Read Ntcham Romains 9 Bible Online

Romains 9 - Ntcham bible

Romains 9

¹M sòoǹ ibaamɔn kii Kriisitoo yɔu nín máaǹ kí sòoǹ puee ní. Maa mɔ́ntí, Circir Fam mun sòoǹ m-pɔbil poon yii an sá tiŋman,

²yii m-pɔbil poon gbí kunimbaakpaaŋŋu ní m yáliŋkí baabadal.

³M yaan ŋūǹ Unimbɔti ń ŋá-mi fám, man nì Kriisitoo ń yàkatī tɔbin, m-nabiyaamu man nì bin pēē mmaalee ń ŋmā kí ká difiilee, m bàà là.

⁴M-nabiyaamu gbanti di sá Isirayeel yab bin Unimbɔti lútì bí nīn sá u-biyaamuee. U nì u-walifiŋu nìn kóò bi-kansikin, ní u nì bi ŋá mpèé. U tīī-bi marab ki dàkā-bi min ní bi làá nīn jáaḿ-uee, ki pōoǹ-bi ipoon[32].

⁵Bi-naanjab sá Jaakɔb jipɔmbi saalaa nì bilee ní. A yaa kpēē tinitanee, Kriisitoo mun sá bi-maaliŋu poon, Kriisitoo un di tɔ́kɔ́ tikɔkɔ nì tikɔkɔ pu ki sá Unimbɔti un máaǹ inyɔŋki baabadal kí nīn pée cá jaanjaanee! Ameeni.

⁶Isirayeel yab nín kaa fōō Yeesu ki kííyee, an kaa dàkà yii Unimbɔti poondi ŋá fám. Di sá yii an kaa sá bin kɔkɔ nyánní Isirayeel maaliŋunee[33] di sá Isirayeel yab páaa.

⁷Bin kɔkɔwoooo nyánní Abraam maaliŋunee kaa sá u-biyaamu páaa, kii Unimbɔti nín nìn sòon̄ nì Abraam puee yii: «See Isaaki naantiibi baba di làá fōō a-yindi[34].»

⁸An dàkà yii an kaa sá mmaal ŋun ti nyí nee[35] di màal̀ Unimbɔti biyaamu. Abraam naantiibi bin Unimbɔti nìn pōoǹ ki tīīyee baba di sá bimɔntiibi,

⁹kii Unimbɔti nín nìn pōoǹ-u puee yii: «Ŋyunti ŋun m yóoǹee yaa bāańee, m làá dāan̄, ní a-nimpuu Saara ń màal̀ kibininjabiki[36].»

¹⁰Tiba mun gíti sɔ̀: Reebeeka mun bɔti bí. U màl̄ ti-naanja Isaaki mbininjabiyaamu muli ní.

¹¹Kí wàatī ú màal̀ mbiyaamu gbantee, muaa láá nyáń ki ŋá tiŋanaaa, kaa láá ŋá ikpiti, ní Unimbɔti tùkū Reebeeka yii: «Ukpil di làá dāá nīn bí kiwaai taapu,» án ŋmā kí nóó nì Unimbɔti nín lēē ki síiǹ u-ban puee. Míǹ ní u yíì binib, kaa kpèé bi-tūntɔtam pu[37],

¹³kii an nín ŋmàn̄ puee, yii: «M néeń Jaakɔb, ní kaa là Eesayuu[38].»

¹⁴Ti yaa kpēē an bɔtee, ti làá lì yii Unimbɔti kaa sá ibaamɔndaanaaa? Aayee, kpataaa!

¹⁵Di sá u nìn tùkū Mooyiisi yii: «Un saai m yaa là kí sɔ̄ee, úǹ saai ní m sūǹ, ní un m yaa là kí ŋá tiŋanee, úǹ ní m ŋáań tiŋan[39].»

¹⁶Mimmee, an kaa nyēeń unil nín là pueeyaaa, kaa nyēeń u-pɔ́ɔǹtam pu, Unimbɔti di sūǹ unil saai kí fīī udaan.

¹⁷Unimbɔti gbɔŋku poonee, ti kāntí yii Unimbɔti tùkū Eejipiti bɔtiu yii: «Kun pu m baasii kāaǹ-si dibeelee di sá ḿ dī a-pu kí dàkà m-pɔŋŋu kí yàntī ntimu nib kɔkɔ ń béé m-yindi[40].»

¹⁸An dàkà yii Unimbɔti yaa là kí fīī binibaaa, u yaa tí là kí nyìŋfì bi-pɔbiliŋaaa, an bí úǹ cee ní.

¹⁹An yaa yíì, ubɔ ŋūǹ kí bàlifì-mi yii: «Kin mimmee, ba pu ní Unimbɔti gíti wòoǹ nnibiyaamu? Di sá ubɔ kaa yíití min Unimbɔti lèe.»

²⁰M làá kíí udaan yii: «Unil, a sá ŋma ní ki kpākantí Unimbɔti? Tiwan tin bi máńee kaa ŋūǹ kí tùkù un máń-tèe yii: <Ba pu ní a máń-mi yéè[41]?>»

²¹Uyɔɔmaati ŋūǹ kí dū kuyɔkɔu kí mā kun kun u yaa lèe: u ŋūǹ kí dū-ku kí mā dibɔmɔntiil, ki tí ŋūǹ kí dūú mā kinyinsaŋ[42].

²²Kin Unimbɔti fáà? U cáá nsan kí gíí diŋuul kí dàkà binib u-pɔŋŋu. U jíń kimɔtii tikpil bin bàà máaǹ ditafadaaldi ki ŋmāntì ú kúntí-bee pu,

²³ní ki kpáàa là kí dàkà u-nyooti nín wīikí pu tikpil tikpil ki tīī bin u fīī ki bɔ́ntì ki yóoǹ bí kɔ́ u-nyootinee.

²⁴Timbi bin u lútì ki yíiń Juuda yab nì bin kaa sá Juuda yabee kansikinee kɔkɔee, ti mun kútì poon.

²⁵Míǹ ní u lī Ooseeya gbɔŋku poon yii: «Bin kaa nìn sá m-nibulee làá dāá nīn kíǹ ki sá m-nibul, ní ditimbundi din maa nìn néeńee, m làá nīn kíǹ ki néeń-dì tikpil.

²⁶Ní laakin bi nìn tùkū-bi yii: <Naa sá man nibulee>, niin ní bi làá yíiń-bi yii Unimbɔti un bí dimaŋfalinee jipɔmbi[43].»

²⁷Unimbɔti bɔnaatiliu Yeesaya mun báakì ki sòon̄ Isirayeel yab bɔti yii: «Báà Isirayeel naantiibi yaa wīikí kii dibul din bí tiŋku gbandee, bi-kansikin binib fiii di làá kíń kí ŋmátí.

²⁸Di sá yii ti-Dindaan làá ŋá tin tin kɔkɔ u sòon̄ ki síiǹ yii u làá ŋá kitiŋ puee malaa[44].»

²⁹Yeesaya gbanti di nìn gíti sòon̄ tibɔti nee ki yóoǹ dooooyee, yii: «Ti-Dindaan Mpɔŋkɔdaan yaa kaa bàà kíǹ ti-maaliŋu poon binib bibee, ti bàà kpántì kii Soodoom tiŋkee ní, ki bàà kíǹ ki náań nì Goomoora tiŋkee[45].»

³⁰Tibɔti tin ti sòon̄ee, ti làá kúntí-tì yii ba? Bin kaa sá Juuda yab, kaa nìn nyàab̀ kí nīn bí deedeeyee di kpántì deedeedambi Unimbɔti nimbiin, kun puee bi fōō-u ki kíí.

³¹Juuda yab bin nìn nyàab̀ kí nóó marab kí ŋmā kí kpántí deedeedambee kaa ŋúń ki ŋúb́ marab gbanti.

³²Ba yì-tì? Kun puee bi dàkafī yii bi-tuuŋŋi pu ní bi ŋūǹ kí nīn bí deedee, kaa nyàab̀ kí fōō Unimbɔti kí kíí kí nīn bí deedee. Bi gbéetì ditaŋkpal

³³din pu Unimbɔti gbɔŋku nìn ŋmàn̄ee yii: «Kpèè, m bíl̀ ditaŋkpagbéetikaal Siiyɔn, ditaŋkpal din líikí binibee. Un yaa fōō-dì ki kííyee, icoo kaa làá jī udaan[46].»