Read Ntcham Actes 8 Bible Online

Actes 8 - Ntcham bible

Actes 8

¹Sɔɔl úǹ nìn ká yii Eetiyeen lafun máaǹ ŋkúm gbanti. Ŋwiin gbantee, dinimbinaamaŋkpaandi nìn jéetì Kriisitoo nikitil din bí Jeerusaleemee pu. Bi-kɔkɔ yàl̄ ki búntì Juudee nì Samaarii tiŋgbammun, see Yeesu kpambaliŋ baba di nìn kíǹ.

²Bininjab bin nìn nóó Unimbɔti deedeeyee di nìn síb́ Eetiyeen ní ki súń u-pu tikpil.

³Sɔɔl úǹ là kí kúntí Kriisitoo nikitilee, ní ki kóò adiinni ki cútí bininjab nì binimpoobi kɔkɔ ki cáǹ ki tòó sarkan.

⁴Bin nìn yàl̄ee nìn cá ajan sá kamaa ki sòoǹ Meesiya bɔmɔntiiti.

⁵Fiiliipi nìn sīntì Samaarii tiŋkin ki bíi sòoǹ Kriisitoo bɔti.

⁶Ŋyunti ŋun bi gbìl̄ Fiiliipi nyɔɔbundi, ki wāĺ maamaacib bin u nìn ŋáańee, samaa kɔkɔ nìn pílifí tin u sòoǹee tiŋan.

⁷Kun puee arasiniibi nìn gbáà ibiil ki nyēē biwaatiibi tikpil pu, ní bifaliŋfaambi nì bideembi tikpil kántì dicáaǹdi.

⁸Ní dipɔɔpiŋkpaandi nìn jéetì kitiŋ gbanti poon.

⁹Uninja ubɔ nìn bí kitiŋ gbantin, bi yíì-u Siimɔn. Kijapaayee nìn sá ukpaŋkpanti ki yāntì an ŋáań Samaarii yab maamaaci u-kpaŋkpantiiku pu, ki yíì u-ba yii unikpaan.

¹⁰Binikpaambi nì mbiyaamu kɔkɔ nìn pílifíǹ-u tiŋan, ní ki lì yii: «Unil nee di sá Unimbɔti pɔŋŋu ŋun bi yíì mpɔŋkpaanee.»

¹¹Bi nìn pílifíǹ-u tiŋan kun puee u nìn cáá u-kpaŋkpantiiku ki ŋáań maamaacib an yúntì.

¹²Fiiliipi nìn sòon̄ tibɔmɔntiil tin sá Unimbɔti Beel nì Yeesu Kriisitoo bɔtee, ní bi fōō u-bɔti ki kíí, ní bininjab nì binimpoobi yāntì bi fùl̄-bi Unimbɔti nyim.

¹³Siimɔn u-ba fōō ki kíí. Bi fùl̄-u ki dóòyee, waa ti là kí sútí kí wàatī Fiiliipi. U nín ká Fiiliipi ŋáań tidaandi nì maamaacikpaŋkpaambee, ní u bākatì tikpil.

¹⁴Yeesu kpambaliŋ bí Jeerusaleem ki gbìl̄ yii Samaarii yab fōō Unimbɔti bɔti ki kííyee, ní bi lēē Peetroo nì Yoowaneesi ki túnní bi-cee.

¹⁵Bi bāań Samaarii yab ceeyee, ní ki mēē ki tīī-bi bí ŋmā kí fōō Circir Fam,

¹⁶kun puee Circir Fam kaa nìn dáá kpákatìń Samaarii yab báà ubɔ pu. Bi nìn pée fùl̄-bi nnyim ti-Dindaan Yeesu yindi ŋmaniŋma pu ní.

¹⁷Ní Peetroo nì Yoowaneesi dū bi-ŋalii ki páaǹ Samaarii yab pu, ní bi fōō Circir Fam.

¹⁸Siimɔn nín ká yii akpambal dū bi-ŋalii ki páaǹ bi-pu bi fōō Circir Famee, ní u tīī Peetroo nì Yoowaneesi animbil,

¹⁹ní ki bí-bi yii: «Tīīmaan ma mun an pɔŋŋu, un pu ní m yaa dū m-ŋalii ki páaǹee, ú fōō Circir Fam.»

²⁰Ní Peetroo fātìi kíí-u yii: «A nín dākafì yii bi dù animbil kí dā Unimbɔti pɔl puee, si nì a-nimbiliŋee kɔkɔ ń ŋá fám!

²¹Aa pée cáá tiba nì tiba tin bíi jītí nee poon. Kun puee a-pɔbil kaa bí deedee Unimbɔti nimbiin.

²²Fá a-landɔkɔkpitii kí mèè ti-Dindaan, an yaa yíì min min a dākafì a-pɔbilinee u làá dūú pɔ̄-si,

²³kun puee m wāĺ a-poon tū kii tiloolee ní ikpiti kusakai bá-si.»

²⁴Ní Siimɔn kíí-bi yii: «Gbàam̀maan ti-Dindaan ni-ba kí tīī-mi, án nín làá ŋá pu tin kɔkɔwoooo ni sòon̄ nee tiba ń taa bàń-mee!»

²⁵Peetroo nì Yoowaneesi lēekì seerab ki sòon̄ Unimbɔti bɔti ki dóò Samaariiyee, ní ki fātìi nín gítí Jeerusaleem ki sòoǹ Tibɔmɔntiil Samaarii timbilimmu tikpil poon.

²⁶Ní ti-Dindaan tuuŋŋu ŋubɔ tùkū Fiiliipi yii: «Yīkì kí túĺ ŋgan pú kí dī nsan ŋun sìntī Jeerusaleem ki cá Gaasaayee, nsan ŋun baa ti dèe.»

²⁷Ní u yíkìi búntì. Niinee, Ueetiiyoopiija ubɔ u sá ufaal ki bí Eetiiyoopii nimpubɔtiu Kandaasi cee ki sá ukàlinjakpaan. Úǹ di nìn kpèé unimpubɔtee pijawanti kɔkɔ.

²⁸U nìn dɔ́miń Jeerusaleem ki jáam̀ Unimbɔti ki dóòyee ki fàtīi kùǹ. U nìn kā u-tɔrɔkuu pu itaamu dátí-u ní ki kàaǹ Unimbɔti bɔnaatiliu Yeesaya gbɔŋku poon.

²⁹Ní Unimbɔti Fam tùkū Fiiliipi yii: «Còom̀ kí kíntí tɔrɔku nee!»

³⁰Ní Fiiliipi sáǹ ki bàn̄ee, ki gbìl̄ kijapaayee bíi kàaǹ Yeesaya Unimbɔti bɔnaatiliu gbɔŋku poon. Ní u bālifì-u yii: «A gbìl̀ a nín kàaǹ puee taapuɔɔɔ?»

³¹Ní u kíí-u yii: «M yaa kaa ká ubɔ ń tùkù-mi taapu, m làá ŋá mana kí gbìl̄?» Ní u mēē Fiiliipi ń jɔ̄m̀ kí kàl̄ u-cee tɔrɔkun.

³²Unimbɔti gbɔŋku jandi din u nìn bíi kàaǹee nín tùkù-ti puee sèé: «Bi cáá-u ki cūnnì kii bi nín cáǹ upii kí kpɔ̀ puee, kii bi nín cēē dipibil kuti di ŋmí kaa sūǹ puee, míǹ ní waa nìn wāaǹ ki lī tiba.

³³U sīntì u-ba taapu, baa pɔ̀n̄-u. Ŋma di làá dāá ŋmā kí tùkù u-maaliŋu yab tin jítèe, kun puee bi lēē u-maŋfal duulinyan[57].»

³⁴Ní ukàlinjee bí Fiiliipi yii: «M gbàam̄-si, ŋma pu ní Unimbɔti bɔnaatiliu sòon̄ míǹ ní? Úǹ u-ba pu ní u sòon̄ mimmaaa, ubɔ pu ní?»

³⁵Niinee ní Fiiliipi yōoǹ dinyɔɔbundi ki kíĺ ki bíi sòoǹ ki tɔ́kɔ́ǹ dijandi din u kàan̄ee pu ki bíi tùkù-u Yeesu Bɔmɔntiiti.

³⁶Bi còom̄ ki cée, ki bàn̄ laaba ki ká nnyim, ní ukàlinjee bí yii: «Kpèè, nnyim sèé nee. Ba di gíti lìkintí-mi bí taa fàl̀-mi Unimbɔti nyim?» [

³⁷Ní Fiiliipi kíí-u yii: «An cáá nsan bí fàl̀-si Unimbɔti nyim a yaa fōō ki kíí nì a-pɔbil kɔkɔ». Ní ukàlinjee kíí-u yii: «M fōō ki kíí yii Yeesu Kriisitoo sá Unimbɔti Jipɔɔn[58].»]

³⁸Ní u bí yii bí yóoń tɔrɔku, ní u nì Fiiliipi liitil nín sìntī ŋkpinni, ní Fiiliipi tin fùl̄-u Unimbɔti nyim.

³⁹Bi nyánní nnyiminee, Unimbɔti Fam yōoǹ Fiiliipi. Ní ukàlinjee kaa ti ká-u, ama ní ki nìkī u-saŋŋu nì dipɔɔpindin.

⁴⁰Fiiliipi, úǹ tin nyáń Asooti[59]. Niinee u sòon̄ tibɔmɔntiil ki kpáaǹ ntimbilimu mun poon u jītée ki tin bàn̄ Seesaaree.