Read Ntcham Actes 25 Bible Online

Actes 25 - Ntcham bible

Actes 25

¹Feestuusi nìn bàn̄ Juudee watil. Iwiin ita boonee ní u yíkì Seesaaree ki nín jɔ́ḿ Jeerusaleem.

²Ní bisaraaŋakpilib nì Juuda yab nikpaambi dɔ́miń ki kàan̄ Pɔɔl bɔti ki tùkū-u, ní ki gbāam̀ Feestuusi

³yii ú jī kimɔtii kí yàntī Pɔɔl ń dāan̄ Jeerusaleem. Di sá yii bi bɔ́ntì ki cí kí kpɔ̀-u nsanni.

⁴Ní Feestuusi kíí-bi yii: «Pɔɔl kā sarkan Seesaaree, man m-ba bíi bɔ́ntí kí fàtīí gítí niin ní nee.»

⁵Ní u gíti bí-bi yii: «Mimmee, ni-kpilib ń nóó-mi tí cù Seesaaree bí tin sòoǹ kí kpèè uninja gbanti yaa ŋá tikpitil tiba.»

⁶Feestuusi nìn ŋá iwiin inii kii saalaa pu bi-kansikin, ní ki fātìi gítìń Seesaaree. Kutaa wúntèe ní u kɔ́ ki kāl̀ kubɔsoondiin ní ki bí bí yíiń Pɔɔl.

⁷Pɔɔl bāańee Juuda yab bin nyánní Jeerusaleemee yú ki kɔ́ĺ-u ki sòoǹ u-pu yii u ŋáaǹ tibɔkpaandi tikpil. Ama baa nìn ŋūǹ kí cáań tiba bí béé yii tin pu bi sòoǹee sá ibaamɔn.

⁸Ní Pɔɔl mun yōoǹní tin u cááyee ki lī yii: «Maa yīntì nì Juuda yab marab ubɔ, kaa tí yīntì nì kunimbɔtidii, kaa yīntì nì gɔminakpaan Seesaar mun.»

⁹Feestuusi nìn là án mɔ̄ɔkiǹ Juuda yabee, ní u bālifì Pɔɔl yii: «A là kí jɔ̄m̀ Jeerusaleem bí sòoǹ a-bɔti nee m-nimbiinaaa?»

¹⁰Ní Pɔɔl kíí-u yii: «Gɔminakpaan Seesaar bɔsoondiikun ní man sí ki bí nee, niin ní an máaǹ bí sòoǹ m-bɔti! Kun puee maa ŋá Juuda yab tikpitil tiba, sii a-ba gba nyí míǹ tiŋan.

¹¹M yaa sá unikpiti ní ki ŋá tin tin máaǹ ŋkúmee, mimmee maa mɔ́tí ŋkúm pu. Ama, an yaa tí sá yii tin bi sòoǹ m-puee yaa sá nnyimɔn, ubɔ kaa ŋūǹ kí dū-mi kí tīī-bi. See ḿ bà gɔminakpaan Seesaar nimbiin!»

¹²Niinee ní Feestuusi nì u-kpilib kāl̀ ki sòon̄ ki kpōotì tɔb, ní ki kíí-u yii: «Kéè, a bí yii a là kí cù gɔminakpaan nimbiinaa! Ti kíí á lafun cù u-nimbiin.»

¹³Iwiin ili boonee, ní ubɔti Agriipa nì Beereeniisi bāań Seesaaree kí jāam̀ Feestuusi.

¹⁴Bi kāl̀ iwiŋkaaŋkaa iba poonee, ní Feestuusi dū Pɔɔl bɔti ki kàan̄ ki tùkū ubɔti yii: «Feeliikisi yāntì uninja ubɔ sarkan doo.

¹⁵M nín nìn cūtì Jeerusaleemee ní bisaraaŋakpilib nì Juuda yab kpilib tùkū-mi yii u nìn ŋá ikpiti ní, ní ki mēē-mi yii ḿ dáaĺ u-tafal.

¹⁶Ní m kíí-bi yii Room yab bíǹ kaa dù unil kí tīī bí dáaĺ u-tafal, asee bí pɔ̄-u kinyɔkɔ u mun ń sòoǹ u-nannanliibi nimbiin kun pu ní bi bí ki jáàyee.

¹⁷Bi dɔ́miń doo nee, kutaa wúntèe maa nìn gíti tāaǹ-bi, ní ki kɔ́ ki kāl̀ m-bɔsoondiikun ní ki bí bí cáań uninja gbanti.

¹⁸Ní u-nannanliibi mun kàan̄. Ama maa ká tikpitil tin ní m bàà dàkafī yii u máaǹ ki ŋée.

¹⁹An nìn sá bíǹ bi-ba marab nì un bi yíì Yeesu u kpíì kin Pɔɔl bí yii u bée ŋmaniŋma pu ní bi bíi kpákà.

²⁰Maa nìn nyí m nín làá ŋá pu kí béé tibɔti gbanti yilee, an pu ní m bālifì Pɔɔl yii u yaa là kí cù Jeerusaleem ḿ sòoǹ u-bɔti gbanti niin.

²¹Ní Pɔɔl yíì ki lī yii bí yàntī ú nīn bí sarkan kí nīn cí ŋyunti ŋun ní gɔminakpaan Seesaar làá dāá sòoǹ tibɔti gbantee. Ní m bí bí dū-u kí pìin̄ kí nīn cí ŋyunti ŋun m làá dāá dū-u kí tīī gɔminakpaanee.»

²²Ní Agriipa bí yii: «Man m-ba bàà là uninja gbanti ń sòoǹ ḿ pīlifì.» Ní Feestuusi kíí-u yii: «Tin u yaa cááyee, fool a fu gbìl̀.»

²³Kutaa wúntèe ní binib tikpil fōō Agriipa nì Beereeniisi, ní bi nì bisoojakpilib nì kitiŋ poon nikpaambi táá ki kɔ́ kubɔsoondiin. Ní Feestuusi yāntì bi cáań Pɔɔl,

²⁴ní ki bí yii: «Ubɔti Agriipa nì nimbi bin kɔkɔwoooo kpáfì doo nee, Juuda yab kɔkɔ dɔ́miń m-cee Jeerusaleem nì doo ki yíiń uninja un ni wāĺ nee ibeeyiin, ní ki tátí yii bi máaǹ kí kpɔ̀-u.

²⁵Ama man nyí yii waa ŋá tin máaǹ ŋkúmee, ní úǹ u-ba dāa bí yii gɔminakpaan ń sòoǹ u-bɔti. M kpēē yii an lafun máaǹ mimmee, ní m là kí dū-u kí tīī-u.

²⁶Maa láá nyí u-bɔti pu tiba kí ŋmà kí tīī ti-yidaaŋwu Seesaar kɔŋkɔnnee. Míǹ pu ní m cáań-u ni-cee, nì sii a-ba ubɔti Agriipa nimbiin, ní bi yaa bíi bàlifī-u anyɔɔbunee, ḿ ŋmā kí ká tiba poon kí ŋmà.

²⁷Di sá yii an kaa kítì ḿ dū usarkadaan kí tīī míǹ, kaa lī tin pu ní bi ŋúb́-uee.»