Read Ntcham Actes 4 Bible Online

Actes 4 - Ntcham bible

Actes 4

¹Ŋyunti ŋun Peetroo nì Yoowaneesi nìn dáá bíi sòoǹ nì kunipaauee, ní bisaraaŋaliibi nì Sadusab nì bin cí kunimbɔtidiiyee kpiliu bāań.

²An kaa nìn mɔ́ɔkiǹ-bi, kun puee bi bíi sòoǹ nì samaa Yeesu bɔti ki dàkà yii bitaŋkpiibi làá dāá fìkitī.

³Ní bi cúú Peetroo nì Yoowaneesi ki cáa tɔ́ sarkan áli kutaa nì ku-wuntil, kun puee an nìn sá kujoou ní.

⁴Nì míǹ kɔkɔee, bin nìn gbìl̄ bi-nyɔɔbuŋŋi gbantee tikpil nìn fōō ki kíí. Bi-wíiŋŋu nìn bàn̄ kii kutukub biŋmoo nyɔkɔm.

⁵Kutaa wúntèe, Juuda yab yidambi nì bitindaŋkpilib nì bimaradakaliibi kpáfì Jeerusaleem.

⁶Bin nìn bée di sá usaraaŋakpil Aani, nì Kaayiifi nì Yoowaneesi nì Aleekisandir nì bin kɔkɔwoooo nìn sá usaraaŋakpil dicaŋkunee.

⁷Ní bi nyántì Peetroo nì Yoowaneesi ki yóoǹ bi-kansikin ní ki bālifì-bi yii: «Ŋma pɔŋŋu pu nì ŋma yindi pu ní ni ŋá míǹ ní?»

⁸Niinee Unimbɔti Fam kpákatìń Peetroo pu, ní u kíí-bi yii: «Biyidambi nì bikpilib, m ŋá-ni gaafalaa.

⁹Ni bàlifī kí béé díǹ tiŋan tin ní ti ŋá uninja neeyee taapu, nì an nín ŋá pu ní u ká dicáaǹdeeee?

¹⁰Míǹ puee, ni-kɔkɔ ń béé tiŋan, ki kpáaǹ Isirayeel yab kɔkɔ, yii an sá Yeesu Kriisitoo Naasaareeti yɔu yindi pu ní u pɔ́ɔkì. An sá u-pɔŋŋu pu ní uninja nee yú ni-nimbiin nì u-gbampɔŋŋu nee. Nimbi di kpáá Yeesu ndɔpuntikaa pu, ama Unimbɔti fīkitì-u ditaŋkpiilin.

¹¹Úǹ pu ní an ŋmàn̄ Unimbɔti gbɔŋkun yii: <Ditaŋkpal din nimbi bidimaliibi dūu fée di kpántì ditaŋkpal din ŋúb́ kudii pɔŋŋuee[29].>

¹²Baa ŋūǹ kí dī ubɔ pu kí ká difiil see Yeesu baba pu. Di sá yii taapu doo Unimbɔti kaa ti tīī ufiil ubɔ un pu timbi binib máaǹ kí dī kí ká difiilee.»

¹³Biyidambee nín ká Peetroo nì Yoowaneesi sòoǹ nì tininjatee, an ŋá-bi maamaaci, kun puee bi ká yii bi sá binifantantiibi, kaa nyí kugbɔŋu. Ama bi béè yii bi nì Yeesu di nìn tāatí.

¹⁴Bi nín ká uninja un pɔ́ɔkèe yú bi-ceeyee, baa ti ŋūǹ kí lì tiba.

¹⁵Ní bi bí Peetroo nì Yoowaneesi ń nyā kubɔsoondiin kí wàatī-bi, ní ki kíǹ ki bàlifī tɔb yii:

¹⁶«Ti làá nín ŋá binib nee mana dee? Kun puee Jeerusaleem yab kɔkɔ ká yii bi ŋá maamaacikpaan ubɔ, timbi ti-ba kaa ti ŋūǹ kí néé.

¹⁷Ama, tibɔti gbanti ń taa gbìtī kí cù ndan samaa kɔkɔ ceeyee, tí dū mpɔmpiin kí pìim̄maan-bi nsan bí taa ti pée sòon̄ Yeesu yindi gbanti pu báà ubɔ cee.»

¹⁸Niinee ní bi yíiń-bi ki pīiǹ-bi nsan bí taa ti sòoǹ kí dàkà binib Yeesu gbanti yindi pu báà fiii.

¹⁹Ní Peetroo nì Yoowaneesi fātìi kíí-bi yii: «An ŋān̄ Unimbɔti nimbiin yii tí pīlifiǹ nimbi kí yàntī Unimbɔtaaa? Kíímaan-ti!

²⁰Ama timbee, taa ŋūǹ kí nīn ŋmí kí taa sòoǹ tin tin ti kée nì tin ti gbìl̄ee.»

²¹Niinee ní bi fātìi tí kpīiǹ-bi ki gíiǹ-bi ki líì, kaa nyí bi nín làá ŋá pu kí dáaĺ bi-tafalee, kun puee samaa kɔkɔ nìn pàkà Unimbɔti tin bi nìn ŋée pu.

²²Uninja un nìn ká maamaaci cáaǹtam gbantee nìn jítì abin imuŋku ili pu.

²³Bi gíiǹ Peetroo nì Yoowaneesi ki líìyee, ní bi búntì bi-yab cee ní ki bàn̄ ki máafì-bi tin kɔkɔ bisaraaŋakpilib nì bikpilib līń-bee.

²⁴Bi gbìl̄ mimmee, bi-kɔkɔ kpáfì dicilpu kinyɔɔbaantii ki mēē Unimbɔti yii: «Ti-Dindaan, sii di náań yilpu nì taapu, kitiŋ nì tiŋku nì tin kɔkɔwoooo pée bée[30].

²⁵Sii di yāntì a-Circir Fam dī ti-naanja a-tɔntɔnliu Daafiidi pu ki sòon̄ yii: <Ba ŋá ní atimbun yòontí ŋi-ba yilpu ki sòoǹ tibɔfan míǹ? Ba ŋá ní samaa cáá ilandɔkɔkpiti in kaa làá tɔ̄ ditundee míǹ?

²⁶Duulinya bɔtiibi nì biyidambi kpáfì ki bóob́ dikɔ̀ndi kí jáǹ ti-Dindaan Unimbɔti nì ubɔti un u lēēyee[31].>

²⁷An lafun ŋá míǹ, yii kitiŋ nee poon Eeroodi nì Pɔnsi Piilati nì binicambi nì Isirayeel yab kpáfì kí jáǹ a-circir tɔntɔnliu Yeesu, un a lēē u sá Meesiyayee[32].

²⁸Kujaau kun bi jáń nì Yeesuee yāntì bi ŋáaǹ tin kɔkɔwoooo a nìn lī ki yóoǹ a-pɔŋŋu nì a-ciiŋyi pu dooooyee.

²⁹Kɔŋkɔnnee, ti-Dindaan, kpèè bi nín lī yii bi làá ŋá-ti ntoomee puee, kí tūtuǹ timbi a-tɔntɔnliibi tí nīn sòoǹ a-bɔti nì tininjati.

³⁰Á tàntī a-ŋal kí dàkà a-pɔŋŋu, bibunliibi ń ká dicáaǹdi, maamaacib nì tidaandi ń ŋá a-circir tɔntɔnliu Yeesu yindi pu.»

³¹Bi mēē ki dóòyee, dibɔbilin niinee kitiŋ cīŋkì, ní Circir Fam gbí bi-kɔkɔ mmɔntiim, ní bi kíĺ ki bíi sòoǹ Unimbɔti bɔti, kaa fàŋkí.

³²Bin kɔkɔwoooo nìn fōō Yeesu ki kííyee nìn pēē kinyɔkɔ ní bi-pɔbiliŋ nìn sá diba. Ubɔ kaa nìn lì yii tin u cááyee sá u-baba yati, ama báà ŋma wanti nìn sá ki tīī bi-kɔkɔ ní.

³³Nì mpɔŋkpaan ní Yeesu kpambaliŋ nìn sòoǹ ki lèekī ti-Dindaan Yeesu fìkititam seerau, ní Unimbɔti biindi nìn bí bi-pu tikpil.

³⁴Bi-kansikinee, ubɔ kaa nìn bí ki sá usoodaan, kun puee bin nìn cáá akpaan àá adiinee nìn nyáfí ní ki cāabìń tin bi nyáfèe nimbiliŋ ki bīil̀ Yeesu kpambaliŋ nimbiin,

³⁵ní bi yàkatī bi-kansikin báà ŋma nín máaǹ miŋyee.

³⁶Míǹ ní Jooseefi ubɔ nìn bí ki sá Leefii naakookun ní bi màl̄-u Siipiri tiŋkin. Yeesu kpambaliŋ nìn páaǹ-u diyindi yii Baarnaabaasi, an taapu sá yii, un ŋmēentí binib ki tìì kunyannyaauee.

³⁷U nìn cáá bukpaa bubɔ ki dūu nyáfì, ní ki cáań animbil ki bíl̀ Yeesu kpambaliŋ nimbiin.