Read Ntcham Actes 27 Bible Online

Actes 27 - Ntcham bible

Actes 27

¹Ŋyunti ŋun bi bí yii tí dāá kɔ́ meela kí nīn cá Italiiyee, ní bi dū Pɔɔl nì bisarkadambi biba ki tīī kijapaai kin bi nìn yíì Juliyusee, u sá usoojakpil dikitil din bi nìn yíì «gɔminakpaan kitilee» poon.

²Ní ti kɔ́ meela un nyánní Adramiiti ki làá nīn cá Asii timmu mun kɔkɔ bí tiŋku caŋinee, ní ti yíkì. Ariistaarki un sá Maseeduwaan Teesalooniiki tiŋkinee nìn bí ti-cee.

³Kutaa wúntèe ní ti bàn̄ Siidɔn. Kii Juliyusi nín nìn ŋúb́ Pɔɔl tiŋan puee, u pú-u kinyɔkɔ ú cù u-bɔɔbi cee kí nyàabìń tin u yaa lèe.

⁴Ti dāa yíkì niinee, ní ki dūu dī ki kpàkaǹ Siipiri tiŋki kin dimɔɔl māntì ki túee, kun puee kubuŋu nìn pɔ̄ɔ̄ ní ki túŋkiń-ti.

⁵Ní ti dūtì tiŋku un bí ki nákáǹ Siilisii nì Paŋfiliiyee, ní ki dūu bàn̄ Miira, Liisii tiŋkin.

⁶Niin ní usoojakpilee nìn ká meela ubɔ nyánní Aleekisandirii ki cá Italii ní u yāntì ti kɔ́ úǹ.

⁷Meelee nìn dū iwiin tikpil ki còom̄ soooo soooo nì falaa, ki wāatì ní ki nín bàn̄ ki ŋmāntì nì Kiniidi tiŋki. Kubuŋu nín nìn páb́-ti, taa ŋūǹ kí dī niin kí nīn cá ndanee puee, ní ti dūu dīń Salmoonee watil pú ki dūu bāań Kreeti caŋin.

⁸Ti bíi kpàkaǹ ki cá nì falaayee, ní ki dūu bàn̄ kitiŋ kin bi yíì Laaseeyee caŋin laakin bi yíì Ditiŋkugbammɔntiilee.

⁹Ti nìn cōom̀ ki yúntì tikpil áli disaŋkindee dāa dūu kpántì mbusu, kun puee Juuda yab nyɔɔboobil wiiŋŋu jítì ní kitiŋ gbanti seeku mun nìn tóobiń. Míǹ puee ní Pɔɔl nìn bí ki kpáafí-bi yii:

¹⁰«Ti-yab, man wāĺ yii ti-saŋŋu nee làá cáań-ti dinimbinaamandi, kun puee meela nì tiwan tin u túee làá ká falaa tikpil, an yaa yíì gba, timbi ti-ba làá kpú.»

¹¹Ama usoojakpilee kaa nìn fōō Pɔɔl nín sòon̄ puee ki kíí, ní ki nìn máká un nìn sá ukpil meelanee nì meeladaan pu.

¹²Meela sililaŋki gbanti nín kaa ŋān̄ kuseeunee puee, ní binib tikpil nìn là kí yīkì niin, bi yaan ŋūǹ kí bà meela sililaŋki Feeniisi, Kreeti tiŋki kin nìn túliń ŋwìiń jeetilaŋki púee, kí kàl̄ niin kuseeu ń jītí.

¹³Kubuŋu kubɔ nyánní ŋŋaŋgan pú ki kíĺ ki bíi jītí fiii fiii. Niinee ní bi dākafì yii bi làá ŋmā kí bà laakin bi bàà màkēe, ní ki dáaĺ dikújal din ŋúb́ meela nnyiminee ki cúu kútì, ní ki búntì ki kpākaǹ ki pìlīǹ Kreeti tiŋkugbandi.

¹⁴An kaa yúntì, kpalaayee ní kubuŋkpaaŋŋu kun bi yíì Urakilɔneeyee nyánní Kreeti jooŋŋin ki sīntìń,

¹⁵ki dɔ́miń ki yōoǹ meela. Taa nìn gíti ŋūǹ kí ŋá tiba kí pèefì meela, asee ti nín yāntì ku yōoǹ-ti ki kpáàa búntèe.

¹⁶Ní ti cūtìi jítì kitimbilii kin bí tiŋku kansikinee bi yíì-kì yii Kooda. Nì falaakpaŋkpaan ní ti dāa nín ŋúń ki cúú buŋalimbu bun nìn nɔ̀b̄ meelee kitiŋ gbanti caŋin,

¹⁷ki dáaliń-bu ki kɔ́ǹ meelan, ní ki dū iŋmii ki bóob́ ki māntìi tú meela taapu. Bi nín nìn fàŋkí yii tí taa cùú lítí Siirtii bul kpaanceetii puee, ní bi sīntì iŋaabu taapu, ní kubuŋkpaaŋŋuee cáá-ti ki cáa nín cá.

¹⁸Ku nín gbíntìi mɔ̄tìi páb́-tee pu, ní kutaa wúntèe bi dū tinyɔmpuwan tiba ki tɔ́ tiŋkun.

¹⁹Winta dalee, ní bíǹ bi-ba dū tin bi cáa kpòotī meelee ki tɔ́ nnyimin.

²⁰Iwiin tikpil poonee, taa ti ká ŋwìiń nì iŋmalbijaa, ní kubuŋkpaaŋŋuee gbíntìi jītí iwiin kɔkɔ ki pɔ̄ɔ̄. Niinee taa ti dàkafī gba yii ti làá ŋmátí.

²¹Áli an yúntì bin nìn kā meelanee kaa jíń tiba. Niinee ní Pɔɔl yúl̀ bi-kansikin ki bí yii: «Ti-yab, ni yaa nìn pílifiǹ-mee, taa bàà yíkìń Kreeti. Taa bàà kāntí falaa nì asaluu un bí nee.

²²Ama kɔŋkɔnnee m mèé-ni, ní pɔ́ɔǹ ni-ba, kun puee ni-kansikin báà ubɔ kaa làá wāŋkì, asee meela baba di làá bīil̀.

²³Kun puee kunyeeu nee, Unimbɔti un yì-mi m nóó-uee túnní u-tuuŋŋu ŋubɔ m-cee,

²⁴ní ŋu bí-mi yii: <Pɔɔl, taa fàŋkì! Asee á bà gɔminakpaan nimbiin bí sòoǹ a-bɔti. Míǹ puee, Unimbɔti làá ŋá-si tiŋan kí yàntī bin kɔkɔwoooo kā meelanee ń ŋmátí!>

²⁵An puee ti-yab, pɔ́ɔm̀maan ni-ba! Kun puee m cáá dimákal Unimbɔti pu yii u nín lī puee, míǹ ní án làá ŋá.

²⁶Ama án làá cáá-ti kí kpàkan̄ kitimbilii kiba kin nnyim māntì ki túee kpaanceetiŋu laaba ní.»

²⁷An nìn bàn̄ ŋwiin ŋubɔ kpá saalku nyeeku dalee, kubuŋu gbanti gbíntìi cáá-ti ki yìiǹ Meediiteeranee tiŋkuu pu. Kunyataasiiuee ní bimeelaŋaaliliibi bíi lì yii ti cīkiǹ kitiŋ kiba.

²⁸Ní bi dū tiŋmantikaal ki tɔ́ tiŋkun, ní ki ká yii nnyim nyóoŋŋu nìn sá meetab bita kpá imuŋku ili. Ti gíti sútì fiiiyee, ki tí dūu tɔ́ mpɔm, ní ki tí ká yii nnyim nyóoŋŋu sá meetab mmuŋku nì binii.

²⁹Niinee ní bi kíǹ ki fàŋkí yii ti-meelau nee ń taa ŋée kí cùú yā ataŋkpee. Míǹ puee ní bi dū akújal anaa ki tɔ́ boon án nīn ŋúb́ meela, ní ki kíǹ ki kā ki pòontí yii kutaa ń wúntí.

³⁰Bimeelaŋaaliliibi nìn nyàab̀ kí nyā meelanee, ní bi gíiǹ buŋalimbu bun nìn nɔ̀b̄ meelee ki tɔ́ nnyimin, ní ki mɔ́ntí yii bíǹ bàà là kí cáá akújal aba kí kúĺ nyɔkɔpu mun ní.

³¹Ní Pɔɔl bí usoojakpilee nì u-soojab yii: «Binib nee yaa kaa kāl̀ meelan soooo, naa làá ŋmátí!»

³²Niinee ní soojab gíí iŋmii in nɔ̀b̄ buŋalimbuee ki tīl̀, ní bu gbíntì nnyimin.

³³An kíǹ fiii kutaa ń wúntée, ní Pɔɔl mēē bi-kɔkɔ bí dāá jī tijin, ní ki bí-bi yii: «Ŋwiin ŋubɔ kpá saalku sèé nee ni nín kā kaa jīǹ tibee.

³⁴Míǹ puee, m gbàam̄-ni, ní jīmaan tijin, kun puee tijin bɔti páb́ ki tīī ni-maŋfal. Di sá yii ni-kansikin báà ubɔ yikpilku kaa làá wāŋkì.»

³⁵U lī míǹ ki dóòyee, ní ki yōoǹ kpɔnɔ ki jáam̀ Unimbɔti tijin gbanti pu bi-kɔkɔ nimbiin, ní ki gíí kpɔnɔ ki kíĺ ki bíi ŋmóò.

³⁶Niinee ní báà ŋma ká kunyannyaau, ki kíĺ ki bíi ŋmóò.

³⁷Timbi bin kɔkɔ nìn kā meelanee nìn sá binib kulaafaau nì binaa kpá imuŋku inaa.

³⁸Bi jíń ki bál̀ee, ki là yii meela ń taa nín̄ gíti nyìm̀ kí nīn bí fúku fukuee, ní bi dū ŋkpɔnɔyim ki dūu tɔ́ nnyimin.

³⁹Kutaa wúntèe, bimeelaŋaaliliibi kaa béè kitiŋ gbanti, ama ní ki ká dibunlɔkɔl diba, digbándi sá dibul ŋma, ní bi bí yii, bi yaan ŋūǹ kí bàà ŋàal̀ meela kí cùnnì niin.

⁴⁰Niinee ní bi cúú iŋmii ki cúu bútì, ní akújalee gbíntì nnyimin, ní bi cúú ŋŋmii ki cúu kútì tiwan tin kpòotī meelee, ní ki kpátì ŋŋaabu ŋun poon kubuŋu kóò ki téekí meelee. Kubuŋu bíi téekí meelee, ní bi dūu dī tiŋku gbandi watil pú.

⁴¹Niinee ní meela cūtìi sàl̄ dibukpaandi diba kansikin ki gbíntì niin, ní u-nyɔkɔpu múĺ dibulin, kaa ti lèekī, ní tinyiŋgban dɔ́miń ki fáá ki wīī boon.

⁴²Niinee ní soojab bàà là kí kpɔ̀ bisarkadambi, yii bí taa ŋée kí wāŋkì nnyim kí nyā kí sāǹ kí kátí.

⁴³Ama usoojakpilee là kí fīī Pɔɔlee, ní ki yíì yii bí taa ŋá míǹ, ní ki bí yii bin ŋūǹ nnyimee ń péé kí yùkū kí tìin̄ kí wāŋkì kí nīn cá ditiŋkugbandi,

⁴⁴ní bin kíǹee ń nīn cáá idɔ àá ameelakati kí nīn wáŋkí ki pá bi-boon. Míǹ ní ti ŋá, ní ti-kɔkɔ nyáń dibuŋgbándi nì alaafiya.