Read Ntcham Actes 9 Bible Online

Actes 9 - Ntcham bible

Actes 9

¹Ŋyunti gbantee, Sɔɔl kaa cāntì ti-Dindaan boonnooliibi nnikpaakoon. U nìn cūtì usaraaŋakpil cee

²ki mēē-u yii ú tīī-u tigbɔn ú cáá cùnnì Damaasi kpafidiiŋŋi kpilib cee, án nín làá ŋá pu u yaa ká biba niin bin nóó nsan gbantee, uninjeeee, unimpueeee[60], ú cúú-u kí bóob́ kí cáań Jeerusaleemee.

³U yíkì u-saŋkindi pu ki tóob́ Damaasee, kpalaayee, ŋwalifi ŋubɔ nyánní yilpu ki māntìi tú-u ki jìliŋkī,

⁴ní u lítì kitiŋ. Niinee ní u gbìl̄ nneen ŋubɔ bí-u yii: «Sɔɔl, Sɔɔl, ba ŋá ní a páb́-mi míǹ?»

⁵Ní u bālifì yii: «An sá sii ŋma ní, m-Dindaan?» Ní ti-Dindaan kíí-u yii: «An sá man Yeesu un a páb̀ee.

⁶Yīkìí kɔ́ kitiŋin. Niin ní bi làá tùkù-si min sá á ŋée.»

⁷Tifaandi kɔ́ bininjab u nì bin nìn nóóyee. Bi yúl̀, kaa ti ŋūǹ kí wàan̄ kí lì tiba, kun puee bi gbìl̄ nneen pu ki mun kaa wāĺ báà ubɔ.

⁸Ní Sɔɔl yáatìi yúl̀ ki ŋúbitì u-nimbiliŋee kaa ti wāĺ. Ní bi cúú u-ŋal ki dātì-u ki cáa cūnnì Damaasi.

⁹Ní u kāl̀ iwiin ita, kaa wál̀, kaa jíń, kaa nyùn̄ mun.

¹⁰Ama Yeesu boonnooliu ubɔ nìn bí Damaasi, bi yíì-u yii Ananiyasi. Ti-Dindaan nyántì u-ba ki dàkā-u, ní ki yíiń-u yii: «Ananiyasi!» Ní u kíí yii: «M sèé, m-Dindaan.»

¹¹Ní ti-Dindaan bí-u yii: «Yīkìí dī didandi din bi yíì didancancaalee kí nyàab̀ Juuda dumpu un bi yíì Sɔɔl u sá Taarsee. Sɔɔl gbanti bíi mèé ŋwimmeem

¹²ní m yāntì u ká sii Ananiyasi kóoń ki dū a-ŋalii ki páaǹ u-pu ú ŋmā kí wāl̀.»

¹³Ní Ananiyasi kíí-u yii: «M-Dindaan, m gbìl̄ binib tikpil cee tikpitil tin uninja nee ŋá a-yab bin bí Jeerusaleemee pu.

¹⁴U dɔ́miń doo ki cáá mpɔn ŋun bisaraaŋakpilib tīiń-u ú nīn cáa bōob̀ bin kɔkɔwoooo nóó-see.»

¹⁵Ní ti-Dindaan bí-u yii: «Nín̄ cá, kun puee uninja gbanti di sá un m lēē ú lēē seera m-pu bin kaa sá Juuda yabee nì bi-bɔtiibi, nì Isirayeel yab kɔkɔ nimbiinee.

¹⁶Ní man m-ba ń dāá dàkà-u falaa un u làá jī m-yindi puee.»

¹⁷Niinee, Ananiyasi búntì ki bàn̄ ki kɔ́ kudicaŋuee ni, ki dū u-ŋalii ki páaǹ Sɔɔl pu, ní ki bí yii: «M-nabiki Sɔɔl, ti-Dindaan di túnní-mi. Úǹ di sá Yeesu un a nìn ká nsanni a nín nìn dòoń puee. U là á wāl̀, kí gbí Circir Fam.»

¹⁸Dicilpu niin ní tiba nyánní u-nimbiliŋin ki lítì kii ijɔmpɔkɔee, ní u wál̀. Ní u yíkì bi fùl̄-u Unimbɔti nyim.

¹⁹Ní u jíń tijin ki fātìi ká mpɔn. Ní Sɔɔl kāl̀ Damaasi iwiŋkaaŋkaa Yeesu boonnooliibi cee,

²⁰ní ki kpáàa kíĺ ki sòoǹ Yeesu pu akpafidiinni, yii u sá Unimbɔti Jipɔɔn.

²¹An nìn ŋá bin kɔkɔwoooo nìn bíi pílifíǹ-uee bitii, ní bi lì yii: «Kaa sá un nìn bí Jeerusaleem ki páb̀ bin nóó Yeesuee deeee? Waa tí dɔ́miń doo kí cūtì-bi kí bóob́-bi kí cáá-bi bisaraaŋakpilib nimbiin deeee?»

²²Ŋyunti gbantee, Sɔɔl nìn mɔ̀tīi kāntí mpɔn, ki sòoǹ ki pɔ́ɔkíǹ Juuda yab bin bí Damaasee, ki dàkà-bi yii Yeesu lafun sá Meesiya.

²³Iyunti tikpil jítèe, ní Juuda yab kpáfì kinyɔkɔ ki là kí kpɔ̀-u.

²⁴Ama Sɔɔl béè tin bi là kí ŋée. Bi nìn dòoń ki nākantí ki cīití-u Damaasi tiŋki gundi punyɔmmu nyɔkɔpui ŋwiimpu nì kunyeeu kí ŋmā kí kpɔ̀-u.

²⁵Kunyeeuee, bin dī Sɔɔlee dū ŋŋmii ki kúĺ kukabiku ki dū Sɔɔl ki tākaǹ, ki dū-u ki nāatì digundi, ní u tin tīiǹ kitiŋ ki nyáń ki búntì[61].

²⁶Niinee, Sɔɔl cūtì Jeerusaleem ki bàà là kí dū u-ba kí kɔ́ǹ Yeesu boonnooliibin. Ama bi-kɔkɔ nìn fàŋkí-u, kaa nyí yii u kpántì Yeesu boonnooliu.

²⁷Ní Baarnaabaasi cáá-u ki cūnnì Yeesu kpambaliŋ cee ki máafì-bi Sɔɔl nín nìn ká ti-Dindaan nsanni, u sòon̄ nì u puee, nì min Sɔɔl nìn sòon̄ Damaasi ki cántì ki pɔ̀n̄ Yeesuee.

²⁸U nì bi nìn kíǹ ki yìiǹ Jeerusaleem, ní u sòoǹ ti-Dindaan pu, kaa fàŋkí.

²⁹Ní u nì Juuda yab bin gbìl̀ Greeki sooŋyee sòoǹ ki kpākantí tɔb, ní bíǹ nìn kíǹ ki nyàab̀ kí kpɔ̀-u.

³⁰Nnabiyaamu mun kíǹee gbìl̄ mimmee, ní ki yōoǹ-u ki cūnnì Seesaaree, ní ki yāntì u búntì Taarsi.

³¹Kriisitoo nikitil din nìn bí Juudee nì Galiilee nì Samaariiyee nìn kíǹ ki bí nsɔŋfin ki báaǹ inyaan ki fàŋkí ti-Dindaan, kaa là kí yìntīǹ-u. Ní bi-wíiŋŋu nìn gbēentí mun, kun puee Circir Fam nìn bí bi-cee.

³²Peetroo nìn yìiǹ niin timmu kɔkɔn ki màntī Kriisitoo yab pu, ní ki kpáàa sīntì bin nìn kóò Liida tiŋkinee cee,

³³ní ki tin ká uninja ubɔ, bi yíì-u Eenee. U nìn sá ufaliŋfaan ki dɔ̄ u-lambaŋki pu abin anii.

³⁴Ní Peetroo bí-u yii: «Eenee, Yeesu Kriisitoo cáaǹ-si! Yīkìí kpáb́ a-lambaŋki.» Ní u yáatìi yúl̀ dicilpu niin.

³⁵Bin kɔkɔwoooo nìn kóò Liida nì Saarɔnee nìn ká-u, ní ki kpántì bi-ba ki kíǹ ki nóó ti-Dindaan.

³⁶Unimpu ubɔ nìn bí Joopee ki nóó Yeesu, bi yíì-u Tabiita, - greeki sooŋyi poonee bi yíì-u Dɔɔrkaasi[62]. - U nìn ŋáań binib tiŋan tikpil, ní ki pūǹ biwɔfib animbil mun.

³⁷Ŋyunti gbantee, u búŋkì ní ki kpíì. Bi fùl̄-u ki dóòyee, ki cáá-u ki jɔ́m̀ diditɔntɔkɔl pu ki bíl̀.

³⁸Joopee nì Liida kaa nìn dátiǹ tɔb. Yeesu boonnooliibi gbìl̄ yii Peetroo bí Liida, ní bi tú bininjab bili u-cee bí cùú gbàamìń-u yii ú dāan̄ bi-cee malaa malaa.

³⁹Ní Peetroo yíkì dicilpu, u nì bininjabee kɔkɔ búntì. Bi bàn̄ee, ní bi cáá-u ki jɔ́m̀ diditɔntɔkɔl pu. Bikpiipusoodambi kɔkɔ nìn dɔ́miń ki māntì ki gɔ́ń Peetroo ki sūǹ ki dàkà Peetroo Dɔɔrkaasi nín nìn dáá bí ki lù abɔkuti nì satab biŋyee.

⁴⁰Ní Peetroo nyántì binib kɔkɔ ní ki gbāaǹ ki bíi mèé, ní ki fātì utaŋkpiil pu ki bí yii: «Tabiita, yīkìm̄!» Ní u ŋúbitì u-nimbiliŋ ki kpēē Peetroo, ní ki yáatìi kāl̀.

⁴¹Ní Peetroo tāntì u-ŋal ki cúú-u ki yáatì-u ki yóoǹ, ní ki yíiń Kriisitoo yab nì bikpiipusoodambee, ki dū un fīkitèe ki dūu dàkā-bi.

⁴²Joopee yab kɔkɔ gbìl̄ an bɔtee, ní binib tikpil fōō ti-Dindaan ki kíí.

⁴³Peetroo nìn kāl̀ Joopee ki yúntì ugbanjɔb un bi nìn yíì Siimɔŋyee cee.