Read Ntcham Romains 4 Bible Online

Romains 4 - Ntcham bible

Romains 4

¹Mimmee, ti làá sòoǹ diyimɔɔl din timbi Juuda yab naanja Abraam nìn kée pu yii ba?

²An yaa sá Abraam tunnyaaŋŋi pu ní Unimbɔti yíiń-u deedeedaanee, u bàà ŋūǹ kí nīn dàkà u-ba. Ama waa ŋūǹ kí dàkà u-ba Unimbɔti nimbiin.

³Unimbɔti gbɔŋku poon lī yii ba ní? An lī yii: «Abraam nìn fōō Unimbɔti ki kíí, ní Unimbɔti ká u-fookiiu un u cáá u-puee ní ki yíiń-u deedeedaan[16].»

⁴Unil un túń ditundee, bi yaa pàn̄-uee, baa lì yii bi pú-u fám, ama u-tundi paati ní u fōō.

⁵Un kaa ŋá diba, ama ní ki fōō Unimbɔti un di yàntī binikpitib kpántí deedeedambee ki kííyee, Unimbɔti yíì udaan deedeedaan u-fookiiu pu ní.

⁶An di yāntì ní Daafiidi nìn lī yii un bí dipɔɔpindinee di sá unil un Unimbɔti yíiń deedeedaan an kaa sá u-tuuŋŋi puee.

⁷«Bin bin Unimbɔti dū bi-yìntitam ki pú-bi ki pítì bi-kpitiiyee bí dipɔɔpindinaaa!

⁸Un ní ti-Dindaan kaa ti lì yii u ŋá ikpitee bí dipɔɔpindinaaa[17]!»

⁹Mimmee, dipɔɔpindi gbanti sá ki tīī Juuda yab bin gífì dikpancandee ŋmaniŋma, kaa sá ki tīī bin kíǹeeee? Ti dáá ká yii: «Abraam nín fōō Unimbɔti ki kííyee pu ní Unimbɔti yíiń-u deedeedaan.»

¹⁰Ŋyunti ŋulɔŋu ní Unimbɔti yíiń-u deedeedaan ní? U nín gíí ki dóòyeeyaaa, u nín kaa láá gííyee? An kaa sá u nín gíí ki dóòyee ní u lī, an sá min waa láá gííyee ní u nìn lī.

¹¹Boonee ní Unimbɔti bí Abraam ń gíí dikpancandi án nīn sá kudaaŋŋu[18] yii u sá deedeedaan u-fookiiu pu. Míǹ puee, bin kɔkɔ fōō Unimbɔti ki kíí, kaa gífì ki sá deedeedambi Unimbɔti nimbiinee, bi-baa di sá Abraam,

¹²ní u sá bin gííyee mun baa. An kaa sá bi nín gííyee ŋmaniŋma pu, an sá bi nín fōō ki kííyee pu, kii ti-baa Abraam mun nín nìn fōō ki kíí pu, kaa láá gííyee.

¹³Unimbɔti nìn pōoǹ Abraam nì u-naantiibi yii u làá dāá dū duulinya kí tīī-bi[19]. An kaa sá Abraam nín nìn nóó marabee pu ní u nìn pōoǹ-u míǹ, ama an sá u nín nìn fōō Unimbɔti ki kíí Unimbɔti yíì-u deedeedaanee pu.

¹⁴An yaa sá tí nīn tɔ́ marab ní kí fōō tin Unimbɔti pōoǹ-tee, mimmee fookii ŋá fám dee, ní Unimbɔti poondi kaa ti bí tiban.

¹⁵Di sá yii marab cāabìń ditafadaaldi ní, ní laakin marab kpée, marab yìntitam mun kpá.

¹⁶Mimmee, ti ká yii ti nín fōō Unimbɔti ki kííyee pu ní ti fòol̄ tin u pòontí-tee. An sá Unimbɔti ŋanti pu ní an bí míǹ ki tīī Abraam maaliŋun yab kɔkɔ. An kaa sá ki tīī bin tɔ́ Mooyiisi marabee ŋmaniŋma, an sá ki kpáaǹ bin kɔkɔ fōō Unimbɔti ki kíí kii Abraam nín nìn fōō ki kíí puee. Timbi bin kɔkɔ fōō ki kííyee baa di sá Abraam.

¹⁷Unimbɔti lī u-gbɔŋku poon míǹ ní yii: «M dū-si ki kpántì atimbun tikpil baa[20].» Unimbɔti un fìkitī bitaŋkpiibi ki wāĺ tin kaa láá bée kii tì bée, Unimbɔti un pu Abraam nìn mákée yāntì u sá ti-baa.

¹⁸Abraam nìn fōō ki kíí ní ki máká, nì min kɔkɔ dimákal diba nìn pée kpée, ní ki lafun dūu kpántì atimbun tikpil baa. Kii Unimbɔti nín nìn pée tùkū-u puee yii: «A-maaliŋun yab nín làá nīn wīikí min nyɔkɔmee dee[21].»

¹⁹U nìn púĺ ki bàn̄ abin dilaataal. U yaa kpēē u-bee, u-wunti pēefì, ní u yaa tí kpēē u-nimpuu Saarayee, u mun kpántì unimpunaati. Bi-liitil nìn jítì mmaal pu, ama ní u-mákal dáá gbíntìi pɔ̄ɔ̄[22].

²⁰Waa fá u-mákal kí dàkafì yii Unimbɔti kaa ŋūǹ kí ŋá tin u pōoǹee, ama u-mákal tīī-u mpɔn ní u nyɔ́ŋkì Unimbɔti,

²¹ki béè u-pɔbilin yii, ibaamɔn, Unimbɔti cáá mpɔn ki làá ŋá min u pōoǹee.

²²An pu ní Unimbɔti yíiń-u deedeedaan.

²³An kaa sá úǹ baba pu ní an ŋmàn̄ yii Unimbɔti yíiń-u deedeedaan.

²⁴An sá ti mun pu, kun puee Unimbɔti kpèé-ti yii ti mun sá deedeedambi dimákal din ti cáá úǹ Unimbɔti un fīkitì ti-Dindaan Yeesu ditaŋkpiilinee pu.

²⁵Ti-kpitii pu ní Yeesu kpíì[23], ní ki fīkitì, ti mun ń ŋmā kí kpántí deedeedambi Unimbɔti nimbiin.