Read Ntcham Romains 13 Bible Online

Romains 13 - Ntcham bible

Romains 13

¹Báà ŋma ń nīn tɔ́ biyidambi bin cáá mpɔn ki kpòotī kitiŋee, kun puee uyidaan ubɔ kaa bí Unimbɔti kaa kāaǹ-u. Unimbɔti di yāntì ní biyidambi kɔkɔ bí.

²Míǹ puee, un yaa yíì biyidambee jáaǹ mara un Unimbɔti yóoǹee dee. Bin yíití biyidambee dátiń ditafadaaldi ki tòó bi-ba pu ní.

³Di sá yii bin bin ŋáań tiŋanee kaa fàŋkí biyidambi, bin ŋáań tikpitilee di fàŋkí-bi. A yaa là biyidambi ń taa nín̄ cáá-si tifaandee, nín̄ ŋáań tiŋan, bi làá pàkà-si.

⁴Bi bíi tūǹ Unimbɔti tundi ní, ki téekí-si á ŋá tiŋan. Ama a yaa ŋá digaŋgam, see á fàŋkì, kun puee an kaa sá fám ní bi cáá mpɔn ki dátí binib tafal. Bi yaa bíi dátí ubɔ tafalee, bi bíi tūǹ Unimbɔti tundi ki dàkà u-ŋuul din u cáá digaŋgam dambi puee dee.

⁵Míǹ pu ní an máaǹ yii tí nīn tɔ́ biyidambi. Tí taa fàŋkì ditafadaaldi ŋmaniŋma pu, tí nīn nyímaan yii míǹ di ŋān̄.

⁶An pu ní ni pà lampoobee, bí ŋmā kí tɔ̄ ditundi gbanti mbaamɔmin, kun puee bi sá Unimbɔti tɔntɔnliibi ní.

⁷Pàmaan un sá kamaa kun ni máaǹ kí pà-uee: pàmaan lampoo kí tīī un an sá ní pà lampoo kí tīīyee, kí tīī bin gífí patanti bi pèe bi-nimbiliŋ, kí fàŋkì bin bin sá ní fàŋkèe, kí nīn tɔ́ bin bin sá ní nīn tɔ́ee[68].

⁸Ní taa nín̄ jīǹ báà ubɔ nì ubɔ apɔɔn. Dipɔndi din ni cááyee di sá ní nīn néeń tɔb. Sii un néeń a-jutiibee, sii ŋá min mara lèe kɔkɔ dee.

⁹Di sá yii marab bin lì yii: «Á taa ŋá tilaakpaal, á taa kpɔ̀ unil, á taa yɔ̀, á taa nín̄ cáá nnimbitaataamee» nì marab bin kíǹee kɔkɔ taapu sá marabaanti nee ní yii: «Á nīn néeń a-juti kii sii a-bee[69].»

¹⁰A yaa néeń a-jutee, aa ŋáań-u tikpitil. A yaa néeń binibee, a bíi ŋáań min mara lēe kɔkɔ dee.

¹¹Míǹ puee, ní nīn néeḿmaan tɔb míǹ, kun puee ni nyí ŋyunti ŋun poon ti bí nee nín sá ŋuŋyee. Ŋyunti ŋun ti máaǹ kí fìntī ŋgeeminee bāań, di sá yii Yeesu gítintam sútì ki pìlīń-ti ki jítiǹ min min ti nìn péé péé ki fōō ki kííyee.

¹²Kunyeeu mɔ́ ki síitì, kutaa tóob́ diwuntil. Mimmee, tí fá dibɔmbɔndi poon tuuŋŋi ní kí dū ŋwalifin janjawanti kí pèen̄.

¹³Tí còom̀maan min kítèe, kii bi nín còom̄ ŋwiimpu puee, kí taa jī kí lákatí ti-ba pu, kí taa gbí ndaam, kí taa ŋá tilaakpaal, kí taa ŋá tijɔkɔndi, kí taa nín̄ jáà, kí taa nín̄ cáá tɔb pu kudɔ̀ŋu.

¹⁴Ní dūmaan ti-Dindaan Yeesu Kriisitoo bimbim kí pèen̄ kii tijanjawanee, kí taa fàtīí tɔ̄ ni-bimbikpitim kí ŋá mì nín là puee.