Read Ntcham Romains 10 Bible Online

Romains 10 - Ntcham bible

Romains 10

¹Nnabiyaamu, m-pɔbil poon nín là miŋyee nì tin tin m mèé Unimbɔti Isirayeel yab puee di sá bí ká difiil.

²M ká bi-pɔ́ɔǹtam dinimbɔtinoolin, ama, bi-pɔ́ɔǹtam gbantee, baa béè ki dóò.

³Di sá yii baa béè min ní Unimbɔti dì ki kpántí binib deedeedambi u-nimbiinee, ní ki bíi nyàab̀ bi-ba saŋŋu ŋun bi làá dī kí kpántí deedeedambee. Bi yíì, kaa sīntì bi-ba taapu Unimbɔti ń kpántí-bi deedeedambi.

⁴Kriisitoo di dɔ́miń ki kúntì marab dītam. Kɔŋkɔnnee, bin kpántì deedeedambee di sá bin kɔkɔ fōō Kriisitoo ki kííyee.

⁵Mooyiisi nìn ŋmàn̄ marab dītam nín cāabìń deedee uŋyee yii: «Un yaa nóó marab deedeeyee kāntí difiil bi-pu[47].»

⁶Ama deedee un nyēeń fookiinee nín sá puee sɔ̀. Unimbɔti gbɔŋku sòoǹ yii: «A-pɔbil poonee, taa lì yii, ŋma di ŋūǹ kí jɔ̄m̀ yilpu?» (Taapu sá yii bí jɔ̄m̀ kí cáań Kriisitoo),

⁷kí taa tí lì yii: «Ŋma di ŋūǹ kí sìntī taapu ditaŋkpiilin?» (Taapu sá yii bí nyāntiń Kriisitoo ditaŋkpiilin.)

⁸Mimmee, tí lì yii ba? Unimbɔti gbɔŋku lī yii: «Dinyɔɔbundi gbanti bí ki kɔ́ĺ-si, ki bí a-nyɔkɔn nì a-pɔbilin[48].» Dinyɔɔbundi gbanti di sá fookii bɔti tin ti sòoǹee, yii.

⁹A yaa lī binib cee yii Yeesu sá a-Dindaan ki yaa fōō ki kíí a-pɔbilin yii Unimbɔti fīkitì-u ditaŋkpiilinee, a làá ká difiil.

¹⁰Di sá yii un kamaa yaa fōō Yeesu ki kíí u-pɔbil poonee kpántí deedeedaan u-nimbiin, ní un yaa lī u-nyɔkɔn yii u fōō-u ki kííyee, udaan kāntí difiil,

¹¹kii Unimbɔti gbɔŋku poon nín lī puee yii: «Un kamaa yaa fōō ti-Dindaan ki kííyee, icoo kaa jīǹ udaan[49].»

¹²Mimmee, digàntil kaa bí un sá Juuda yɔuee nì un kaa sá Juuda yɔuee kansikin. Bi-kɔkɔ Dindaan sá ubaanti ní. Úǹ ŋáań bin kɔkɔ yíì u-yindi ú fīī-bee tiŋan tikpil,

¹³kii an nín ŋmàn̄ puee yii: «Un kamaa yaa yíiń ti-Dindaan yindee kāntí difiil[50].»

¹⁴Ama, bi yaa kaa fōō-u ki kíí, bi làá ŋá mana kí yíiń-u? Bi yaa kaa gbìl̄ u-pu, mana ní bi làá fōō-u kí kíí? Ubɔ yaa kaa bíi sòoǹ u-pu, mana ní bi làá gbìl̄?

¹⁵Unimbɔti yaa kaa túnní binib, mana ní bi làá sòoǹ-tì? Kii an nín ŋmàn̄ puee yii: «Bin sòoǹ Tibɔmɔntiilee nín dòoń bi-taaŋi ŋānní puee[51].»

¹⁶Ama bi-kɔkɔ kaa fōō tibɔmɔntiilee ki kíí, kii Yeesaya nín lī puee yii: «Ti-Dindaan, an kaa sá binib fiii di fōō ti-bɔti ki kííii[52]?»

¹⁷Mimmee bi gbìl̀ ní ki nín fōō ki kíí, ní tin bi gbìl̄ ki fōō ki kííyee sá Kriisitoo bɔti.

¹⁸Míǹ puee, Isirayeel yab kaa gbìl̄ tibɔmɔntiilee naaa? Bi gbìl̄-tì. An nóó nì min an ŋmàn̄ee dee, yii: «Kitiŋ kɔkɔ gbìl̄ bi-neeŋyi pu, ní tibɔti tin bi sòoǹee bàn̄ kitiŋgbeennyɔkɔ.»

¹⁹Mimmee, Isirayeel yab kaa gbìl̄ tibɔtee taapu naaa? Dooooyee ní Mooyiisi nìn pée sòon̄ bi-pu yii: «Man Unimbɔti làá yàntī binib bin kaa bí tibanee ń nīn jīǹ mmɔn, ní án nīn wù nimbi, kí yàntī ní fōō diŋuul binib bin kaa nyí iciinee pu.»

²⁰Ní Yeesaya mun sòon̄ ki cántì yii: «Bin bin kaa nìn nyàab̀ man Unimbɔtee ká-mi, ní m cáá m-ba ki dàkā bin kaa bàlifī m-puee.»

²¹Ama tin u sòon̄ Isirayeel yab puee sèé: «M tāntì m-ŋalii kutaafaau áli kujoou ki yíìń bin kaa tɔ́-mi, bi-yiliŋ pɔ̄ɔ̄yee[53].»