Read Ntcham Romains 8 Bible Online

Romains 8 - Ntcham bible

Romains 8

¹Kɔŋkɔnnee, bin nì Yeesu Kriisitoo ŋá ubaantee, dibɔkpil diba kaa ti dɔ̄ ki cí-bi.

²Di sá yii Circir Fam min tīī-ti dimaŋfal Yeesu Kriisitoo puee marau nyántì-ti ikpiti nì ŋkúm marau ŋaan.

³Di sá yii Mooyiisi marab kaa nìn ŋúń ki ŋá míǹ, kun puee binib bí iwɔfin, kaa ŋūǹ kí nóó marabee. Ama ní Unimbɔti dū úǹ u-ba Jipɔɔn ki túnní, u dɔ́miń ki cáá tiwumbaantiil kii timbi bikpitibee, ki ŋúń ki lēē ikpiti. Unimbɔti ŋá míǹ ki kúntì mpɔn ŋun ikpiti cáá binib puee.

⁴Mimmee, timbi bin kaa nóó mbimbikpitim ama ní ki nóó Circir Fam nín kpòotī-ti puee, ti kpántí deedeedambi kii marab nín là puee dee.

⁵Bin bin nóó mbimbikpitimee nyàab̀ kí nīn ŋáań tin fáatì-bee ní, ní bin nóó Circir Famee mun nyàab̀ kí nīn ŋáań tin Circir Fam lèe.

⁶Mbimbikpitim nín là tiwan tiŋyee di cāabìń ŋkúm. Circir Fam nín là kun kuŋyee di cāabìń mmaŋfafɔkɔn nì ŋgbansɔŋfi.

⁷Bin nóó bi-bimbikpitim nín là puee sá Unimbɔti nannanliibi ní. Baa sìntīǹ bi-ba ki tìì Unimbɔti marab, kaa pée ŋūǹ gba.

⁸Bin nóó bi-bimbikpitim nín là puee kaa ŋūǹ kí fáatíǹ Unimbɔti.

⁹Ama nimbee, nimbi kaa nóó ni-bimbikpitim nín là puee. Min min Unimbɔti Fam lèe, míǹ ní ni nóó, kun puee u-Fam kóò ni-ni. Un yaa kaa cáá Kriisitoo Famee, kaa sá u-yɔu.

¹⁰Kriisitoo yaa bí a-ni, nì min kɔkɔ ikpiti puee a-wunti làá kpúee, Circir Fam làá tīī-si dimaŋfal, kun puee a bí deedee.

¹¹Unimbɔti un fīkitì Yeesu Kriisitoo ditaŋkpiilinee Fam yaa kóò a-nee, Unimbɔti gbanti un fīkitì Kriisitoo ditaŋkpiilinee làá dāá yàntī u-Fam min kóò a-nee ń tīī a-wunti tin kúùyee dimaŋfal.

¹²Mimmee, m-nabiyaamu, taa ti cáá ti-bimbikpitim dipɔndi diba, kí nīn ŋáań mì nín là puee.

¹³Ni yaa gbíntì ki ŋáań min ni-bimbikpitim lèe, ni kúù ní. Ama Circir Fam pɔŋŋu puee, ni yaa kūū tin ni-bimbikpitim là ní ŋée, ni kāntí dimaŋfal.

¹⁴Di sá yii bin kɔkɔwoooo Unimbɔti Fam kpòotēe sá Unimbɔti biyaamu ní.

¹⁵Mimmee, naa ti máaǹ kí nīn gbíntìi fàŋkí kii iyumbuee, kun puee ni fōō Unimbɔti Fam min yāntì Unimbɔti fōō-ti ti yíì-u yii ti-Baayee,

¹⁶ní Circir Fam mi-ba tùkù ti-pɔbiliŋ poon yii ti sá Unimbɔti biyaamu.

¹⁷Ti nín sá u-biyaamu puee, ti fòol̄ u-gaajawanti. Ti nì Kriisitoo di dāa fòol̄-tì. Ti yaa kpáfì ki jīǹ falaayee, boonee ti nì u di dāa tí fòol̄ tinyool[29].

¹⁸M nyí yii falaa un ti bíi jīǹ ti-yuntiŋu nee kaa wīikí ki bàn̄ Unimbɔti nyooti tin u làá dāá tīī-tee.

¹⁹Unimbɔti nín náań tiwan tin kɔkɔee jìkì ki cí ŋwiin ŋun Unimbɔti làá dāá tīī u-biyaamu tinyool báà ŋma ń kée.

²⁰Unimbɔti wannaaŋkaati gbanti kɔkɔ ŋá fám. Kaa sá yii tì là, Unimbɔti di yāntì an ŋá míǹ. Nì min kɔkɔ tì kpántì fámee, tì máká yii

²¹tì làá dāá nyā ntimbiil gbanti yuŋkun kí kpāfì nì Unimbɔti biyaamu kí tɔ̄ ti-ba ní kí fōō tinyool.

²²Ti nyí yii Unimbɔti wannaaŋkaati gbanti kɔkɔ bí falaa ni áli ki dāa sāā díǹ kii upɔdaan nín yáliŋkí imatiŋween puee.

²³Ama an kaa sá tiwannáaŋkaal gbanti baba, ki kpáaǹ timbi bin Unimbɔti tìì u-Fam min yāntì ti dáká tin bí ki dòońee. Ti mun bí ki yáliŋkíǹ ti-ba ki cí ŋyunti ŋun ti làá kpántí Unimbɔti biyaamu mbaamɔminee, an dàkà yii ŋyunti ŋun u làá dāá fīī ti-wunti mun kí lííyee[30].

²⁴Mimmee, ti ká difiil, ama ní an dáá nín bí dimákalin. A yaa ká kun a mákée, an kaa ti sá dimákal, kun puee tiwan tin a fōōyee, a gíti ŋūǹ kí nīn máká ti-puɔɔɔ?

²⁵Ti yaa máká tin taa láá kée puee, see tí jī kimɔtii kí nīn kpèé nsan pú.

²⁶Míǹ mbaantiim ní Circir Fam bí ki tútúǹ-ti ti-wɔfii poon, kun puee taa nyí min máaǹ tí mèèyee, ama Ŋfamee mi-ba yáliŋkí ki jítiǹ anyɔɔbun nín ŋūǹ kí sòoǹ tibɔti tiŋyee ki mèé Unimbɔti ti-pu.

²⁷Ní Unimbɔti un wāĺ binib pɔbiliŋ poonee béetí kun Ŋfam lèe, di sá yii kun mì mèéyee nóó nì kun Unimbɔti là kí tīī u-yabee ní.

²⁸Ní ti nyí yii tin kɔkɔ pée bàń bin néeń Unimbɔtee, Unimbɔti cáa kpántí tiŋan ní ki tìì-bi. Bíǹ ní u bɔ́ntì ki lēē ki síiǹ yii bí nīn sá u-yab.

²⁹Bin u gāntì dooooyee ní u lēē ki yóoǹ bí kpántí kii u-Jipɔɔn nín bí puee, án nín làá ŋá pu u-Jipɔɔnee ń nīn sá ukpil u-nabiyaamu mun sá kunipaauee kansikinee.

³⁰Bin u lēē dooooyee ki yóoǹee, u yíiń-bi. Bin u yíińee, ní u yāntì bi kpántì deedeedambi Unimbɔti nimbiin, ní bin u yāntì bi kpántì deedeedambee, u kɔ́ǹ-bi u-nyootin.

³¹Ti làá gíti lì tibɔti nee pu yii ba dee? Unimbɔti yaa yú ti-boonee, ŋma di gíti ŋūǹ kí ŋá-ti tiba?

³²Timbi pu ní Unimbɔti kaa tāaǹ úǹ u-ba Jipɔɔn ki dū-u ki ŋá saraa, mana ní u ŋūǹ kí yíí kí taa tīī-ti tikɔkɔ kí kūtì u-Jipɔɔnee pu?

³³Unimbɔti bí yii bin u lútèe sá deedeedambi, kin, ŋma di gíti ŋūǹ kí ká tikpitil tiba bi-pu kí sòoǹ?

³⁴Yeesu Kriisitoo un kpíì ki kpáàa fīkitì mun ki kā Unimbɔti ŋaŋgiil púee bí ki mèé ki tìì-ti. Kin ŋma di gíti ŋūǹ kí kpɔ̀ ti-bɔti?

³⁵Dineendi din Kriisitoo cáá ti-puee, tiba ŋūǹ kí yàkatī ti-kansikinaaa? Falaa di ŋūǹ kí yàkatī-taaa, dinimbinaamandaaa, disàandaaa, ŋkùmaaa, disoolaaa, mbusuaaa, ŋkúm?

³⁶Kii Unimbɔti gbɔŋku poon nín lī puee yii: «Sii ti-Dindaan pu ní, kí yòon̄ kutaafaau kí dāá mɔ́-kuee, ti tūŋkí ŋkúm, ní bi ŋáań-ti kii ipii in bi cáǹ kí kpɔ̀ee[31].»

³⁷Tíǹ kɔkɔ poonee, un néeń-tee tútúǹ-ti ti jáà ki jīǹ ki kúntí tikɔkɔ.

³⁸M nyí ibaamɔn poon yii tiba kaa ŋūǹ kí yàkatī dineendi din bí timbi nì ti-Dindaan kansikinee: ŋkúmaaa, dimaŋfalaaa, Unimbɔti tuuŋyaaa, an yaa tí sá abeedambi bin baa wāĺeeyaaa, tin tin poon ti bí kɔŋkɔnneeyaaa, tin bí ki dòońeeyaaa, mpɔndambaaa,

³⁹an yaa sá tin bí yilpuee nì tin bí taapueeyaaa, an yaa tí sá tiwannáaŋkaal tin kɔkɔ kíǹeeyaaa, báà tiba nì tiba kaa ŋūǹ kí yàkatī timbi nì dineendi din Unimbɔti dī ti-Dindaan Yeesu Kriisitoo pu ki dàkā-tee.