Read Ntcham 1 Corinthiens 12 Bible Online

1 Corinthiens 12 - Ntcham bible

1 Corinthiens 12

¹Nnabiyaamu, m là ní béé Unimbɔti Fam nín pūǹ dipɔl diŋyee bɔti.

²Ni téetí yii ni nín kaa nìn dáá nóó Yeesuee, an nìn dátí-ni ní ki cáǹ awaa ŋin bi máń ŋaa gbìl̀ kaa sòoǹee cee.

³An pu ní m là ní béé yii unil un Unimbɔti Fam kpòotēe kaa ŋūǹ kí lì yii mbusu ń jēetí Yeesu pu, míǹ ní ubɔ kaa tí ŋūǹ kí lì yii: «Yeesu sá ti-Dindaan» Unimbɔti Fam yaa kaa kpōotì udaan.

⁴Unimbɔti Fam nín pūǹ dipɔl[44] diŋyee bí u-ba u-ba, ama Unimbɔti Fam mbaantiimee di tìì míǹ.

⁵Ní báà ŋma tundi nyēē di-ba di-ba, ama ní ti-kɔkɔ tūǹ ki tìì ti-Dindaan ubaanti.

⁶Ní báà ŋma cáá min ní u tūǹ u-tundee, ama Unimbɔtibaanti di yàntī ti-kɔkɔ ŋūǹ ki ŋáań míǹ.

⁷Unimbɔti Fam tìì binib dipɔl ní bi tūǹ atuun an tútúǹ báà ŋma.

⁸Unimbɔti Fam pūǹ ubɔ iciin ú sòoǹ tibɔti, míǹ mbaantiim ní mì tí pūǹ ubɔ mun dinyil ú sòoǹ tibɔti.

⁹Unimbɔti Famee mbaantiim di pūǹ ubɔ fookii, ní ki pūǹ ubɔ mun ú nīn ŋūǹ ki cāantí iween.

¹⁰Unimbɔti Fam pūǹ ubɔ mpɔn ú nīn ŋáań maamaacib, ní kí pɔ̄ ubɔ mun ú nīn nàatī Unimbɔti nyɔɔbundi, kí pɔ̄ ubɔ mun ú nīn nyí kí gàntī Unimbɔti Fam tundi nì arasiniibi tuuŋŋi, ní kí pɔ̄ ubɔ ní úǹ sòoǹ isooncaan kupaau, ní kí pɔ̄ ubɔ ní úǹ ń gbìl̄ isooncaan taapu kí nàatī.

¹¹Unimbɔti Fam mbaantiimee di tūǹ an tuuŋŋi kɔkɔ. Mì nín lēē miŋyee ní mì yàkatī mi-pɔl ki tìì báà ŋma[45].

¹²Kii tiwun nín sá tibaantiil ki cáá ajan kupaau puee, nì min kɔkɔ ajan gbanti bí a-ba a-ba, ŋi-kɔkɔ kpáfì ki ŋá tiwumbaantiilee, míǹ ní ti nì Kriisitoo sá[46].

¹³Míǹ ní bin sá Juuda yabee nì bin kaa sée, nì bin sá iyumbuee nì bin kaa sée, Unimbɔti Fam mbaantiim ní bi fùl̄ ti-kɔkɔ ti kpántì tiwumbaantiil. Míǹ ní Unimbɔti tīī ti-kɔkɔ u-Fam gbanti mbaantiim.

¹⁴Tiwun kaa sá mbaantiim, an yākatì ajan kupaau ní.

¹⁵Ditaal yaa bí yii: «Man kaa sá ŋŋal, an puee maa kútì tiwun pu», mimmee dàa lafun kútì tiwun puɔɔɔ?

¹⁶Àá ditafal yaa bí yii: «Man kaa sá dinimbil, míǹ puee maa kútì tiwun pu», mimmee dàa lafun kútì tiwun puɔɔɔ?

¹⁷Tiwun kɔkɔ yaa sá dinimbilee, tì bàà ŋáań mana kí nīn gbìl̀? Àá tiwun kɔkɔ yaa bàà sá ditafalee, mana ní tì bàà ŋáań kí nīn gbìl̀ nsɔnsɔfi?

¹⁸Ama min Unimbɔti lèe ní u kāaǹ tiwun jaŋŋi tiwun pu.

¹⁹Ajan kɔkɔ yaa dūu ŋá dijambaantiilee, tiwun kaa bàà bí deeyaa!

²⁰Tiŋmanee unil wunti jaŋŋi bí kupaau, ama ní ki sá tiwumbaantiil.

²¹An puee, dinimbil kaa ŋūǹ kí lì ŋŋal yii: «Maa là-si,» míǹ ní diyil mun kaa tí ŋūǹ kí lì ataa yii: «Maa là-ni.»

²²Unil wunti jaŋŋi ŋin bi kpèé yii ŋaa pɔ̄ɔ̄yee, ŋíǹ di nín kèetī.

²³Ní ŋin ti kpèé ki ŋèen̄ee, ŋíǹ ní ti tìì tinyool, ní ŋin bɔti taa lèe, ŋíǹ ní ti kpèé tiŋan.

²⁴Ama ajan ŋin sá amɔntee kaa nyàab̀ bí tīī-ŋi tinyool, Unimbɔti ŋá tiwun míǹ kí tīī dijandi din lóò tinyoolee tinyool ní,

²⁵án nín làá ŋá pu digàntil ń taa nín̄ bí tiwun jaŋŋi kansikin ŋi-kɔkɔ ń nīn sūǹ tɔb puee.

²⁶Falaa yaa cúú dijandi dibee, an cúú ki kpáaǹ ajan kɔkɔ dee. Bi yaa tí bíi pàkà dijandi dibee, ŋin kɔkɔ kíǹee fàal̀ ní.

²⁷Ni-kɔkɔ sá Kriisitoo wunti ní, ní ni-kansikin báà ŋma sá tiwun jandi diba.

²⁸Míǹ ní Unimbɔti péé péé ki kāaǹ akpambal Kriisitoo nikitil kansikin, nliliitiimee, Unimbɔti bɔnaatiliibi, ntataatiimee, bidakaliibi[47], boonee ní u dū bin kíǹee ki páaǹ. U pú biba bí nīn ŋáań maamaacib, ki pú biba bí nīn cāantí bibunliibi, ní ki tīī biba ŋŋmam bí nīn tútúǹ binib, ní ki pú biba bí nīn kpòotī binib, ní ki pú biba bí nīn sòoǹ isooncaan kupaau.

²⁹Bi-kɔkɔ di sá akpambalaaa? Bi-kɔkɔ di sá Unimbɔti bɔnaatiliibaaa? Bi-kɔkɔ di sá bidakaliibaaa? Bi-kɔkɔ di ŋáań maamaacibaaa?

³⁰Bi-kɔkɔ ní Unimbɔti pú bí nīn cāantí bibunliibaaa? Bi-kɔkɔ di sòoǹ isooncaanaaa? Bi-kɔkɔ di gbìl̀ isooncaan taapu ki nàatāaa?

³¹An puee, ní nyàab̀ Unimbɔti ń pɔ̄-ni dipɔl din jítiǹ ŋin kíǹeeyee. Ama m làá gíti dàkà-ni nsan ŋun jítiǹ i-kɔkɔee.