Read Ntcham Actes 7 Bible Online

Actes 7 - Ntcham bible

Actes 7

¹Ní usaraaŋakpil bālifì-u yii: «An sá míǹ tiŋmanaaa?»

²Ní Eetiyeen kíí-u yii: «Nimbi m-baabi nì m-nabiyaamu, m ŋá-ni gaafalaa. Pīlifìmaan! Unimbɔti tinyooldaan dɔ́miń ti-naanja Abraam cee ŋyunti ŋun u dáá bí Meesoopootamiiyee, ki wāatì ní u nín kɔ́ Kaaran,

³ní ki bí-u yii: <Nyā a-tiŋkin nì a-dicaŋkun kí cù kitiŋ kin m làá dàkà-see ni.>

⁴Ní u nyáń Kaldee tiŋkin ní ki cūtì ki kóò Kaaran tiŋkin. U-baa kúm boonee ní Unimbɔti cáań-u kitiŋ kin poon ni bí nee.

⁵Waa nìn tīī-u kitiŋ nee poon dijandi báà diba, áli gba waa nìn cáá tikpaatan wāā ki bàn̄ u-tabɔbil. Unimbɔti pōoǹ-u yii u làá dū kitiŋ gbanti kí tīī-u, án kpántí úǹ nì u-naantiibi kɔkɔ wanti. Míǹ gbee, Abraam kaa nìn dáá cáá kibiki.

⁶Unimbɔti bí-u yii: <A-naantiibi làá nīn sá binicambi kitiŋ kiban, kí kpántí iyumbu, bí sàaǹ-bi áli abin tilaafati tili.>

⁷Unimbɔti gíti lī-u yii: <Ama kitiŋ kin yab làá dāá sàaǹ-bi mimmee, mama m-ba di làá dāá dáaĺ bi-tafal. Boonee, a-naantiibee làá dāá nyā kitiŋ gbantin kí dāan̄ doo kí nīn nyɔ́ŋkí-mi[37].>

⁸Niinee Unimbɔti tīī-u digiil marau din sá u-poondi daaŋkuee. Míǹ puee Abraam màl̄ Isaakee, ní ki gíí-u dikpancandi iwiin inii dal, ní Isaaki mun gíí Jaakɔb, ní Jaakɔb gíí ti-naanjab bin sá tinaakɔti saalaa nì tilee[38].

⁹«Ti-naanjabee nìn ná Jooseefi, ní ki dū-u ki nyáfì bí cáá-u kí cùnnì Eejipiti. Ama Unimbɔti nìn bí u-cee

¹⁰ki nyántì-u u-falaau kɔkɔ poon, ní ki tīī-u iciin ki yāntì u-bɔti fáatì Faaroo Eejipiti bɔtiu, ní Faaroo dū-u ki kāaǹ ú nīn sá gɔmina Eejipiti tiŋki kɔkɔ pu, ki kpáaǹ úǹ ubɔti cindi.

¹¹Niinee ní ŋkùm miba nyáń Eejipiti nì Kanaan timmu kɔkɔn. An nìn sá falaakpaan ní. Ti-naanjab kaa nìn kāntí tiba kí jī.

¹²Jaakɔb nín nìn gbìl̄ yii tijikaal bí Eejipitee, ní u tú ti-naanjab mpeepeekaam niin.

¹³Nliliitiimee ní Jooseefi yāntì u-nabiyaamu béè-u, ní Faaroo béè kudicaŋu kun poon ní Jooseefi sée.

¹⁴Niinee ní Jooseefi tú bí cáań u-baa Jaakɔb nì u-samaau kɔkɔ: bi nìn sá binib biŋmoo kpá imuŋku inaa.

¹⁵Jaakɔb cūtì Eejipitee, ní ki tin kpíì niin. Míǹ ní ti-naanjab mun kpíì niin.

¹⁶Ní bi yōoǹ bi-wunti ki cáa cūnnì Siikeem, ki tin síb́ dikaakul din Abraam nìn dá nì animbil Amɔɔr biyaamu cee Siikeemee[39].

¹⁷«Ŋyunti ŋun an tóob́ Unimbɔti ń ŋá kii u nín nìn pōoǹ pu ki tīī Abraamee, ní Isirayeel yab būtì ki wíiǹ Eejipiti tiŋkin.

¹⁸Ní ubɔtipɔɔn kāl̀, kaa nyí Jooseefi.

¹⁹U dū iciin ki ŋúń ti-naanjab, ní ki cáá-bi ki sàantí, áli ki yāntì bi nyāntí bi-biyaamu ki féeń mu kúù[40].

²⁰An yuntiŋu ní bi nìn màl̄ Mooyiisi un nìn ŋān̄ Unimbɔti ceeyee, ní bi kpíiǹ-u iŋmal ita u-baa diiku poon[41].

²¹Bi dāa nyántì-u ki ŋman dūu fée, ní Faaroo bisal píí-u ki ŋúb́-u kii úǹ u-ba bikee[42].

²²An di yì-tì ní Mooyiisi bífì Eejipiti yab ciiŋyi kɔkɔ, ki nìn pɔ̄ɔ̄ dibɔsoondin ki kpáaǹ atuunni.

²³«U bàn̄ abin imuŋku ilee, ní an dɔ́miń u-pɔbil poon yii ú cù kí màntì u-nabiyaamu Isirayeel yab pu.

²⁴Niin ní u ká Ueejipitija ubɔ bí ki sàantí u-nabiki kiba, ní u mɔ́tì ki kútì u-nabiki kin bi bíi sàantée pu, ní ki kūū Ueejipitijee ki tɔ̀n̄ ipɔntoon.

²⁵U bàà nyí yii u-nabiyaamu làá béé yii úǹ pu ní Unimbɔti làá dī kí fīī-bi, ama baa ŋúń ki béè.

²⁶Kutaa wúntèe, u ká bi-ŋmaniŋma kansikin bili bíi jáà, ní u bíi sɔ̀ŋkī bi-pɔbiliŋ,

²⁷ní ki sáŋkì-bi yii: <M-bɔɔbi, ni sá nnabiyaamu ní. Ba ŋá ní ni sàantí tɔb míǹ?>

²⁸Ní un bíi sàantí u-jutee téé Mooyiisi ní ki fātìi bālifì-u yii: <Ŋma di kāaǹ-si ti-kpiliu nì ti-bɔsoonliu? A là kí kpɔ̀-mi kii a nín fu kūū Ueejipitija puee níii?>

²⁹An bɔti puee, Mooyiisi sáǹ ki cūtìi kíǹ ki kóò Madiyan tiŋkin. Niin ní u màl̄ mbininjabiyaamu muli[43].

³⁰«Abin imuŋku ili boonee, ní Unimbɔti tuuŋŋu dɔ́miń u-cee kisugbooi kin wù bìlbilee poon kuteeun, dijool din bi yíì Siinaayee caŋin.

³¹Mooyiisi ká mimmee, ní an ŋá-u maamaaci. U sútì ki pìl̄ kí mɔ̀tīí kpèèyee, ní u gbìl̄ Unimbɔti neen lī yii:

³²<Man di sá a-naanjab Nimbɔtiu, Abraam nì Isaaki nì Jaakɔb Nimbɔtiu!> Ní Mooyiisi wunti kíǹ ki bíi jìkì, ní waa ti là kí kpèè niin.

³³Ní ti-Dindaan bí-u yii: <Tákatí a-naatakaŋ, kun puee kitiŋ kin pu a yú nee sá circir tiŋki ní.

³⁴M ká ki gíti ká falaa un poon ní m-samaau bí Eejipitee, ki gbìl̄ bi-yaliŋkii mun pu, ní m kpákatìń kí fīī-bi. Kɔŋkɔnnee, nín̄ cá, m làá tɔ̄-si Eejipiti[44].>

³⁵«Mooyiisi un Isirayeel yab nìn yíì ki bí yii: <Ŋma kāaǹ-si á nīn sá ti-kpiliu nì ti-bɔsoonliuee?> úǹ ní Unimbɔti túnní bi-cee ú nīn sá bi-bɔtiu kí nīn sá bi-fiiliu, ní ntuun ŋun u nìn ká kisugbooyinee nìn bí ki tútúǹ-u.

³⁶Úǹ di ŋáaǹ maamaacib nì tidaandi Eejipiti tiŋkin ki nyántì-bi niin, ki gíti ŋáaǹ maamaacib nì tidaandi Tikati mɔɔl poon, ki kpáaǹ kuteeun, laakin bi ŋá abin imuŋku ilee[45].

³⁷Mooyiisi gbanti ubaanti tùkū Isirayeel yab yii: <Unimbɔti làá dāá lēē ni-nabiyaamu kansikin ubɔ, ú nīn sá Unimbɔti bɔnaatiliu kii mamee[46].>

³⁸Ŋyunti ŋun samaa nìn kpáfì kuteeunee, Mooyiisi di nìn sí ntuun ŋun nìn sòoǹ nì u Siinaayi jool pu nì ti-naanjab kansikinee. Mooyiisi di nìn fōō dimaŋfal nyɔɔbuŋŋi Unimbɔti cee ki cáań ki tīī-ti[47].

³⁹«Ama ti-naanjab nìn yíì, kaa là kí pīlifiǹ-u. Bi-landɔkɔi gítì Eejipiti watil.

⁴⁰Ní bi bí Aarɔn yii: <Mā-ti awaa ŋin làá nīn līī ti-nyɔkɔpuee, kun puee Mooyiisi un nyántìń-ti Eejipiti tiŋkinee, taa nyí kun di bāań-uee.>

⁴¹Ŋyunti gbantee ní bi mɔ́ɔ́ dinabil, ní ki ŋá saraa ki tīī-dì ní ki bí ki jīǹ jiŋaal kun bíǹ bi-ba mɔ́ɔ́ nì bi-ŋaliiyee pu[48].

⁴²Niinee, Unimbɔti fātì u-boon ki tīī-bi, ki dū-bi ki líiǹ iŋmalbijaa, bí nīn tòotī-i, kii Unimbɔti bɔnaatiliibi nín nìn ŋmàn̄ bi-gbɔnti poon puee yii: <Unimbɔti bí yii, Isirayeel yab, man ní ni nìn ŋá saraabi ki tīī abin imuŋku ili ŋin ni nìn ŋá kuteeuneeee?

⁴³Aayee, kun puee ni nìn tūntí diwaal Mooleeki waadiiku kun ni gāā nì satee, nì diwaal din bi yíì Rafanee ŋmalbijau. An waaŋi ŋin ni nìn máń ki jáaḿee puee, m làá cáá-ni Babiloon tiŋkin kuyuŋu[49].>

⁴⁴Kuteeunee, ti-naanjab nìn cáá tanti un poon ataŋkpee ali ŋin pu marab nìn ŋmàn̄ ki kēe bée. Di sá yii Unimbɔti nìn tùkū Mooyiisi yii ú gāā tanti kii un u dàkā-uee nín bí puee ní Mooyiisi lafun ŋá míǹ.

⁴⁵Boonee, ti-naanjab fōō tantee bi-baabi cee ki kpáàa nóó Joosuwa ki kɔ́ ntimu mun nibuliŋ Unimbɔti nìn jìn̄ bi-nyɔkɔpuee poon. Niin ní tanti gbanti yúl̀ ki dāa sāā Daafiidi yuntiŋu[50].

⁴⁶Daafiidi gbanti bɔti nìn fáatì Unimbɔti pɔbil, ní u mēē Unimbɔti yii ú càntī ú mā ŋkɔŋkoon kí tīī úǹ, bi-naanja Jaakɔb Nimbɔtiu[51].

⁴⁷Asee Saloomɔn di dāa máń kunimbɔtidii gbanti[52].

⁴⁸«Ama yilpu Nimbɔtiu kaa kóò adiin ŋin binib cáá bi-ŋalii ki māāyee. A lì kii Unimbɔti bɔnaatiliibi nín nìn lī puee, yii:

⁴⁹<Ti-Dindaan bí yii: Yilpu sá m-beejal, ní kitiŋ sá m-taaŋi siinlaŋki, kudii kulɔkɔ ní ni làá gíti mā-mi, àá mpaan ŋulɔŋu ní m làá dāá kàl̄ kí ŋùŋfì?

⁵⁰An kaa sá mama m-ba di náań tin bí nee kɔkɔɔɔ[53]?>»

⁵¹Eetiyeen nìkī ki lī yii: «Nimbi binib nee yiliŋ pɔ̄ɔ̄, ni-pɔbiliŋ dátiǹ Unimbɔti, naa là kí pīlifiǹ-u mun. Baabadal ni jáà nì Circir Fam, kii ni-naanjab nín nìn ŋáań puee.

⁵²Bíǹ di nìn sāaǹ Unimbɔti bɔnaatiliibi kɔkɔ, ki kūū bin nìn sòon̄ ki yóoǹ yii Deedeedaan làá dāá dāan̄ee. Kɔŋkɔnnee ni nyáfì Yeesu Deedeedaanee ki kūū-u[54].

⁵³Nimbi di fōō Unimbɔti tuuŋŋu[55] cee marab ki mun di kaa là kí ŋúb́-bi.»

⁵⁴Bibɔsooŋkpaambee gbìl̄ mimmee, an wùn̄-bi, ní bi fōō Eetiyeen pu diŋuul tikpil ní bi-nyiŋŋi gà tɔb kàkaka.

⁵⁵Ama Circir Fam gbí Eetiyeen, ní u dū u-nimbikpeeŋu ki báaǹ yilpu, ki ká Unimbɔti nyooti ní Yeesu yú Unimbɔti ŋaŋgiil pú.

⁵⁶Ní u bí yii: «Kpèèmaan, m ká yilpu cúu pīitì, ní Yeesu Kinibiki yú Unimbɔti ŋaŋgiil pú!»

⁵⁷Ní bi yíkìi tátí mpɔn ki kpáà bi-tafaliŋ, ní bi-kɔkɔ yíkìń u-pu kílkil,

⁵⁸ki cúú-u ki dáaĺ-u ki nyántì kitiŋ kpaanceetiŋu, ní ki yáŋkì-u ataŋkpee ki kūū. Bin nìn lēē u-pu seerakpitee nìn cáań bi-bɔkutiŋ ki bíl̀ unaacimpɔɔn un bi nìn yíì Sɔɔlee cee.

⁵⁹Ŋyunti ŋun bi bíi yāŋkí Eetiyeen ataŋkpeeyee, ní u bíi mèé yii: «Ti-Dindaan Yeesu, fōō m-naŋki!»

⁶⁰Niinee ní Eetiyeen gbāaǹ ki téeń mpɔn yii: «Ti-Dindaan, taa dū bi-kpitii nee kí dáaĺ bi-tafal[56]!» U lī míǹ ki dóòyee, ní ki sīntì.