Read Ntcham Romains 7 Bible Online

Romains 7 - Ntcham bible

Romains 7

¹Nnabiyaamu, m pàkā yii m bíi sòoǹ nì binib bin nyí marabee ní. Ni nyí yii mara cáá mpɔn unil pu ŋyunti ŋun u dáá bí dimaŋfalinee ŋmaniŋma ní.

²Míǹ ní unimpu yaa mɔ́ǹ ticatee, mara bóob́-u ki nákáǹ u-cal ŋyunti ŋun u dáá bí dimaŋfalinee. U-cal yaa kpíìyee, mara bútì-u ki nákatiǹ u-cal un u nìn nákée dee.

³Mimmee, unimpu cal yaa dáá bí, kaa kpíì, u yaa yíkìi mɔ́ǹ ubɔee, bi ŋūǹ kí yíiń-u kinimpulaakpaai. U-cal yaa kpíìyee, mara un bóob́-u ki nákáǹ u-calee cúu bútì dee, u ŋūǹ kí mɔ̄ǹ uninjapɔɔn ubɔ. Niinee, baa ti yíì-u kilaakpaai.

⁴M-nabiyaamu, míǹ mbaantiim, ni nín kpáfì ki kpíì nì Kriisitooyee, ni-kúmee yākatì ni nì marab kansikin. Kɔŋkɔnnee, ni kíǹ ki sá Kriisitoo un fīkitì ditaŋkpiilinee yab ní. Tí lòoǹ abimɔnti kí tīī Unimbɔti.

⁵Dooooyee, ti nín nìn dáá bí ki ŋáań ti-ba lammee, marab nìn tútúǹ ti-landɔkɔkpitii in téekí-ti, ti tūǹ atuun ŋin cáǹ-ti ŋkúminee.

⁶Dooooyee, marab nìn cúú-ti kuyuŋu, ama kɔŋkɔnnee ti yākatì tɔbin, baa ti cáá ti-pu mpɔn, ti tɔ́ ti-ba. Míǹ puee, ti ŋūǹ kí tɔ̄ ditundi min ní Circir Fam kpòotī-tee, an kaa ti sá min min kugbɔŋu poon marab nìn kpòotī-ti dooooyee.

⁷Mimmee, tí lì yii ba? Marab sá ikpiti deeyaaa? Aayee kpataaa! An yaa kaa sá marab pu, maa bàà nyí kun di sá ikpitee. Di sá yii marab yaa kaan lī yii: «Á taa nín̄ cáá nnimbitaataam», maa bàà nyí kun bi yíì nnimbitaataamee[26].

⁸Marab lī mimmee, ní tikpitil ká nsan kí kɔ́ǹ-mi tiwan kɔkɔ nnimbitaataam. Di sá yii, marab yaa kpée, ikpiti kaa cáá mpɔn.

⁹Doooo min marab nìn kpée, m nìn bí dimaŋfalin. Ama marab nín bāańee, ikpiti dɔ́miń ki fōō mpaan,

¹⁰ní man kpíì. Mimmee, marab bin bàà sá ukpootil kí cáá-mi dimaŋfalinee[27] fātìi téé-mi ki tɔ́ ŋkúmin.

¹¹Ní ikpiti dī marab pu ki ká nsan ki kíil̀-mi[28] ki kūū-mi marab gbanti pu.

¹²Marab bi-ba bí circir, ní isaŋki in bi sáŋkí-tee mun bí circir ki bí deedee ki ŋān̄.

¹³Mimmee, tin sá tiwammɔntiilee di cáań-mi ŋkúmaaa? Aayee, kpataaa! An sá ikpiti di cáań míǹ, ki dūu dīń tiwammɔntiil pu ki kūū-mi, ki dàkā i nín sá ikpiti iŋyee mbaamɔmin. Marab puee, ti béè yii ikpiti kaa lafun sàafì.

¹⁴Ti nyí yii marab lafun sá Unimbɔti wanti. Ama ní man sá nniwuŋgban, ikpiti dá-mi kuyuŋu.

¹⁵Maa nyí tin m ŋáańee, kun puee maa ŋáań tin m bàà là kí ŋée, ní ki ŋáań tin tin m ná, kaa bàà là kí ŋée.

¹⁶M yaa bíi ŋáań tin tin maa là kí ŋée, mimmee m béè yii marab ŋān̄ dee.

¹⁷Mimmee, an dàkà yii an kaa sá man m-ba di bíi ŋáań tikpitil, an sá ikpiti in bí m-nee di ŋáań.

¹⁸M nyí tiŋman yii tiŋan kaa bí m-ni, an dàkà yii m-wuntin. Nì min kɔkɔ m bàà cáá nlandɔkɔmɔnti kí ŋá tiŋanee, mpɔn kpá ḿ ŋmā kí ŋá.

¹⁹Tiŋan tin m bàà là kí ŋée, maa ŋáań tíǹ, tikpitil tin maa bàà là kí ŋée, tíǹ ní m ŋáań.

²⁰Mimmee, m yaa bíi ŋáań tin tin maa bàà là kí ŋée, an kaa ti sá mama m-ba di bíi ŋáań, an sá ikpiti in bí m-nee di bíi ŋáań.

²¹M dáań ki ká tiba: m yaa bàà bí yii ḿ ŋá tiŋanee, tikpitil ní m ŋáań.

²²M-pɔbilinee, Unimbɔti marab di fáatì-mi,

²³ama m ká yii mpɔn ŋubɔ bí m-wunti nì ti-jaŋŋin ki jáaǹ kun kun m-landɔkɔŋu fáatèe, ki dū-mi ki nyáfiǹ ikpiti pɔŋŋu ŋun bí m-wuntinee.

²⁴Man nimbinaamandi neeee! Tiwun nee dátí-mi ki cáǹ ŋkúmin, ŋma di làá fīī-mi kí líí?

²⁵Tí jāam̀maan Unimbɔti ti-Dindaan Yeesu Kriisitoo un fìil̄-tee pu! Mimmee, m-landɔkɔŋu poonee, m bàà là kí nóó Unimbɔti marab, ama iwɔfi in bí m-wuntinee là kí nóó ikpiti.