Read Ntcham Actes 28 Bible Online

Actes 28 - Ntcham bible

Actes 28

¹Ti ŋmátì ki dóòyee, ní ki nín béè yii bi yíì kitiŋ gbanti Maalti.

²Binib bin nìn kóò niinee baasii ŋúb́-ti mmɔntiimin. Utaa nìn kíĺ ki kíǹ ki nì, ní tiwool bí. Míǹ puee bi nìn kpāā ŋŋmi ní ki yíiń-ti ní ti-kɔkɔ dɔ́miń ki kāl̀ ki māntìi tú ŋŋmee ki wùl̀.

³Ní Pɔɔl cūtìi báań tikpaŋkpaal dibɔ́ndi diba, ukoowaati kā niin, ki cáań ki tɔ́ ŋŋmin. Niinee ní ŋŋmifaam píĺ ukoowaatee, ní u nyáń ki jú u-ŋal ki báaǹ.

⁴Binibee nín ká yii ukoobu lúń Pɔɔl ŋal puee, ní bi bíi lì tɔb cee yii: «Uninja nee máaǹ ki làá nīn sá unikpɔl ní. Di sá yii, min kɔkɔwoooo u ŋmátì ki nyáń tiŋkunee, ti-waal deedeedaan kaa pú-u mpaan ú tɔ̄ u-ba.»

⁵Niinee ní Pɔɔl gbéeǹ ukoobuee ki fíiǹ ki tɔ́ ŋŋmin, kaa gbìl̄ tiba.

⁶Ní bi kíǹ ki kā ki kpèé yii an làá díkáaa, u làá lítí kí kpú niin niin. Ama bi kāl̀ ki cíitìi kpēē ki gīī, tiba kaa ŋá-uee, ní bi kpántì bi-landɔkɔi, ki kíǹ ki bíi cáá yii an sá diwaal diba ní.

⁷Niin caŋin ní kitiŋ gbanti bɔtiu un bi yíì Pubiliyusee saaku nìn bí. Kijapaayee nìn fōō-ti mmɔntiimin, ti dōoǹ u-dumpu iwiin ita.

⁸Pubiliyusi baa nìn dɔ̄ u-wunti píĺ kpaŋkpam ki cɔ̀tī. Ní Pɔɔl cūtìi māntì u-pu, ní ki mēē ki tīī-u, ní ki dū u-ŋalii ki páaǹ u-pu, ní u pɔ́ɔkì.

⁹Niinee ní bibunliibi bin bí niinee kɔkɔ dɔ́miń ki ká dicáaǹdi.

¹⁰Binibee nìn ŋá-ti tiŋan tikpil, ní daliŋkin ti làá yīkèe, bi nìn tīī-ti tin kɔkɔ ti lèe.

¹¹Iŋmal ita boonee ní ti kɔ́ meela un nìn yúl̀ kitiŋ gbantin kuseeu jítèe. U nìn nyánní Aleekisandirii, bi kpítì awaa ali ki nántiǹ atab ki nákáǹ u-pu.

¹²Ti bàn̄ Sirakuusi tiŋkinee, ní ki kāl̀ niin iwiin ita.

¹³Niinee, ti yíkì ki kpàkaǹ ditiŋkugbandee, ní ki tin dūu bàn̄ Reejiyoo. Kutaa wúntèe, ní kubuŋu nyánní ti-boon pú ki kíĺ ki bíi jītí, ní ti dū iwiin ili ki dūu bàn̄ Pusɔl.

¹⁴Kitiŋ gbantin ní ti nìn ká nnabiyaamu mubɔ, ní bi bí yii tí kàl̄ bi-cee kinyɔŋ kiba. Ti nín cōom̀ pu ki dāa bàn̄ Roomee dee.

¹⁵Nnabiyaamu mun bí Roomee nín gbìl̄ ti-puee, ní bi yíkìi dɔ́miń áli Apiyusi nyɔŋkin nì kitimbilii kin bi yíì Inicaŋkɔŋkoon itee, [114] ki túŋkì-ti. Pɔɔl nín pée ká-bee, ní u bíi nyɔ́ŋkí Unimbɔti ní ki ká kunyannyaau.

¹⁶Ti nín bàn̄ Roomee, ní bi pú Pɔɔl nsan ú nīn kóò u-baba sooja ń nīn cí-u.

¹⁷Iwiin ita boonee, ní Pɔɔl yíiń Juuda yab kpilib bin nìn kóò Roomee bí kpāfì u-cee. Bi dɔ́miń ki kpáfèe, ní u bí-bi yii: «M-nabiyaamu, maa kpáàa ŋá ti-samaau tiba, kaa yīntiǹ ti-naanjab koobiliŋ mun. Ama bi cúú-mi Jeerusaleem, ki dū-mi ki tīī Room yab.

¹⁸Ní bíǹ bālifì-mi anyɔɔbun, ní ki bàà là kí gíiǹ-mi kí líí, kun puee baa ká kun di yì-tì ní bi máaǹ kí kpɔ̀-mee.

¹⁹Ama Juuda yab kaa nìn kíí, yii bí taa líí-mi. An di yì-tì ní m nìn bí yii gɔminakpaan ń sòoǹ m-bɔti. Nì míǹ kɔkɔee, maa làá bīil̀ m-yab.

²⁰Kun pu ní m là kí ká-ni kí sòoǹ nì nee dee. Di sá yii dipoondi din pu Isirayeel yab kā ki mákée pu ní ikusaka kā m-ŋaan nee.»

²¹Ní bi kíí Pɔɔl yii: «Juudee yab kaa ŋmàn̄ní-ti kugbɔŋu kubɔ ki sòon̄ a-bɔti pu tiba. Ti-nabiki kiba mun kaa tí nyánní niin ki dɔ́miń ki máafì-ti a-bɔti tiba. Ubɔ mun kaa tí tùkū-ti yii a ŋá tikpitil tiba.

²²Míǹ puee, ti bàà là kí béé tin tin a cááyee, kun puee ti nyí yii báà laakiŋyee, binib tikpil kaa là nnimbɔtisan ŋun a nóó nee.»

²³Ní bi fātìi yóoǹ-u ŋwiin, ní binib tikpil dāa dɔ́miń ŋwiin gbanti. Pɔɔl nìn kíĺ kutaafaau ki cáa sāā kujoou ki cáá Mooyiisi marab nì Unimbɔti bɔnaatiliibi gbɔnti ki sòoǹ nì bi Unimbɔti Beel bɔti taapu, ki nyàab̀ bí ŋmā kí fōō Yeesu kí kíí.

²⁴U nín nìn sòon̄ puee, biba nìn gbìl̄ ki fōō ki kíí, ama biba mun nìn yíì, kaa fōō ki kíí.

²⁵Kunikpɔŋkpɔkɔu nìn kɔ́ bi-kansikin. Bi làá nīn cée, ní Pɔɔl lī-bi dinyɔɔbundi nee yii: «Tiŋman, an sá ibaamɔn ní Unimbɔti Fam dī u-bɔnaatiliu Yeesaya pu dooooyee ki sòon̄ nì ni-naanjab, yii:

²⁶<Cù binib nee cee kí tùkù-bi yii: Ni làá dāá gbìl̄ nì ni-tafaliŋ ní kaa nyí taapu, ki làá dāá nīn kpèé nì ni-nimbiliŋ ní kaa wāĺ.

²⁷Di sá yii binib gbanti pɔbiliŋ gbìfì, bi kpáá bi-tafaliŋ ki ŋúb́ bi-nimbiliŋ. Baa là kí nīn wāĺ, kaa là kí nīn gbìl̀, kaa là bi-landɔkɔi mun ń béé taapu, bí bàà gítiń m-cee ḿ cáaǹ-bi[115]!>»

²⁸Ní Pɔɔl gíti kútì-bi yii: «Ní nīn nyímaan yii Unimbɔti tú u-fiil nyɔɔbundi nee bin kaa sá Juuda yabee cee[116]! Bíǹ làá fōō-dì.» [

²⁹Pɔɔl lī an nyɔɔbuŋŋee ki dóòyee ní Juuda yab búntì ki còom̄ ki kpákà bi-ŋmaniŋma tikpil[117].]

³⁰Pɔɔl nìn kāl̀ abin ali amɔn kudii kun u fōō ki pà ki kóòyee poon, ki nìn fòol̄ bin kɔkɔ dòoń u-ceeyee.

³¹U nìn sòoǹ Unimbɔti Beel pu, ki dàkà ti-Dindaan Yeesu Kriisitoo bɔti nì tininjati, ubɔ kaa páb́-u.