Read Ntcham Romains 16 Bible Online

Romains 16 - Ntcham bible

Romains 16

¹M dū ti-niisal Fooyibee un tūǹ ditundi Kriisitoo nikitil din bí Saŋkireeyee[77] kansikinee ki ŋá ni-ŋaan.

²Fōōmaan-u ti-Dindaan pu kii Unimbɔti nib nín máaǹ kí nīn fòol̄ tɔb puee. Ní ajan ŋin kɔkɔ poon an bàlifī yii ní tūtuǹ-uee, ní tūtum̀maan-u. Míǹ ní u mun jòoń binib tikpil, ki kpáaǹ man m-ba.

³Ní jāam̀ Priisiil nì Akiilasi[78], m-tɔntɔnjutiibi Yeesu Kriisitoo tundin.

⁴Bi kíí kí dū bi-ba kí tīī ŋkúm man ŋmátí. An kaa sá man baba di làá jāam̀-bi an pu, Kriisitoo nikitiŋ ŋin kaa sá Juuda yabee kɔkɔ mun làá jāam̀-bi.

⁵Ní jāam̀ Kriisitoo nikitil din kpáfí bi-dumpuee mun. Ní jāam̀ Eepayineeti, m-bɔɔ un m néeńee, un péé péé ki fōō ki kíí Asii tiŋkinee.

⁶Ní jāam̀ Maarii un túń ditundi tikpil ki tīī-nee.

⁷Ní jāam̀ Androonikuusi nì Juniyaasi, man nì bin pēē kubaabinaatoou ki pēē sarka muee. Yeesu kpambaliŋ kansikinee, bi tɔ́-bi tikpil. Bíǹ péeǹ man ki fōō Kriisitoo ki kíí.

⁸Ní jāam̀ Ampiliyatuu, m-bɔɔ un pu maa mɔ̄ ti-Dindaan puee.

⁹Ní jāam̀ Urbeen, ti nì un kpáfí ki tūǹ ditundi Kriisitoo puee, kí jāam̀ m-bɔɔmɔnti Sitaku mun.

¹⁰Ní jāam̀ Apeeleesi, un jíń falaa Kriisitoo pu, kaa lítèe. Ní jāam̀ Ariistoobul dicaŋkun yab.

¹¹Ní jāam̀ Eeroodiyoon, man nì un pēēyee. Ní jāam̀ Naasiisi dicaŋkun yab bin sá ti-Dindaan yabee.

¹²Ní jāam̀ Triifeeni nì Triifoosi, bin tūǹ ditummɔntiil ki tìì ti-Dindaanee, kí jāam̀maan ti-niisamɔnti Peersiidi un túń atummɔnti tikpil ki tīī ti-Dindaanee.

¹³Ní jāam̀ Rufusi[79] un ti-Dindaan lútì ú tɔ̄ u-tundee, kí kpáàa jāam̀ u-na un kpántì ma mun nee.

¹⁴Ní jāam̀ Asiŋkiltu nì Fileegɔn nì Eermeesi nì Patrooba nì Eermaasi, nì ti-nabiyaamu mun bí bi-ceeyee.

¹⁵Ní jāam̀ Filooloogu nì Julii nì Neeree nì u-niisal Oolimpa nì Unimbɔti yab bin kɔkɔ bí bi-ceeyee.

¹⁶Ni-kɔkɔ ń jāam̀maan tɔb tiŋan kii nnabiyaamuee. Kriisitoo nikitiŋ kɔkɔ jáamiń-ni.

¹⁷Nnabiyaamu, m kpáafí-ni ní nīn nyí nì ni-ba nì bin fá tibɔmɔntiil tin bi dàkā-nee ki cāabìń diyakatil, ki yàntī binib lítée. Sútí kí wàatīmaan bidambi.

¹⁸An nibee kaa nóó ti-Dindaan Kriisitoo. Bi nyàab̀ bi-ba jim ní[80], ní ki sòoǹ anyɔɔbummɔɔn ki kíiĺ binib, ki yàntī bin nyil kaa náaǹee lítí.

¹⁹Báà ŋma nyí ni nín tɔ́ ti-Dindaanee, an puee, m-pɔbil sɔ̀m̀ ni-pu. Ama m là ní nīn sá bin nyí ki ŋáań tiŋanee, kí nīn sá bin bí circir, kaa là ikpitee.

²⁰An kaa làá yúntí, Unimbɔti un tìì ŋgbansɔŋfee làá yàntī ní tāā kí mátí Sitaan. Ti-Dindaan Yeesu ŋanti ń nīn bí ni-pu!

²¹M-tɔntɔnjuti Tiimootee[81] jáamiń-ni. Lusiyusi nì Jasɔn nì Soospatee, man nì bin pēēyee, mun jáamiń-ni.

²²Man Teertiyusi un ŋmàn̄ kugbɔŋu neeyee mun jáamiń-ni ti-Dindaan pu.

²³Gaayusi un dumpu m kóòyee, nì un dumpu Kriisitoo nikitil kɔkɔ kpáfée, jáamiń-ni. Eelasitu un ŋúb́ bi-tiŋki nimbiliŋee, nì ti-nabiki Kaartusi jáamiń-ni[82]. [

²⁴Ti-Dindaan Yeesu Kriisitoo ŋanti ń nīn bí ni-kɔkɔ pu. Ameeni[83].]

²⁵Tí nyɔ̄ŋkìmaan Unimbɔti! Nì tibɔmɔntiil tin m sòoǹ Yeesu Kriisitoo puee, Unimbɔti cáá mpɔn kí báań-ni inyaan nnimbɔtisan poon. Doooo ŋyuntikpikee, tibɔtee nìn bí dibalin, Unimbɔti kaa nìn dáá bīitì ti-pu,

²⁶ama kɔŋkɔnnee u nyántì-tì mpaampiin pu. U dī tigbɔn tin u-bɔnaatiliibi ŋmàn̄ ki nāatì u-bɔtee pu ki yāntì atimbun kamaa nib béè ti-pu án nín làá ŋá pu bí fōō kí kíí kí nīn kíǹ ki tɔ́ Unimbɔtee. Jaanjaan Nimbɔtiu nín là puee dee.

²⁷Míǹ puee, Unimbɔti un baba sá uciŋfitee ń ká tinyool Yeesu Kriisitoo pu kí nīn pée cá jaanjaan! Ameeni.