Read Ntcham 1 Corinthiens 11 Bible Online

1 Corinthiens 11 - Ntcham bible

1 Corinthiens 11

¹Ní nīn dīmaan man tabɔbiliŋ kii ma mun nín dī Kriisitoo tabɔbiliŋ puee.

²M pàkà-ni kii ni nín téetí m-pu ŋyunti kamaa pu, ki ŋúb́ tibɔti tin m dàkā-nee kii m nín pée dàkā-ni-tì puee.

³Ama nì míǹ kɔkɔee, tibɔti tin m là ní bééyee sèé: Kriisitoo sá uninja kamaa yidaaŋwu, ní unimpu yidaaŋwu sá u-cal, ní Kriisitoo yidaaŋwu sá Unimbɔti.

⁴Uninja di yaa bí ki mèé àá Unimbɔti tīī-u dinyɔɔbundi diba ní u bíi nàatī ní ki cíkí tiba u-yil puee, u kpèé Kriisitoo fám dee.

⁵Ama unimpu di yaa bí ki mèé Unimbɔti àá Unimbɔti tīī-u dinyɔɔbundi diba ú nàatī ní tiba kaa bīī u-yil puee, u kpèé u-cal un sá u-yidaaŋwuee fám dee. An bí kii u tú diyibaakpandee ní.

⁶Ama unimpu yaa kaa là kí dū tiba kí bìin̄ u-yil puee, ú cā u-yikpiti àá ú kòol̀. Diyikpical àá dikooldi yaa tí cáá-u icooyaaa, ú nīn bìintí tiba u-yil pu.

⁷Uninja kaa máaǹ kí bìin̄ tiba u-yil pu, di sá yii úǹ sá Unimbɔti naŋku, ní ki sá u-nyooti. Ní unimpu sá uninja nyooti.

⁸Di sá yii an kaa sá unimpu pu ní Unimbɔti lēē tiba ki náań uninja, ama an sá uninja pu ní u lēē tiba ki dūu náań unimpu.

⁹An kaa tí sá unimpu pu ní u náań uninja, ama an sá uninja pu ní u náań unimpu[42].

¹⁰An pu ní an sá yii ituun puee, unimpu máaǹ kí nīn yíĺ tiba kí bìin̄ u-yil pu, míǹ di dàkà yii waa yì u-ba.

¹¹Ti-Dindaan saŋŋu poonee, uninja kaa yì u-ba unimpu cee, míǹ ní unimpu mun kaa yì u-ba uninja cee. Ubɔ kaa ŋūǹ kí nīn bí ubɔ ń nín kpá.

¹²Di sá uninja pu ní bi lēē tiba ki náań unimpu, ní unimpu mun di màal̀ uninja, ama bíǹ kɔkɔee nyánní Unimbɔti cee ní.

¹³Nimbi ni-ba, ní dàkafì kí kpèè yii an ŋān̄ unimpu ń nīn mèé Unimbɔti kaa yíĺ tiba u-yil puɔɔɔ?

¹⁴Duulinya u-ba dàkà yii an kaa ŋān̄ uninja ń nīn tú tiyikpiti sùuu.

¹⁵Ama unimpuee, tiyikpiti yaa fɔ̀kɔ̀ee di sá u-nyooti, kun puee tiyikpiti nín fɔ̀kɔ̀ puee di fòol̄ ŋŋaabu ŋun u bàà làá yíĺee paaŋŋu.

¹⁶Ubɔ yaa cáá tiba kí kpákáǹ an puɔɔɔ, timbi nì Unimbɔti nikitiŋ nín ŋúb́ miŋyee dee.

¹⁷Kɔŋkɔnnee m nín gbìl̄ tiŋyee puee m làá wòoǹ-ni ní, di sá yii ni nín kōontí ikoon in an bàà sá án tūtuǹ-ni kin an púntí-nee.

¹⁸Mpeepeekaamee, m gbìl̄ yii ni yaa kpáfì kí jāam̀ Unimbɔtee, ni kpákà ní ki gàntī tɔb. - Man m-ba, m fōō yii an máaǹ ki sá míǹ.

¹⁹An lafun máaǹ digàntil ń nīn bí ni-kansikin, bí ŋmā kí béé bin yú deedeeyee. -

²⁰Ni nín kpáfí ki jáaḿ Unimbɔtee, an kaa sá ti-Dindaan jinti ní ni jīǹ.

²¹Di sá yii nimbee, báà ŋma ŋáań malaa ní kí yòon̄ u-jinti ki bíi jīǹ u-baba. Ni nín ŋá mimmee ní ŋkùm làá kpɔ̀ biba ní bin kíǹee ń gbí ndaam.

²²Naa cáá idumpu kí jī kí nyɔ̀ niinaaa? Unimbɔti nikitil ní ni kpèé fám naaa, bin kaa cáá tibee ní ni kɔ̄ntí icoo ní? Ni cí yii ḿ lì-ni tiba ní naa! Ḿ pàkà-naaa? Aayee, maa làá pàkà-ni báà fiii!

²³Ní kpèè tibɔti tin ti-Dindaan dàkā-mi m dū ki nāatì-nee. Di sá yii kunyeeu kun bi dū ti-Dindaan Yeesu ki ŋúbiǹ u-nannanliibee, u nìn yōoǹ kpɔnɔ

²⁴ki jáam̀ Unimbɔti an pu ní ki cúu gífì, ní ki bí yii: «Doo di sá man wunti tin m dūu tīī ni-puee, nín̄ ŋáaḿmaan míǹ ki téetí m-pu.»

²⁵Bi jíń tijikaal ki dóòyee ní u tí yōoǹ ndaam ní ki bí yii: «Ndaam nee di sá m-fatikuu un làá nyēe, an di sá mpèéyee daaŋku. Ní nīn ŋáań míǹ ki nyù ki téetí m-pu[43].»

²⁶Di sá yii, iyunti in kɔkɔ ní ni yaa bíi ŋmóò kpɔnɔ nee ki nyù ndaam neeyee, ni bí ki sòoǹ ti-Dindaan kúm pu dee kí dāá sāā ŋyunti ŋun u làá fàtīí gítińee.

²⁷An puee, ubɔ yaa kaa bàà máaǹ kí ŋmɔ́ kpɔnɔ kí nyɔ̀ ndaam gbanti ní ki yaa ŋmɔ́ ki nyùn̄ee, u yīntiǹ ti-Dindaan wunti nì u-fatikuu.

²⁸Míǹ puee, báà ŋma ń cɔ̄ŋkì u-ba kí wàatī ní kí nín ŋmɔ́ kpɔnɔ kí nyɔ̀ ndaam gbanti.

²⁹Kun puee un di yaa ŋmɔ́ kpɔnɔ ki nyùn̄ ndaam kaa nyí ti-Dindaan wunti bɔti taapuee, u nín ŋmɔ́ ki nyùn̄ mimmee, ditafadaaldi ní u dáaĺ ki tɔ́ u-ba pu.

³⁰An pu ní ni-kansikin biba sá bibunliibi nì bideembi, ní tikpil mun kpíì.

³¹Ti yaa cɔ́ŋkì ti-bee, Unimbɔti kaa dátí ti-tafal.

³²Ama ti-Dindaan yaa dátí ti-tafalee, an sá kí sāŋkì-ti, án nín làá ŋá pu tí taa láa nīn bí ditafadaakpaandi din poon duulinya nib làá dāá kɔ́ee nee.

³³An puee nnabiyaamu, ni yaa kpáfì kí jī ti-Dindaan jikaatee, cīitímaan tɔb.

³⁴Un ní ŋkùm yaa cááyee, udaan ń jīń u-dumpu, án nín làá ŋá pu ní taa nín̄ kpáfí ki dátí ditafadaaldi ki tòó ni-ba puee. An yaa sá tibɔti tin kíǹee, m yaa láa dɔ́mińee ní m dāa dàkà-ni-tì.