Read Ntcham Actes 6 Bible Online

Actes 6 - Ntcham bible

Actes 6

¹Iwiin gbanti poonee Yeesu boonnooliibi wíiŋŋu nìn gbéeǹ, ní Juuda yab bin gbìl̀ Greeki sooŋyee bíi gbùkum̄ nì Juuda yab bin pée bí bi-dumpu dooooyee, yii baa tìì bíǹ kpiipoobi tiwan tin bi yàkatī kutaa sá kamaayee kii bi nín tìì bin béeyee puee.

²Ní Yeesu kpambaliŋ saalaa nì alee yíiń biboonnooliibi kɔkɔ, ní ki bí-bi yii: «An kaa máaǹ tí yàntī Unimbɔti bɔti disoondi kí nīn kpèé tijin laŋki.

³Míǹ puee, nnabiyaamu, lēēmaan ni-kansikin bininjab biluli bin pu báà ŋma nyí yii bi sá binimɔntiibee nì bin ni Circir Fam gbí tiŋanee, binib bin cáá iciinee, tí dū ditundi gbanti kí ŋúbiǹ-bi.

⁴Mimmee, timbi kāntí mpaan kí dū ti-yuntiŋu kɔkɔ kí mèè ŋwimmeem kí sòoǹ Unimbɔti bɔti tin sá ti-tundee.»

⁵Tibɔti gbanti mɔ́ɔkiǹ samaa kɔkɔ, ní bi lēē Eetiyeen, un nìn fōō ki kíí tikpil Circir Fam bí u-ni tiŋan puee, nì Fiiliipi nì Prookɔɔr nì Niikanɔɔr nì Tiimɔn nì Paameenasi nì Niikoolaa un sá Antiyɔɔsi ki fōō Juuda yab marabee.

⁶Bi cáań-bi ki dàkā Yeesu kpambaliŋ, ní akpambalee mēē Unimbɔti ki tīī-bi, ní ki dū bi-ŋalii ki páaǹ bi-pu.

⁷Unimbɔti nyɔɔbundi mɔ̀tīi gbìtī ajan kɔkɔ, ní Yeesu boonnooliibi mɔ̀tīi wīintí tikpil Jeerusaleem tiŋkin, ki kpáaǹ bisaraaŋaliibi tikpil nìn fòol̄ Yeesu bɔti ki kíikí.

⁸Unimbɔti nìn pú Eetiyeen diyimɔɔl nì mpɔn tikpil, ní u nìn ŋáań maamaacikpaambi nì tidaandi samaa kansikin.

⁹Dikitil din bi nìn yíì iyumbu in bi líìyee kitilee nib nìn yíkì ki bíi kpākantí Eetiyeen. Bi nìn sá Juuda yab bin nyánní Siireen nì Aleekisandirii nì Siilisii nì Asiiyee ní.

¹⁰Ama baa nìn ŋūǹ kí sòoǹ kí líí-u, iciin in Circir Fam nìn yàntī u sòoǹee pu.

¹¹Míǹ puee bi tīī njapaamu mubɔ tiba dibalin bí lì yii: «Ti gbìl̄ u sòoǹ tibɔti ki bíiĺ Mooyiisi nì Unimbɔti yindi[36].»

¹²Ní an cúú kunipaauee poon ki kūtì ki kpáaǹ bitindaŋkpilib nì bimaradakaliibi, ní bi cūtìi cúuń-u mpɔn ki cáań bibɔsoonliibi kitil nimbiin.

¹³Ní bi yāntì binib biba mɔ́ntì nnyimɔn u-pu yii: «Uninja nee pée sòoǹ kaa gbèentí ki bíiĺ kunimbɔtidii nee nì Mooyiisi marab,

¹⁴kun puee timbi gbìl̄ u bí yii Yeesu Naasaareeti yɔu nee làá kpìtī kunimbɔtidii nee kí kpántí akoobil ŋin Mooyiisi nìn tīī ti-naanjabee.»

¹⁵Bibɔsoonliibi bin nìn kēe kɔkɔ dū bi-nimbikpeeŋu ki báaǹ Eetiyeen pu, ní ki ká yii u-nimbiin kpántì kii Unimbɔti tuuŋŋu nimbiinee.