Read Ntcham Romains 3 Bible Online

Romains 3 - Ntcham bible

Romains 3

¹A yaa sá Juuda yɔuee, a gíti cáá diyimɔɔl dibaaa? Àá digiil sá tiwammɔntiilaaa?

²Tiŋman, bi-yimɔɔl jítiǹ bin béeyee yal kpataaa. Diyimɔɔpeepeekaal di sá Unimbɔti nín dū u-bɔti ki ŋúbiǹ Juuda yabee.

³Ama bi-kansikin biba kaa ŋúń ki yúl̀ deedee. Mimmee, bi nín kaa yúl̀ deedeeyee puee di làá yàntī Unimbɔti deedeeu ń ŋá fámaaa?

⁴Aayee, kpataaa! Unimbɔti di làá nīn pée sá deedeedaan, ní binib kɔkɔ ń nīn sá binyimɔndambi, kii Unimbɔti gbɔŋku nín lī puee yii: «Binib máaǹ kí ká a nín sá deedee puee tin a sòoǹee poon, ní bi yaa sòon̄ a-bɔtee, bí ká yii a cáá ibaamɔn[12].»

⁵Ti nín ŋáań ikpiti iŋyee yaa dàkà yii Unimbɔti sá umɔntee, mimmee u nín dátí ti-tafal ti-kpitii puee, waa bí deedee deeyaa! (M sòoǹ nniyaamin ní).

⁶Aayee kpataaa! Unimbɔti yaa kaa bàà bí deedee, waan ŋūǹ kí sòoǹ duulinya bɔti.

⁷Mimmee, m-nyimɔŋyi yaa ŋūǹ kí yàntī Unimbɔti baamɔŋyi ń nyā mpaampiin pu bí wāl̀ kí tīī-u tinyoolee, ba pu ní bi làá gíti sòoǹ kí kpɔ̀ m-bɔti yii m sá unikpiti?

⁸Míǹ puee, tí lì yii: «Tí nīn ŋáań ikpiti, án dāá kpántí tiŋanaa!» Míǹ ní bin mɔ́ntí nnyimɔn ki tūntí ti-puee lì. Bin sòoǹ ti-pu mimmee máaǹ ditafadaaldi.

⁹Mimmee, timbi Juuda yab jítiǹ binib bin kíǹeeee? Aayee, kpataaa! Kii m nín bàà pée lī puee, Juuda yab nì bin kaa sá Juuda yabee kɔkɔ bí ikpitin.

¹⁰Kii Unimbɔti gbɔŋku nín lī puee, yii: «Unil báà ubɔ kaa bí ki bí deedee, báà ubaanti, an kpá.

¹¹Ubɔ kaa bí ki cáá iciin. Ubɔ kaa bí ki nyàab̀ Unimbɔti.

¹²Bi-kɔkɔ yīntiǹ-u ki wáŋkì, báà ubɔ kaa bí ki ŋáań tiŋan, báà uniseen, an kpá.

¹³Dikaakul din wāā ki núùyee nín bí puee, míǹ ní tibɔti tin bí bi-neeŋyinee bí. Bi cáá bi-limbiliŋ ki kíiĺ binib, bi-nyunculiŋ nín tábití ki sòoǹ tiŋyee sá tilool kii ukoowaati lootee ní.

¹⁴Bi-nyɔmmu poon gbí mbusu nì ntuntun.

¹⁵Bi yáb̀ nnikpaakoon pu.

¹⁶Laakin kamaa bi yaa cūtèe, see bí cáá bi-timbiilii nì falaa niin.

¹⁷Baa nyí ŋgbansɔŋfi saŋŋu.

¹⁸Baa fàŋkí Unimbɔti báà fiii[13].»

¹⁹Ti nyí yii marab nín sòoǹ tiŋyee kɔkɔee, bi sòoǹ ki tìì bin bin Unimbɔti nìn tīī u-marabee ní. Míǹ puee, ubɔ kaa dāa cáá kinyɔkɔ kí wàan̄ kí tīī nnaakpal. Kitiŋ pu yab kɔkɔ dāa béetí yii bi sá binikpitib Unimbɔti nimbiin.

²⁰Di sá yii unil nín ŋúb̀ marab mmɔntiimin puee kaa ŋūǹ kí yàntī ú nīn bí deedee Unimbɔti nimbiin[14], kun puee marab tundi di pée sá bí dàkà binib kun di sá ikpitee.

²¹Ama kɔŋkɔnnee, Unimbɔti dàkā min ní unil ŋūǹ kí dī kí kpántí deedeedaan u-nimbiin kí taa dī marab puee: Mooyiisi gbɔnti nì Unimbɔti bɔnaatiliibi mun nìn sòon̄ an bɔti pu.

²²An sá ti nín fōō Yeesu Kriisitoo ki kííyee pu ní Unimbɔti kpántì-ti deedeedambi u-nimbiin. Unimbɔti kaa gàntī binib, an sá ki tīī bin kɔkɔ fōō Yeesu ki kííyee,

²³kun puee báà ŋma ŋá ikpiti ki dátiǹ Unimbɔti nyooti.

²⁴Unimbɔti ŋáań-ti tiŋan ki yàntī ti kpántí deedee nib u-nimbiin faalaa, Yeesu Kriisitoo nín dū u-ba ki fīī-ti ki líìyee pu.

²⁵Úǹ ní Unimbɔti yōoǹ ki lēē-ti saraa, u-fatikuu ń pítí bin kɔkɔwoooo fōō-u ki kííyee kpitii, bi nì Unimbɔti kansikin ń ŋāŋkì. Unimbɔti ŋá míǹ kí dàkà u nín sá deedeedaan puee ní. Di sá yii dooooyee, u nìn jíń kimɔtii kaa nìn dátí binikpitib tafal bi-kpitii pu.

²⁶Ama kɔŋkɔnnee, u dàkā binib u-deedeeu: u-deedeeuee di sá u dū Yeesu ki pàn̄ ti-kpitii pɔndi, ní ki yíì bin kɔkɔ fòol̄ Yeesu ki kíikée deedeedambi.

²⁷Mimmee, unil cáá nsan kí dàkà u-baaa? Aayee, nsan kaa bí báà fiii. Ba pu ní a ká difiil? A nín nóó Mooyiisi marabee puɔɔɔ? Aayee, an sá a nín fōō ki kííyee pu.

²⁸Ti nyí yii unil un fōō Yeesu ki kííyee di kpántí deedeedaan Unimbɔti nimbiin, an kaa sá marab bin u nóóyee pu.

²⁹An yaan sá marab puee, mimmee, Unimbɔti bàà sá Juuda yab ŋmaniŋma Nimbɔtiu naa! Waa bàà sá bin kaa sá Juuda yabee mun Nimbɔtiu. Ama u sá báà ŋma Nimbɔtiu ní.

³⁰Di sá yii u pée sá Unimbɔtibaanti ní[15], ki làá yàntī Juuda yab bin gíí dikpancandi ki fōō Yeesu ki kííyee nì bin kaa sá Juuda yab, kaa gíí, ki mun fōō Yeesu ki kííyee kɔkɔ ń kpántí deedeedambi u-nimbiin.

³¹Mimmee, an dàkà yii ti yaa fōō Yeesu ki kííyee, taa ti dù marab kí yíiń tiba deeyaaa? Aayee, an kaa sá míǹ. Ŋyunti gbanti ní ti nín tìì marab mpɔn.