Read Ntcham Actes 5 Bible Online

Actes 5 - Ntcham bible

Actes 5

¹Ama, uninja ubɔ nìn bí, bi yíì-u Ananiyasi. U nì u-nimpuu Safiira nìn kpáfì ki nyáfì bi-kpaatanti,

²ní ki bātì animbil, ki kíǹ ŋin kíǹee ki cáa bíl̀ Yeesu kpambaliŋ nimbiin. U-nimpuu mun nìn nyí min u-cal ŋée.

³Ní Peetroo bí yii: «Ananiyasi, ba ŋá ní a yāntì Sitaan jíń a-pɔbil poon mpaan míǹ[33]? A mɔ́ntì Unimbɔti Fam ki bātì tikpaatan nimbiliŋ pu.

⁴Sii di yì a-kpaatanti, a ŋūǹ kí dū-tì kí yóoń. A nín tí nyáfì-tèe, sii di yì an nimbiliŋ. Kin an ŋá mana ní a yāntì nlandɔkɔkpiti fōō mpaan a-pɔbil poon míǹ? An kaa sá binib ní a mɔ́ntì, an sá Unimbɔti.»

⁵Ŋyunti ŋun Ananiyaasi gbìl̄ mimmee, ní u lítì ki kpíì. Tifaandi nìn kɔ́ bin kɔkɔwoooo gbìl̄ an bɔtee.

⁶Ní binaacimpɔmbi yíkì ki dū sata ki bīiǹ-u, ní ki yōoǹ-u ki cáa síb́.

⁷An yúntì ki bàn̄ kii tikúti titee, ní u-nimpuu kóoń, kaa kpáàa béè tin jítèe.

⁸Ní Peetroo bālifì-u dinyɔɔbundi yii: «Tùkù-mi, ni nín nyáfì tikpaatan puee nimbiliŋ sɔ̀ɔɔ?» Ní u kíí yii: «Iiin, ti nín nyáfì puee dee.»

⁹Niinee Peetroo bí-u yii: «Ba ŋá ní sii nì a-cal kpáfì ki cɔ́ŋkì ti-Dindaan Fam míǹ? Kpèè, bin síb́ a-calee di dòoń kupunyɔkɔpuee! Bi làá dāá yòon̄ si mun.»

¹⁰Kpalaa niinee, ní u mun lítì Peetroo taaŋi taapu ki kpíì. Binaacimpɔmbi kóońee, ki ká u kpíì, ní bi yōoǹ u mun ki cáa síb́ ki kɔ́ĺ u-cal.

¹¹Tifaandi nìn kɔ́ Kriisitoo nikitil kɔkɔ nì bin kɔkɔ nìn pée gbìl̄ an bɔtee.

¹²Yeesu kpambaliŋ nìn ŋáań tidaandi nì maamaacib tikpil samaa kansikin. Bin fōō ki kííyee nìn kpáfí dicilpu dibɔɔbaantiil Saloomɔn kadantikuu taapu.

¹³Tifaandi nìn kɔ́ bin kaa fōō ki kííyee, ní bi-kansikin báà ubɔ kaa ti là kí sútíí pìl̄-bi, ama nì míǹ kɔkɔee bi nìn pàkà-bi.

¹⁴Bininjab nì binimpoobi bin nìn fòol̄ ti-Dindaan ki kíikée nìn wīikí tikpil, ki gbēentí ŋyunti kamaa, ní ki dūu ŋá dinikitikpaandi.

¹⁵An yāntì áli gba binib cāabìń bibunliibi ki bīil̀ nlambamu nì tikampati pu adan pu, án nín làá ŋá pu Peetroo yaa jītée, u-jiliŋku kpaŋkpam ń lítí biba puee.

¹⁶Binib tikpil mun nìn nyēeń ntimu mun kaa dátiǹ Jeerusaleemee, ki cāabìń bibunliibi nì bin pu arasiniibi nìn kā bi wáatèe, ní bi-kɔkɔ kāntí dicáaǹdi.

¹⁷Niinee usaraaŋakpil nì u-yab kɔkɔ, an dàkà yii Sadusab jandi, kíǹ ki ná Yeesu kpambaliŋ.

¹⁸Bi nìn yíkìi cúú Yeesu kpambaliŋ ki pīiǹ-bi kudii.

¹⁹Ama ní kunyeeuee ti-Dindaan tuuŋŋu ŋubɔ dɔ́miń ki pīitì kusarkadii punyɔmmu ki nyántì-bi, ní ki bí-bi yii:

²⁰«Cù kí yūĺmaan kunimbɔtidii poon kí dū dimaŋfal bɔti kɔkɔ kí sòoǹ, samaa ń gbìl̄.»

²¹Bi gbìl̄ mimmee, ní ki péé kutaafaau ki kɔ́ kunimbɔtidiin ní ki kíĺ ki bíi dàkà Unimbɔti bɔti. Niinee, usaraaŋakpil nì u-yab bāań ki yíiń bibɔsoonliibi kitil. Bi kpáfì ki tú bí yíiń Yeesu kpambaliŋee kusarkadiin.

²²Pilisib bàn̄ee, kaa ká-bi kusarkadiin, ní ki fātìi gítìń ki tùkū-bi yii:

²³«Ti bàn̄ee, kusarkadii pīī kpálkpal, ní soojab yú mpunyɔmu nyɔkɔpui, ní ti cúu pīitèe, báà ubɔ nì ubɔ kpá poon!»

²⁴Bi gbìl̄ mimmee, ní bin kpèé kunimbɔtidiiyee kpiliu nì bisaraaŋakpilib bākatì nì Yeesu kpambaliŋ nín wáŋkì puee, kun puee tiba yaa làá gíti bàń-bi tibɔti nee poon sɔ̀, baa nyí.

²⁵Ní ubɔ bāań ki bí-bi yii: «Binib bin ni cúú ki tɔ́ sarkanee di yú kunimbɔtidiin ki dàkà samaayee.»

²⁶Ní bin kpèé kunimbɔtidiiyee kpiliu nì u-pilisib cūtì ki cáań-bi soooo, kaa ŋá-bi mpɔn, kun puee bi fàŋkí samaa ń taa tɔ̄-bi ataŋkpee.

²⁷Bi cáań-bee, ní ki cáá-bi ki cūnnì bibɔsoonliibi kitil nimbiin. Ní usaraaŋakpil bālifì-bi tibɔti yii:

²⁸«Taa bí-ni yii ní taa ti sòoǹ diyindi din pu ni sòoǹ nee pu kpataaa? Kpèèmaan, díǹ pu nee ni yāntì ni-bɔti gbanti gbītì Jeerusaleem kɔkɔ! Mimmee, ni là timbi ń jī kijapaai nee kpuulool deeyaa[34]!»

²⁹Ní Peetroo nì Yeesu kpambaliŋ ŋin kíǹee, kíí-u yii: «An máaǹ tí gbìl̄ Unimbɔti nyɔkɔ kí yàntī binib.

³⁰Nimbi di kpáá Yeesu ndɔpuntikaa pu ki kūū-u, ní ti-naanjab Nimbɔtiu fīkitì-u.

³¹Unimbɔti dū-u ki kāaǹ u-ŋaŋgiil pú, ú nīn sá Ubɔti nì Ufiil ki tīī Isirayeel yab bí ŋmā kí fá bi-kpitii, Unimbɔti ń dūú pɔ̄-bi.

³²Timbi nìn ká ki sá biseeradambi an bɔti pu, ki kpáaǹ Circir Fam min Unimbɔti tìì bin tɔ́-uee.»

³³Bi gbìl̄ an bɔtee, ní ki fōō diŋuul ki là kí kpɔ̀ akpambal.

³⁴Ama Fariisab kansikin ubɔ nìn bí niin, bi yíì-u yii Gamaliyeel[35], u sá umaradakal un samaa kɔkɔwoooo nìn tɔ́ee. Kijapaayee nìn yáatìi yúl̀ bibɔsoonliibi kitil kansikin ki pú kinyɔkɔ yii bí dá láá nyāntí akpambalee.

³⁵Ní u bí-bi yii: «Isirayeel yab, ní kpèèmaan tiŋan nì tin ní ni là kí ŋá nì njapaamu nee!

³⁶An kaa yúntì ní un bi nìn yíì Teedasee yíkì ki yíì u-ba yii u sá unikpaan, ní binib bàn̄ kii tilaafati tili ki nóó-u. Ní bi kūū-u ní bin kɔkɔwoooo nìn nóó-uee yàl̄, báà ubɔ kaa ti kíǹ.

³⁷Úǹ boonee, ní Juudasi ugaaliileeja mun yíkì ŋyunti ŋun bi kàan̄ binibee, ní ki dáaliń kunipaau ki gíiǹ u-jandi pú. Ní bi kūū u mun ní bin kɔkɔwoooo nìn nóó-uee yàl̄.

³⁸Míǹ puee, tin m cáá ki làá tùkù-nee di sá yii, ní càntīmaan binib nee kí taa ŋá-bi tiba, kun puee atuun ŋin bi ŋáań nee yaa nyánní binib cee, ŋi bí kí dāá kúntí.

³⁹Ama an yaa nyánní Unimbɔti cee, naa ŋūǹ kí pìin̄-bi nsan. Ní kpèèmaan tiŋan kí taa jáǹ Unimbɔti kujaau!»

⁴⁰Niinee, bi-kɔkɔ kpáfì ki gbìlīǹ-u ní ki yíiń Yeesu kpambaliŋ, ní ki gbáń-bi anaalab, ní ki bí-bi yii bí taa ti sòoǹ Yeesu yindi pu, ní ki gíiǹ-bi ki líì.

⁴¹Nì dipɔɔpindi ní Yeesu kpambaliŋ nìn nyáń bibɔsoonliibi kitil nimbiin, kun puee Unimbɔti ŋá-bi tinyool ki yāntì bi jíń falaa Yeesu yindi pu.

⁴²Ní baabadal bi bí kunimbɔtidiin, nì binib dumpui ki sòoǹ ki dàkà tibɔmɔntiil tin sòoǹ Yeesu, Meesiya puee, kaa gbèentí.