi nín nìn cáá-mi bibɔsoonliibi kitil nimbiinee, tikpitil tin bi ká m ŋá

²¹an yaa kaa sá m nín nìn yú bi-kansikin ki téeń mpɔn dinyɔɔbumbaantiil yii: <M nín fōō ki kíí yii bitaŋkpiibi làá dāá fìkitēe puee ní m yú ni-nimbiin díǹ, ni bíi sòoǹ m-bɔtaa!>»

²²Pɔɔl sòon̄ míǹ ki dóòyee, ní Feeliikisi, un di nìn nyí kun di sá Yeesu saŋŋu tiŋanee, dāa bí-bi yii bí nīn kùǹ. Ní ki bí yii: «Asee usoojakpikpaan Liisiyasi yaa láa dɔ́mińee, m dāa béetí ni-bɔti gbanti.»

²³U lī mimmee, ní ki bí yii usoojakpil ubɔ ń cáá Pɔɔl kí pìin̄, ama kí yàntī ú tɔ̄ u-ba ŋwaam pu, kí nīn pūǹ u-bɔɔbi nsan bí nīn dòoń u-cee ki cāabìń tin tin u yaa lèe.

²⁴Iwiin iba boonee ní Feeliikisi nì u-nimpuu Drusii un sá ujuudanimpuee dɔ́miń ní ki tú bi cūtìi yíiń Pɔɔl. Ní Pɔɔl sòon̄ u pílifì min di sá yii bí fōō Yeesu Kriisitoo kí kííyee.

²⁵Ŋyunti ŋun Pɔɔl kíĺ ki bíi sòoǹ unil nín máaǹ kí nīn bí deedee kí fá u-wunti kɔdeeu puee nì ibɔsoon in bí ki dòońee puee, ní Feeliikisi fāŋkì, ní ki bí yii: «Nín̄ cá, daliŋkin m yaa ká mpaanee, m làá tí fàtīí yíiń-si.»

²⁶U nìn dàkafī yii Pɔɔl làá tīī-u animbil ní, míǹ pu ní u nìn yíì-u múlmul bi sòoǹ.

²⁷Abin ali boonee ní Pɔɔsiyusi Feestuusi fōō Feeliikisi yil ki kíǹ ki sá gɔmina. Feeliikisi là an mɔ̄ɔkiǹ Juuda yabee, ní u yāntì Pɔɔl gbíntìi bí sarkan.