Read Ntcham Romains 15 Bible Online

Romains 15 - Ntcham bible

Romains 15

¹Timbi bin ká mpɔn Unimbɔti saŋŋu poonee, ti máaǹ kí tūtuǹ bin kaa láá ká mpɔnee kí jī kimɔtii bi-pu, kí taa nín̄ nyàab̀ min làá nīn fáatiǹ-tee.

²Báà ŋma ń nyàab̀ min làá tūtuǹ u-jutee mmɔntiim ú báań inyaan.

³Di sá yii Kriisitoo kaa nìn nyàab̀ kí ŋá min fáatì-uee, ama, kii an nín ŋmàn̄ puee yii: «Asiibil ŋin bi nìn sìí sii Unimbɔtee, lítì man pu[74].»

⁴Di sá yii tin kɔkɔ bi nìn ŋmàn̄ Unimbɔti gbɔŋku poon dooooyee sá kí dàkà-ti tí nīn cáá kimɔtii nì kunyannyaau, kí nīn máká Unimbɔti pu.

⁵Unimbɔti un di tìì kimɔtii nì kunyannyaauee ń tūtuǹ-ni ní ŋá ubaanti kii Yeesu Kriisitoo nín là puee.

⁶Ni-kɔkɔ ń ŋmā kí kpāfì kinyɔɔbaantii kí nyɔ̄ŋkì Unimbɔti un sá ti-Dindaan Yeesu Kriisitoo Baayee.

⁷Míǹ puee, kii Kriisitoo nín fōō-ni puee, ní nīn fòol̄maan tɔb án tīī Unimbɔti tinyool.

⁸An taapu sá yii Kriisitoo dɔ́miń Juuda yab kansikin ki túń ditundi ki ŋá min Unimbɔti nìn pōoǹ ki tīī bi-naanjabee ki dàkā yii Unimbɔti sá deedeedaan,

⁹ní ki dɔ́miń bin kaa sá Juuda yabee mun ń nyɔ̄ŋkì Unimbɔti u-saasɔl pu, kii an nín ŋmàn̄ puee, yii: «An pu ní m làá nyɔ̄ŋkì-si atimbun kansikin, kí gāā ilan kí pàkà a-yindi.»

¹⁰An gíti ŋmàn̄ yii: «Atimbun, fàal̀maan nì dinibul din Unimbɔti lútèe!»

¹¹An gíti tí ŋmàn̄ yii: «Nimbi atimbun kɔkɔ ń nyɔ̄ŋkì ti-Dindaan, ní anibul kɔkɔ ń pàkà-u!»

¹²Yeesaya mun nìn lī yii: «Jeesee naantiiu ubɔ làá dāan̄, u làá dāá yīkì kí jī atimbun kɔkɔ pu dibeel, ní atimbunee kɔkɔ làá dāá nīn máká u-pu[75].»

¹³Unimbɔti un tìì dimákalee ń gbéeǹ-ni dipɔɔpindi kí tīī-ni ŋgbansɔŋfi mmɔntiimin ni nín fōō u-bɔti ki kíí puee, án nín làá ŋá pu u-Fam pɔŋŋu ń yàntī ní nīn cɔ́tí u-pu tikpil tikpilee.

¹⁴M-nabiyaamu, man m-ba nyí yii ni sá binib bin tiŋan gbí ni-pɔbiliŋ, ki nyí tin kɔkɔ ni máaǹ kí nīn nyée, ki ŋūǹ kí nīn sáŋkí tɔb muee.

¹⁵Nì míǹ kɔkɔee, m ŋmàn̄ ki cántì ajan aba, kaa fāŋkì kí fàtīí téetí-ni tin ni nìn nyí dooooyee. M yaa ŋmàn̄-ni mimmee, an sá diyimɔɔl din Unimbɔti pú-mi

¹⁶ḿ nīn sá Yeesu Kriisitoo tɔntɔnliu bin kaa sá Juuda yabee ceeyee pu. Unimbɔti dū Tibɔmɔntiil disoondi ki ŋúbiǹ-mi, an ŋman kii bisaraaŋaliibi tundi ní m bíi tūǹee, ḿ ŋmā kí dū bin kaa sá Juuda yabee kí tīī Unimbɔti, u-Circir Fam ń yàntī bí nīn sá saraamɔnti un làá fáatí-uee.

¹⁷Man nì ti-Dindaan Yeesu Kriisitoo nín ŋá ubaantee puee ní m ŋūǹ kí nīn gàafī nì ditundi din m tūǹ ki tìì Unimbɔtee pu.

¹⁸Di sá yii maa làá wàan̄ kí lì tiba an yaa kaa sá tin Kriisitoo dī m-pu ki ŋá, ki cáań binib bin kaa sá Juuda yabee ń nīn tɔ́ Unimbɔtee. Kriisitooyee di yāntì m sòon̄ anyɔɔbun ki túń atuun

¹⁹ki ŋá tidaandi nì maamaacib, nì Unimbɔti Fam pɔŋŋu. Míǹ ní m sòon̄ Tibɔmɔntiil tin sá Kriisitoo yatee an kɔkɔ, ki yōoǹ Jeerusaleem ki dāa sāā Iliirii tiŋki.

²⁰M pɔ̄ɔntí m-ba kí sòoǹ Tibɔmɔntiilee laakin binib kaa láá gbìl̄ Kriisitoo puee, án nín làá ŋá pu ḿ taa mā kí tɔ́kɔń laakin biba nìn kíĺee.

²¹Míǹ ní m ŋá kii an nín ŋmàn̄ puee yii: «Binib bin cee baa sòon̄ u-puee làá dāá ká-u, bin bin kaa nìn gbìl̄ u-puee làá dāá gbìl̄ taapu.»

²²Ditundi gbanti pu ní m mākafì miŋa nì miŋa kí dāan̄ ni-cee ní kaa ŋúń.

²³Kɔŋkɔnnee, maa ti cáá ditundi diba ntimu gbanti poon. M baasii nyàab̄ kí dāan̄ ni-cee abin kupaau sèé.

²⁴M yaa làá cù Eespaanyee, see ḿ dīń ni-cee, man nì ni ń kàl̄, ní kpáàa tūtuǹ-mi ḿ cù kitiŋ gbantin. Mimmee m làá ŋmā kí kàl̄ ni-cee ŋyunti ŋubɔ fiii an mɔ̄ɔkiǹ-mi.

²⁵Kɔŋkɔnnee, m dá láá cá Jeerusaleem kí tɔ̄ ditundi diba kí tīī Unimbɔti yab bin bí niinee.

²⁶Kun puee Kriisitoo yab bin bí Maseeduwaan nì Akayee kpáfì ki tɔ́ animbil kí tūtuǹ Kriisitoo yab bin bí Jeerusaleem ki sá bisoodambee.

²⁷Bíǹ bi-ba di lēē yii bi làá ŋá míǹ, ní an lafun máaǹ bí ŋá-bi míǹ, kun puee Kriisitoo yab bin bí Jeerusaleemee dū Tibɔmɔntiil ki yākatì nì bi. Míǹ puee, an máaǹ bi mun ń dū bi-wanti kí tūtuǹ-bi[76].

²⁸M yaa dū inannakan in bi nākaǹní-mee ki dūu tīī-bi, ki kpēē tibɔti gbanti ki dóòyee, m làá dīń ni-cee, ní kí nín nìkī Eespaanyi.

²⁹M nyí yii Kriisitoo làá bìin̄ m-dāantam ni-cee pu án nīn mɔ̄ tikpil.

³⁰Ama, nnabiyaamu, m mèé-ni ti-Dindaan Yeesu Kriisitoo nì dineendi din Circir Fam tììyee pu, ni-nimbiliŋ ń nīn máǹ ŋwimmeem pu. Ní nīn mèé Unimbɔti ki tútúǹ-mi,

³¹ḿ ŋmā kí nyā Juudee yab bin kaa fōō ki kííyee ŋaan, ní Unimbɔti yab bin bí Jeerusaleemee mun ń fōō nì dipɔbil diba ditutundi din m cáǹ kí tīī-bee.

³²Míǹ ní, Unimbɔti yaa kíí, m làá ŋmā kí bàń ni-cee nì dipɔɔpindi man nì ni ń kàl̄ ḿ ŋùŋfì.

³³Unimbɔti un tìì ŋgbansɔŋfee ń nīn bí ni-kɔkɔ cee. Ameeni.