Read Ntcham 1 Corinthiens 1 Bible Online

1 Corinthiens 1 - Ntcham bible

1 Corinthiens 1

¹An sá man Pɔɔl un Unimbɔti là ki yíiń-mi ḿ nīn sá Yeesu Kriisitoo kpambalee nì ti-nabiki Sɔsteen di jáaḿ-ni[1].

²M ŋmàn̄ kugbɔŋu nee ki tīī nimbi Unimbɔti nikitil din bí Kɔranti[2], Unimbɔti lútì-ni ní nīn sá u-yab Yeesu Kriisitoo puee. U yíiń-ni ní nīn bí circir, ni nì bin kɔkɔ bí báà laakin ki jáaḿ ti-Dindaan Yeesu Kriisitoo bi-Dindaan un sá ti mun Dindaanee.

³Ti-Baa Unimbɔti nì ti-Dindaan Yeesu Kriisitoo ń ŋá-ni tiŋan kí tīī-ni ŋgbansɔŋfi.

⁴M jáaḿ m-Nimbɔtiu múlmul ni-pu, tiŋan tin u ŋá-ni Yeesu Kriisitoo puee.

⁵Di sá Kriisitoo pu ní u ŋá-ni tiŋan kɔkɔ, ki yāntì ni gbìl̄ ki béè u-bɔti taapu kɔkɔ ki ŋūǹ kí sòoǹ-tì mbaamɔmin.

⁶Kriisitoo bɔti tin ti cáań ki sòon̄ nì nee, ni fōō-tì ki ŋúb́-tì tiŋan pu.

⁷Míǹ pu ní nimbi bin kā ki cí ti-Dindaan Yeesu Kriisitoo gítintamee, Unimbɔti pú-ni u-pɔ̄tam kɔkɔ, báà miba kaa lóò-ni.

⁸Unimbɔti gbanti di làá ŋúb́-ni mmɔntiimin kí tin cáá kátí-ku án nín làá ŋá pu ti-Dindaan Yeesu Kriisitoo yaa láa gítìńee, bí taa láa ká ni-pu ikpiti ibee.

⁹Unimbɔti yaa pōoǹ puee, see ú ŋá míǹ, an di sá yii u yíiń-ni yii ni nì u-Jipɔɔn ti-Dindaan Yeesu Kriisitoo ń ŋá ubaanti[3].

¹⁰Nnabiyaamu, nì ti-Dindaan Yeesu Kriisitoo yindi puee, m gbàam̄-ni, ní nīn pēēmaan kinyɔkɔ, digàntil ń taa nín̄ bí ni-kansikin. Nín̄ pēēmaan kinyɔkɔ mmɔntiimin, ni-kɔkɔ bɔti ń nīn sá tibaantiil, ni-landɔkɔi mun ń nīn pēē.

¹¹Di sá yii m-nabiyaamu, Kloowee dicaŋkun yab biba dɔ́miń ki tùkū-mi yii kujaau bí ni-kansikin.

¹²Kun pu m lì mimmee di sá m gbìl̄ yii ni-kansikin biba lì yii bíǹ nóó Pɔɔl ní, ní biba mun lì yii bíǹ nóó Apooloosi[4] ní, ní biba mun lì yii bíǹ nóó Peetroo, ní biba mun lì yii bíǹ nóó Kriisitoo ní.

¹³Mimmee, ni dàkafī yii Kriisitoo yākatì u-ba ajan kupaauaaa? Àá Pɔɔl ní bi kpáá ndɔpuntikaa pu ki tīī-ni ní? Àá Pɔɔl yindi pu ní bi fùl̄-ni Unimbɔti nyim ní?

¹⁴M jáaḿ Unimbɔti m nín kaa fùl̄ ni-kansikin báà ubɔ nnyimee, asee Kriisipusi nì Gaayusi baba[5].

¹⁵An puee ni-kansikin ubɔ kaa ŋūǹ kí lì yii man yindi pu ní bi fùl̄-u nnyim.

¹⁶Tiŋman! M téetí yii m nìn fùl̄ Steefanasi nì u-dicaŋkun yab Unimbɔti nnyim. M yaa gíti fùl̄ biba muɔɔɔ, maa ti nyí.

¹⁷Di sá yii Kriisitoo kaa túnní-mi ḿ nīn fùul̀ binib Unimbɔti nnyim, ama u túnní-mi ḿ sòoǹ u-Bɔmɔntiiti ní. Maa làá dū binib ciiŋyi ní kí sòoǹ an bɔti. M yaa ŋá mimmee, m làá yàntī kun pu Yeesu Kriisitoo kpíì ndɔpuntikaa puee ń ŋá fám dee.

¹⁸Kun puee ti nín sòoǹ yii Kriisitoo kpíì ndɔpuntikaa pu kí fīī binibee, an sá tiwaatibɔti ní ki tīī bin bí diwaŋkil saŋŋu poonee. Ama ní ki sá Unimbɔti pɔŋŋu ki tīī timbi bin bí difiil saŋŋunee,

¹⁹kii an nín ŋmàn̄ Unimbɔti gbɔŋku poon puee yii: «M làá kúntí biciŋfitiibi ciiŋyi ní kí nàan̄ binyiliibi nyil.»

²⁰Niinee uciŋfiti, àá unyil gíti cáá tilati? Bin bí duulinya poon ki kpākantée bí la? Unimbɔti dàkā yii duulinya yab ciiŋŋu sá kuwaatiiu ní[6].

²¹Di sá yii duulinya nì u-ciiŋŋuee, waa ŋúń ki béè Unimbɔti nì u-ciiŋŋu. An pu ní an fáatì Unimbɔti ń dī tibɔti tin ti sòoǹ bi cáa yíì tiwaatibɔti nee pu kí fīī bin fōō-u ki kííyee.

²²An yaa sá Juuda yabee, bíǹ nyàab̀ bí ŋá maamaacib bí ká án nīn sá-bi kudaaŋŋu, ní Greeki yab bíǹ nyàab̀ iciin.

²³Ama ní timbee, Kriisitoo un bi kpáá ndɔpuntikaa puee bɔti ní ti sòoǹ. An bɔtee di làkantí Juuda yab, ní ki sá bin kaa sá Juuda yabee cee tiwaatibɔti.

²⁴Ama Kriisitoo di sá Unimbɔti pɔŋŋu nì u-ciiŋŋu ki tīī binib bin Unimbɔti yíińee, bin sá Juuda yabee nì bin kaa sée.

²⁵Di sá yii tin tin Unimbɔti ŋá binib cáa yíì tiwaatibɔtee jítiǹ binib ciiŋyi, ní tin u ŋá binib kpèé yii an sá iwɔfee pɔ̄ɔ̄ ki jítiǹ binib.

²⁶Nnabiyaamu, kpèèmaan nimbi dikitil din Unimbɔti yíińee, bin binib yíì biciŋfitiibee, nì biyidambi, nì agaajabil kaa wīikí ni-kansikin.

²⁷Ama Unimbɔti lēē kun ní duulinya yíì kuwaatiiuee ní ki dūu kɔ́ǹ biciŋfitiibi icoo, ní ki lēē kun duulinya yíì iwɔsɔfee ní ki dūu kɔ́ǹ bipɔɔbi icoo.

²⁸U lēē tiwan tin bi kpèé ki sìŋkīǹ kaa dūu yíiń tibee, tin kaa pée bí tibanee ní u dūu sīntiǹ tin bi wāĺ yii tì bí tibanee taapu taapu.

²⁹U ŋá míǹ unil báà ubɔ ń taa gāā u-bindi Unimbɔti nimbiin.

³⁰Di sá yii úǹ Unimbɔti di yāntì ní ni nì Yeesu Kriisitoo ŋá ubaanti. U yāntì Yeesu kpántì timbi ciiŋŋu. Kriisitoo pu ní ti kpántì deedeedambi Unimbɔti nimbiin ki bí circir, u fōō-ti ki líì.

³¹An pu ní an ŋmàn̄ Unimbɔti gbɔŋku poon yii: «Sii un yaa làá gāā a-bindee ń gāā ti-Dindaan nín ŋá tiŋyee pu[7].»